حضرت عبداللہ بن عمر رضی اللہ عنہمانے بیان کیا کہ نبی کریم صلی اللہ علیہ وسلم نے بنو المصطلق پر جب حملہ کیا تو وہ بالکل غافل تھے اور ان کے مویشی پانی پی رہے تھے۔ ان کے لڑنے والوں کو قتل کیا گیا، اور عورتوں بچوں کو قید کرلیا گیا انھیں قیدیوں میں جویریہ رضی اللہ عنہ (ام المومنین) بھی تھیں۔حضرت عبداللہ بن عمر رضی اللہ عنہماخود بھی اسلامی فوج کے ہمراہ تھے۔ [اللؤلؤ والمرجان/كتاب الجهاد/حدیث: 1129]

حضرت سعید بن ابی بردہ اپنے والد سے بیان کرتے ہیں کہ نبی کریم صلی اللہ علیہ وسلم نے ان کے دادا حضرت ابو موسیٰ رضی اللہ عنہ ور حضرت معاذ بن جبل رضی اللہ عنہ کو یمن کا حاکم بنا کر بھیجا اور فرمایا کہ لوگوں کے لئے آسانی پیدا کرنا‘ ان کو دشواریوں میں نہ ڈالنا۔ لوگوں کو خوش خبریاں دینا‘دین سے نفرت نہ دلانا اور تم دونوں آپس میں موافقت رکھنا۔ [اللؤلؤ والمرجان/كتاب الجهاد/حدیث: 1130]

حضرت انس بن مالک رضی اللہ عنہ روایت کرتے ہیں کہ رسول اللہ صلی اللہ علیہ وسلم نے فرمایا، آسانی کرو اور سختی نہ کرو اور خوش کرو اور نفرت نہ دلاؤ۔ [اللؤلؤ والمرجان/كتاب الجهاد/حدیث: 1131]

حضرت ابن عمر رضی اللہ عنہمانے بیان کیا کہ رسول اللہ صلی اللہ علیہ وسلم نے فرمایا: عہد توڑنے والے کے لئے قیامت کو ایک جھنڈا اٹھایا جائے گا اور پکاردیا جائے گا کہ یہ فلاں بن فلاں کی دغا بازی کا نشان ہے۔ [اللؤلؤ والمرجان/كتاب الجهاد/حدیث: 1132]

حضرت انس بن مالک رضی اللہ عنہ نے بیان کیا کہ نبی کریم صلی اللہ علیہ وسلم نے فرمایا ٗ قیامت کے دن ہر دغا باز کیلئے ایک جھنڈا ہو گا ٗ وہ جھنڈا (اس کے پیچھے) گاڑ دیا جائے گا ٗ اور اس کے ذریعہ اسے پہچانا جائے گا۔ [اللؤلؤ والمرجان/كتاب الجهاد/حدیث: 1133]

حضرت جابر بن عبداللہ رضی اللہ عنہ نے بیان کیا کہ نبی کریم صلی اللہ علیہ وسلم نے فرمایا تھا، جنگ تو ایک چالبازی کا نام ہے۔ [اللؤلؤ والمرجان/كتاب الجهاد/حدیث: 1134]

حضرت ابوہریرہ رضی اللہ عنہ نے بیان کیا کہ نبی کریم صلی اللہ علیہ وسلم نے فرمایا لڑائی کیا ہے؟ ایک چال ہے۔ [اللؤلؤ والمرجان/كتاب الجهاد/حدیث: 1135]

حضرت ابوہریرہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: دشمن سے لڑنے بھڑنے کی تمنا نہ کرو، ہاں! اگر جنگ شروع ہو ہی جائے تو پھر صبر سے کام لو۔ [اللؤلؤ والمرجان/كتاب الجهاد/حدیث: 1136]

حضرت عمر بن عبیداللہ رضی اللہ عنہ جب خوارج سے لڑنے کے لیے حروریہ کی طرف روانہ ہوئے۔ تو انہیں عبداللہ بن ابی اوفیٰ رضی اللہ عنہ کا خط ملا۔ اس میں انہوں نے لکھا تھا کہ رسول کریم صلی اللہ علیہ وسلم نے ایک لڑائی کے موقع پر انتظار کیا، پھر جب سورج ڈھل گیا۔ تو آپ صلی اللہ علیہ وسلم نے لوگوں کو خطاب کرتے ہوئے فرمایا اے لوگو! دشمن سے لڑائی بھڑائی کی تمنا نہ کرو، بلکہ اللہ تعالیٰ سے سلامتی مانگو۔ ہاں! جب جنگ چھڑ جائے تو پھر صبر کئے رہو اور ڈٹ کر مقابلہ کرو اور جان لو کہ جنت تلواروں کے سائے میں ہے۔ پھر آپ نے یوں دعا کی، اے اللہ! کتاب (قرآن) کے نازل فرمانے والے، اے بادلوں کے چلانے والے! اے احزاب (یعنی کافروں کی جماعتوں کو غزوۂ خندق کے موقع پر) شکست دینے والے! ہمارے دشمن کو شکست دے اور ان کے مقابلے میں ہماری مدد کر۔ [اللؤلؤ والمرجان/كتاب الجهاد/حدیث: 1137]

حضرت عبداللہ بن عمر رضی اللہ عنہمانے بیان کیا کہ نبی کریم صلی اللہ علیہ وسلم کے ایک غزوہ (غزوۂ فتح) میں ایک عورت مقتول پائی گئی تو آپ صلی اللہ علیہ وسلم نے عورتوں اور بچوں کے قتل پر انکار کا اظہار فرمایا۔ [اللؤلؤ والمرجان/كتاب الجهاد/حدیث: 1138]