اردو حاشہ:
(1) سرخ رنگ کا بلکہ کسی بھی رنگ کا خیمہ لگانا جائز ہے۔
(2) ”ادھر ادھر“ یعنی حيَّ على الصلاةِ، حيَّ على الفلاحِ کہتے وقت دائیں بائیں کرتے تھے نہ کہ ساری اذان میں۔
(3) جس طرح خیمہ سرخ ہو سکتا ہے، اس طرح عمارت بھی سرخ ہو سکتی ہے۔

� لغوی تشریح:
«أَتَتَبَّعُ فَاهُ» «تَتَبُّع» باب تفعیل سے ہے۔ مطلب یہ ہے کہ میں ان کے چہرے کی طرف نظریں لگائے ہوئے تھا اور ان کے منہ کا بغور ملاحظہ کر رہا تھا۔
«هٰهُنَا» دائیں جانب۔
«وَهٰهُنَا» اور بائیں جانب
«لَوّٰي» «تَلْوِيَة» سے ہے جو باب تفعیل سے ہے، یعنی موڑا۔
«وَلَمْ يَسْتَدِرُ» «اِسْتَدَارَة» سے ہے۔ اس کے معنی ہیں: گھومنا، یعنی اپنے جسم کو انہوں نے نہیں گھمایا۔

فوائد و مسائل:
➊ اذان قبلہ رخ کھڑے ہو کر کہنا مسنون ہے۔ اسی طرح «حَيَّ عَلَي الصَّلٰوةِ» اور «حَيَّ عَلَي الْفَلَاحِ» کہتے وقت دائیں بائیں چہرے کو پھیرنا بھی مسنون ہے۔
➋ اذان کہتے ہوئے کانوں میں انگلیاں داخل کرنے کے تین فائدے ہیں: کانوں میں انگلیاں ڈالنے سے آواز بلند ہو جاتی ہے۔ علاوہ ازیں کوئی بہرہ آدمی مؤذن کو ایسی حالت میں دیکھ کر معلوم کر سکتا ہے کہ نماز کے لیے اذان دی جا رہی ہے، نیز دوسروں کی آواز کے اختلاط سے مؤذن محفوظ رہتا ہے۔

راویٔ حدیث:
(سیدنا أبوجُحیفہ رضی اللہ عنہ) أبوجُحیفہ کنیت ہے۔ وہب بن عبداللہ سوائی نام ہے۔ جُحیفہ میں ”جیم“ پر ضمہ ہے۔ یہ تصغیر ہے۔ ”جیم“ ”حا“ سے پہلے ہے۔ سوائی میں ”سین“ پر ضمہ ہے۔ سوائی عامری مشہور ہیں۔ صغار صحانہ میں شمار کیے گئے ہیں۔ کوفے میں سکونت اختیار کی۔ سیدنا علی رضی اللہ عنہ نے ان کو بیت المال پر عامل مقرر کیا۔ ان کے ہمراہ تمام غزوات میں شریک ہوئے۔ کوفے میں 74 ہجری میں وفات پائی۔

520۔ اردو حاشیہ:
➊ موذن کا قبلہ رخ ہونا مستحب ہے۔ اور جب وہ «حي على الصلوة» اور «حي على الفلاح» پر پہنچے تو دایئں اور بایئں جانب منہ کر کے یہ کلمات کہے۔
➋ «حله» اس لباس کو کہتے ہیں۔ جس میں چاد ر اور تہبند دونوں کپڑے ایک ہی جنس کے ہوں۔
➌ سرخی رنگ کے لباس کی عمومی طور پر نہی وار د ہے۔ اور رسول اللہ صلی اللہ علیہ وسلم نے جو پہنا ہے تو شارحین اس کی بابت یہ فرماتے ہیں کہ اس میں سرخ دھاریاں تھیں۔ «والله أعلم»
➍ ابطح مکہ میں صفا مروہ کی طرف آنے والے راستے کو کہتے ہیں۔
➎ شیخ البانی رحمہ اللہ نے اس روایت کے الفاظ ”اور خود پورے نہیں گھومے“ کو شاذ بلکہ منکر قرار دیا ہے۔ [مفصل صحيح سنن أبو داود للألباني، حديث: نمبر 533]
اس سے یہ بات ثابت ہوئی کہ گردن کے گھومنے کے ساتھ اگر جسم بھی گھوم جائے تو اس میں شرعاً کوئی قباحت نہیں۔

فائدہ:
اس حدیث سے ثابت ہوا کہ صحا بہ کرام رضوان اللہ علیہم اجمعین رسول اللہ صلی اللہ علیہ وسلم کے وضو سے بچے ہوئے پانی سے بہت زیادہ محبت کرتے تھے، سبحان اللہ۔ نیز یہ بھی ثابت ہوا کہ نماز پڑھتے وقت سترے کا اہتمام کرنا چاہیے، خواہ گھر ہو یا مسجد، بیت اللہ ہو یا صحرا۔ سترے کے آگے سے ہر کوئی گزرسکتا ہے۔