فوائد ومسائل:
(۱)رحم، اللہ تعالیٰ کی مخلوق ہے اور لفظ رحم کا اشتقاق لفظ رحمن ہے، یعنی اسے اللہ تعالیٰ سے خصوصی نسبت ہے۔ رحم کو جب اللہ تعالیٰ نے پیدا فرمایا تو اس وقت بھی اس نے اللہ تعالیٰ سے التجا کی اور روز قیامت بھی اللہ کی عدالت میں اپنے ساتھ ہونے والی زیادتیوں کا تذکرہ کرے گا تو اللہ تعالیٰ فرمائے گا کہ میں تیرے ساتھ کیے وعدے کو پورا کروں گا کہ جس نے تجھے توڑا میں اسے اپنے سے توڑ دوں گا۔
(۲) رحم کا یہ کہنا:”اے میرے رب مجھ پر ظلم ہوا“ سے معلوم ہوتا ہے کہ حسی ظلم کے علاوہ معنوی ظلم بھی ہوتا ہے۔ اگرچہ ہمیں رحم کا وجود نظر نہیں آتا لیکن ہم اس کو اس کا مقام نہ دے کر اس کا حق غصب کر رہے ہیں اور یہی ظلم ہے۔
(۳) اس سے معلوم ہوا کہ اللہ تعالیٰ کی تمام مخلوقات میں احساس و ادراک موجود ہے۔ یہ الگ بات ہے کہ ہم اس کا ادراک نہیں کرسکتے۔
(۴) اللہ تعالیٰ کی کوئی مخلوق اس کے حکم سے سرتابی نہیں کرتی سوائے انسانوں اور جنوں کے۔ انہی سے باز پرس ہوگی، تاہم دیگر مخلوقات پر ہونے والے ظلم کا مداوا کرکے انہیں ختم کر دیا جائے گا۔ (صحیح مسلم، کتاب البر والصلة، باب تحریم الظلم:۶۵۸۰)یہ اللہ تعالیٰ کے انصاف کی اعلیٰ مثال ہے۔
(۵) انسان کو اللہ تعالیٰ سے جڑنے کی کوشش کرنی چاہیے کہ اس کے ساتھ تعلق ہو تو کوئی دوسرا کچھ نہیں بگاڑ سکتا اور اگر وہ ناراض ہو تو کوئی دوسرا کچھ نہیں سنوار سکتا۔ اس حدیث میں اللہ تعالیٰ سے جڑنے کا ذریعہ صلہ رحمی بتائی گئی ہے اس کو ضرور اختیار کرنا چاہیے۔