اردو حاشہ:
1؎:
اس کا مطلب یہ ہوا کہ نبی اکرم ﷺ کی حیات طیبہ میں ہی قرآن کی طرح ”کتابتِ حدیث“ کا عمل شروع ہو گیا تھا،
بیسیوں صحیح روایات سے ثابت ہے کہ رسول اللہ ﷺ نے (قرآن کے علاوہ) اپنے ارشادات و فرامین اور احکام خود بھی تحریر کرائے اور بیس صحابہ کرام رضی اللہ عنہم کو احادیث مبارکہ لکھنے کی اجازت بھی دے رکھی تھی۔
(تفصیل کے لیے کتاب العلم عن رسول ﷺ کے باب ”ماجاء فی رخصۃ کتابۃ العلم“ میں دیکھ لیں۔

2؎:
یہ حکم جانوروں کے مالکوں اور محصّلین زکاۃ دونوں کے لیے ہے،
متفرق کو جمع کرنے کی صورت یہ ہے کہ مثلاً تین آدمیوں کی چالیس بکریاں الگ الگ رہنے کی صورت میں ہر ایک پر ایک ایک بکری کی زکاۃ واجب ہو،
جب زکاۃ لینے والا آئے تو تینوں نے زکاۃ کے ڈر سے اپنی اپنی بکریوں کو یکجا کر دیا تاکہ ایک ہی بکری دینی پڑے۔

3؎:
اس کی تفسیر یہ ہے کہ مثلاً دو ساجھی دار ہیں ہر ایک کی ایک سو ایک بکریاں ہیں کل ملا کر دو سو دو بکریاں ہوئیں،
ان میں تین بکریوں کی زکاۃ ہے،
جب زکاۃ لینے والا آیا تو ان دونوں نے اپنی اپنی بکریاں الگ الگ کر لیں تاکہ ایک ایک واجب ہو ایسا کرنے سے منع کیا گیا ہے۔

4؎:
مثلاً دو شریک ہیں،
ایک کی ایک ہزار بکریاں ہیں اور دوسرے کی صرف چالیس بکریاں،
اس طرح کل ایک ہزار چالیس بکریاں ہوئیں زکاۃ وصول کرنے والا آیا اور اس نے دس بکریاں زکاۃ میں لے لیں،
فرض کیجیے ہر بکری کی قیمت چھبیس چھبیس روپے ہے،
اس طرح ان کی مجموعی قیمت دو سو ساٹھ روپے ہوئی جس میں دس روپے اس شخص کے ذمہ ہوں گے جس کی چالیس بکریاں ہیں اور دو سو پچاس روپے اس پر ہوں گے جس کی ایک ہزار بکریاں ہیں،
کیونکہ ایک ہزار چالیس کے چھبیس چالیسے بنتے ہیں جس میں سے ایک چالیسہ کی زکاۃ چالیس بکریوں والے پر ہو گی اور25چالیسوں کی زکاۃ ایک ہزار بکریوں والے پر ہو گی اب اگر زکاۃ وصول کرنے والے نے چالیس بکریوں والے شخص کی بکریوں سے دس بکریاں زکاۃ میں لی ہیں جن کی مجموعی قیمت دو سو ساٹھ روپے بنتی ہے تو ہزار بکریوں والا اسے ڈھائی سو روپئے واپس کرے گا اور اگر زکاۃ وصول کرنے والے نے ایک ہزار بکریوں والے شخص کی بکریوں میں سے لی ہیں تو چالیس بکریوں والا اسے دس روپیہ واپس کرے گا۔

نوٹ:
(سند میں سفیان بن حسین ثقہ راوی ہیں،
لیکن ابن شہاب زہری سے روایت میں کلام ہے،
لیکن متابعات و شواہد کی بنا پر یہ حدیث بھی صحیح ہے)

1568. اردو حاشیہ: بکریاں تین سو ہوں تو تین بکریاں زکوۃ ہو گی، تین سوننانوے تک۔ چار سو پوری ہوں تو چار بکریاں ہوں گی چار سوننانوے تک۔ علی ھذا القیاس.

