سیدنا ابوحبہ بدری رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”‏‏‏‏ابوسفیان بن حارث میرے خاندان کا بہترین فرد ہے۔“ ‏‏‏‏

معاذ بن رفاعہ بن رافع زرقی اپنے باپ، جو بدری تھے اور ان کے دادا اہل عقبہ میں سے تھے، سے روایت کرتے ہیں، انہوں نے کہا کہ جبریل علیہ السلام، رسول اللہ صلی اللہ علیہ وسلم کے پاس آئے اور پوچھا: تم لوگ جنگ بدر میں شریک ہونے والوں (‏‏‏‏کا کیا مقام) سمجھتے ہو؟ آپ صلی اللہ علیہ وسلم نے فرمایا: ”مسلمانوں میں سے افضل تر ین۔“ جبریل علیہ السلام نے کہا: اس جنگ میں جو فرشتے شریک ہوئے تھے وہ بھی اسی طر ح (‏‏‏‏افضل تر ین شمار کئے جاتے) ہیں۔

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”بیشک اللہ تعالیٰ نے بدر والوں پر نگاہ ڈالی اور فرمایا: جیسے چاہو عمل کرتے رہو، میں نے تم لوگوں کو بخش دیا ہے۔“

سیدنا عمرو بن عبسہ رضی اللہ عنہ، کہتے ہیں: میں رسول اللہ صلی اللہ علیہ وسلم کے پاس آیا اور کہا: اے اللہ کے رسول! کس کس نے اس دین کے معاملے میں آپ کی اطاعت کی ہے؟ آپ صلی اللہ علیہ وسلم نے فرمایا: ”‏‏‏‏ ایک آزاد نے اور ایک غلام نے۔“ ‏‏‏‏ میں نے کہا: اسلام کسے کہتے ہیں؟ آپ صلی اللہ علیہ وسلم نے فرمایا: ”‏‏‏‏پاکیزہ کلام کرنا اور لوگوں کو کھانا کھلانا (‏‏‏‏اسلام ہے)۔“ ‏‏‏‏ میں نے کہا: ایمان کیا ہے؟ آپ صلی اللہ علیہ وسلم نے فرمایا: ”‏‏‏‏صبر کرنا اور نرم روی اختیار کرنا (‏‏‏‏ایمان ہے)۔ ‏‏‏‏“ میں نے کہا: کون سا اسلام افضل ہے؟ آپ صلی اللہ علیہ وسلم نے فرمایا: ‏‏‏‏ ”‏‏‏‏ (‏‏‏‏وہ صاحب اسلام سب سے افضل ہے) جس کی زبان اور ہاتھ (‏‏‏‏کے شر) سے دوسرے مسلمان محفوظ رہیں۔“ میں نے کہا: کون سا ایمان افضل ہے؟ آپ صلی اللہ علیہ وسلم نے فرمایا: ”حسن اخلاق۔“ میں نے کہا: کون سی نماز افضل ہے؟ آپ صلی اللہ علیہ وسلم نے فرمایا: ”‏‏‏‏لمبے قیام والی۔“ ‏‏‏‏ میں نے کہا کون سی ہجرت افضل ہے؟ آپ صلی اللہ علیہ وسلم نے فرمایا: ”‏‏‏‏رب کی ناپسندیدہ چیزیں ترک کر دینا۔“ ‏‏‏‏ میں نے کہا: کون سا جہاد افصل ہے؟ آپ صلی اللہ علیہ وسلم نے فرمایا: ”‏‏‏‏ (‏‏‏‏وہ مجاہد افضل ہے) جس کے گھوڑے کی کونچیں کاٹ دی جائیں اور اس کا خون بہا دیا جائے۔“ میں نے کہا: کون سا وقت افضل ہے؟ آپ صلی اللہ علیہ وسلم نے فرمایا: ”رات کا آخری حصہ (‏‏‏‏یا آخری رات کا درمیانہ حصہ)۔“

سیدنا کعب بن مالک رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جب مصر فتح کر لو تو قبطیوں سے حسن سلوک سے پیش آنا کیونکہ ان کے ساتھ عہد و پیمان اور رشتہ و قرابت ہے۔“

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے اپنی وفات کے وقت نصیحت کرتے ہوئے فرمایا: ”اللہ سے ڈرنا، اللہ سے ڈرنا مصر کے قبطیوں کے بارے میں، عنقریب تم ان پر غالب آ جاؤ گے اور اللہ تعالیٰ کے راستے میں تمہارے اعوان و انصار ہوں گے۔“ ‏‏‏‏

