تخریج الحدیث:
[وأخرجه مسلم 578، من حديث ما لك به]

تفقه:
➊ نماز میں سجدہ تلاوت آ جائے تو سجدہ کرنا سنت ہے۔
➋ سجدہ تلاوت واجب نہیں ہے۔ ایک دفعہ سیدنا زید بن ثابت رضی اللہ عنہ نے رسول اللہ صلی اللہ علیہ وسلم کے سامنے سورۃ النجم پڑھی جس میں سجدے والی آیت ہے تو آپ صلی اللہ علیہ وسلم نے سجدہ نہیں کیا تھا۔ دیکھئے [صحيح بخاري 1072، وصحيح مسلم 577]
➌ سیدنا عمر بن الخطاب رضی اللہ عنہ فرماتے تھے: جو سجدہ کرے تو ٹھیک کیا اور جو سجدہ نہ کرے تو اس پر کوئی گناہ نہیں ہے۔ [صحيح بخاري 1077]
● سیدنا عمر رضی اللہ عنہ نے سجدہ تلاوت والی آیت پڑھ کر سجدہ نہیں کیا تھا۔ [صحيح بخاري 1077]
➍ حدیث بالا میں نماز سے مراد عشاء کی نماز ہے۔ دیکھئیے [صحيح بخاري 1078]
سنت نبوی صلی اللہ علیہ وسلم کی تعلیم کے لئےعملاً کردار ادا کرنا چاہئے۔

966 ۔ اردو حاشیہ: امام مالک رحمہ اللہ اس سجدے کو بھی منسوخ سمجھتے ہیں مگر ان کا موقف مذکورہ روایات کے پیش نظر درست نہیں ہے خصوصاً آخری روایت کیونکہ اس میں خلفائے راشدین ابوبکر اور عمر رضی اللہ عنہما کا عمل بھی ثابت ہے۔

968 ۔ اردو حاشیہ:
➊ امام مالک رحمہ اللہ اس سجدے کے بھی قائل نہیں ہیں۔ وہ اسے منسوخ سمجھتے ہیں مگر یہ بات نہ صرف بلادلیل ہے بلکہ خلاف سنت ہے۔
➋ امام ننسائی رحمہ نے صرف ان سجدوں کے ابواب باندھے ہیں جن میں اختلاف ہے۔ باقی متفق علیہ سجدوں کا ذکر نہیں کیا، البتہ سورۂ حج کا دوسرا سجدہ بھی باوجود اختلافی ہونے کے ذکر نہیں کیا۔ احناف و موالک اس سجدے کو نہیں مانتے۔ ان کے نزدیک یہ صلاتی سجدہ (نماز والا سجدہ) ہے۔
➌ قرآن مجید میں کل پندرہ (15) سجدے مذکور ہیں۔ حنابلہ اور اہل حدیث ان سب کے قائل ہیں۔ احناف اور شوافع چودہ سجدوں کے قائل ہیں جب کہ امام مالک کل گیارہ سجدے مانتے ہیں لیکن احادیث سے قرآن پاک میں 15 سجود تلاوت کا ذکر ملتا ہے، لہٰذا قرآن مجید کی تلاوت کرتے ہوئے 15 مقامات پر سجدہ کرنا مستب ہے۔

969 ۔ اردو حاشیہ: ابورافع کا انکار مذکورہ سورت میں سجدے پر ہو سکتا ہے اور مطلقاً نماز میں سجدۂ تلاوت کرنے پر بھی۔ دونوں صورتوں میں اعتراض غلط ہے۔ مذکورہ صورت میں بھی سجدہ ثابت ہے اور نماز میں سجدۂ تلاوت کرنا بھی۔

1408. اردو حاشیہ: سجدہ تلاوت نماز کے دوران میں بھی کیاجاتا ہے۔نماز خواہ فرض ہو یا نفل۔

فائدہ:
اس حدیث میں سجدۂ تلاوت کا ذکر ہے، اور سجدۂ تلاوت کرنا مستحب ہے، دیکھیے [صحيح البخاري: 1022، 1027]
، جس طرح قرأت کر نے والا سجدہ کرتا ہے، اسی طرح سننے والا بھی سجدہ کرے گا۔

حدیث حاشیہ:
فوائد ومسائل:
حضرت ابوہریرۃ رضی اللہ تعالیٰ عنہ 7 ہجری میں مسلمان ہوئے ہیں اور انہوں نے مفصل سورتوں میں سے دو کے سجدہ کا تذکرہ کیا ہے،
جو اس بات کی دلیل ہے کہ ان سورتوں میں بھی سجدہ کیا جائےگا۔
امام مالک رحمۃ اللہ علیہ کے نزدیک قرآن مجید میں گیارہ سجدے ہیں۔
وہ سُوْرَۃُ ص اور سُوْرَۃُ النَّجْم،
اِنْشِقَاقْ اور اِقْرَأْ میں سجدہ نہیں مانتے۔
امام شافعی رحمۃ اللہ علیہ کے نزدیک چودہ سجدے ہیں اور وہ بھی سُوْرَۃُ ص کا سجدہ نہیں مانتے اور سُوْرَةُ حَجْ میں دو سجدے مانتے ہیں امام ابوحنیفہ رحمۃ اللہ علیہ کے نزدیک بھی چودہ سجدے ہیں وہ سُوْرَةُ ص کا سجدہ مانتے ہیں اور سُوْرَةُ حَجْ میں ایک سجدہ سمجھتے ہیں۔
امام احمد رحمۃ اللہ علیہ اور محدثین کے نزدیک پندرہ سجدے ہیں وہ سب کو تسلیم کرتے ہیں۔

