ابراہیم بن ابی عبلہ بیان کرتے ہیں کہ میری بیوی بیمار پڑ گئی، میں (اس زمانے میں) امِ درداء کے پاس جایا کرتا تھا (جب میں جاتا) تو وہ مجھ سے کہتیں: آپ کی بیوی کا کیا حال ہے؟ میں ان سے کہتا: بیمار ہے، پھر وہ میرے لیے کھانا منگواتیں اور میں کھانا کھاتا۔ پھر میں دوبارہ گیا انہوں نے دوبارہ ایسا کیا (مجھے کھانا دیا)۔ پھر ایک بار میں ان کے پاس آیا تو وہ بولیں: آپ کی بیوی کا کیا حال ہے؟ میں نے کہا: صحت کی طرف مائل ہو رہی ہے، انہوں نے کہا: جب تم ہمیں کہتے تھے کہ تمہاری بیوی بیمار ہے تو میں تمہارے لیے کھانا منگواتی تھی لیکن جب وہ ٹھیک ہو رہی ہے تو اب ہم آپ کے لیے کچھ نہیں منگوائیں گے۔ [صحيح الادب المفرد/حدیث: 398]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم ایک اعرابی کی عیادت کے لیے تشریف لے گئے (کہا کہ نبی صلی اللہ علیہ وسلم کا معمول یہ تھا کہ جب کسی بیمار کی بیمار پرسی کے لیے جاتے) تو یہ کہتے: «لا بأس عليك، طهور إن شاء الله» ”کوئی حرج کی بات نہیں ہے، ان شاء اللہ یہ گناہوں کو پاک کرنے والی ہے“، (سیدنا ابن عباس رضی اللہ عنہما نے) کہا: اس اعرابی نے کہا (کیا یہ پاک کرنے والی ہے؟ ہرگز نہیں!) بلکہ یہ بخار ایک بوڑھے آدمی پر جوش کھاتا ہے تاکہ اسے قبرستان کی زیارت کروا دے نبی صلی اللہ علیہ وسلم نے فرمایا: ”اچھا تو یونہی سہی۔“ [صحيح الادب المفرد/حدیث: 399]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”آج تم میں سے کس نے روزہ رکھا ہے؟“ سیدنا ابوبکر رضی اللہ عنہ نے کہا: میں نے، آپ صلی اللہ علیہ وسلم نے فرمایا: ”آج تم میں سے کس نے مریض کی عیادت کی ہے؟“ سیدنا ابوبکر رضی اللہ عنہ نے کہا: میں نے، آپ صلی اللہ علیہ وسلم نے فرمایا: ”آج تم میں سے کس نے جنازے میں شرکت کی ہے؟“ سیدنا ابوبکر رضی اللہ عنہ نے کہا: میں نے، آپ صلی اللہ علیہ وسلم نے پوچھا: ”آج کس نے مسکین کو کھانا کھلایا ہے؟“ سیدنا ابوبکر رضی اللہ عنہ نے کہا: میں نے، مروان نے کہا کہ مجھے معلوم ہوا ہے کہ (اس پر) نبی صلی اللہ علیہ وسلم نے فرمایا: ”جب کسی شخص میں ایک ہی دن میں یہ سب خصلتیں جمع ہو جائیں گی تو وہ جنت میں داخل ہو گا۔“ [صحيح الادب المفرد/حدیث: 400]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم ام سائب کے پاس آئے وہ بخار سے کپکپا رہی تھی، آپ نے پوچھا: ”تمہیں کیا ہوا؟“ اس نے کہا: بخار ہے، اللہ اس کو رسوا کرے۔ اس پر نبی صلی اللہ علیہ وسلم نے فرمایا: ”چپ رہو، اس کو برا نہ کہو، یہ مومن کی خطاؤں کو ایسے زائل کر دیتا ہے جیسے بھٹی کی آگ لوہے کے زنگ کو ختم کر دیتی ہے۔“ [صحيح الادب المفرد/حدیث: 401]

سیدنا ابوہریرہ رضی اللہ عنہ سے مروی ہے وہ رسول اللہ صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”اللہ فرماتا ہے کہ میں نے تم سے کھانا مانگا اور تم نے مجھے کھانا نہیں دیا، بندہ کہے گا، اے میرے رب! تو نے مجھ سے کیسے کھانا مانگا؟ اور میں نے نہیں دیا اور تُو تو رب العالمین ہے، اللہ فرمائے گا: تجھے خبر نہیں کہ میرے فلاں بندے نے تم سے کھانا مانگا لیکن تم نے اسے نہیں دیا، کیا تمہیں نہیں معلوم کہ اگر تم نے اسے کھلایا ہوتا تو اس کا ثواب میرے پاس پا لیتا۔ اے ابن آدم! میں نے تم سے پانی طلب کیا، تم نے مجھے پانی نہیں پلایا۔ وہ کہے گا: اے میرے رب! میں تجھے کیسے پانی پلاتا تو تو رب العالمین ہے۔ تو اللہ فرمائے گا: میرے فلاں بندے نے تم سے پانی مانگا اور تم نے اسے نہیں دیا کیا تمہیں معلوم نہیں کہ اگر تم اسے پانی پلاتے تو اس کا اجر میرے پاس پاتے۔ اے ابن آدم! میں بیمار ہوا، تم نے میری بیمار پرسی نہیں کی۔ بندہ کہے گا: اے میرے رب میں تیری بیمار پرسی کیسے کرتا جبکہ توتو رب العالمین ہے، اللہ فرمائے گا: کیا تمہیں معلوم نہیں کہ میرا فلاں بندہ بیمار پڑا اگر تم نے اس کی بیمار پرسی کی ہوتی تو اس کا ثواب میرے پاس پا لیتے یا مجھے اس کے پاس پا لیتے۔“ [صحيح الادب المفرد/حدیث: 402]