سیدہ ام حبیبہ رضی اللہ عنہا سے مروی ہے کہ رسول اللہ صلی اللہ علیہ وسلم نے فرمایا: ”مجھے وہ آفات و مصائب دکھا دیے گئے ہیں جن میں میری امت مبتلا ہو گی، وہ ایک دوسرے کو قتل کریں گے۔“ دراصل یہ اللہ تعالیٰ کی طرف سے سبقت لے جانے والی چیز ہے، جیسا کہ سابقہ امتوں میں ہو چکا ہے۔ میں نے اللہ تعالیٰ سے سوال کیا کہ وہ مجھے ان (‏‏‏‏امتیوں) کے حق میں سفارش کرنے کا موقع دےدے، اللہ تعالیٰ نے میری دعا قبول کر لی“ ‏‏‏‏۔

سیدنا عبداللہ بن عمر رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”‏‏‏‏مجھے سب سے زیادہ محبوب اسامہ (‏‏‏‏بن زید) ہے، فاطمہ وغیرہ سے بھی زیادہ۔ ”‏‏‏‏

حبان بن واسع بن حبان اپنی قوم کے چند بزررگوں سے روایت کرتے ہیں کہ رسول اللہ صلی اللہ علیہ وسلم نے بدر والے دن صحابہ کی صفیں درست کیں، آپ صلی اللہ علیہ وسلم کے ہاتھ میں تیر تھا اس کے ذریعے صفیں سیدھی کر رہے تھے۔ آپ بنوعدی بن نجار کے حلیف سواد بن غزیہ کے پاس سے گزرے، وہ صف سے آگے بڑھے ہوئے تھے، آپ صلی اللہ علیہ وسلم نے اسے تیر کا چوکا لگایا اور فرمایا: ”سواد! سیدھے ہو جاؤ۔“ سواد نے کہا: اے اللہ کے رسول! آپ نے مجھے تکلیف دی ہے، حالانکہ اللہ تعالیٰ نے آپ کو حق و عدل کے ساتھ مبعوث کیا ہے، مجھے قصاص لینے دیجئے۔ آپ صلی اللہ علیہ وسلم نے اپنے پیٹ سے کپڑا اٹھایا اور فرمایا: ”‏‏‏‏قصاص لے لے“۔ میں آپ صلی اللہ علیہ وسلم کے ساتھ چمٹ گیا اور آپ صلی اللہ علیہ وسلم کے پیٹ کا بوسہ لے لیا۔ آپ صلی اللہ علیہ وسلم نے فرمایا: ”‏‏‏‏سواد! کس چیز نے تجھے ایسا کرنے پر آمادہ کیا ہے؟ ”‏‏‏‏ میں نے کہا: اے اللہ کے رسول! جو کچھ سامنے ہے آپ دیکھ رہے ہیں، میں نے چاہا کہ (‏‏‏‏زندگی کے اختتام میں) میری جلد آپ کی جلد کے ساتھ لگے۔ پھر آپ صلی اللہ علیہ وسلم نے میرے لیے خیر و بھلائی کی دعا کی اور فرمایا: ”‏‏‏‏سواد! سیدھے ہو جاؤ۔“ ‏‏‏‏

سیدنا حمید بن عبدالرحمٰن رضی اللہ عنہ کہتے ہیں جب رسول اللہ صلی اللہ علیہ وسلم فوت ہوئے تو ابوبکر رضی اللہ عنہ مدینہ کے کسی گوشے میں (‏‏‏‏ ایک آبادی میں) تھے جب آئے تو آپ کے چہرے سے کپڑا اٹھایا، آپ کا بوسہ لیا اور کہا: میرے ماں باپ آپ پر قربان ہوں، آپ کتنی پاکیزہ شخصیت ہیں، زندہ ہوں یا فوت شدہ۔ رب کعبہ کی قسم! محمد صلی اللہ علیہ وسلم فوت ہو گئے ہیں . . .۔ پھر سیدنا ابوبکر اور سیدنا عمر رضی اللہ عنہما انصاریوں کے پاس گئے، سیدنا ابوبکر رضی اللہ عنہ نے ان سے بات کی اور ان کے بارے میں نازل ہونے والی تمام آیات اور احادیث رسول ذکر کر دیں، نیز کہا: (‏‏‏‏انصاریو!) تم جانتے ہو کہ رسول اللہ صلی اللہ علیہ وسلم نے فرمایا: ”اگر لوگ ایک وادی میں چلیں اور انصار دوسری وادی میں چلیں تو میں انصار کی وادی میں ان کے ساتھ چلوں گا۔“ سعد! تم جانتے ہو کہ رسول اللہ صلی اللہ علیہ وسلم نے فرمایا اور تم وہاں بیٹھے تھے: ”‏‏‏‏قریش اس (‏‏‏‏خلافت کے) معاملے کے ذمہ دار و حقدار ہیں، نیکوکار لوگ نیک قریشیوں کے تابع فرمان ہوں گے اور برے لوگ برے قریشیوں کے ماتحت ہوں گے۔“ سیدنا سعد رضی اللہ عنہ نے کہا: تم سچ کہہ رہے ہو، ہم وزرا ہیں اور تم امرا ہو۔ یہ حدیث سیدنا ابوبکر صدیق اور سیدنا سعد بن عبادہ رضی اللہ عنہما سے مروی ہے۔