سیدہ عائشہ رضی اللہ عنہا نبی صلی اللہ علیہ وسلم کی زوجہ سے روایت ہے، وہ کہتی ہیں کہ ایک بار رسول اللہ صلی اللہ علیہ وسلم کی خدمت میں یہودیوں کی ایک جماعت آئی اور انہوں نے کہا: «السَّامُ عَلَيْكُمْ» تم پر ہلاکت آئے۔ سیدہ عائشہ رضی اللہ عنہا کہتی ہیں: میں بھانپ گئی میں نے کہا: «عَلَيْكُمُ السَّامُ وَاللَّعْنَةُ»، کہتی ہیں: اس پر رسول اللہ صلی اللہ علیہ وسلم نے فرمایا: ”ٹھہرو، اے عائشہ! بیشک اللہ سارے کاموں میں نرمی کو پسند کرتا ہے۔“ میں نے کہا: کہ یا رسول اللہ! کیا آپ نے سنا نہیں جو انہوں نے کہا:؟ رسول اللہ صلی اللہ علیہ وسلم نے فرمایا: میں نے کہہ دیا ہے: ” «وَعَلَيْكُمْ» اور تم پر بھی وہی ہو۔“ [صحيح الادب المفرد/حدیث: 359]

سیدنا جریر بن عبد اللہ رضی اللہ عنہ سے روایت ہے انہوں نے کہا کہ رسول اللہ صلی اللہ علیہ وسلم نے فرمایا: ”جسے نرمی سے محروم کر دیا گیا اسے ہر قسم کی خیر سے محروم کر دیا گیا۔“ [صحيح الادب المفرد/حدیث: 360]

سیدنا ابودرداء رضی اللہ عنہ نبی صلی اللہ علیہ وسلم سے روایت کرتے ہیں آپ صلی اللہ علیہ وسلم نے فرمایا: ”جسے نرمی سے اس کا حصہ دے دیا گیا اسے بھلائی سے اس کا حصہ دے دیا گیا، اور جو اپنے نرمی کے حصے سے محروم کر دیا گیا اسے اس کے خیر کے حصے سے محروم کر دیا گیا، قیامت کے دن مومن کے ترازو میں سب سے بھاری چیز، اچھا اخلاق ہو گا اور بیشک اللہ بیہودہ گوئی کرنے والے بد اخلاق انسان کو ناپسند کرتا ہے۔“ [صحيح الادب المفرد/حدیث: 361]

سیدہ عائشہ رضی اللہ عنہاسے مروی ہےکہ نبی صلی اللہ علیہ وسلم نے فرمایا: ”اچھے اخلاق والوں (نیک لوگوں) کی غلطیوں کو معاف کر دیا کرو۔“ [صحيح الادب المفرد/حدیث: 362]

سیدنا انس رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”اکھڑپن جس چیز میں ہو اسے بدنما کر دیتا ہے بیشک اللہ نرم خو ہے اور نرمی کو پسند کرتا ہے۔“ [صحيح الادب المفرد/حدیث: 363]

سیدنا ابوسعید خدری رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم کنواری لڑکی جو اپنے پردے میں ہو اس سے بھی زیادہ حیادار تھے۔ جب کوئی بات آپ صلی اللہ علیہ وسلم کو ناگوار ہوتی تھی تو ہم آپ صلی اللہ علیہ وسلم کے چہرے سے جان لیتے تھے۔ [صحيح الادب المفرد/حدیث: 364]

سیدہ عائشہ رضی اللہ عنہا بیان کرتی ہیں کہ میں ایک ایسے اونٹ پر سوار تھی جو سرکش (ضدی) تھا اونٹ میں ذرا سختی تھی، اس پر نبی صلی اللہ علیہ وسلم نے فرمایا: ”تم (ہمیشہ) نرمی اختیار کرو۔ یہ صفت جس میں ہوتی ہے اسے مزین کر دیتی ہے اور جس چیز سے نکال لی جاتی ہے اسے عیب دار کر دیتی ہے۔“ [صحيح الادب المفرد/حدیث: 365]

سیدنا ابوہریرہ رضی اللہ عنہ سے مروی ہے، انہوں نے کہا: رسول اللہ صلی اللہ علیہ وسلم نے فرمایا: ”تم بخل سے بچتے رہو، بیشک اس نے تم سے پہلے والوں کو ہلاک کر دیا ہے۔ انہوں نے آپس میں خوں ریزیاں کیں، اور اپنے رشتے ناطے منقطع کیے اور ظلم قیامت کے دن بہت سے اندھیروں کا باعث ہو گا۔ اور تم بدگوئی سے بچو۔ بیشک اللہ فحش گوئی کرنے والے، تکلف سے گالیاں دینے والے کو پسند نہیں کرتا۔“ [صحيح الادب المفرد/حدیث: 366]

کثیر بن عبید کہتے ہیں: میں ام المؤمنین سیدہ عائشہ رضی اللہ عنہا کے پاس آیا تو انہوں نے فرمایا: ذرا پکڑو تاکہ میں اپنی شلوار سی لوں۔ تو میں نے پکڑ لی۔ میں نے عرض کیا: اے ام المؤمنین اگر میں باہر جا کر لوگوں سے اس (معاملے کا) تذکرہ کر دوں تو لوگ اسے آپ کا بخل شمار کریں گے۔ فرمایا: اپنا کام کرو نئے کپڑے اس کے لیے نہیں جو پرانا نہ استعمال کرے۔ [صحيح الادب المفرد/حدیث: 367]

سیدنا عبداللہ بن مغفل رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”بیشک اللہ نرمی کرنے والا ہے۔ نرمی ہی کو پسند فرماتا ہے اور نرمی پر وہ عطا کرتا ہے جو سختی پر نہیں عطا کرتا۔“ [صحيح الادب المفرد/حدیث: 368]