سیدنا ابوہریرہ رضی اللہ عنہ سے روایت ہے کہ فرمایا رسول اللہ صلی اللہ علیہ وسلم نے: ”جب جوتا پہنے کوئی تم میں سے تو چاہیے کہ داہنے پیر میں اوّل پہنے اور جب اتارے تو پہلے بائیں پیر کا اتارے، تو داہنا پیر پہنتے وقت شروع میں رہے اور اتارتے وقت اخیر میں رہے۔“

کعب الاحبار سے روایت ہے کہ ایک شخص نے اپنی جوتی اتاری۔ کعب الاحبار نے کہا: تم نے کیوں جوتیاں اتاریں؟ شاید تم نے اس آیت کو دیکھ کر اتاری ہوں گی، اللہ جل جلالہُ نے موسیٰ علیہ السلام سے جب وہ طور پر جانے لگے، فرمایا: «﴿فَاخْلَعْ نَعْلَيْكَ﴾» ”اتار جوتیاں اپنی“، مگر تو جانتا ہے موسیٰ علیہ السلام کی جوتیاں کاہے کی تھیں؟
کہا امام مالک رحمہ اللہ نے کہ مجھے معلوم نہیں اس شخص نے کیا جواب دیا۔ کعب نے کہا: حضرت موسیٰ علیہ السلام کی جوتیاں مردہ گدھے کی کھال کی تھیں۔

سیدنا ابوہریرہ رضی اللہ عنہ سے روایت ہے کہ منع کیا رسول اللہ صلی اللہ علیہ وسلم نے دو لباسوں سے، اور دو بیعوں سے، ایک بیع ملامسہ، اور دوسرے بیع منابذہ سے، اور ایک کپڑا اوڑھ کر احتباء کرنے سے، جب کہ اس کی شرمگاہ پر کوئی کپڑا نہ ہو، اور ایک کپڑا سارے بدن پر لپیٹ لینے سے۔

سیدنا عبداللہ بن عمر رضی اللہ عنہما سے روایت ہے کہ سیدنا عمر بن خطاب رضی اللہ عنہ نے ایک کپڑا ریشمی بکتا ہوا دیکھا مسجد کے دروازے پر، انہوں نے رسول اللہ صلی اللہ علیہ وسلم سے کہا: کاش آپ صلی اللہ علیہ وسلم اس کو خرید لیتے اور جمعہ کے روز اور جس روز آپ صلی اللہ علیہ وسلم کے پاس وفد کے لوگ آیا کرتے ہیں پہنا کرتے۔ رسول اللہ صلی اللہ علیہ وسلم نے فرمایا: ”اس کپڑے کو وہ شخص پہنے گا جس کا آخرت میں کچھ حصّہ نہیں ہے۔“ پھر اسی قسم کے چند کپڑے آپ صلی اللہ علیہ وسلم کے پاس آئے، آپ صلی اللہ علیہ وسلم نے ان میں سے ایک کپڑا سیدنا عمر رضی اللہ عنہ کو دیا، سیدنا عمر رضی اللہ عنہ نے کہا: یا رسول اللہ صلی اللہ علیہ وسلم ! پہلے تو آپ صلی اللہ علیہ وسلم نے عطارد (بن حاجب نام ہے ایک شخص کا) کے کپڑے کی بابت فرمایا تھا کہ اس کو وہ شخص پہنے گا جس کا آخرت میں کچھ حصّہ نہیں؟ آپ صلی اللہ علیہ وسلم نے فرمایا: ”میں نے تجھے یہ کپڑا پہننے کو تھوڑی دیا ہے۔“ پھر سیدنا عمر رضی اللہ عنہ نے وہ کپڑا اپنے ایک کافر بھائی (عثمان بن حکیم) کو دے دیا جو مکّہ میں تھا۔

سیدنا انس بن مالک رضی اللہ عنہ نے کہا: میں نے سیدنا عمر رضی اللہ عنہ کو دیکھا جب کہ وہ امیر المؤمنین تھے، ان کے دونوں مونڈھوں کے بیچ میں کرتے میں تین پیوند لگے تھے، ایک کے اوپر ایک۔