سیدنا ابوسعید رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”مریضوں کی عیادت کرو، جنازے میں شرکت کرو، یہ تمہیں آخرت کی یاد دلائے گی۔“ [صحيح الادب المفرد/حدیث: 403]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”یہ تینوں کام ہر مسلمان پر حق ہیں، بیمار کی عیادت کرنا، جنازے میں شرکت کرنا اور چھینکنے والے کا جواب دینا اگر اس نے الحمد للہ کہا ہو۔“ [صحيح الادب المفرد/حدیث: 404]

سعد کے تین بیٹوں نے اپنے والد سے روایت کی ہے کہ رسول اللہ صلی اللہ علیہ وسلم مکہ میں سعد کی عیادت کے لیے تشریف لائے تو سعد رضی اللہ عنہ رونے لگے، آپ صلی اللہ علیہ وسلم نے پوچھا: ”تم کیوں روتے ہو؟“ کہا: مجھے ڈر لگتا ہے کہ کہیں میں اس زمین میں نہ مر جاؤں جہاں سے میں نے ہجرت کی ہے جیسا کہ سعد (بن خولہ) انتقال کر گئے۔ آپ صلی اللہ علیہ وسلم نے تین بار فرمایا: ”اے اللہ! سعد کو شفا دے۔“ پھر سعد نے کہا: میرے پاس بہت سا مال ہے، جس کی وارث صرف میری بیٹی ہو گی، کیا میں اپنے پورے مال کی (اللہ کے راستے میں) وصیت کر جاؤں؟ آپ صلی اللہ علیہ وسلم نے فرمایا: ”نہیں“، انہوں نے کہا: دو تہائی کی؟ آپ صلی اللہ علیہ وسلم نے فرمایا: ”نہیں“، انہوں نے کہا: نصف مال کی؟ آپ نے فرمایا: ”نہیں“، انہوں نے کہا: اچھا ایک تہائی مال کی؟ آپ نے فرمایا: ”ہاں، ایک تہائی مال کی اور ایک تہائی بھی بہت ہے، تم نے اپنے مال میں جو صدقہ دیا وہ صدقہ ہے اور تمہارا اپنے بیوی بچوں پر خرچ کرنا صدقہ ہے۔ اور جو تمہارے کھانے سے تمہاری بیوی کھا لے وہ صدقہ ہے، اور یہ کہ تم اپنے اہل و عیال کو مال و دولت یا کہا: گزران کے ساتھ چھوڑو تو وہ اس سے بہتر ہے کہ تم اسے اس حال میں چھوڑو کہ وہ لوگوں کے آگے ہاتھ پھیلائیں۔“ اور ہاتھ سے اشارہ کیا۔ [صحيح الادب المفرد/حدیث: 405]

ابواسماء سے مروی ہے انہوں نے کہا کہ جس نے اپنے بھائی کی عیادت کی وہ جنت کے باغ میں ہو گا، میں نے ابوقلابہ سے پوچھا: جنت کے باغ سے کیا مراد ہے؟ فرمایا: اس کے پھل۔ میں نے ابوقلابہ سے کہا: ابواسماء نے یہ حدیث کس سے روایت کی ہے؟ کہا: ثوبان سے اور ثوبان رسول اللہ صلی اللہ علیہ وسلم سے روایت کرتے ہیں۔ [صحيح الادب المفرد/حدیث: 406]

ابوبکر بن حزم اور محمد بن منکدر سے روایت ہے کہ وہ مسجد والوں میں سے کچھ لوگوں میں تھے انہوں نے عمر بن حکم بن رافع انصاری کی بیمار پرسی کی، انہوں نے کہا: اے ابوحفص! ہمیں کوئی حدیث سناؤ۔ انہوں نے کہا: میں نے جابر بن عبداللہ رضی اللہ عنہ سے سنا ہے انہوں نے کہا: میں نے نبی صلی اللہ علیہ وسلم کو کہتے ہوئے سنا: ”جس شخص نے کسی مریض کی عیادت کی وہ رحمت میں داخل ہو جاتا ہے جب وہ وہاں بیٹھ جاتا ہے وہ رحمت کے سمندر میں جگہ بنا لیتا ہے۔“ [صحيح الادب المفرد/حدیث: 407]