سیدنا ابوسعید خدری اور سیدنا ابوہریرہ رضی اللہ عنہما نبی صلی اللہ علیہ وسلم سے روایت کرتے ہیں آپ صلی اللہ علیہ وسلم نے فرمایا: ”جب کسی مسلمان کو کوئی تھکاوٹ، بیماری، پریشانی، رنج، تکلیف اور غم ہوتا ہے یہاں تک کہ اسے ایک کانٹا بھی چبھتا ہے تو اللہ اس کے سبب اس کے گناہوں کو دور کر دیتا ہے۔“ [صحيح الادب المفرد/حدیث: 378]

سعید سے مروی ہے انہوں نے کہا کہ میں سلمان کے ساتھ تھا انہوں نے کندہ قبیلے کے کسی بیمار کی بیمار پرسی کی۔ جب سلمان مریض کے پاس آئے تو انہوں نے کہا: بشارت ہو! بیشک مومن کے مرض کو اللہ (گناہوں کا) کفارہ اور (اپنی) رضا کا سبب بنا دیتا ہے اور فاجر کا مرض ایسا ہے جیسا کہ اونٹ کو اس کے گھر والے باندھ دیتے ہیں پھر اسے چھوڑ دیتے ہیں۔ وہ نہیں جانتا اسے کیوں باندھا گیا اور کیوں چھوڑا گیا ہے؟ [صحيح الادب المفرد/حدیث: 379]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”ایک صاحب ایمان مرد یا عورت کو اس کے بدن، اس کے اہل و عیال اور اس کے مال میں مسلسل آزمائشیں آتی رہتی ہیں، یہاں تک کہ وہ اللہ سے اس حال میں ملاقات کرتا ہے کہ اس پر کوئی گناہ باقی نہیں رہتا۔“ [صحيح الادب المفرد/حدیث: 380]

سیدنا ابوہریرہ رضی اللہ عنہ بیان کرتے ہیں کہ ایک اعرابی آیا تو نبی صلی اللہ علیہ وسلم نے فرمایا: ”کیا تمہیں کبھی ام ملدم نے پکڑا ہے؟“ اس نے کہا: ام ملدم کیا ہے؟ آپ صلی اللہ علیہ وسلم نے فرمایا: ”کھال اور گوشت کے درمیان حرارت ہوتی ہے۔“ (یعنی بخار)، اس نے کہا: کبھی نہیں، آپ صلی اللہ علیہ وسلم نے فرمایا: ”کیا تمہیں کبھی صداع ہوا ہے؟“ اس نے کہا: صداع کیا چیز ہے؟ آپ صلی اللہ علیہ وسلم نے فرمایا: ”ایک ہوا ہے جو سر میں گھس جاتی ہے اور رگوں پر ضرب لگاتی ہے۔“ (سر درد)، اس نے کہا: کبھی نہیں، پھر جب وہ کھڑا ہوا تو آپ صلی اللہ علیہ وسلم نے فرمایا: ”جسے کسی جہنمی کو دیکھنا پسند ہو وہ اسے دیکھ لے۔“ [صحيح الادب المفرد/حدیث: 381]

سیدہ عائشہ رضی اللہ عنہا نبی صلی اللہ علیہ وسلم سے روایت بیان کرتی ہیں کہ آپ صلی اللہ علیہ وسلم نے فرمایا: ”جب کوئی مومن بیمار پڑتا ہے تو اللہ اسے (گناہوں سے) پاک کر دیتا ہے جیسے بھٹی لوہے کو زنگ سے پاک کر دیتی ہے۔“ [صحيح الادب المفرد/حدیث: 382]

سیدہ عائشہ رضی اللہ عنہا نبی صلی اللہ علیہ وسلم سے روایت بیان کرتی ہیں کہ آپ صلی اللہ علیہ وسلم نے فرمایا: ”جب کسی مسلمان کو درد یا مرض کی مصیبت پڑتی ہے یہاں تک کہ اگر اسے ایک کانٹا بھی چبھتا ہے یا کوئی تکلیف پہنچتی ہے، تو اس کے گناہوں کا کفارہ ہو جاتا ہے۔“ [صحيح الادب المفرد/حدیث: 383]

