فوائد ومسائل:
(۱)مذکورہ حدیث میں عزت و شرف کی مختلف صورتوں کا ذکر ہے۔ شرف و عزت کی سب سے اعلیٰ صورت یہ ہے کہ انسان تقویٰ اختیار کرکے اعمال صالحہ کے ذریعے سے اللہ کا قرب حاصل کرے پھر آپ نے بتایا کہ حسب و نسب کے لحاظ سے اگر کوئی شخص سب سے زیادہ معزز ہے تو وہ سیدنا یوسف علیہ السلام ہیں کیونکہ ان کے باپ دادا اور پردادا بھی انبیاء تھے کیونکہ ان میں علم و نبوت اور اعلیٰ اخلاق کی تمام خوبیاں موجود تھیں۔ اور جہاں تک عرب کے خاندانوں کا تعلق ہے تو جو جاہلیت میں شرف و عزت والا تھا وہ اسلام میں بھی زیادہ عزت والا ہے لیکن اس کے لیے شرط یہ ہے کہ اسلام قبول کرنے کے بعد وہ اس میں فقاہت حاصل کرے، یعنی خاندانی شرف و عزت کے ساتھ ساتھ اگر کوئی شخص علم و عمل میں بھی آگے بڑھ جاتا ہے تو یہ یقیناً دوسروں سے زیادہ معزز ہوگا۔ گویا ایک شخص جاہلیت میں بھی شرف و عزت والا تھا پھر اسلام قبول کرکے اس نے علم و عمل میں بھی مقام پیدا کیا تو یہ سب سے زیادہ عزت والا ہے بہ نسبت اس شخص کے جو جاہلیت میں تو عزت والا نہیں تھا لیکن اسلام میں اس نے فقاہیت حاصل کی۔
خلاصہ کلام یہ ہے کہ اصل عزت و شرف ایمان اور عمل صالح ہی سے حاصل ہوتا ہے۔ محض خاندانی نسبت کوئی فائدہ نہیں دیتی۔
(۲) اسلام نے خاندانی عزت و شرف کا اعتبار کیا ہے۔ اسی طرح اگر اللہ تعالیٰ نے کسی کو عزت دی ہے تو اس کی عزت و تکریم کرنا ضروری ہے، تاہم شرعی احکام پر عمل کرنے میں سب برابر ہیں اور حدود اللہ کا نفاذ بھی سب پر برابر ہوگا۔