عطاء نے بیان کیا کہ عمر بن صفوان نے میری عیاد ت کی، نماز کا وقت آ گیا تو سیدنا ابنِ عمر رضی اللہ عنہما نے ان کو دو رکعت نماز پڑھائی اور کہا: میں مسافر ہوں (اس لیے نماز قصر کی اور نصف پڑھی)۔ [صحيح الادب المفرد/حدیث: 408]

سیدنا انس رضی اللہ عنہ سے مروی ہے کہ ایک یہودی لڑکا نبی صلی اللہ علیہ وسلم کی خدمت کرتا تھا، تو وہ بیمار پڑ گیا تو نبی صلی اللہ علیہ وسلم اس کی عیادت کے لیے اس کے پاس تشریف لائے اور اس کے سر کے پاس بیٹھ گئے اور فرمایا: ”مسلمان ہو جا“، اس نے اپنے والد کی طرف دیکھا جو اس کے سر کے پاس تھا۔ باپ نے اس سے کہا: ابوالقاسم کی بات مان لو، چنانچہ وہ لڑکا مسلمان ہو گیا، نبی صلی اللہ علیہ وسلم اس کے پاس یہ کہتے ہوئے نکلے، ”شکر ہے اس اللہ کا جس نے اسے جہنم سے نجات دی۔“ [صحيح الادب المفرد/حدیث: 409]

سیدہ عائشہ رضی اللہ عنہا سے روایت ہے انہوں نے کہا: جب رسول اللہ صلی اللہ علیہ وسلم مدینہ تشریف لائے تو سیدنا ابوبکر رضی اللہ عنہ اور سیدنا بلال رضی اللہ عنہ بیمار ہو گئے۔ کہتی ہیں: میں ان کے پاس گئی۔ میں نے کہا: اے ابا جان! آپ کا کیا حال ہے؟ اور اے بلال! آپ کا کیا حال ہے؟ کہا: ابوبکر رضی اللہ عنہ کو جب بخار آتا تھا تو کہتے تھے: ہر آدمی اپنے اہل و عیال میں صبح کرتا ہے اور موت اس کے جوتے کے تسمے سے بھی قریب تر ہے اور بلال رضی اللہ عنہ سے جب بخار اتر جاتا تو اپنی آواز بلند کرتے اور کہتے: اے کاش! یہ ہوتا کہ میں ایک ایسی وادی میں رات گزارتا جہاں میرے گرد اذخر اور جلیل کی جھاڑیاں ہوتیں اور کیا وہ کسی دن مجنہ کے چشموں کا ارادہ کریں گی اور کبھی ایسا بھی ہو گا کہ میرے لیے شامہ و طفیل پہاڑیاں ظاہر ہوں گی (یہ سب مکہ کی جگہیں یاد کر رہے ہیں)۔ سیدہ عائشہ رضی اللہ عنہا کہتی ہیں کہ میں رسول اللہ صلی اللہ علیہ وسلم کے پاس آئی اور انہیں اس حال کی خبر دی تو آپ صلی اللہ علیہ وسلم نے کہا: «اللهم حبب إلينا المدينة، كحبنا مكة أو أشد، وصححها، وبارك لنا فى صاعها ومدها، وانقل حماها فاجعلها بالجحفة» ”اے اللہ! ہمارے لیے مدینہ کو مکہ کی طرح یا اس سے بھی زیادہ محبوب بنا دے اور اس کو صحت بخش بنا دے اور ہمارے لیے اس کے صاع اور مد میں برکت عطا فرما اور اس کے بخار کو وادی جحفہ میں بھیج دے۔“ [صحيح الادب المفرد/حدیث: 410]

سعید بن عمرو بن سعید اپنے باپ سے روایت کرتے ہیں کہ انہوں نے کہا: حجاج سیدنا ابن عمر رضی اللہ عنہما کے پاس آیا اور میں ان کے پاس تھا۔ اس نے سوال کیا کہ وہ کیسے ہیں؟ کہا: ٹھیک ہیں، کہا: آپ کو کس نے زخم پہنچایا؟ کہا: جس نے اس دن ہتھیار اٹھانے کا حکم دیا جس دن ہتھیار اٹھانا جائز نہیں یعنی حجاج نے زخم پہنچایا (چونکہ اس نے اپنی فوج کو لڑنے کا حکم دیا)۔ [صحيح الادب المفرد/حدیث: 411]

عبداللہ بن ابی ہذیل سے مروی ہے کہ سیدنا عبداللہ بن مسعود رضی اللہ عنہ ایک بیمار کے پاس اس کی بیمار پرسی کے لیے گئے۔ آپ کے ساتھ کچھ اور لوگ بھی تھے اور گھر میں ایک خاتون بھی تھی، تو لوگوں میں سے ایک آدمی عورت کی طرف دیکھنے لگا تو سیدنا عبداللہ رضی اللہ عنہ نے فرمایا: اگر تمہاری آنکھ پھوٹ جائے تو تمہارے لیے بہتر ہے۔ [صحيح الادب المفرد/حدیث: 412]

سیدنا زید بن ارقم رضی اللہ عنہ سے مروی ہے کہ میری آنکھ دکھ رہی تھی تو نبی صلی اللہ علیہ وسلم نے میری بیمار پرسی کی۔ [صحيح الادب المفرد/حدیث: 413]

سیدنا انس رضی اللہ عنہ سے مروی ہے انہوں نے کہا کہ میں نے نبی صلی اللہ علیہ وسلم کو یہ کہتے ہوئے سنا: ”اللہ عزوجل نے فرمایا: جب میں بندے کو اس کی دو محبوب چیزوں یعنی دونوں آنکھوں سے آزماتا ہوں پھر وہ صبر کرتا ہے تو میں اس کو بدلے میں جنت دے دیتا ہوں۔“ [صحيح الادب المفرد/حدیث: 414]

سیدنا ابوامامہ رضی اللہ عنہ سے مروی ہے وہ نبی صلی اللہ علیہ وسلم سے روایت کرتے ہیں: ”اللہ ارشاد فرماتا ہے: اے ابن آدم جب میں تمہاری دو عزیز ترین چیزیں(آنکھیں) لے لوں تو تم اس صدمے پر صبر کرو اور اجر حاصل کرنے کی نیت کرو تو میں تیرے لیے جنت سے کم ثواب پر راضی نہیں ہوں گا۔“ [صحيح الادب المفرد/حدیث: 415]

سیدنا ابن عباس رضی اللہ عنہما سے روایت ہے کہ نبی صلی اللہ علیہ وسلم جب کسی مریض کی عیادت کو جاتے تھے تو اس کے سر کے قریب بیٹھتے تھے اس کے بعد سات مرتبہ یہ کہتے: «أسأل الله العظيم، رب العرش العظيم أن يشفيك» ”میں عظمت والے اللہ سے جو عرش عظیم کا رب ہے سوال کرتا ہوں کہ تمہیں شفا عطا کرے“، اگر اس مریض کی وفات میں ابھی تاخیر ہوتی تو وہ اس تکلیف سے نجات پا جاتا۔ [صحيح الادب المفرد/حدیث: 416]

ربیع بن عبداللہ بیان کرتے ہیں میں حسن کے ساتھ قتادہ کی عیادت کو گیا تو وہ قتادہ کے سر کے قریب بیٹھ گئے، پھران سے حال پوچھا: اور ان کے لیے دعا کی کہ اے اللہ! ان کے قلب کو شفا دے اور ان کی بیماری کو دور کر دے۔ [صحيح الادب المفرد/حدیث: 417]