896 ۔ اردو حاشیہ:
➊ دعائے استفتاح کے سلسلے میں سب سے زیادہ صحیح روایت یہ ہے، لہٰذا اس کا پڑھنا اولیٰ ہے۔ امام مالک دعائے استفتاح کے قائل نہیں مگر اتنی روایات صحیحہ کی موجودگی میں یہ موقف حیران کن ہے۔
➋ پانی، برف اور اولوں سے مراد مختلف قسم کی رحمتیں ہیں۔ باری تعالیٰ کی مختلف صفات ہیں، مثلاً: عفوودرگزر، مغفرت اور رحمت۔ پانی کے ساتھ برف اور اولوں کا ذکر تاکید کے لیے کیا گیا ہے، یعنی اے اللہ! ان گناہوں کی حدت و تمازت کو، جو جہنم کی آگ میں لے جانے کا سبب ہیں، پانی، برف اور اولوں سے ختم کر دے۔
➌ ”میرے اور میری غلطیوں کے درمیان مشرق و مغرب جتنی دوری ڈال دے۔“ اس کا مطلب یہ ہے کہ جس طرح مشرق اور مغرب کا آپس میں ملنا محال ہے، اسی طرح مجھ سے گناہوں کو اور گناہوں کو مجھ سے دور رکھ۔
➍ علامہ کرمانی رحمہ اللہ فرماتے ہیں: ممکن ہے اس دعائے استفتاح میں تین زمانوں کی طرف اشارہ ہو، یعنی میرے اور میری غلطیوں کے درمیان دوری سے مراد مستقبل کے گناہ یوں، تنقیہ (گناہوں کی صفائی) سے مراد زمانۂ حال کی لغزشیں ہوں اور گناہ دھونے سے مراد زمانہ ماضی میں کیے ہوئے گناہ ہوں۔ واللہ أعلم۔ [فتح الباري: 2؍298، تحت حدیث: 744]
➎ اس حدیث مبارکہ سے یہ بھی معلوم ہوا کہ برف اور اولوں سے طہارت حاصل کی جا سکتی ہے۔
➏ اس سے پتہ چلتا ہے کہ صحابہ کرام رضی اللہ عنہم ہمیشہ نبی اکرم صلی اللہ علیہ وسلم کے حالات و واقعات، آپ کی حرکات و سکنات دریافت کرتے رہتے تھے حتیٰ کہ اللہ تعالیٰ نے ان کے ذریعے سے اپنا مکمل دین محفوظ شکل میں ہم تک پہنچا دیا۔

� لغوی تشریح:
«هُنَيْهَةَ» ”ہا“ پر ضمہ، ”نون“ پر فتحہ، ”یا“ ساکن اور دوسری ”ہا“ پر فتحہ ہے۔ تھوڑا سا وقفہ۔
«نَقِّنِي» ”نون“ پر فتحہ، ”قاف“ پر تشدید اور کسرہ ہے۔ «تنقية» سے امر کا صیغہ ہے۔ پاک صاف کر دے۔
«يُنَقّٰي» صیغہ مجہول۔
«الدَّنَسِ» ”دال“ اور ”نون“ پر فتحہ ہے، میل کچیل۔
«الثَّلْجِ» ”ثا“ پر فتحہ اور ”لام“ ساکن ہے، وہ بخارات جو فضا میں سردی کے درجہ انجماد تک پہنچنے کی وجہ سے منجمد ہو جاتے ہیں اور دھنی ہوئی کی طرح ہو کر زمین پر گرتے ہیں (جسے برف کہتے ہیں۔)
«وَالْبَرَدِ» ”با“ اور ”را“ دونوں پر فتحہ ہے۔ بادلوں کا پانی جو سرد ہوا میں جم کر اولوں کی صورت میں زمین پر گرتا ہے۔

فوائد و مسائل:
➊ اس حدیث سے معلوم ہوتا ہے کہ تکبیر تحریمہ کے بعد قرأت سے پہلے قدرے وقفہ ہے اور اس میں یہ دعا پڑھنا مسنون ہے۔
➋ اس سے یہ بات بھی معلوم ہوئی کہ دعائے افتتاح بلند آواز سے نہیں بلکہ آہستہ پڑھنی چاہئے۔
➌ گناہوں میں سخت تمازت و حرارت ہوتی ہے جسے مومن دنیا ہی میں جبکہ فاسق آخرت میں محسوس کرے گا اور اس کی تمازت و حرارت کو ختم کرنے کے لیے ٹھنڈا پانی اور برف زیادہ کار آمد ہے، اس لیے دعا میں ان چیزوں کا تذکرہ کیا گیا ہے۔ «والله أعلم بالصواب»

� فوائد و مسائل:
«اللهم باعد بيني» الخ پڑھنا زیادہ صحیح، حنفی مذہب کے فقہاء نے بھی اس کی تائید کی ہے،
چنانچہ شرح وقایہ اردو [ص 94] میں حنفی مذہب کے زبردست مجتہد، محقق اور موید علامہ کمال ابن الہمام رحمہ اللہ کا بیان ہے کہ بجائے «سبحانك اللهم» کے «اللهم باعد بيني» الخ پڑھنا زیادہ تر صحیح ہے۔“ [فتح القدير 289/1]

