سیدنا جابر بن عتیک رضی اللہ عنہ سے روایت ہے کہ رسول اللہ صلی اللہ علیہ وسلم سیدنا عبداللہ بن ثابت رضی اللہ عنہ کی عیادت کو آئے تو دیکھا ان کو بیماری کی شدت میں، سو پکارا آپ صلی اللہ علیہ وسلم نے ان کو۔ انہوں نے جواب نہ دیا، پس آپ صلی اللہ علیہ وسلم نے «إِنَّا لِلّٰهِ وَإِنَّا إِلَيْهِ رَاجِعُوْنَ» کہا اور فرمایا: ”ہم مغلوب ہوئے تمہارے پر اے ابوالربیع!“ پس رونا شروع کیا عورتوں نے چلا کر، اور سیدنا جابر بن عتیک رضی اللہ عنہ ان کو چپ کرانے لگے۔ سو فرمایا رسول اللہ صلی اللہ علیہ وسلم نے: ”ابھی عورتوں کو رونے دو، جب آن پڑے تو اس وقت کوئی نہ روئے رونے والی۔“ صحابیہ نے پوچھا: کیا مطلب ہے آن پڑنے کا؟ فرمایا: ”جب مر جائے“ اتنے میں سیدنا عبداللہ بن ثابت رضی اللہ عنہ کی بیٹی نے کہا: مجھے امید تھی کہ تم شہید ہو گے کیونکہ تم سامان جہاد کا کر چکے تھے، تو فرمایا رسول اللہ صلی اللہ علیہ وسلم نے: ”اللہ جل جلالہُ اس کو اجر دے گا موافق اس کی نیت کے، تم کس چیز کو شہادت سمجھتے ہو؟“ بولے: اللہ جل جلالہُ کی راہ میں مارے جانے کو۔ فرمایا رسول اللہ صلی اللہ علیہ وسلم نے: ”سوا اس کے سات شہید اور ہیں: ایک وہ جو طاعون سے مر جائے، دوسرے وہ جو ڈوب کر مر جائے، تیسرے وہ جو ذات الجنب سے مر جائے، چوتھے وہ جو پیٹ کے عارضہ سے مر جائے، پانچویں وہ جو آگ سے جل کر مر جائے، چھٹے وہ جو دب کر مر جائے، ساتویں وہ عورت جو زچگی سے مر جائے۔“

حضرت عمرہ بنت عبدالرحمٰن سے روایت ہے کہ انہوں نے سنا سیدہ عائشہ رضی اللہ عنہا سے جب ان کے سامنے بیان کیا گیا کہ سیدنا عبداللہ بن عمر رضی اللہ عنہما کہتے ہیں: مردہ عذاب کیا جاتا ہے زندے کے رونے سے، تو سیدہ عائشہ رضی اللہ عنہا نے فرمایا: اللہ بخشے ابوعبدالرحمٰن کو، انہوں نے جھوٹ نہیں بولا، لیکن وہ بھول گئے یا چوک گئے، اصل اتنی ہے کہ رسول اللہ صلی اللہ علیہ وسلم گزرے ایک یہودن پر جو مر گئی تھی اور لوگ اس پر رو رہے تھے، تو آپ صلی اللہ علیہ وسلم نے فرمایا: ”یہ لوگ اس پر رو رہے ہیں، اور اُس پر عذاب قبر میں ہو رہا ہے۔“