سیدنا انس بن مالک رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جس نے مجھ پر ایک بار درود پڑھا اللہ اس پر دس رحمتیں نازل کرے گا اور اس کی دس خطاؤں کو معاف فرمائے گا۔“ [صحيح الادب المفرد/حدیث: 500]

سیدنا جابر بن عبداللہ رضی اللہ عنہ سے مروی ہے کہ نبی صلی اللہ علیہ وسلم منبر پر چڑھے، جب آپ پہلی سیڑھی پر چڑھے تو فرمایا: ”آمین“، پھر دوسری سیڑھی پر چڑھے تو فرمایا: ”آمین“، پھر جب تیسری سیڑھی پر چڑھے تو فرمایا: ”آمین“، لوگوں نے عرض کیا کہ یا رسول اللہ! ہم نے سنا کہ آپ نے تین بار آمین کہا:؟ آپ صلی اللہ علیہ وسلم نے فرمایا: ”جب میں پہلی سیڑھی پر چڑھا تو جبریل میرے پاس آئے اور انہوں نے کہا: بدبخت ہوا وہ بندہ جس پر رمضان آیا اور گزر گیا اور اس کی مغفرت نہ ہوئی، میں نے اس پر کہا: آمین، پھر کہا: بدبخت ہوا وہ بندہ جس نے والدین کو ان دونوں کو یا ان میں سے کسی ایک کو بڑھاپے میں پایا اور ان کی خدمت کی وجہ سے جنت میں نہ جا سکا اس پر میں نے کہا: آمین، پھر کہا: بدنصیب ہوا وہ انسان جس کے سامنے آپ کا ذکر آیا اور اس نے آپ پر درود نہ پڑھا، میں نے کہا: آمین۔“ [صحيح الادب المفرد/حدیث: 501]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”جس نے مجھ پر ایک بار درود پڑھا اللہ اس پر دس رحمتیں نازل فرماتا ہے۔“ [صحيح الادب المفرد/حدیث: 502]

سیدنا ابوہریرہ رضی اللہ عنہ سے مروی ہے کہ نبی صلی اللہ علیہ وسلم منبر پر چڑھے اور فرمایا: ”آمین، آمین، آمین۔“ آپ سے عرض کیا گیا: یا رسول اللہ! آپ پہلے تو ایسے نہیں کرتے تھے۔ آپ صلی اللہ علیہ وسلم نے فرمایا کہ جبریل نے مجھ سے کہا کہ اس کی ناک خاک آلود ہو جس نے اپنے والدین یا ان میں سے کسی ایک کو پایا، اور وہ اسے جنت میں داخل نہ کر سکے۔ میں نے کہا: آمین، پھر کہا کہ اس آدمی کی ناک خاک آلود ہو جس کی زندگی میں رمضان کا مہینہ آیا اور اس کی مغفرت نہ ہوئی، میں نے کہا: آمین، پھر کہا: کہ اس کی بھی ناک خا ک آلود ہو جس کے سامنے آپ کا نام لیا گیا اور اس نے آپ پر درود نہیں پڑھا۔ میں نے کہا: آمین۔ [صحيح الادب المفرد/حدیث: 503]

سیدہ جویریہ بنت حارث بن ابی ضرار رضی اللہ عنہا سے مروی ہے کہ نبی صلی اللہ علیہ وسلم ان کے پاس سے نکل کر باہر آئے، یہ جویریہ وہ ہیں جن کا نام برہ تھا، نبی صلی اللہ علیہ وسلم نے ان کا نام بد ل کر جویریہ کر دیا۔ آپ صلی اللہ علیہ وسلم ان کے پاس سے نکل آئے، آپ کو یہ ناپسند تھا کہ ان کے پاس جائیں اور ان کا نام برہ ہو، پھر آپ ان کے پاس دن چڑھنے کے بعد واپس آئے وہ اسی طرح بیٹھی تھیں۔ آپ صلی اللہ علیہ وسلم نے فرمایا: ”تم اسی طرح بیٹھی رہی اور میں نے تمہارے بعد چار کلمات تین بار کہے اگر تم ان کو اپنے کلمات سے وزن کرو تو یہ ان سے بھاری رہیں: «سبحان الله وبحمده عدد خلقه، ورضا نفسه، وزنة عرشه، ومداد: أو مدد كلماته۔“ [صحيح الادب المفرد/حدیث: 504]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جہنم سے اللہ کی پناہ مانگو، عذاب قبر سے اللہ کی پناہ مانگو، مسیح الدجال کے فتنہ سے اللہ کی پناہ مانگو اور زندگی اور موت کے فتنوں سے اللہ کی پناہ مانگو۔“ [صحيح الادب المفرد/حدیث: 505]

