محجن اسلمی نے کہا کہ رجاء نے بیان کیا: میں ایک دن محجن کے ساتھ آ رہا تھا یہاں تک کہ ہم بصرہ والوں کی مسجد پر رک گئے تو بریدہ اسلمی مسجد کے دروازوں میں سے ایک دروازے پر بیٹھے تھے۔ کہتے ہیں: اور مسجد میں ایک آدمی تھا جس کا نام سکبہ تھا وہ بہت لمبی نماز پڑھتا تھا۔ جب ہم مسجد کے دروازے پر پہنچے اس وقت بریدہ ایک چادر اوڑھے ہوئے تھے اور وہ ہنسی مزاح کرنے والے آدمی تھے۔ انہوں نے کہا: اے محجن! کیا تم ایسے نماز پڑھتے ہو جیسے سکبہ پڑھتا ہے؟ محجن نے اس کو جواب نہ دیا اور واپس لوٹ گئے۔ محجن کہتے ہیں: رسول اللہ صلی اللہ علیہ وسلم نے میرا ہاتھ تھاما اور ہم چلنا شروع ہو گئے یہاں تک کہ ہم احد پہاڑ پر چڑھ گئے اور آپ صلی اللہ علیہ وسلم نے مدینہ کی طرف جھانکا اور فرمایا: ”اس گاؤں پر افسوس اس کے باشندے اس میں سکونت کو ترک کر دیں گے اس حالت میں جب یہ بہت زیادہ آباد ہو گی۔ اس کے پاس دجال آئے گا تو وہ اس کے دروازوں میں سے ہر دروازے پر فرشتہ پائے گا تو وہ اس میں داخل نہ ہو سکے گا۔“ پھر آپ صلی اللہ علیہ وسلم اترے۔ جب ہم مسجد میں پہنچے تو رسول اللہ صلی اللہ علیہ وسلم نے ایک شخص کو دیکھا جو نماز پڑھ رہا تھا، رکوع اور سجدے کرتا جا رہا تھا تو رسول اللہ صلی اللہ علیہ وسلم نے مجھ سے پوچھا: ”یہ کون ہے؟“ میں نے مبالغہ کے ساتھ اس کی تعریف شرو ع کر دی۔ میں نے کہا: یا رسول اللہ! یہ فلاں ہے اور فلاں ہے۔ آپ صلی اللہ علیہ وسلم نے فرمایا: ”رک جاؤ، اس کو نہ سناؤ، ورنہ اسے ہلاک کر دو گے۔“ بیان کیا کہ آپ صلی اللہ علیہ وسلم چل دیے یہاں تک کہ آپ اپنے حجرات کے پاس گئے لیکن وہاں جا کر آپ صلی اللہ علیہ وسلم نے اپنے دنوں ہاتھ جھاڑے پھر فرمایا: ”تمہارے دین میں سے افضل وہ ہے جو آسان ہو، تمہارے دین میں سے افضل وہ ہے جو آسان ہو۔“ آپ صلی اللہ علیہ وسلم نے یہ تین بار فرمایا۔ [صحيح الادب المفرد/حدیث: 260]

محمّد (بن سرین) نے کہا کہ لوگ کہا کرتے تھے: اپنے دوست کی اتنی تکریم نہ کرو کہ اس پر گراں گزرے۔ [صحيح الادب المفرد/حدیث: 261]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جب کوئی شخص اپنے بھائی کی عیادت کرتا یا اس سے ملاقات کرتا ہے تو اللہ تعالیٰ اس سے فرماتا ہے: تو بھی مبارک ہے اور تمہارا چلنا بھی مبارک ہے اور تو نے جنت میں جگہ بنا لی۔“ [صحيح الادب المفرد/حدیث: 262]

سیدہ ام درداء رضی اللہ عنہا سے روایت ہے، انہوں نے کہا: سلمان فارسی مدائن سے شام تک چل کر ہماری ملاقات کو آئے اس حالت میں کہ قمیص اور «انْدَرْوَرْدُ» پہنی ہوئی تھی، (یعنی ایسی شلوار جو پنڈلیوں سے اوپر تھی۔) ابن شوذب کا کہنا ہے: سلمان کو دیکھا گیا تو ان کے اوپر قمیص تھی جس کا کالر نہیں تھا اور وہ بہت لمبی اور ڈھیلی ڈھالی تھی۔ تو ان سے کہا گیا آپ نے اپنے آپ کو بدنما بنا رکھا ہے۔ تو انہوں نے کہا: بیشک بھلائی تو آخرت کی ہی بھلائی ہے۔ [صحيح الادب المفرد/حدیث: 263]

سیدنا انس بن مالک رضی اللہ عنہ سے مروی ہے کہ رسول اللہ صلی اللہ علیہ وسلم نے انصار کے ایک گھرانے سے ملاقات کی اور ان کے پاس کھانا بھی کھایا۔ جب آپ صلی اللہ علیہ وسلم نکلنے لگے تو گھر کی ایک جگہ کے متعلق حکم دیا تو وہاں ایک چٹائی بچھا کر اس چٹائی پر پانی سے چھینٹے مارے گئے آپ صلی اللہ علیہ وسلم نے اس پر نفلی نماز پڑھی اور ان کے حق میں دعا مانگی۔ [صحيح الادب المفرد/حدیث: 264]

