سیدنا ابن عباس رضی اللہ عنہما سے روایت ہے کہ انہوں نے کہا: جب تم کسی ایسے بادشاہ کے پاس آؤ جس کے حملہ کا تمہیں ڈر ہو تو تین بار یہ کہو: «الله أكبر . الله أعز من خلقه جميعاً، الله أعز مما أخاف وأحذر، أعوذ بالله الذى لا إله إلا هو، الممسك السماوات السبع أن يقعن على الأرض إلا بإذنه؛ من شر عبدك فلان، وجنوده وأتباعه وأشياعه من الجن والإنس . اللهم كن لي جاراً من شرهم، جل ثناؤك، وعز جارك، وتبارك اسمك، ولا إله غيرك» ”اللہ اکبر، اللہ اپنی ساری مخلوق سے زیادہ طاقتور ہے۔ اللہ اس سے بھی زیادہ طاقت ور ہے جس سے میں ڈرتا ہوں اور خوف کھاتا ہوں، میں اللہ کی پناہ چاہتا ہوں جس کے سوا کوئی معبود نہیں، وہی سات آسمانوں کو پکڑے ہوئے کہ کہیں زمین پر نہ گر جائیں مگر اس کے حکم کے ساتھ، تیرے فلاں بندے کے شر سے اور اس کی فوجوں سے، اور اس کے پیروکاروں سے اور جنوں اور انسانوں میں سے اس کے پیچھے چلنے والی چیزوں سے، یا اللہ! تو ان کے شر سے میرا پڑوسی بن جا، تیری تعریف عظیم ہے، تیری پناہ بہت مضبوط ہے، تیرا نام بابرکت ہے اور تیرے سوا کوئی معبود نہیں۔“ [صحيح الادب المفرد/حدیث: 549]

سیدنا ابوسعید خدری رضی اللہ عنہ نبی صلی اللہ علیہ وسلم سے روایت کرتے ہیں کہ جب کوئی مسلمان کوئی ایسی دعا کرتا ہے جو گناہ اور قطع رحمی کی نہ ہو، تو تین باتوں میں سے اسے ایک ضرور ملتی ہے یا تو اس کی دعا کو اللہ جلدی دے دیتے ہیں یا اس کو اس کے لیے آخرت میں ذخیرہ کر دیتے ہیں یا ویسی ہی برائی اس سے دور کر دیتے ہیں۔ انہوں نے کہا: تب تو ہم بہت زیادہ دعائیں کریں گے۔ انہوں نے کہا: اللہ بہت زیادہ دینے والا ہے۔ [صحيح الادب المفرد/حدیث: 550]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جو مومن بھی اپنا چہرہ اللہ کے سامنے گاڑھ دے اس سے کچھ بھی مانگے اللہ اسے وہ عطاء کر دیتا ہے یا تو اللہ اسے دنیا میں ہی جلد دے دیتا ہے یا اس کے لیے آخرت میں ذخیرہ کر دیتا ہے جب تک وہ جلد بازی سے کام نہ لے۔“ انہوں نے کہا: یا رسول اللہ! جلد بازی کیا ہے؟ فرمایا: ”وہ یوں کہے: میں نے بہت دعائیں کیں، بہت دعائیں کیں لیکن مجھے نظر نہیں آ رہا کہ میری دعائیں قبول ہو رہی ہیں۔“ [صحيح الادب المفرد/حدیث: 551]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”اللہ کے نزدیک دعا سے بڑھ کر کوئی چیز باعزت نہیں۔“ [صحيح الادب المفرد/حدیث: 552]

سیدنا نعمان بن بشیر رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”دعا ہی عبادت ہے۔“ پھر آپ نے (قرآن کی یہ آیت) تلاوت فرمائی: «ادعوني أستجب لكم» ”مجھ سے دعا کرو میں قبول کروں گا۔“ [صحيح الادب المفرد/حدیث: 553]

