سیدنا ابن عمر رضی اللہ عنہما سے مروی ہے انہوں نے کہا: ہم ایک مجلس میں نبی صلی اللہ علیہ وسلم کی یہ دعا سو مرتبہ شمار کرتے تھے: «رب اغفر لي وتب عليّ، إنك أنت التواب الرحيم» ”اے رب! میری مغفرت فرما اور میری توبہ قبول کر بے شک تو توبہ قبول کرنے والا رحمت کرنے والا ہے۔“ [صحيح الادب المفرد/حدیث: 482]

سیدہ عائشہ رضی اللہ عنہا سے مروی ہے انہوں نے کہا: رسول اللہ صلی اللہ علیہ وسلم نے چاشت کی نماز پڑھی پھر کہا: «اللهم اغفر لي، وتب علي، إنك أنت التواب الرحيم» ”اے اللہ! میری مغفرت فرما، میری توبہ قبول کر لے بے شک تو ہی توبہ قبول کرنے والا اور رحم فرمانے والا ہے۔“ یہاں تک کہ آپ صلی اللہ علیہ وسلم نے سو بار یہ دعا کہی۔ [صحيح الادب المفرد/حدیث: 483]

سیدنا شداد بن اوس رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: سید الاستغفار یہ ہے کہ انسان کہے: «اللهم أنت ربي، لا إله إلا أنت، خلقتني وأنا عبدك، وأنا على عهدك ووعدك ما استعطت، أعوذ بك من شر ما صنعتُ، أبوءُ لك بنعمتك، وأبوء لك بذنبي فاغفر لي؛ فإنه لا يغفر الذنوب إلا أنت» جو اس دعا کو یقین کے ساتھ دن میں پڑھے گا اور اگر وہ شام سے پہلے اسی دن فوت ہو گیا تو وہ جنت والوں میں سے ہو گا اور جو رات کو کہے گا اور اسے اس کا یقین ہو گا اور وہ صبح سے پہلے فوت ہو گیا تو وہ جنت والوں میں سے ہو گا۔ [صحيح الادب المفرد/حدیث: 484]

سیدنا ابوبردہ رضی اللہ عنہ سے روایت ہے میں نے جہینہ کے ایک شخص اغر سے سنا وہ سیدنا عبداللہ بن عمر رضی اللہ عنہما سے روایت کرتے ہیں کہ انہوں نے کہا: میں نے نبی صلی اللہ علیہ وسلم کو فرماتے ہوئے سنا: ”اللہ کی بارگاہ میں توبہ کیا کرو، میں تو اللہ کی بارگاہ میں ہر روز سو بار توبہ کرتا ہوں۔“ [صحيح الادب المفرد/حدیث: 485]

کعب بن عجرہ سے روایت ہے انہوں نے کہا: کچھ کلمات ایسے ہیں جن کا کہنے والا نامراد نہیں ہوتا وہ یہ ہیں: «سبحان الله»، «الحمدلله»، «لا اله الا الله» ‏‏‏‏، «الله اكبر» سو بار۔ اس حدیث کو ابن ابی انیسہ اور عمرو بن قیس نے مرفوع بیان کیا ہے۔ [صحيح الادب المفرد/حدیث: 486]