781۔ اردو حاشیہ:
➊ ثنا کی دعاؤں میں سے یہ دعا سب سے صحیح اسانید سے ثابت ہے، الفاظ میں قدرے فرق بھی مروی ہے۔
➋ ثنا کو خاموشی سے پڑھنا مسنون ہے۔
➌ آخری جملہ ”اے اللہ! مجھے برف، پانی اور اولوں سے دھو دے۔“ اس میں برف اور اولوں کا ذکر یا تو تاکید کے لئے ہے یا اس معنی میں ہے کہ یہ پانی زمینی آلودگیوں سے پاک اور صاف ہوتا ہے، تو اس سے صفائی بھی عمدہ ہو گی اور صفائی کے لئے ”برف اور اولوں کے ذکر میں“ حکمت یہ بیان کی جاتی ہے کہ یہ الفاظ بطور تفاول ہیں۔ یعنی اے اللہ! گناہوں کے باعث جو آگ کی حرارت کا سزاوار بن رہا ہوں، ان سے محفوظ رکھ اور میری خطاؤں کو ٹھنڈی برف اور اولوں سے دھو اور آگ کی جلن سے بالکل مامون و محفوظ فرما دے۔ «والله اعلم»
➍ صحابہ کرام رضوان اللہ عنہم اجمعین نبی کریم صلی اللہ علیہ وسلم کے تمام احوال کا تتبع فرمایا کرتے تھے، خواہ وہ ظاہر ہوتے یا مخفی اس طرح اللہ تعالیٰ نے ان کے ذریعے سے دین کو محفوظ کر دیا ہے۔ «رضي الله عنهم وارضاهم»

60۔ اردو حاشیہ:
➊ حدیث کی باب سے مطابقت واضح ہے کہ رسول اللہ صلی اللہ علیہ وسلم نے برف کو پانی کے برابر ذکر فرمایا ہے، لہٰذا اس سے وضو ہو سکتا ہے۔
➋ اس دعا میں پانی، برف اور اولوں کے ذکر سے مقصود یہ ہے کہ میرے گناہوں کو ہر ممکن طریقے سے مجھ سے دور فرما دے۔ ان سے اللہ تعالیٰ کی رحمت کی مختلف صورتوں کی طرف بھی اشارہ ہو سکتا ہے۔

335۔ اردو حاشیہ: دیکھیے سنن نسائی حدیث: 60 اور اس کے فوائد و مسائل۔

اردو حاشہ:
(1)
صحابہ کرام رضوان اللہ عنہم اجمعین کو علم کا اس قدر شوق تھا کہ خود رسول اللہ ﷺ سے پوچھ لیتے تھے۔
اور یہ انتظا ر نہیں کرتے تھے۔
کہ خود آپﷺ بیان فرمایئں۔
البتہ بعض اوقات اس خیال سے توقف کرتے تھے۔
کہ یہ سوال رسول اللہﷺ کو ناگوار محسوس نہ ہو۔
اور بلا ضرورت سوال کرنے سے بھی پرہیز کرتے تھے۔

(2)
گناہوں سے فاصلہ کردینے کا مطلب یہ ہے کہ اللہ تعالیٰ اپنی رحمت اور توفیق کے ساتھ گناہوں سے محفوظ رکھے۔
اور ہم گناہوں کا ارتکاب تو درکنار ان کے قریب بھی نہ پھٹکیں۔

(3)
گناہوں کو میل کچیل سے تشبیہ دی جاتی ہے۔
اس لئے انتہائی صفائی کو سفید کپڑے کی صفائی سے تشبیہ دی گئی ہے۔
کیونکہ سفید کپڑے کو زیادہ توجہ اور اہتمام سے صاف کیا جاتا ہے۔
کہ اگر معمولی سا بھی داغ یا دھبہ رہ گیا تو بہت بُرا محسوس ہوگا۔
مطلب یہ ہے کہ اللہ تعالیٰ تمام چھوٹے بڑے گناہ معاف فرما دے۔

(4)
گناہ جہنم میں لے جانے کا باعث ہیں۔
ان سے روح بے چینی محسوس کرتی ہے۔
جس طرح جسم ظاہری گرمی سے بے چینی محسوس کرتا ہے۔
اس لئے گناہوں سے صفائی کےلئے زیادہ ٹھنڈی اشیاء کا ذکر کیا گیا ہے۔
کہ دل کو ٹھنڈ اور تسکین حاصل ہوجائے۔

(5)
نبی کریمﷺ معصوم تھے۔
لیکن اظہار عبودیت کےلئے اور امت کو تعلیم دینے کےلئے استغفار فرماتے تھے۔

