سیدنا ابن عباس رضی اللہ عنہما سے روایت ہے انہوں نے کہا کہ مجھے کتوں اور بکریوں پر تعجب ہوتا ہے۔ ایک سال میں اتنی اور اتنی بکریاں ذبح کی جاتی ہیں اور اتنی اور اتنی ذبح کے لیے مکہ میں لائی جاتی ہیں (اور بکریاں کتوں سے زیادہ ہیں) حالانکہ ایک کتیا اتنے اور اتنے بچے جنم دیتی ہے (یہ بکریوں میں اللہ نے ہی کوئی برکت ڈالی ہے)۔ [صحيح الادب المفرد/حدیث: 448]

ابوظبیان سے مروی ہے انہوں نے کہا کہ مجھ سے سیدنا عمر بن خطاب رضی اللہ عنہ نے کہا: اے ابوظبیان! تمہارا وظیفہ کتنا ہے؟ میں نے کہا: ڈھائی ہزار، انہوں نے کہا: اے ابوظبیان! تم زراعت کا کام کرو اور جانوروں کی افزائش نسل کا کام کرو اس سے پہلے کہ قریش کے چھوکرے تمہارے حکمران بنیں، ان کے ہوتے ہوئے وظیفے کو مال نہیں کہا جائے گا۔ [صحيح الادب المفرد/حدیث: 449]

عبدہ بن حزن کہتے ہیں اونٹوں کے مالکوں نے اور بکریوں کے مالکوں نے آپس میں ایک دوسرے سے فخر کا مقابلہ کیا (اونٹوں کے مالک کہتے تھے کہ ہماری برتری ہے اور بکریوں کے مالک کہتے تھے کہ ہماری برتری ہے)۔ تو نبی صلی اللہ علیہ وسلم نے فرمایا: ”جب موسیٰ علیہ السلام کو نبی بنایا گیا تو وہ بکریوں کے چرواہے تھے، داؤد علیہ السلام کو نبی بنایا گیا تو وہ بھی چرواہے تھے اور جب مجھے نبی بنایا گیا تو میں اجیاد محلہ میں اپنے گھر والوں کی بکریاں چراتا تھا۔“ [صحيح الادب المفرد/حدیث: 450]

سیدنا ابوہریرہ رضی اللہ عنہ سے روایت ہے کہ انہوں نے کہا کہ کبیرہ گناہ سات قسم کے ہیں، ان میں سے سب سے پہلا: اللہ کے ساتھ شرک کرنا، کسی نفس کو (ناحق) قتل کرنا، پاک دامن عورتوں پر بدکاری کا الزام لگانا، ہجرت کے بعد بدوی زندگی اختیار کرنا۔ [صحيح الادب المفرد/حدیث: 451]

سیدنا ثوبان رضی اللہ عنہ سے روایت ہے انہوں نے کہا کہ رسول اللہ صلی اللہ علیہ وسلم نے مجھ سے فرمایا: ”دیہاتوں میں سکونت اختیار نہ کرنا، کیونکہ دیہاتوں میں سکونت اختیار کرنے والا ایسا ہے جیسے قبرستان میں رہنے والا۔“ احمد نے کہا: «كفور» سے مراد ہے: بستیاں (دیہات)۔ [صحيح الادب المفرد/حدیث: 452]

شریح اپنے والد سے روایت کرتے ہیں کہ میں نے سیدہ عائشہ رضی اللہ عنہا سے دیہاتوں میں جانے کے متعلق پوچھا، میں نے پوچھا کہ کیا نبی صلی اللہ علیہ وسلم کبھی دیہاتوں میں جایا کرتے تھے؟ انہوں نے جواب دیا: ہاں، وہ ان ٹیلوں کی طرف دیہاتوں میں جاتے تھے۔ [صحيح الادب المفرد/حدیث: 453]

