کھانے سے متعلق احکام و مسائل
7. مٹی کھانے کی ممانعت
حدیث نمبر: 726 |
|
سیدنا ابوہریرہ رضی اللہ عنہ نے رسول اللہ صلی اللہ علیہ وسلم سے روایت کیا، آپ صلی اللہ علیہ وسلم نے فرمایا: ”جو شخص مٹی کھاتا ہے، وہ اپنے آپ کو ہلاک کرنے میں اعانت کرتا ہے۔“
تخریج الحدیث: «معجم طبراني كبير، رقم: 6138. سلسلة ضعيفة، رقم: 4560. ضعيف الجامع الصغير، رقم: 5474.»
8. زیتون کے تیل کی فضیلت
حدیث نمبر: 727 |
|
سیدنا ابوہریرہ رضی اللہ عنہ نے رسول اللہ صلی اللہ علیہ وسلم سے روایت کیا، آپ صلی اللہ علیہ وسلم نے فرمایا: ”زیتون کا تیل لگاو اور اس کا سالن بناو، کیونکہ وہ بابرکت ہے۔“
تخریج الحدیث: «سنن ترمذي، ابواب الاطعمة، باب اكل الزيت، رقم: 1851. سنن ابن ماجه، كتاب الاطعمة، باب الزيت، رقم: 3319. قال الشيخ الالباني: صحيح.»
9. دائیں ہاتھ سے کھانے پینے کی تاکید
حدیث نمبر: 728 |
|
سیدنا ابوہریرہ رضی اللہ عنہ نے رسول اللہ صلی اللہ علیہ وسلم سے روایت کیا، آپ صلى اللہ علیہ وسلم نے فرمایا: ”جب تم میں سے کوئی کھائے تو اپنے دائیں ہاتھ سے کھائے اور دائیں ہاتھ سے پیئے، کیونکہ شیطان اپنے بائیں سے کھاتا اور بائیں سے پیتا ہے۔“
تخریج الحدیث: «مسلم، كتاب الاشرية، باب اداب الطعام والشراب واحكامها، رقم: 2020. سنن ابوداود، رقم: 3776. سنن ترمذي، رقم: 1800. مسند احمد: 325/2.»
حدیث نمبر: 729 |
|
ابوبکر بن عبداللہ بن عمر، ابن عمر رضی اللہ عنہ کے حوالے سے نبی کریم صلی اللہ علیہ وسلم سے اسی سابقہ حدیث کی مثل روایت کرتے ہیں۔
تخریج الحدیث: «انظر ما قبله.»
10. سانڈے کے کھانے کا بیان
حدیث نمبر: 730 |
|
سیدنا ابوہریرہ رضی اللہ عنہ نے بیان کیا کہ میں نے رسول اللہ صلی اللہ علیہ وسلم کو سنا: آپ صلى اللہ علیہ وسلم کی خدمت میں سات سانڈے ایک برتن میں پیش کیے گئے، ان پر گھی ڈالا گیا تھا، تو رسول اللہ صلی اللہ علیہ وسلم نے فرمایا: ”میں اس سے اجتناب کرتا ہوں، پس تم اسے کھاؤ۔“
11. ناگوار بو والی سبزی کھانے سے اجتناب
حدیث نمبر: 731 |
|
سیدہ ام ایوب رضی اللہ عنہا نے بیان کیا: رسول اللہ صلی اللہ علیہ وسلم ہمارے ہاں مہمان ٹھہرے تو ہم نے آپ صلى اللہ علیہ وسلم کے لیے کھانا تیار کیا، اس میں کوئی (ناگوار بُو والی) سبزی تھی، جب ہم نے وہ آپ کی خدمت میں پیش کیا تو آپ صلی اللہ علیہ وسلم نے اسے ناپسند فرمایا، اور فرمایا: ”اسے کھاؤ، کیونکہ میں تم میں تمہاری طرح نہیں ہوں، مجھے اندیشہ ہے کہیں میں اپنے ساتھ (جبریل علیہ السلام) کو تکلیف نہ پہنچاؤں۔“
تخریج الحدیث: «سنن ترمذي، ابواب الاطعمة، باب الرخصة فى الثوم مطبوخا، رقم: 1810. سنن ترمذي ابن ماجه، كتاب الاطعمة، باب اكل الثوم والبصل والكراث، رقم: 3364. قال الشيخ الالباني: حسن. مسند احمد: 433/6. صحيح ابن خزيمه، رقم: 1671.»
12. جن برتنوں کے استعمال کی ممانعت تھی اس کا بیان
حدیث نمبر: 732 |
|
سیدہ عائشہ رضی اللہ عنہا نے بیان کیا: رسول اللہ صلی اللہ علیہ وسلم نے روغنی گھڑے، کدو سے بنے ہوئے برتن اور تارکول لگے برتن (کے استعمال) سے منع فرمایا ہے۔
تخریج الحدیث: «بخاري، كتاب الاشرية، باب ترخيص النبى صلى الله عليه وسلم فى الاوعية الخ، رقم: 5594. مسلم، كتاب الاشربة، باب النهي عن الانتباذ فى المزفت الخ، رقم: 1997. سنن ابوداود، رقم: 3690. سنن ترمذي، رقم: 1868. سنن نسائي، رقم: 5634. سنن ابن ماجه، رقم: 3401. مسند احمد: 23/3.»
13. نبیذ بنانے کا بیان
حدیث نمبر: 733 |
|
ابونضرہ سے روایت ہے کہ ایک عورت نے سیدہ عائشہ رضی اللہ عنہا نے پوچھا: آپ رسول اللہ صلی اللہ علیہ وسلم کے لیے کس طرح نبیذ بنایا کرتی تھیں؟ انہوں نے فرمایا: ہم رات کے وقت آپ صلی اللہ علیہ وسلم کے لیے کھجوریں بھگو دیا کرتی تھیں، تو آپ اگلے روز صبح کے وقت اسے پی لیتے تھے۔
تخریج الحدیث: «مسلم، كتاب الاشرية، باب اباحة النيبذ الذى... رقم: 2005. سنن ابوداود، كتاب الاشربة، باب فى صفة النبيذ، رقم: 3711. سنن ترمذي، رقم: 1871.»
14. کھانا کھانے کے بعد انگلیوں کو چاٹنا چاہیے
حدیث نمبر: 734 |
|
سیدنا ابن عباس رضی اللہ عنہما نے رسول اللہ صلی اللہ علیہ وسلم سے روایت کیا، آپ صلی اللہ علیہ وسلم نے فرمایا: ”جب تم میں سے کوئی کھانا کھائے تو وہ ہاتھ صاف نہ کرے حتیٰ کہ وہ اسے چاٹ لے یا چٹوا لے۔“
تخریج الحدیث: «بخاري، كتاب الاطعمة، باب لعن الاصابع ومسها قبل ان تمسح بالمنديل، رقم: 5456. مسلم، كتاب الاشربة، باب استحباب لعق الاصابع الخ، رقم: 2031. سنن ابوداود، رقم: 3847. سنن ابن ماجه، رقم: 3269. سنن دارمي، رقم: 2026. مسند احمد: 293/1.»