اردو حاشہ:
فوائد و مسائل:
(1)
گائے یا اونٹنی ایک وقت میں ایک بچہ دیتی ہیں لیکن بکریاں زیادہ بچے دیتی ہیں، اس لیے بکریوں کے ریوڑ میں بچے زیادہ ہوتے ہیں۔
اس چیز کے پیش نظر شریعت نے بکریوں میں زکاۃ کی شرح کم رکھی ہے۔
ریوڑ کی بکریوں اور بچوی کی کل تعداد اگر چالیس سے کم ہو تو اس مال پر کوئی زکاۃ فرض نہیں۔
چالیس سے ایک سو بیس کی تعداد پر زکاۃ صرف ایک بکری ہے۔
ایک سو اکیس سے دو سو تک کے ریوڑ پر زکاۃ میں دو بکریاں ادا کرنا واجب ہے۔
دو سو ایک سے تین سو ننانوے تک زکاۃ کی مقدار تین بکریاں ہے۔
جب چار سو پوری ہوں گی تو چار بکریاں ادا اور وصول کی جائیں گی۔
اس سے زیادہ تعداد میں جتنے پورے سو ہوں گے، اتنی ہی بکریاں زکاۃ ہو گی۔
پورے سینکڑوں سے زائد بکریوں پر زکاۃ نہیں۔
الگ الگ ریوڑوں کو جمع کرنے کی صورت یہ ہے، مثلاً:
دو آدمیوں کے پاس چالیس چالیس بکریاں تھیں جن میں سے ہر ریوڑ پر ایک ایک بکری زکاۃ ہے۔
انہیں کل دو بکریاں ادا کرنا تھیں۔
انہوں نے اپنی بکریاں ملا کر ایک ریوڑ بنا لیا۔
اس طرح اسی (80)
بکریوں پر ایک ہی بکری زکاۃ دے کر ایک بکری بچا لی۔
جب وصول کرنے والا چلا گیا تو دونوں پھر الگ الگ ہو گئے۔
ایک ریوڑ کے دو ریوڑ بنا کر زکاۃ بچا لینے کی مثال یہ ہے کہ دو آدمیوں کے مشترکہ ریوڑ میں دو سو بیس بکریاں تھیں، لہٰذا ان پر تین بکریاں زکاۃ ہے انہوں نے اس کے دو ریوڑ بنا لیے جن میں سے ہر ایک ریوڑ میں ایک سو دس بکریاں ہیں۔
اس طرح ہر ریوڑ پر ایک بکری زکاۃ واجب ہوئی اور مجموعی طور پر دو بکریاں زکاۃ دی گئیں اور ایک بکری بچا لی گئی یا کسی ریوڑ میں ساتھ بکریاں تھیں جن پر ایک بکری زکاۃ ہے۔
انہیں دو حصوں میں تقسیم کر کے تیس تیس کے دو ریوڑ بنا لیے گئے۔
جن پر کوئی زکاۃ نہیں۔
ایک ریوڑ کے دو یا دو ریوڑوں کو ایک بنانے کا عمل زکاۃ وصول کرنے والے افسر (عامل)
کی طرف سے بھی ہو سکتا ہے تاکہ زیادہ زکاۃ وصول ہو یہ بھی منع ہے۔
اس کی مثال سو بکریوں کو پچاس پچاس کے دو حصوں میں تقسیم کرنا ہے تاکہ ایک کے بجائے دو بکریاں وصول ہوں یا دو ایسے ریوڑوں کو ایک قرار دینا جن میں سے ہر ایک میں ایک سو پندرہ بکریاں تھیں تاکہ دو بکریاں وصول ہوں یا دو ایسے ریوڑوں کو ایک قرار دینا جن میں سے ہر ایک میں ایک سو پندرہ بکریاں تھیں تاکہ دو بکریوں کے بجائے تین بکریاں وصول کی جائیں۔
سانڈے سے مراد وہ نر جانور ہے جو ریوڑ میں افزائش نسل کے لیے رکھا جاتا ہے۔
اس کی اہمیت کی وجہ یہ ہے کہ وہ مالک کے لیے قیمتی ہے جب کہ بوڑھا اور عیب دار جانور جس مستحق کو دیا جائے گا اس کی حق تلفی شمار ہوگی کیونکہ وہ اس سے پورا فائدہ نہیں اٹھا سکے گا۔
یہ حکم اس لیے دیا گیا کہ نہ زکاۃ دینے والے کو نقصان ہو نہ زکاۃ لینے والے کو۔

اردو حاشہ:
فوائد ومسائل:

(1)
اگر دو شخص اپنی اپنی بکریاں ملا کر ایک ریوڑ بنا لیں تو انہیں خلیط کہا جاتا ہے۔
یہ اشتراک اس صورت میں معتبر ہے جب دونوں ریوڑوں کا چرواہا، باڑا، پانی کا انتظام اور افزائش نسل کے لیے سانڈ مشترک ہو۔ (موطأ إمام مالك، الزکاة، باب صدقة الخلطاء: 1؍242)
اگر اشتراک اس قسم کا ہو کہ ہر فریق کی اپنی اپنی بکریاں ہیں تو اسے خلطة (اختلاط)
کہتے ہیں۔
اگر ہر بکری مشترک ہو مثلا دو آدمیوں نے پیسے ملا کر چند بکریاں خرید لیں تو یہ خلطہ نہیں شرکہ (اشتراک)
ہے۔
برابری کی بنیاد پر حساب کتاب کرنے کی مثال یہ ہے کہ چالیس چالیس بکریوں والے دو افراد نے اختلاط کرکے اپنا ایک ریوڑ بنالیا۔
زکاۃ وصول کرنے والے نے جس شخص کی بکریوں میں سے زکاۃ کی بکری وصول کی، دوسرا آدمی اسے آدھی بکری کی قیمت ادا کرے گا۔
اگر بکریوں میں کمی بیشی ہو تو اسی نسبت سے حساب کر کے ایک دوسرے کو ادائیگی کردیں گے۔
مصدق زکاۃ دینے والا اگر اپنی خوشی سے عمدہ جانور یا سانڈ دینا چاہے تو اس سے وصول کر لیا جائے لیکن زکاۃ وصول کرنے والا خود طلب نہ کرے۔
اگر اس لفظ کو مُصَدِّقْ (زکاۃ وصول کرنے والا)
پڑھا جائے تو مطلب یہ ہوگا کہ اگر عامل کسی فائدے کے پیش نظر عیب دار یا بوڑھا جانور لینا پسند کرے تو زکاۃ ادا کرنے والا گناہ گار نہیں، مثلاً:
ممکن ہے کہ ایک جانور لنگڑا ہو لیکن اس میں گوشت زیادہ ہو یا وہ عمدہ نسل کا ہونے کی وجہ سے دوسرے جانوروں سے بہتر سمجھا جاتا ہو اس طرح بیت المال کو یا جس مستحق کے حصے میں وہ آئے اسے زیادہ فائدہ حاصل ہو جائے۔