سیدنا زید بن اسلم رضی اللہ عنہ سے روایت ہے کہ ایک شخص نے پوچھا رسول اللہ صلی اللہ علیہ وسلم سے کہ کیا درست ہے مجھ کو اپنی عورت سے جب وہ حائضہ ہو؟ تو فرمایا آپ صلی اللہ علیہ وسلم نے: ”باندھ اس پر تہبند اس کے، پھر تجھے اختیار ہے تہبند کے اوپر۔“

حضرت ربیعہ بن ابی عبدالرحمٰن سے روایت ہے کہ سیدہ عائشہ رضی اللہ عنہا لیٹی تھیں ساتھ رسول اللہ صلی اللہ علیہ وسلم کے ایک کپڑے میں، اتنے میں کود کر الگ ہوگئیں، تو فرمایا رسول اللہ صلی اللہ علیہ وسلم نے: ”شائد حیض آیا تجھ کو۔“ کہا: ہاں! تو فرمایا آپ صلی اللہ علیہ وسلم نے: ”باندھ لے تہبند اپنے، پھر آن کر وہیں لیٹ جا۔“

حضرت نافع سے روایت ہے کہ سیدنا عبداللہ بن عمر رضی اللہ عنہما نے بھیجا کسی آدمی کو سیدہ عائشہ رضی اللہ عنہا کے پاس اور پوچھوایا کہ مرد مباشرت کرے اپنی عورت سے حالتِ حیض میں؟ تو کہا سیدہ عائشہ رضی اللہ عنہا نے: چاہیے کہ باندھ لے تہبند نیچے کے جسم پر، پھر اگر چاہے مباشرت کرے اس سے۔

امام مالک رحمہ اللہ کو پہنچا کہ سالم بن عبداللہ بن عمر اور سلیمان بن یسار پوچھے گئے حائضہ عورت کے بارے میں کہ جب پاک ہو جائے تو جماع کرے خاوند اس کا قبل غسل کے؟ کہا ان دونوں نے: نہیں! جب تک غسل نہ کرے۔