حسن بصری سے روایت ہے کہ ایک شخص کا انتقال ہوا تو اس نے اپنا ایک بیٹا اور ایک غلام چھوڑا، اس نے اپنے غلام کو اپنے بیٹے کے بارے میں وصیت کی (کہ میرے بیٹے کا خیال رکھنا)، اس نے (اس کی کفالت اور تربیت میں) کوئی کمی نہ کی یہاں تک کہ وہ بالغ ہو گیا اور اس نے اس کی شادی کر دی، اس کے بعد لڑکے نے غلام سے کہا: میرے لیے سامان تیار کر دیجیئے تو میں طلب علم کے لیے نکلوں، اس نے سامان تیار کر دیا تو وہ ایک عالم کے پاس آیا، ان عالم سے علم حاصل کیا، تو عالم نے کہا: جب جانے لگو تو مجھے بتانا میں تمہیں ایک بات سکھاؤں گا۔ اس نے کہا: اب میرے جانے کا وقت آ گیا ہے تو آپ مجھے سکھا دیں۔ اس نے کہا: اللہ سے ڈرتے رہنا، صبر سے کام لینا اور جلد بازی نہ کرنا۔ حسن (بصری) نے کہا: ان (تین نصیحتوں) میں ہر طرح کی خیر پائی جاتی ہے۔ وہ لڑکا واپس آیا اور قریب نہیں تھا کہ ان باتوں کو بھول پائے۔ یہ صرف تین ہی تو تھیں، جب وہ اپنے علاقے میں آیا، اپنی سواری سے اترا، پھر جب وہ گھر اترا تو دیکھا کہ ایک شخص اس کی بیوی سے ذرا فاصلے پر سو رہا ہے اور اس کی بیوی بھی سو رہی ہے۔ اس نے کہا: اللہ کی قسم! میں اس منظر پر انتظار کرنے کا نہیں سوچ سکتا۔ وہ اپنی سواری کے پا س واپس گیا۔ جب اس نے تلوار پکڑنے کا ارادہ کیا تو خیال آیا: اللہ سے ڈر، صبر کر اور جلدی سے کام نہ لے، پھر وہ لوٹ آیا اور اس سوتے ہوئے شخص کے سر پر کھڑا ہو گیا لیکن سوچا میں اس پر انتظار نہیں کر سکتا پھر لوٹ کر سواری کے پاس آیا، جب تلوار اٹھانے کا ارادہ کیا تو پھر یاد آیا پھر لوٹ کر آ گیا پھر جب آ کر اس کے سر پر کھڑا ہوا تو وہ شخص جاگ گیا اس نے جیسے ہی اسے دیکھا، جھپٹ کر اس سے معانقہ کیا اور اسے بوسہ دیا اور خیر و عافیت پوچھی کہا: میرے بعد کیسی گزری، کہا: آپ کے بعد بہت اچھی گزری، واللہ بہت اچھی گزری کہ اس رات تین بار تلوار اور آپ کے سر کے مابین دوڑا لیکن وہ علم جو میں نے حاصل کیا ہے وہ حائل ہو گیا۔ (یہ جو سویا ہوا آدمی تھا یہ اس کے باپ کا آزاد کردہ غلام تھا جس کو سوئے ہوئے وہ پہچان نہ سکا جب وہ جاگ گیا تو اس نے اسے پہچان لیا۔) [صحيح الادب المفرد/حدیث: 454]

اشج عبدالقیس سے مروی ہے، انہوں نے کہا کہ نبی صلی اللہ علیہ وسلم نے مجھ سے فرمایا: ”تم میں دو ایسی عادات ہیں جنہیں اللہ پسند فرماتا ہے۔“ میں نے عرض کیا: یا رسول اللہ! وہ کیا ہیں؟ آپ صلی اللہ علیہ وسلم نے فرمایا: ”بردباری اور حیا“، میں نے کہا: یہ شروع سے ہیں یا نئی ہیں؟ آپ صلی اللہ علیہ وسلم نے فرمایا: ”شروع سے ہیں“، میں نے کہا: تمام تعریفیں اللہ کے لیے ہیں جس نے مجھے دو ایسی عادات پر پیدا کیا جنہیں اللہ پسند کرتا ہے۔ [صحيح الادب المفرد/حدیث: 455]

سیدنا قتادہ رضی اللہ عنہ کہتے ہیں کہ مجھ سے اس نے بیان کیا جو عبدالقیس قبیلے کے اس وفد سے ملا جو نبی صلی اللہ علیہ وسلم کی خدمت میں حاضر ہوا۔ قتادہ نے ابونضرہ کا ذکر کیا ہے وہ سیدنا ابوسعید خدری رضی اللہ عنہ سے بیان کرتے ہیں انہوں نے کہا کہ نبی صلی اللہ علیہ وسلم نے اشج عبدالقیس سے فرمایا: ”بیشک تم میں دو ایسی خصلتیں ہیں جنہیں اللہ پسند فرماتا ہے بردباری اور تحمل مزاجی۔“ [صحيح الادب المفرد/حدیث: 456]

سیدنا ابن عباس رضی اللہ عنہما سے روایت ہے کہ نبی صلی اللہ علیہ وسلم نے اشج (یعنی اشج عبدالقیس) سے فرمایا: ”بیشک تم میں دو عادتیں ایسی ہیں جنہیں اللہ پسند فرماتا ہے، بردباری اور ٹھہر ٹھہر کر کام کرنا۔“ [صحيح الادب المفرد/حدیث: 457]