سعد کی صاحبزادی عائشہ بیان کرتی ہیں کہ میرے والد نے بیان کیا کہ میں مکہ میں ایک بار شدید بیمار پڑ گیا نبی صلی اللہ علیہ وسلم میری عیادت کو تشریف لائے تو میں نے عرض کیا یا رسول اللہ! میں مال چھوڑ رہا ہوں اور میری صرف ایک ہی لڑکی ہے کیا میں اپنے مال میں سے دو تہائی کی وصیت کر دوں اور ایک تہائی چھوڑ دوں؟ فرمایا: ”نہیں“، میں نے پوچھا: نصف کی وصیت کر دوں، اور لڑکی کے لیے نصف چھوڑ دوں؟ فرمایا: ”نہیں“، میں نے پوچھا: تو کیا ایک تہائی کی وصیت کر دوں اور دو تہائی لڑکی کے لیے چھوڑ دوں؟ فرمایا: ”ہاں، ایک تہائی اور ایک تہائی بہت زیادہ ہے۔ اس کے بعد اپنا ہاتھ میری پیشانی پر رکھا اور میرے منہ اور پیٹ پر پھیرا اور پھر دعا کی، اے اللہ! سعد کو شفا عطا فرما اور اس کی ہجرت کو مکمل کر اس کے بعد سے آج تک جب میں خیال کرتا ہوں آپ کے دست مبارک کی ٹھنڈک اپنے جگر پر محسوس کرتا ہوں۔“ [صحيح الادب المفرد/حدیث: 384]

سیدنا عبداللہ بن عمرو رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جب کوئی شخص بیمار پڑتا ہے تو اس کے وہ اعمال لکھے جاتے ہیں جو وہ حالت صحت میں کیا کرتا تھا۔“ [صحيح الادب المفرد/حدیث: 385]

سیدنا انس بن مالک رضی اللہ عنہ نبی صلی اللہ علیہ وسلم سے روایت کرتے ہیں کہ جب کبھی اللہ تعالیٰ کسی شخص کو کسی بدنی آزمائش میں مبتلا کرتا ہے تو جب تک وہ بیمار رہتا ہے اس کے وہی اعمال لکھے جاتے ہیں جو وہ حالت صحت میں کیا کرتا تھا، اگر مریض کو اللہ نے شفا عطا کر دی تو میرا خیال ہے کہ آپ صلی اللہ علیہ وسلم نے فرمایا: ”اس کے گناہ دھو دیے اور اگر اللہ نے اسے اٹھا لیا تو اس کی مغفرت فرما دی۔“ اور ایک روایت میں ہے: ”اگر اللہ اسے شفا دے دے تو اسے گناہوں سے دھو دیتا ہے۔“ [صحيح الادب المفرد/حدیث: 386]

سیدنا ابوہریرہ رضی اللہ عنہ سے مروی ہے کہ انہوں نے کہا کہ بخار نبی صلی اللہ علیہ وسلم کی خدمت میں آیا اور عرض کیا: آپ مجھے اپنے ان لوگوں کے پیچھے بھیجئے جو زیادہ اولیت رکھتے ہیں تو آپ صلی اللہ علیہ وسلم نے انصار کے پاس بھیج دیا وہ ان کے ہاں چھ دن رات رہا، ان پر بخار بہت سخت ثابت ہوا نبی صلی اللہ علیہ وسلم ان کے گھروں میں آئے تو ان لوگوں نے آپ صلی اللہ علیہ وسلم سے شکایت کی اس پر نبی صلی اللہ علیہ وسلم نے ان کے ایک ایک محلے اور ایک ایک گھر میں جانا شروع کیا اور ان کے لیے عافیت کی دعا فرمانے لگے، آپ جب لوٹ رہے تھے تو ایک عورت آپ کے پیچھے آئی اور اس نے عرض کیا: قسم اس ذات کی جس نے آپ کو حق کے ساتھ مبعوث کیا ہے میں انصار میں سے ہوں اور میرے والد بھی انصار میں سے ہیں، جیسے آپ نے انصار کے لیے دعا کی ہے میرے لیے بھی دعا کیجئے، آپ صلی اللہ علیہ وسلم نے فرمایا: ”کیا چاہتی ہو؟ اگر چاہو تو میں تمہارے لیے دعا کروں کہ تم بخار سے محفوظ رہو اور اگر چاہو تو صبر کرو اور تمہیں جنت ملے گی“، اس نے کہا: میں صبر کروں گی اور میں جنت کو خطرے میں نہیں ڈالوں گی۔ [صحيح الادب المفرد/حدیث: 387]