| من كتاب الرويا کتاب خوابوں کے بیان میں 12. باب في رُؤْيَةِ الرَّبِّ تَعَالَى في النَّوْمِ: اللہ تعالیٰ کو خواب میں دیکھنے کا بیان
عبدالرحمٰن بن عائش کہتے ہیں: میں نے رسول الله صلی اللہ علیہ وسلم کو فرماتے ہوئے سنا: ”میں نے اپنے رب کو اچھی سے اچھی صورت میں دیکھا: رب العالمین نے کہا: ملا اعلی (آسمانی فرشتے) کس چیز کے بارے میں جھگڑ رہے ہیں؟ میں نے عرض کیا: اے میرے رب! تو ہی زیادہ علم والا ہے۔ فرمایا: پس رب نے اپنے ہاتھ کو میرے دونوں کندھوں کے درمیان رکھا جس کی ٹھنڈک میں نے اپنے سینے تک محسوس کی اور مجھے زمین و آسمان کا علم ہو گیا۔“ پھر آپ صلی اللہ علیہ وسلم نے یہ آیت تلاوت فرمائی: «﴿وَكَذَلِكَ نُرِي ....﴾ الخ» [انعام: 75/6]
تخریج الحدیث: «هذا من أحاديث الصفات التي علينا أن نؤمن بها ونجريها على ظاهرها من غير تمثيل أو تشبيه أو تأويل. إسناده صحيح إذا ثبتت صحبة عبد الرحمن بن عائش، [مكتبه الشامله نمبر: 2195]»
اس حدیث میں عبدالرحمٰن بن عائش کے بارے میں شدید اختلاف ہے کہ انہیں صحبتِ رسول اللہ صلی اللہ علیہ وسلم کی سعادت ملی یا نہیں؟ اس لئے اس کی صحت میں نظر ہے۔ حوالہ دیکھے: [السنة لابن أبى عاصم 388، 467]، [العلل المتناهية لابن الجوزي 11]، [الشريعة للآجري، ص: 433]، [الأسماء و الصفات، ص: 398]، [الحاكم 520/1] وضاحت:
(تشریح حدیث 2185) اس حدیث کو اگر صحیح مان لیا جائے تو اس سے رب ذوالجلال کا انبیاء کے لئے خواب میں تجلی فرمانا ثابت ہوگا، ہر ایرے غیرے کے لئے نہیں، اور علم سے مراد یہ ہے کہ اس وقت عالمِ ملکوت و عالمِ دنیا میں کیا ہو رہا ہے اس کا علم ہوگیا، یہ نہیں کہ قیامت تک کا علمِ غیب حاصل ہو گیا۔ آپ صلی اللہ علیہ وسلم کو غیب کی وہی بات معلوم ہوتی تھی جو آپ صلی اللہ علیہ وسلم کو وحی و الہام سے بتا دی جاتی تھی، ورنہ اس آیت: « ﴿قُلْ لَا يَعْلَمُ مَنْ فِي السَّمَاوَاتِ وَالْأَرْضِ الْغَيْبَ إِلَّا اللّٰهُ﴾ [النمل: 65] » ترجمہ: ”کہہ دو زمین و آسمان میں کوئی بھی اللہ کے سوا علمِ غیب نہیں جانتا۔ “ کا بطلان لازم آئے گا، اسی طرح: « ﴿وَمَا يَعْلَمُ جُنُودَ رَبِّكَ إِلَّا هُوَ﴾ [المدثر: 31] » ترجمہ: ”تمہارے رب کے کتنے لشکر ہیں صرف وہی جانتا ہے۔ “ اور « ﴿وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ﴾ [الأعراف: 188] » ترجمہ: ”اور اگر مجھے علمِ غیب ہوتا تو میں بہت سے منافع حاصل کر لیتا۔ “ وغیرہ آیاتِ کثیرہ سے آپ صلی اللہ علیہ وسلم سے مطلق علمِ غیب کی نفی ہوتی ہے۔ قال الشيخ حسين سليم أسد الداراني: هذا من أحاديث الصفات التي علينا أن نؤمن بها ونجريها على ظاهرها من غير تمثيل أو تشبيه أو تأويل. إسناده صحيح إذا ثبتت صحبة عبد الرحمن بن عائش
محمد بن سیرین رحمہ اللہ نے کہا: جو شخص اپنے رب کو خواب میں دیکھے وہ جنت میں جائے گا۔
تخریج الحدیث: «إسناده ضعيف، [مكتبه الشامله نمبر: 2196]»
یہ ابن سیرین رحمہ اللہ کا قول ہے، حدیث نہیں، اس لئے قابلِ حجت نہیں ہے۔ ابن سیرین رحمہ اللہ کو اللہ تعالیٰ نے تعبیر الرویا کا علم عطا فرمایا تھا۔ اس قول کو امام دارمی رحمہ اللہ کے علاوہ ابن عدی نے [الكامل 2622/7] میں ذکر کیا ہے۔ قال الشيخ حسين سليم أسد الداراني: إسناده ضعيف
|