حدیث حاشیہ:
معلوم ہوا کہ پندرہ سال کی عمر میں مرد بالغ تصور کیا جا تا ہے اور اس پر شرعی احکام پورے طور پر لاگو ہوجاتے ہیں۔

حدیث حاشیہ:
1۔
اس حدیث سے معلوم ہوتا ہے کہ غزوہ احد اور غزوہ خندق کے درمیان ایک سال کا وقفہ تھا کیونکہ غزوہ احد کے وقت حضرت عبد اللہ بن عمر ؓ کی عمر چودہ برس تھی اور غزوہ خندق میں وہ پندرہ سال کے ہو گئےتھے۔
2۔
دراصل امام بخاری ؒ نے اس حدیث کو موسیٰ بن عقبہ کی تائید میں پیش کیا ہے کہ غزوہ خندق چار ہجری میں ہوا کیونکہ غزوہ احد کا تین ہجری میں ہونا یقینی ہے اور ایک سال بعد غزوہ خندق ہوا تو اس کا واضح مطلب ہے کہ وہ چار ہجری میں ہوا لیکن دوسرے سیرت نگاروں کا کہنا ہے کہ غزوہ خندق پانچ ہجری میں ہوا کیونکہ غزوہ احد کے موقع پر ابو سفیان نے کہا تھا کہ آئندہ سال پھر بدر کے مقام پر لڑائی ہوگی مگر مکے میں قحط پڑ جانے کی وجہ سے ان کی تیاری نہ ہوسکی تو وہ اس سال یعنی چار ہجری میں نہ آئے جبکہ نبی ﷺ چار ہجری میں بدر کی طرف تشریف لے گئے تھے تاہم ابو سفیان اور دیگر مشرکین مکہ وگیرہ کے وہاں نہ آنے کی وجہ سے آپ ﷺ مدینہ طیبہ واپس تشریف لے آئے پھر اس کے بعد آئندہ سال پانچ ہجری میں ابو سفیان نے مختلف قبائل اور یہود مدینہ کو ساتھ ملا کر مدینے پر چڑھائی کی۔
3۔
حضرت عبد اللہ بن عمر ؓ کی پیش کردہ حدیث کا جواب یہ ہے کہ غزوہ احد کے وقت ان کی عمرکا چودھواں سال شروع ہو چکا تھا اور غزوہ خندق میں ان کی عمر کے پندرھویں سال کا اختتام تھا اس طرح غزوہ خندق کے درمیان دو سال کی مدت کا ہونا ناممکن نہیں ہے۔
اس لیے غزوہ خندق عام مشہور اور قابل اعتماد قول کے مطابق پانچ ہجری میں ہوا۔
(فتح الباری: 7/491)
واللہ اعلم۔

تخریج:
«أخرجه البخاري، الشهادات، باب بلوغ الصبيان وشهادتهم، حديث:2664، ومسلم، الإمارة، باب بيان سن البلوغ، حديث:1868، والبيهقي:3 /83.» تشریح:
1. اس حدیث کی رو سے تصرفات کی عمر پندرہ سال میں شروع ہو جاتی ہے جسے قابل قبول اور قابل تسلیم سمجھا گیا ہے۔
2. مصنف بھی اس حدیث کو اس باب میں یہی بتانے کے لیے لائے ہیں کہ خرید و فروخت کس عمر کی قابل اعتبار ہے۔
گویا پندرہ سال سے کم عمر‘ بچہ اور پندرہ سال کا نوجوان‘ مردوں کے حکم میں آجاتا ہے۔
3.اس حدیث سے نوجوان کا شوق جہاد ملاحظہ کیجیے کہ آگے بڑھ کر خود اپنے آپ کو خدمت جہاد کے لیے پیش کرتا ہے۔
پہلی بار ناکامی کے بعد اگلے سال پھر قسمت آزمائی کرتا ہے اور اپنے عزم و ارادے میں کامیاب ہو جاتا ہے۔
4.معلوم ہوا کہ فوج میں بھرتی کے لیے اس سے کم عمر والوں کو نہیں لینا چاہیے۔
5.اس سے یہ اصول بھی نکلا کہ فوج کی بھرتی کے لیے پہلے جسمانی ٹیسٹ لینا چاہیے‘ اگر مناسب نہ ہو تو واپس بھیج دیا جائے۔

