اردو حاشہ:
1؎:
یہ وہ انس بن مالک نہیں ہیں جو رسول اللہ ﷺ کے خادم ہیں،
بلکہ یہ کعبی ہیں۔

2؎:
مراد چار رکعت والی نماز میں سے ہے۔

3؎:
اور اسی کو صاحب تحفہ الأحوذی نے راجح قرار دیا ہے اور کہا ہے کہ میرے نزدیک ظاہر یہی ہے کہ یہ دونوں مریض کے حکم میں ہیں لہذا ان پر صرف قضا لازم ہو گی۔
واللہ اعلم۔

اردو حاشہ:
(1) امام نسائی رحمہ اللہ نے مذکورہ حدیث انس کو بھی مذکورہ باب کے تحت ہی ذکر فرما دیا، حالانکہ اس پر الگ سے عنوان قائم کرنا زیادہ مناسب تھا جیسا کہ دیگر صحابہ کرام رضی اللہ عنہم سے مروی احادیث کے اسنادی اختلافات کے بیان میں کرتے ہیں۔ دیکھئے: (ذخیرۃ العقبیٰ شرح سنن النسائی: 21/ 172، 173)
(2) حاملہ اور دودھ پلانے والی عورت کو اگر بچے کے نقصان کا اندیشہ ہو تو وہ روزہ چھوڑ سکتی ہے، بعد میں قضا ادا کرے یا بعض نے کہا ہے کہ فدیہ دے دے، یہی کافی ہے۔ بعض کہتے ہیں قضا کی ضرورت ہے نہ فدیہ کی، گویا کہ حقیقتاً معافی ہے، مگر جمہور اہل علم کے نزدیک پہلی بات ہی صحیح ہے کہ بعد میں قضا ادا کرنی ہوگی۔

اردو حاشہ:
(1) یہ انس بن مالک قشیری ہیں۔ مشہور انس بن مالک خادم رسول اور ہیں… رضي اللہ عنه …
(2) ”پکڑ لیے گئے تھے۔“ رسول اللہﷺ کے لشکر نے یہ اونٹ پکڑے تھے۔ ان کا خیال تھا کہ یہ کفار کے ہیں‘ حالانکہ یہ اونٹ صحابی رسول حضرت انس بن مالک قشیری رضی اللہ عنہ کے تھے۔ تو حضرت انس رضی اللہ عنہ اپنے اونٹوں کے مطالبے کے لیے خدمت نبوی میں حاضر ہوئے تھے۔

اردو حاشہ:
حاملہ اور مرضعہ کو اگر مشقت محسوس ہو یا اپنے بچے کا خطرہ ہو تو انہیں روزہ چھوڑنے اور اس کی جگہ کفارہ دینے کی رخصت ہے۔ اگرچہ اس مسئلے میں اختلاف ہے لیکن یہ موقف راجح ہے۔ ابن عباس اور ابن عمر دونوں صحابہ کرام رضی اللہ عنہم کا یہی فتویٰ ہے اور سند بھی صحیح ہے۔ دیکھئے (سنن الدارقطني: 2/ 207، مع التعلیق المغني، مزید دیکھیے: سبل السلام مع تعلیق الألباني: 2/ 453) روایت کا صحیح مفہوم سمجھنے کے لیے دیکھئے احادیث: 2269، 2276۔

فوائد ومسائل:
مسافر، بچے کو دودھ پلانے والی اور حاملہ کے لیے رعایت ایک ہی سیاق میں ذکر ہوئی ہے، مگر تفصیل میں فرق ہے کہ مسافر کو روزہ معاف ہے، مگر قضا کرنا واجب ہے۔
اور مُرضِعَہ (دودھ پلانے والی) اور حاملہ کی بابت علماء کی چار آراء ہیں، جس کی مختصر تفصیل حدیث نمبر: 2318 کے فوائد میں گزری ہے۔
تاہم ان عورتوں کو ایام اقامت میں پوری نماز پڑھنی ہوتی ہے۔
شرعی عذر (حیض و نفاس) میں نماز بالکل معاف ہے اور اس کی کوئی قضا نہیں۔

اردو حاشہ:
فوائد و مسائل:
(1)
جس وقت یہ واقعہ پیش آیا۔
اس وقت حضرت انس بن مالک رضی اللہ تعالیٰ عنہ کعبی رضی اللہ تعالیٰ عنہ مسلمان ہوچکے تھے۔
جب كہ ان کا قبیلہ ابھی مسلمان نہیں ہوا تھا۔

(2)
مسافر کو آدھی نماز معاف ہونے کا یہ مطلب ہے کہ جن نمازوں میں چار رکعت فرض ہیں۔
ان میں دو رکعت فرض نماز ادا کی جائے۔
فجر اور مغرب کی نماز سفر میں بھی پوری پڑھی جاتی ہے۔

(3)
روزے دار کو کھانے کی دعوت دی جائے۔
تو وہ اپنے روزے کا اظہار کرسکتا ہے۔
یہ ریا میں شامل نہیں۔

(4)
مسافر بچے کو دودھ پلانے والی اور حاملہ کے لئے رعایت ایک ہی سیاق میں بیان ہوئی ہے۔
مگر تفصیل میں فرق ہے کہ مسافر کوروزہ معاف ہے۔
مگر قضا ادا کرنا واجب ہے۔
اور مرضعہ اور حاملہ کی بابت علماء کی چار آراء ہیں۔
جن کی تفصیل درج ذیل ہے۔
ایک رائے تو یہ ہے کہ ان کےلئے فدیہ ہی کافی ہے۔
بعد میں قضا نہیں دوسری رائے یہ ہے کہ ان پر نہ قضا ہے نہ فدیہ یہ رائے حافظ ابن حزم رحمۃ اللہ علیہ کی ہے۔
جو انھوں نے المحلی (مسئلہ نمبر 770)
میں بیان کی ہے۔
تیسری رائے یہ ہے کہ فدیہ طعام کے علاوہ بعد میں وہ قضا بھی دیں چوتھی رائے یہ ہے کہ وہ مریض کے حکم میں ہیں۔
وہ روزہ چھوڑدیں انھیں فدیہ دینے کی ضرورت نہیں۔
اور بعد میں قضا دیں مولانا محمد علی جانباز رحمۃ اللہ علیہ نے اسی رائے کو ترجیح دی ہے۔
دیکھئے: (إنجاز الحاجة، شرح ابن ماجة: 566/5)
نیز سعودی علماء کی بھی یہی رائے ہے۔
دیکھئے: (فتاویٰ اسلامیہ (اُردو) 2/203، مطبوعہ دارالسلام)