سیدنا ابوہریرہ رضی اللہ عنہ بیان کرتے ہیں کہ نبی صلی اللہ علیہ وسلم کے پاس ایک شخص آیا اور اس کے ساتھ ایک بچہ بھی تھا۔ وہ اپنے بچے کو گلے لگاتا تھا تو نبی صلی اللہ علیہ وسلم نے فرمایا: ”کیا تم کو اس پر رحم آتا ہے؟“ اس نے عرض کیا: جی ہاں۔ فرمایا: ”جتنا تم اس پر رحم کرتے ہو اللہ کو اس سے بھی زیادہ تم پر رحم آتا ہے، اور وہ رحم کرنے والوں میں سب سے بڑھ کررحم کرنے والا ہے۔“ [صحيح الادب المفرد/حدیث: 290]

سیدنا ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”ایک شخص کو راہ چلتے چلتے شدید پیاس لگی۔ اسے ایک کنواں ملا۔ وہ کنویں میں اتر پڑا اس نے پانی پی لیا۔ باہر نکلا تو دیکھا کہ ایک کتا ہانپ رہا تھا اور زبان باہر نکالے ہوئے تھا، پیاس کے مارے گیلی مٹی چاٹ رہا تھا۔ اس شخص نے کہا کہ اس کتے کو بھی ویسی ہی پیاس لگی ہے جیسی مجھے لگی تھی۔ اس کے بعد وہ پھر کنویں میں اترا۔ اپنے موزوں میں پانی بھرا اور اس کو منہ میں پکڑ کر اوپر لایا اور کتے کو پلا دیا۔ اللہ نے اس کے اس عمل کی قدر فرمائی اور اس کی مغفرت فرما دی۔“ لوگوں نے عرض کیا: یا رسول اللہ! کیا ہمیں جانوروں (کے ساتھ بھلائی) کا بھی اجر ملتا ہے۔ فرمایا: ”ہر زندہ چیز (کے ساتھ بھلائی) کا اجر ملتا ہے۔“ [صحيح الادب المفرد/حدیث: 291]

سیدنا عبداللہ بن عمر رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ”ایک عورت کو بلی کے سلسلے میں عذاب کیا گیا جس نے اسے باندھ دیا تھا، یہاں تک کہ وہ بھوکی پیاسی مر گئی۔ وہ اس بلی کی وجہ سے جہنم میں داخل ہو گئی اس سے کہا جائے گا: (اور اللہ زیادہ جاننے والا ہے) کہ جب تو نے اسے باندھ کر رکھا تھا تو نہ اسے کھلایا اور نہ اسے پلایا، اور نہ ہی اسے آزاد چھوڑ دیا کہ زمین کے کیڑے مکوڑے کھا لیتی۔“ [صحيح الادب المفرد/حدیث: 292]

سیدنا عبداللہ بن عمرو بن عاص رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”رحم کرو، تم پر رحم کیا جائے گا۔ درگزر کیا کرو، اللہ تم سے درگزر کرے گا۔ ان لوگوں کے لیے بربادی ہے جو بات سن کر نظر انداز کرتے ہیں، ان لوگوں کے لیے بربادی ہے جو گناہوں پر جم جاتے ہیں وہ جو اپنے کیے ہوئے گناہوں پر اڑ جاتے ہیں حالانکہ ان کو معلوم ہے کہ یہ ناجائز ہے۔“ [صحيح الادب المفرد/حدیث: 293]

سیدنا ابوامامہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”جس نے کسی پر رحم کیا چاہے ذبح کیے جانے والے جانور ہی پر ہو، اللہ اس پر قیامت کے دن رحم فرمائے گا۔“ [صحيح الادب المفرد/حدیث: 294]

سیدنا عبداللہ (ابن مسعود) رضی اللہ عنہ سے روایت ہے کہ نبی صلی اللہ علیہ وسلم ایک مقام پر اترے تو کسی شخص نے جنگلی چڑیا کے انڈے اٹھا لیے۔ وہ چڑیا رسول اللہ صلی اللہ علیہ وسلم کے سر مبارک پر آ کر پھڑپھڑانے لگی۔ تو آپ صلی اللہ علیہ وسلم نے فرمایا: ”تم میں سے کس نے اس کے انڈے اٹھا کر اس کو دکھ پہنچایا ہے؟“ ایک شخص نے عرض کیا: یا رسول اللہ! ”میں نے اس کے انڈے لیے ہیں۔“ فرمایا: ”اس پر رحم کر کے انڈے وہیں رکھ دو۔“ [صحيح الادب المفرد/حدیث: 295]

ہشام بن عروہ سے روایت ہے کہ انہوں نے کہا: ابن زبیر جب مکہ میں تھے تو نبی صلی اللہ علیہ وسلم کے اصحاب پنجروں میں پرندے اٹھا کر لے جاتے تھے۔ [صحيح الادب المفرد/حدیث: 296]

سیدنا انس رضی اللہ عنہ سے مروی ہے کہ نبی صلی اللہ علیہ وسلم گھر میں تشریف لائے تو آپ صلی اللہ علیہ وسلم نے ابوطلحہ کا ایک بچہ دیکھا جسے ابوعمیر کہا جاتا تھا۔ اس کے پاس ایک بلبل تھا جس سے وہ کھیلتا تھا۔ آپ صلی اللہ علیہ وسلم نے فرمایا: ”اے ابوعمیر! بلبل کا کیا ہوا؟“ یا فرمایا: ”بلبل کہاں ہے؟“ [صحيح الادب المفرد/حدیث: 296M]

حمید بن عبدالرحمن کہتے ہیں کہ ان کی والدہ ام کلثوم جو عقبہ بن ابی معیط کی بیٹی ہیں بیان کرتی ہیں کہ انہوں نے رسول اللہ صلی اللہ علیہ وسلم کو یہ فرماتے ہوئے سنا: وہ شخص کذاب نہیں ہے جو لوگوں میں صلح کرائے، تو (صلح کے لیے) وہ اچھی بات کرے یا اچھی بات پہنچائے، کہتی ہیں: میں نے آپ صلی اللہ علیہ وسلم کو تین مواقع کے علاوہ لوگوں کو جھوٹ بولنے کی رخصت دیتے ہوئے نہیں سنا: ”لوگوں میں صلح کرانے کے لیے، آدمی کا اپنی بیوی سے بات کرنا، اور عورت کا اپنے خاوند سے بات کرنا۔ (یعنی اگر کوئی غلط فہمی پیدا ہو جائے تو صلح کے لیے کوئی ایسی بات کی جا سکتی ہے جس کا ظاہری معنی اور باطنی معنی فرق ہو، خالص جھوٹ پھر بھی نہیں بولنا چاہیے۔)“ [صحيح الادب المفرد/حدیث: 297]

سیدنا عبداللہ (ابن مسعود) رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”سچ پر ہمیشہ قائم رہو، کیونکہ سچ بولنا نیکی کی طرف رہنمائی کرتا ہے اور نیکی جنت کی طرف رہنمائی کرتی ہے، اور بیشک ایک شخص سچ بولتا رہتا ہے حتیٰ کہ اسے اللہ کے نزدیق صدیق لکھ دیا جاتا ہے، اور جھوٹ سے ہمیشہ بچتے رہنا، کیونکہ جھوٹ فجور (گناہوں) تک پہنچاتا ہے اور فجور جہنم تک، ایک شخص جھوٹ بولتا رہتا ہے حتیٰ کہ اسے اللہ کے نزدیک کذاب لکھ دیا جاتا ہے۔“ [صحيح الادب المفرد/حدیث: 298]