ابوخلدۃ روایت کرتے ہیں کہ عبدالکریم ابوامیہ ابوعالیہ کے پاس آئے۔ اس وقت وہ اونی کپڑے پہنے ہوئے تھے، تو ابوعالیہ نے کہا: یہ لباس تو راہبوں کا ہے، بیشک مسلمان جب آپس میں ملاقات کرتے تھے تو زینت اختیار کرتے تھے۔ [صحيح الادب المفرد/حدیث: 265]

سیدہ اسماء رضی اللہ عنہا کے آزاد کردہ غلام عبداللہ سے مروی ہے: سیدہ اسماء رضی اللہ عنہا نے مجھے ایک چوغہ نکال کر دکھایا جو مشائخ پہنتے ہیں اس کا گریبان موٹے ریشم سے بنا ہوا تھا اور اس کی آستینوں پر ریشم کی گوٹ لگائی گئی تھی۔ سیدہ اسماء رضی اللہ عنہا نے کہا: یہ ہے رسول اللہ صلی اللہ علیہ وسلم کا چوغہ جو آپ صلی اللہ علیہ وسلم وفود کے آنے پر اور جمعہ کے دن پہنا کرتے تھے۔ [صحيح الادب المفرد/حدیث: 266]

سیدنا عبداللہ بن عمر رضی اللہ عنہما سے مروی ہے، انہوں نے بیان کیا: سیدنا عمر رضی اللہ عنہ کو ایک موٹے ریشم کا جبہ مل گیا وہ اسے لے کر نبی صلی اللہ علیہ وسلم کے پاس آئے۔ اور کہا: یا رسول اللہ! اس کو خرید لیں اور جمعہ کے وقت اور جب معزز لوگ آپ صلی اللہ علیہ وسلم کے پاس وفد بن کے آئیں تو اسے پہنا کریں اس پر آپ صلی اللہ علیہ وسلم نے ارشاد فرمایا: ”اس طرح کا لباس وہ لوگ پہنتے ہیں جن کا آخرت میں کوئی حصہ نہیں۔“ پھر نبی صلی اللہ علیہ وسلم کے پاس کچھ چوغے لائے گئے۔ آپ صلی اللہ علیہ وسلم نے ایک چوغہ سیدنا عمر رضی اللہ عنہ کو، ایک چوغہ سیدنا اسامہ رضی اللہ عنہ کو، اور ایک چوغہ سیدنا علی رضی اللہ عنہ کو بھیج دیا۔ سیدنا عمر رضی اللہ عنہ نے کہا: یا رسول اللہ! آپ نے یہ میری طرف بھیج دیا ہے جبکہ میں نے اس کے بارے میں آپ کا فرمان سنا ہے؟ تو نبی صلی اللہ علیہ وسلم نے فرمایا: ”تم اس کو فروخت کر دو یا اس سے کوئی اور حاجت پوری کر لو۔“ [صحيح الادب المفرد/حدیث: 267]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”کسی شخص نے ایک بستی میں اپنے ایک بھائی سے ملاقات کی تو اللہ نے اس کے راستے میں ایک فرشتے کو گھات میں بٹھا دیا۔ فرشتے نے پوچھا: تم کہاں جانا چاہتے ہو؟ اس نے کہا: اپنے ایک بھائی کے پاس جو اس بستی میں رہتا ہے۔ اس نے پوچھا کہ کیا اس نے کوئی احسان کیا ہے جو بدلہ چکانے جا رہے ہو؟ اس نے جواب دیا: نہیں میں اس سے صرف اللہ کے لئے محبّت کرتا ہوں۔ اس نے کہا: میں اللہ کی طرف سے تیرے پاس بھیجا ہوا فرشتہ ہوں (اور یہ پیغام دینے آیا ہوں کہ) جیسے تم نے اس سے محبت کی ہے اللہ بھی تم سے محبت کرتا ہے۔“ [صحيح الادب المفرد/حدیث: 268]

سیدنا ابوذر رضی اللہ عنہ سے روایت ہے کہ ایک بار میں نے عرض کیا: یا رسول اللہ! ایک شخص کچھ آدمیوں سے محبت کرتا ہے لیکن اس کے بس کی بات نہیں کہ (وہ اپنے عمل کے ذریعے) ان لوگوں تک پہنچے۔ اس پر آپ صلی اللہ علیہ وسلم نے فرمایا: ”اے ابوذر! تم اسی کے ساتھ ہو گے جس سے تم محبت کرتے ہو۔“ میں نے عرض کیا: میں اللہ اور اس کے رسول صلی اللہ علیہ وسلم سے محبّت کرتا ہوں۔ فرمایا: ”اے ابوذر! تم اسی کے ساتھ ہو گے جس سے تم محبت کرتے ہو۔“ [صحيح الادب المفرد/حدیث: 269]