سیدنا معقل بن یسار رضی اللہ عنہ بیان کرتے ہیں کہ میں سیدنا ابوبکر رضی اللہ عنہ کے ساتھ نبی صلی اللہ علیہ وسلم کے پاس گیا، آپ صلی اللہ علیہ وسلم نے فرمایا: ”اے ابوبکر! البتہ تم لوگوں میں جو شرک پایا جاتا ہے وہ چیونٹی کی چال سے بھی زیادہ پوشیدہ ہے۔“ ابوبکر رضی اللہ عنہ نے کہا: کیا شرک یہ نہیں ہے کہ اللہ کے سوا کوئی اور الہ بنایا جائے؟ تو نبی صلی اللہ علیہ وسلم نے فرمایا: ”قسم اس ذات کی جس کے ہاتھ میں میری جان ہے شرک تو چیونٹی کے چلنے سے بھی زیادہ پوشیدہ ہے۔ کیا میں تمہیں ایسے کلمات نہ بتاؤں جب تم وہ کہو تو تم سے تھوڑا اور زیادہ (شرک) دور ہو جائے گا۔“ آپ صلی اللہ علیہ وسلم نے فرمایا: یہ کہا کرو: «اللهم إني أعوذ بك أن أشرك بك وأنا أعلم، وأستغفرك لما لا أعلم» ”یا اللہ! میں اس بات سے تیری پناہ چاہتا ہوں کہ میں اس حال میں شرک کروں کہ مجھے علم ہو اور میں اس شرک سے تیری معافی چاہتا ہوں جو میں نہیں جانتا۔“ [صحيح الادب المفرد/حدیث: 554]

سیدنا انس رضی اللہ عنہ سے مروی ہے انہوں نے کہا: جب تیز آندھی چلتی تھی تو نبی صلی اللہ علیہ وسلم فرماتے تھے: «اللهم إني أسألك من خير ما أُرسلت به، وأعوذ بك من شر ما أرسلت به» ”اے اللہ! میں تجھ سے وہ خیر مانگتا ہوں جس کے ساتھ اسے بھیجا گیا اور تجھ سے اس شر سے پناہ چاہتا ہوں جس کے ساتھ اسے بھیجا گیا۔“ [صحيح الادب المفرد/حدیث: 555]

سلمہ جو کہ (ابن اکوع ہیں) ان سے روایت ہے کہ انہوں نے کہا: جب تیز آندھی آتی تو آپ صلی اللہ علیہ وسلم کہتے تھے: «اللهم لاقحاً، لا عقيماً» ”اے اللہ! یہ ہوا بھلائی کے لیے ہو بانجھ نہ ہو۔“ [صحيح الادب المفرد/حدیث: 556]

ابی سے روایت ہے کہ انہوں نے کہا: ہوا کو برا نہ کہو جب تم کو ایسی چیز دکھائی دے جسے تم ناپسند کرتے ہو تو کہو: یا اللہ ہم تجھ سے اس آندھی کے خیر کا سوال کرتے ہیں اور اس چیز کے خیر کا جو اس میں پائی جاتی ہے اور اس چیز کے خیر کا جو اس کے ساتھ بھیجی گئی ہے اور ہم اس آندھی کے شر سے تیری پناہ چاہتے ہیں اور اس کے شر سے جو اس میں پایا جاتا ہے اور اس کے شر سے جس کے ساتھ اسے بھیجا گیا ہے۔ [صحيح الادب المفرد/حدیث: 557]

سیدنا ابوہریرہ رضی اللہ عنہ سے روایت ہے کہ انہوں نے کہا: رسول اللہ صلی اللہ علیہ وسلم نے فرمایا: ”ریح اللہ کے رزق سے ہے، یہ رحمت بھی لاتی ہے اور عذاب بھی تو اس کو برا نہ کہو لیکن اللہ سے اس کے خیر کا سوال کرو اور اس کے شر سے اللہ کی پناہ حاصل کرو۔“ [صحيح الادب المفرد/حدیث: 558]