حدیث حاشیہ:
فوائد ومسائل:
رسول اللہ صلی اللہ علیہ وسلم اگرچہ عام گناہوں اور کوتاہیوں سے محفوظ تھے۔
لیکن قریباں رابیش بود حیرانی کے فطری اصول کے مطابق،
آپﷺ ان لغزشوں اور کوتاہیوں سے سخت لرزاں اور ترساں رہتے تھے جو بشری تقاضوں کے تحت بھول چوک کے سبب آپﷺ سے سرزد ہو سکتی تھیں اور معصیت ونافرمانی نہ ہونے کے باوجود آپﷺ کی بلند و بالا شان اور مقام تقریب کےلحاظ سے قابل گرفت ہو سکتی تھیں۔
مشہور مقولہ ہے۔
(حَسَنَاتُ الْأَبْرَارِ سَيِّئٰاتُ الْمُقَرَّبِيْن)
جن کے رتبے ہیں سواء ان کو سوا مشکل ہے اور آپﷺ کی دعا سے معلوم ہوتا ہے انسان کسی قدر بھی بلند و بالا مقام پر فائز ہو جائے وہ بشریت کے تقاضوں سے نہیں نکل سکتا اور اللہ تعالیٰ کی توفیق و راہنمائی کے بغیر خطاؤں اور لغزشوں سے دور نہیں رہ سکتا اور گناہ مادی میل کچیل کی طرح دل اور روح کی میل کچیل ہیں اور اللہ کے غضب کی آگ اور اس کی سوزش وجلن کا سبب ہیں،
اس لیے اس حدت وسوزش کو اللہ کی بخشش ورحمت کے پانی،
برف اور اولوں سے ٹھنڈا کرنے کی ضرورت ہے۔

حدیث حاشیہ:
دعائے استفتاح کئی طرح پرواردہے مگر سب میں صحیح دعا یہی ہے اور سبحانک اللهم جسے عموماً پڑھا جاتا ہے وہ بھی حضرت عائشہ ؓ سے مروی ہے۔
مگراس روایت کی سند میں ضعف ہے، بہرحال اسے بھی پڑھا جاسکتاہے۔
مگرترجیح اسی کو حاصل ہے، اور اہل حدیث کا یہی معمول ہے۔

حدیث حاشیہ:
(1)
اسے دعائے استفتاح کہا جاتا ہے۔
امام بخاری ؒ نے یہ ثابت کیا ہے کہ تکبیر تحریمہ اور فاتحہ کے درمیان کچھ پڑا جا سکتا ہے۔
واضح رہے کہ دیگر ادعیۂ افتتاح بھی احادیث میں وارد ہیں مگر مذکورہ دعا صحیح ترین ہے اور اسے آہستہ پڑھنا چاہیے۔
اس کے علاوہ مندرجہ ذیل دعا بھی پڑھی جاسکتی ہے جو مختصر، آسان اور جامع ہے:
(سبحانك اللهم وبحمدك وتبارك اسمك وتعاليٰ جدك ولا إله غيرك) (سنن أبي داود،الصلاة، حدیث: 776)
سنن بیہقی کی ایک روایت سے معلوم ہوتا ہے کہ افتتاح کے طور پر مختلف دعاؤں کو جمع بھی کیا جاسکتا ہے، لیکن سند کے لحاظ سے یہ روایت صحیح نہیں جیسا کہ امام بیہقی نے خود وضاحت کردی ہے۔
(السنن الکبرٰی للبیھقي، باب من روی الجمع بینھما: 2/35)
(2)
دعائے استفتاح کے بعد چونکہ قراءت شروع کرنی ہے، اس لیے قرآن کریم کے حکم کے پیش نظر تعوذ پڑھنا بھی سنت ہے۔
حضرت ابو سعید خدری ؓ سے روایت ہے کہ رسول اللہ ﷺ جب نماز کے لیے کھڑے ہوتے تو دعائے استفتاح کے بعد مندرجہ ذیل تعوذ پڑھتے:
(أعوذ بالله السميع العليم من الشيطان الرجيم من همزه و نفخه و نفثه) (سنن أبي داود، الصلاة، حدیث: 775)
ارشاد باری تعالیٰ ہے:
﴿فَإِذَا قَرَأْتَ الْقُرْآنَ فَاسْتَعِذْ بِاللَّـهِ مِنَ الشَّيْطَانِ الرَّجِيمِ ﴿٩٨﴾ ”جب تم قرآن پڑھنے لگو تو شیطان مردود سے اللہ کی پناہ طلب کرو۔
“ (النحل98: 16)
اس آیت کے عموم سے استدلال کرتے ہوئے متقدمین نے ہر رکعت کے شروع میں تعوذ کی مشروعیت کو بیان کیا ہے جبکہ راجح بات یہ ہے کہ تعوذ صرف پہلی رکعت ہی میں پڑھا جائے۔
جیسا کہ مندرجہ ذیل حدیث اس کا واضح ثبوت ہے:
رسول اللہ ﷺ جب دوسری رکعت کے لیے اٹھتے تھے تو ﴿الْحَمْدُ لِلَّـهِ رَبِّ الْعَالَمِينَ﴾ کے ساتھ قراءت شروع کرتے تھے۔
(صحیح مسلم، المساجدومواضع الصلاة، حدیث: 1356(599)