سیدنا انس بن مالک رضی اللہ عنہ کہتے تھے کہ رسول اللہ صلی اللہ علیہ وسلم نہ لمبے تھے بہت، نہ ٹھگنے تھے، نہ سفید تھے چونے کی طرح، نہ بہت گندمی، اور بال آپ صلی اللہ علیہ وسلم کے بہت گھونگریالے بھی نہ تھے، اور بہت سیدھے بھی نہ تھے، جب آپ صلی اللہ علیہ وسلم کا سن (یعنی عمر) چالیس برس کا ہوا تو اللہ جل جلالہُ نے آپ صلی اللہ علیہ وسلم کو نبوت عطاء فرمائی، پھر بعد نبوت کے آپ صلی اللہ علیہ وسلم مکّہ میں دس برس رہے، اور مدینہ میں دس برس رہے، اور ساٹھ برس کی عمر میں آپ صلی اللہ علیہ وسلم کی وفات ہوئی، اس وقت آپ صلی اللہ علیہ وسلم کے سر اور داڑھی میں بیس بال بھی سفید نہ ہوں گے۔

سیدنا عبداللہ بن عمر رضی اللہ عنہما سے روایت ہے کہ فرمایا رسول اللہ صلی اللہ علیہ وسلم نے: ”مجھ کو خواب میں ایک رات معلوم ہوا کہ کعبہ کے پاس ہوں، تو میں نے ایک شخص کو دیکھا گندمی رنگ جیسے کہ تو نے بہت اچھے گندمی رنگ کے آدمی دیکھے ہوں، اس کے کندھوں تک بال ہیں جیسے کہ تونے بہت اچھے کندھوں تک بال دیکھے ہیں، سو اس مرد نے اس بال میں کنگھی کی ہے تو ان سے پانی ٹپکتا ہے، دو آدمیوں پر تکیہ لگائے“، یا یوں فرمایا: ”دو آدمیوں کے کندھوں پرتکیہ لگائے، وہی شخص بیت الله کا طواف کرتا ہے، سو میں نے پوچھا: کون شخص ہے؟ تو کسی نے مجھ سے کہا کہ یہ مسیح ہے مریم کا بیٹا، پھر میں نے یکایک ایک اور شخص دیکھا، نہایت گھنگریالے بال والا، داہنی آنکھ کا کانا، اس کی کانی آنکھ ایسی تھی جیسے پھولا ہوا انگور، سو میں نے پوچھا کہ یہ کون شخص ہے؟ کسی نے مجھ سے کہا: یہ مسیح دجال ہے۔“

سیدنا ابوہریرہ رضی اللہ عنہ سے روایت ہے کہ پانچ چیزیں پیدائشی سنّت ہیں، ایک ناخن کاٹنا، دوسرے مونچھیں کتروانا، تیسرے بغل کے بال اکھاڑنا، چوتھے زیرِ ناف کے بال مونڈھنا، پانچویں ختنہ کرنا۔

حضرت سعید مسیّب نے کہا کہ حضرت ابراہیم علیہ السلام ہی نے سب سے پہلے مہمان کی ضیافت کی، اور سب سے پہلے ختنہ کیا، اور سب سے پہلے مونچھیں کتریں، اور سب سے پہلے سفید بال کو دیکھ کر کہا: ”اے پروردگار! یہ کیا ہے؟“ اللہ جل جلالہُ نے فرمایا: ”یہ عزت اور وقار ہے۔“ حضرت ابراہیم علیہ السلام نے کہا: ”تو اے پروردگار! زیادہ عزت دے مجھ کو۔“

امام مالک رحمہ اللہ نے فرمایا کہ مونچھوں کو اتنا کترنا چاہیے کہ ہونٹ کے کنارے کھل جائیں، یہ نہیں کہ بالکل کتر ڈالے۔