اردو حاشہ:
سرکاری دستاویزات میں پندرہ سال کے لڑکے کو بالغ اور اس سے کم کو نابالغ لکھا جائے گا کیونکہ حکومت کے پاس عمر وغیرہ کا ریکارڈ ہوتا ہے۔ باقی دو علامات میں ہیر پھیر ممکن ہے اگرچہ وہ قطعی علامات ہیں۔

فوائد ومسائل:
1۔
بچہ پندرہ سال کی عمر میں بالغ شمار ہوتا ہے۔
اور شرعی امور کا مکلف ہوجاتا ہے۔
لہذا اسے جنگ وقتال میں بھی شریک کیا جا سکتا ہے۔
اس سے پہلے اسے جنگ میں لے جانا درست نہیں۔

2۔
اور جب جنگ میں شریک ہوگا۔
تو غنیمت میں سے باقاعدہ حصہ پائے گا۔

3۔
پندرہ سال یا علامات بلوغت سے پہلے اگر کسی جرم کا ارتکاب کرے تو اس پر شرعی حد لاگو نہیں ہوگی۔
تعزیر وتادیب ہوگی۔
اسی طرح اس کی دی ہوئی طلاق بھی نافذ العمل نہیں ہوگی۔
فیصلے میں اس کے ولی کی شمولیت ضروری ہوگی اور اسے اپنے مال سے باقاعدہ اور آزادانہ تصرف کا اختیار بھی اس کے بعد حاصل ہوگا۔

فوائد ومسائل:
شرعی طور پر بالغ سمجھے جانےکے لئے پندرہ سال کی عمر کا اعتبار ہے، خواہ زیر ناف بال اگیں یا نہ احتلام ہو یا نہ اور نابالغ کو قتال میں شریک کرنا روا نہیں۔

اردو حاشہ:
فوائد و  مسائل:

(1)
اس حدیث سے علماء نے استدلال کیا ہے کہ پندرہ سال کی عمر بلوغت کی عمر ہے لہٰذااس عمر کےبچے کو بالغ شمار کرنا چاہیے۔

(2)
عام حالات میں بلوغت کی دوسری علامت پراعتماد کیا جاتا ہے مثلا:
زیر ناف بال آ جانا یا احتلام ہونا، لڑکیوں کا مہانہ نظام شروع ہونا۔
لیکن اگر کسی بچے یابچی میں مناسب عمرمیں یہ علامتیں ظاہرنہ ہوتوپندرہ سال عمر مکمل ہونے پرانھیں بالغ قرار دیا جا سکتا ہے۔

اردو حاشہ:
وضاحت:
1؎:
لڑکا یا لڑکی کی عمر سن ہجری سے جب پندرہ سال کی ہوجائے تو وہ بلوغت کی حدکو پہنچ جاتا ہے،
اسی طرح سے زیرناف بال نکل آنا اوراحتلام کا ہونا بھی بلوغت کی علامات میں سے ہے،
اور لڑکی کو حیض آجائے تو یہ بھی بلوغت کی نشانی ہے۔

حدیث حاشیہ:
معلوم ہوا کہ پندرہ سال کی عمر ہونے پر بچے پر شرعی احکام جاری ہوجاتے ہیں اور اس عمر میں وہ گواہی کے قابل ہوسکتا ہے۔

حدیث حاشیہ:
(1)
اس حدیث کے مطابق جب بچے کی عمر پندرہ برس ہو جائے تو اس پر بالغوں کے احکام جاری ہو جاتے ہیں۔
اس پر عبادات، حدود اور دیگر احکام شریعت بھی اسی عمر میں لازم ہوں گے۔
اس عمر میں وہ جنگ میں شریک ہو سکے گا اور مال غنیمت کا حق دار ہو گا۔
اگر وہ حربی کافر ہے تو اسے قتل کیا جائے گا۔
اس عمر میں اس کی گواہی بھی قبول کی جائے گی۔
اگر اس عمر سے پہلے احتلام شروع ہو جائے تو بھی بلوغ کے احکام نافذ ہوں گے۔
(2)
احتلام سے مراد اچھلنے والے پانی کا اترنا ہے، خواہ جماع سے ہو یا حالت نیند میں۔
عورتوں کے لیے حیض کی آمد ان کے بالغ ہونے کی علامت ہے۔
اس میں عمر کی کوئی حد نہیں ہوتی۔
صحت اور علاقائی اثرات کے اعتبار سے عمر مختلف ہو سکتی ہے۔