سیدنا جابر رضی اللہ عنہ سے مروی ہے کہ رسول اللہ صلی اللہ علیہ وسلم کہا کرتے تھے: «اللهم أصلح لي سمعي وبصري، واجعلهما الوارثين مني، وانصرني على من ظلمني وأرني منه ثأري» ”اے اللہ! میری سماعت اور میری بصارت کو میرے لیے درست بنا دے اور انہیں میرا وارث بنا دے، جو مجھ پر ظلم کرے اس کے خلاف میری مدد فرما اور مجھ کو اس سے انتقام لے کر دکھا۔“ [صحيح الادب المفرد/حدیث: 506]

سیدنا ابوہریرہ رضی اللہ عنہ بیان کرتے ہیں نبی صلی اللہ علیہ وسلم کہا کرتے تھے: «اللهم متعني بسمعي وبصري، واجعلهما الوارث مني، وانصرني على عدوي، وأرني منه ثأري» ”اے اللہ! میری سماعت اور میری بصارت سے مجھے فائدہ پہنچا، انہیں میرا وارث بنا، میرے دشمن کے مقابلے میں میری مدد فرما اور اس سے انتقام لے کر مجھے دکھا۔“ [صحيح الادب المفرد/حدیث: 507]

طارق بن اشیم اشجعی سے روایت ہے کہ انہوں نے کہا: ہم لوگ صبح اٹھ کر نبی صلی اللہ علیہ وسلم کی خدمت میں حاضر ہوا کرتے تھے مرد آتے تھے، عورتیں آتی تھیں کوئی کہتا کہ یا رسول اللہ! جب میں نماز پڑھ چکوں تو کیا دعا کروں؟ آپ صلی اللہ علیہ وسلم فرماتے تھے: «اللهم اغفر لي، وارحمني، واهدني، وارزقني، فقد جمعت لك دنياك وآخرتك» ”کہو! اے اللہ! میری مغفرت فرما، مجھ پر رحم کر، مجھے ہدایت دے اور مجھے رزق عطا کر، یہ کلمات تمہارے لیے دنیا اور آخرت دونوں جمع کر دیں گے۔“ [صحيح الادب المفرد/حدیث: 508]

سیدنا انس رضی اللہ عنہ سے روایت ہے کہ انہوں نے کہا: نبی صلی اللہ علیہ وسلم ہمارے (یعنی گھر والوں کے) پاس آیا کرتے تھے۔ ایک دن آپ صلی اللہ علیہ وسلم تشریف لائے تو ہمارے لیے دعا کی۔ ام سلیم (میری والدہ) نے کہا: یا رسول اللہ! یہ آپ کا ادنیٰ خادم انس ہے، کیا آپ اسے دعا نہ دیں گے؟ آپ صلی اللہ علیہ وسلم نے فرمایا: «اللهم! أكثر ماله وولده، وأطل حياته، واغفر له» ”اے اللہ اس کا مال بھی زیادہ کر دے اور اس کی اولاد بھی، اس کی زندگی لمبی کر دے اور اس کے گناہ معاف کر دے۔“ تو آپ صلی اللہ علیہ وسلم نے میرے لیے تین چیزوں کی دعا کی تھی۔ میں اپنی اولاد میں سے ایک سو تین کو دفن کر چکا ہوں میرا باغ سال میں دو دفعہ پھل دیتا تھا اور میری عمر اتنی لمبی ہو گئی کہ میں لوگوں سے شرمانے لگا اور اب میں مغفرت کی توقع بھی رکھتا ہوں۔ [صحيح الادب المفرد/حدیث: 509]