فوائد ومسائل:
(۱)اس حدیث سے معلوم ہوا کہ مرد عورت کو چھینک کا جواب دے سکتا ہے، البتہ غیر محرم کو، جسے جواب دینے میں کسی فتنے کا اندیشہ ہو، جواب دینے سے گریز کیا جائے۔
(۲) موجودہ نسخے اور صحیح الادب المفرد والے نسخے میں ام الفصل سے پہلے ابنتہ کا اضافہ ہے اور ام الفصل کو اس سے بدل بنایا گیا ہے۔ فضل اللہ الصمد والے نسخے کے حاشیہ میں شیخ البانی کے حوالے سے ہے کہ یہ اصل سے لفظ رہ گیا ہے میں نے اسے صحیح مسلم اور طبرانی وغیرہ سے درست کیا ہے۔ لیکن شاید یہ کاتب کی غلطی ہے کہ اس نے ابنۃ کو ابنتہٖ بنا دیا ہے یا شیخ رحمہ اللہ کو سہو ہوا ہے کیونکہ صحیح مسلم میں ابنۃ الفصل بن عباس ہے، یعنی فضل بن عباس کی بیٹی جو ابو موسیٰ اشعری کی بیوی تھی جس سے حسن بن علی سے علیحدگی کے بعد ابو موسیٰ نے نکاح کیا تھا۔ موجودہ صورت میں عبارت کا مفہوم بالکل غلط ہو جاتا ہے اور وہ یہ کہ ابو موسیٰ اپنی بیٹی ام فضل کے پاس تھے حالانکہ ایسے نہیں ہے۔ اس لیے یا تو ام الفصل ہی رہنے دیا جائے جو ام کلثوم کی کنیت ہوسکتی ہے یا پھر ابنۃ الفضل بن عباس کیا جائے۔ جیسا کہ صحیح مسلم میں ہے اور یہی آخری زیادہ قرین صواب ہے اور میں نے متن بھی صحیح مسلم کے مطابق کر دیا ہے۔
(۳) فضل بن عباس رضی اللہ عنہما کی اس بیٹی کا نام ام کلثوم تھا۔