حدیث حاشیہ:
(1)
ایک روایت میں ہے کہ میں نے حضرت ابو القاسم ﷺ کے پیچھے نماز پڑھی تھی۔
آپ نے یہی سورت تلاوت کی تھی اور اس میں سجدہ کیا تھا۔
(صحیح ابن خزیمة: 282/1، حدیث: 561)
(2)
امام بخاری ؒ کا مقصد یہ ہے کہ نماز عشاء میں بآواز بلند قراءت کرنی چاہیے اور نماز میں ایسی سورت بھی پڑھی جاسکتی ہے جس میں سجدۂ تلاوت ہو۔

حدیث حاشیہ:
(1)
ایک حدیث میں ہے کہ حضرت ابو ہریرہ ؓ نے فرمایا:
اگر میں نے رسول اللہ ﷺ کو اس سورت میں سجدہ کرتے نہ دیکھا ہوتا تو میں بھی اس میں سجدہ نہ کرتا۔
(صحیح البخاري، سجودالقرآن، حدیث: 1074)
(2)
دراصل مالکیہ کے نزدیک فرائض کی نماز میں ایسی سورت تلاوت کرنا مکروہ ہے جس میں سجدہ ہو، امام بخارى ؒ نے اس موقف کی تردید کرت ہوئے مذکورہ عنوان قائم کرکے یہ حدیث پیش کی ہے کہ اس میں کوئی حرج نہیں۔
نماز میں سجدے والی سورت پڑھی جاسکتی ہے۔

حدیث حاشیہ:
امام بخاری ؒ یہ بتانا چاہتے ہیں کہ اہل مدینہ کا مفصل کی سورتوں میں سجدہ نہ کرنا کوئی حیثیت نہیں رکھتا جب رسول اللہ ﷺ اور آپ کے بعد خلفائے راشدین کا عمل اس کے برعکس ہے، یعنی وہ مفصل کی سورتوں میں سجدہ کرتے تھے۔
مذکورہ روایت کے مطابق ابو سلمہ نے حضرت ابو ہریرہ ؓ پر اعتراض کیا جبکہ آگے حدیث:
(1078)
میں ہے کہ ابو رافع نے بھی حضرت ابو ہریرہ ؓ سے اس کے متعلق دریافت کیا۔
جب حضرت ابو ہریرہ نے حدیث کا حوالہ دیا تو دونوں خاموش ہو گئے اور اس کے خلاف اہل مدینہ کے عمل کا حوالہ نہیں دیا۔
(فتح الباري: 718/2)
واضح رہے کہ حضرت ابو ہریرہ ؓ مدینہ طیبہ میں مسلمان ہوئے تھے اور انہوں نے رسول اللہ ﷺ کو مدینہ ہی میں سجدہ کرتے دیکھا تھا۔
علاوہ ازیں مصنف عبدالرزاق میں ہے کہ حضرت عمر اور ابن عمرؓ دونوں باپ بیٹے سے اس سورت میں سجدہ کرنا ثابت ہے۔
(فتح الباري: 718/2)
اس کا مطلب یہ ہے کہ رسول اللہ ﷺ کے بعد بھی اہل مدینہ کا عمل حدیث کے مطابق تھا۔
واللہ أعلم۔

حدیث حاشیہ:
امام مالک ؒ سے منقول ہے کہ وہ فرض نماز میں آیت سجدہ کی تلاوت کو مکروہ خیال کرتے ہیں۔
امام بخاری ؒ نے اس عنوان اور پیش کردہ حدیث سے اس موقف کی تردید کی ہے۔
امام بخاری ؒ کے استدلال کی بنیاد یہ ہے کہ حضرت ابو ہریرہ ؓ نے رسول اللہ ﷺ کے پیچھے اس سورت میں سجدہ کیا۔
ابن خزیمہ کی ایک روایت میں مزید وضاحت ہے کہ حضرت ابو ہریرہ ؓ نے فرمایا:
میں نے رسول اللہ ﷺ کی اقتدا میں نماز ادا کی تو آپ نے اس سورت میں سجدہ کیا۔
(صحیح ابن خزیمة: 282/2، حدیث: 561)
اس سے معلوم ہوا کہ آیت سجدہ کو فرض نماز میں پڑھا جا سکتا ہے، اور دوران نماز سجدہ کرنے میں کوئی قباحت نہیں۔
(فتح الباري: 324/2)