نافع سے روایت ہے کہ سیدنا عبداللہ بن عمر رضی اللہ تعالیٰ عنہما غسل کرتے تھے عید الفطر کے دن قبل عیدگاہ جانے کے۔
امام مالک رحمہ اللہ نے فرمایا کہ میں نے سنا ہے بہت علماء سے کہتے تھے: عید الفطر اور عید الاضحیٰ میں اذان اور اقامت نہ تھی رسول اللہ صلی اللہ علیہ وسلم کے زمانے سے اب تک۔
امام مالک رحمہ اللہ نے کہا: ہمارے نزدیک اس میں کچھ اختلاف نہیں۔

نافع رحمہ اللہ سے روایت ہے کہ سيدنا عبدالله بن عمر رضی اللہ عنہما عید الفطر کے دن عیدگاہ کی طرف جانے سے پہلے غسل کرلیا کرتے تھے۔

ابن شہاب سے روایت ہے کہ رسول اللہ صلی اللہ علیہ وسلم نماز پڑھتے عید الفطر اور عید الاضحیٰ کی خطبہ سے پہلے (یعنی خطبہ عیدین کا بعد نمازِ عیدین کے پڑھتے تھے)۔

امام مالک رحمہ اللہ کو پہنچا کہ سیدنا ابوبکر رضی اللہ عنہ اور سیدنا عمر رضی اللہ عنہ بھی ایسا ہی کرتے تھے۔ (یعنی بعد نماز کے خطبہ پڑھتے تھے عیدین میں)۔

حضرت ابوعبید سے جو مولیٰ ہیں عبدالرحمٰن بن ازہر کے، روایت ہے کہ میں حاضر ہوا عید کو ساتھ سیدنا عمر بن خطاب رضی اللہ تعالیٰ عنہ کے تو نماز پڑھی سیدنا عمر رضی اللہ عنہ نے پھر فارغ ہوئے اور خطبہ پڑھا تو کہا کہ یہ دو دن (عید الفطر اور عید الاضحیٰ کے) وہ دن ہیں کہ منع کیا رسول اللہ صلی اللہ علیہ وسلم نے روزہ رکھنے سے ان دنوں میں، یہ عید الفطر وہ دن ہے جس دن تم روزہ موقوف کرتے ہو، اور عید الاضحیٰ وہ دن ہے کہ اس دن اپنی قربانی کا گوشت کھاتے ہو۔ ابوعبیدہ نے کہا کہ پھر حاضر ہوا میں عید کو سیدنا عثمان بن عفان رضی اللہ تعالیٰ عنہ کے ساتھ تو انہوں نے آکر نماز پڑھی پھر نماز سے فارغ ہو کر خطبہ پڑھا، اور کہا کہ آج کے روز دو عیدیں ہیں (ایک عید الفطر اور ایک جمعہ) تو جس شخص کا جی چاہے باہر والوں سے تو ٹھہر جائے جمعہ کے واسطے، اور جو چاہے کہ اپنے گھر جائے تو چلا جائے①، میں نے اجازت دی۔ کہا ابوعبید نے: پھر حاضر ہوا میں عید کو ساتھ سیدنا علی بن ابی طالب رضی اللہ تعالیٰ عنہ کے اور سیدنا عثمان رضی اللہ تعالیٰ عنہ گھرے ہوئے تھے②، تو سیدنا علی رضی اللہ تعالیٰ عنہ نے آکر نماز پڑھائی، پھر نماز سے فارغ ہوکر خطبہ پڑھا۔

حضرت عروہ بن زبیر عید الفطر کے روز کھانا کھا لیتے قبل نماز کو جانے کے۔

حضرت سعید بن مسیّب سے روایت ہے کہ لوگوں کو حکم ہوتا تھا کھانا کھا لینے کا قبل نماز کو جانے کے۔
امام مالک رحمہ اللہ نے فرمایا کہ میں کھانا کھانا لازم نہیں دیکھتا عید الاضحیٰ میں قبل نماز کے۔

سیدنا عمر بن خطاب رضی اللہ تعالیٰ عنہ نے پوچھا سیدنا ابوواقد لیثی رضی اللہ تعالیٰ عنہ سے کہ رسول اللہ صلی اللہ علیہ وسلم کون سی سورتیں پڑھتے تھے عیدین میں؟ بولے: سورۂ قاف اور سورۂ قمر۔

حضرت نافع سے روایت ہے کہ میں نے نماز پڑھی عید الاضحیٰ اور عید الفطر کی ساتھ سیدنا ابوہریرہ رضی اللہ تعالیٰ عنہ کے، تو پہلی رکعت میں سات تکبیریں کہیں قبل قرأت کے، اور دوسری رکعت میں پانچ تکبیریں قبل قرأت کے۔

امام مالک رحمہ اللہ نے فرمایا: ہمارے نزدیک یہی حکم ہے۔
امام مالک رحمہ اللہ نے فرمایا: اگر کوئی شخص پہنچا عیدگاہ میں اور دیکھا کہ لوگ فارغ ہو گئے ہیں عید کی نماز سے تو وہ عید کی نماز نہ پڑھے، نہ عیدگاہ میں نہ اپنے گھر میں، اس پر بھی اگر اس نے پڑھ لی عیدگاہ میں یا اپنے گھر میں تو کچھ قباحت نہیں ہے، لیکن پہلی رکعت میں سات تکبیریں کہے قبل قراءت اور دوسری رکعت میں پانچ قبل قراءت کے۔ اور سفیان ثوری رحمہ اللہ اور امام احمد رحمہ اللہ کے نزدیک اگر اکیلے نماز عید کی پڑھے تو چار رکعتیں پڑھے، کیونکہ روایت کیا سعید بن منصور نے کہ جس شخص کی فوت ہو جائے نمازِ عید امام کے ساتھ تو وہ چار رکعتیں پڑھے۔ عید کی نماز امام ابوحنیفہ رحمہ اللہ کے نزدیک واجب ہے اور امام مالک رحمہ اللہ اور جمہور علماء کے نزدیک سنت ہے اور یہی صحیح ہے۔