سیدنا ابن عباس رضی اللہ عنہما سے روایت ہے کہ اگر ایک پہاڑ دوسرے پہاڑ پر ظلم کرے تو ظلم کرنے والے کو ریزہ ریزہ کر دیا جائے۔ [صحيح الادب المفرد/حدیث: 458]

سیدنا فضالہ بن عبید رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”تین قسم کے آدمیوں سے کوئی سوال نہیں کیا جائے گا، ایک وہ آدمی جس نے جماعت سے علیحدگی اختیار کی اپنے امام کی نافرمانی کی اور گناہ گاری میں ہی فوت ہو گیا، اس کے بارے میں تم کچھ نہ پوچھو (کہ اس کا کیا حال ہو گا)، دوسری وہ لونڈی یا غلام جو اپنے آقا کو چھوڑ کر بھاگ گیا، تیسری وہ عورت جس کا شوہر گھر میں موجود نہ ہو، وہ اس کو دنیا کے اخراجات سے کفایت کرتا ہو تو وہ اس کے بعد گھر سے باہر زینت لگا کر نکلنے لگے اور آدمیوں میں گھلنے ملنے لگے۔ تین آدمی ایسے ہیں ان سے سوال نہ کیا جائے گا (یعنی سیدھے مجرم ہوں گے) وہ آدمی جس نے اللہ سے اس کی اوپر لینے والی چادر چھینی، بیشک اللہ کی اوپر لینے والی چادر کبریائی ہے اور بیشک اس کا نیچے کا تہبند اس کی عزت ہے، دوسرا وہ آدمی جو اللہ کے بارے میں شک و شبہ کا شکار ہے اور تیسرا اللہ کی رحمت سے مایوس ہونے والا۔“ [صحيح الادب المفرد/حدیث: 459]

بکار بن عبدالعزیز اپنے والد سے اور وہ اپنے دادا (ابوبکرہ) سے اور وہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”تمام گناہوں میں سے جن کی سزا اللہ چاہے گا قیامت کے دن تک موخر کر دے گا سوائے ظلم، والدین کی نافرمانی اور قطع رحمی کے۔ ایسے آدمی کو اللہ موت سے پہلے دنیا میں ہی جلد سزا دے دیتا ہے۔“ [صحيح الادب المفرد/حدیث: 460]

سیدنا ابوہریرہ رضی اللہ عنہ سے روایت ہے کہ انہوں نے کہا کہ تم میں سے کوئی ایک آدمی اپنے بھائی کی آنکھ میں تنکا تو دیکھ لیتا ہے لیکن اپنی آنکھ میں ایک بڑی لکڑی (شہتیر) یا کھجور کے تنے کو بھول جاتا ہے۔ ابوعبید نے کہا: «الجذل» سے مراد ہے: بڑی اور اونچی لکڑی ہے۔ [صحيح الادب المفرد/حدیث: 461]

معاویہ بن قرہ سے مروی ہے انہوں نے کہا کہ میں معقل مزنی کے ساتھ تھا تو انہوں نے راستے سے تکلیف دہ چیز ہٹا دی میں نے بھی ایک چیز دیکھی تو میں نے بڑھ کر اسے ہٹا دیا اس پر معقل نے کہا: اے میرے بھتیجے! تم نے ایسا کیوں کیا؟ میں نے کہا: میں نے آپ کو ایک کام کرتے ہوئے دیکھا تو میں نے بھی کیا۔ انہوں نے کہا: اے بھتیجے! تم نے اچھا کیا، میں نے نبی صلی اللہ علیہ وسلم کو فرماتے ہوئے سنا: ”جس نے مسلمانوں کی راہ سے کوئی تکلیف دہ چیز ہٹا دی تو اس کے لیے ایک نیکی لکھ دی جاتی ہے اور جس کی ایک نیکی بھی قبول ہو جائے وہ جنت میں جائے گا۔“ [صحيح الادب المفرد/حدیث: 462]