فوائد ومسائل:
1۔
رسول اللہ ﷺ کی معیشت بقدر گزران اور قناعت کی تھی۔
جو کچھ بھی ہوتا بالعموم صدقہ کردیاکرتے تھے مگر اسکے باوجود آپﷺ قربانی کا اہتمام کرتے۔
اور اسی طرح جہاد کےلئے بھی اسلحہ حاضر رکھا کرتے تھے۔

2۔
قربانی کے موقع پرروپیہ پیسہ صدقہ کرنے کی بجائے جانور قربان کرنا ہی مشروع ومطلوب ہے۔
جانور کی قیمت صدقہ کرنا قربانی کا بدل ہرگز نہیں ہوسکتا۔

3۔
اونٹ کو نحر کیاجاتا ہے۔
یعنی حلق کے آخر میں ہنسلی کی ہڈی کے ساتھ نرم حصے میں چھرا گھونپا جاتا ہے۔
اونٹ کو ذبح کرنے کا قرآن وسنت کا طریقہ یہ ہے کہ اسے کھڑا کرکے ذبح کیا جائے۔
ارشاد باری تعالیٰ ہے۔
(وَالْبُدْنَ جَعَلْنَاهَا لَكُم مِّن شَعَائِرِ اللَّـهِ لَكُمْ فِيهَا خَيْرٌ ۖ فَاذْكُرُوا اسْمَ اللَّـهِ عَلَيْهَا صَوَافَّ)(الحج۔
36) اور قربانی کے اونٹ بھی جنھیں ہم نے تمہارے لئے اللہ کے شعائر بنایا ہے۔
تمہارے لئےان میں بھلائی ہے۔
لہذا(نحر کے وقت) جب وہ پائوں باندھے کھڑے ہوں تو تم ان پراللہ کا نام لو حضرت ابن عباس رضی اللہ تعالیٰ عنہ صواف کی تفسیر میں فرماتے کے اس کے معنی(قیاما) کے ہیں۔
یعنی کھڑے ہونے کی حالت میں اونٹ کونحر کیاجائے۔
(صحیح البخاری۔
الحج باب نحر البدن قائمۃ)علاوہ ازیں اونٹ کی بایئں ٹانگ کو باندھ لیاجائے۔
نبی کریمﷺ اور صحابہ کرامرضوان اللہ عنہم اجمعین اونٹ کواس حالت میں نحر کیا کرتے تھے۔
حضرت جابر رضی اللہ تعالیٰ عنہ بیان کرتے ہیں کہ نبی کریم ﷺ اور صحابہ کرامرضوان اللہ عنہم اجمعین اونٹ کو اسی حالت میں نحر کرتے تھے۔
کہ بائاں پائوں بندھا ہوتا۔
او ر وہ باقی ماندہ تین پائوں پر کھڑا ہوتا۔
(سنن ابی دائود۔
المناسک۔
باب کیف تنحر البدن۔
حدیث 1767)حضرت زیاد بن جبیر رضی اللہ تعالیٰ عنہ بیان کرتے ہیں۔
کہ میں نے حضرت ابن عمر رضی اللہ تعالیٰ عنہ کو دیکھا کہ وہ ایک شخص کے پاس تشریف لائے۔
جس نے ذبح کرنے کے لئے اپنی اونٹنی کو بٹھایا ہوا تھا۔
آپ ﷺ نے فرمایا اسے کھڑا کر کے باندھ لو۔
یہی حضرت محمد رسول اللہ ﷺکی سنت ہے۔
(صحیح البخاری۔
الحج باب النحر الابل مفیدۃ۔
حدیث 1713)اونٹ کے علاوہ دیگر جانوروں کو ذبح کیا جاتاہے۔
یعنی ان کا حلق ااور ساتھ کی رگیں کاٹی جاتی ہیں۔

تخریج:
«أخرجه البخاري، الحج، باب من نحر هدية بيده، حديث:1712، حديث:5553، 5558 وغيره، وحديث عائشة: أخرجه مسلم، الأضاحي، حديث:1967.» تشریح:
1. رسول اللہ صلی اللہ علیہ وسلم کو موٹے تازے جانور کی قربانی محبوب تھی۔
2.قربانی سے پہلے چھری خوب تیز کر لینی چاہیے۔
3. جانور کو پہلو کے بل لٹا کر ذبح کرنا چاہیے۔
4. ذبح سے پہلے مسنون دعا اور تکبیر پڑھنی چاہیے۔
مذکورہ حدیث میں مذکور دعا کے علاوہ بھی ایک دعا ذبح کرتے وقت پڑھنا ثابت ہے۔
اور وہ دعا یہ ہے: «إِنِّي وَجَّھْتُ وَجْھِيَ لِلَّذِي فَطَرَ السَّمٰوٰتِ وَاْلأَرضَ عَلٰی مِلَّۃِ إِبْرَاھِیمَ حَنِیفًا وَّمَا أَنَا مِنَ الْمُشْرِکِینَ‘ إِنَّ صَلاَتِي وَ نُسُکِي وَ مَحْیَايَ وَ مَمَاتِي لِلّٰہِ رَبِّ الْعَالَمِینَ‘ لاَ شَرِیکَ لَہُ وَبِذٰلِکَ أُمِرْتُ وَ أَنَا مِنَ الْمُسْلِمِینَ‘ اَللّٰھُمَّ! مِنْکَ وَلَکَ عَنْ مُحَمَّدٍ وَّ أُمَّتِہِ بِسْمِ اللّٰہِ وَ اللّٰہُ أَکْبَرُ» (مسند أحمد:۳ /۳۷۵‘ وسنن أبي داود‘ الضحایا‘ باب ما یستحب من الضحایا‘ حدیث: ۲۷۹۵) دعا میں مذکور الفاظ: «عَنْ مُحَمَّدٍ وَ أُمَّتِہِ» کے بجائے اپنا اور اہل و عیال کا نام لے یا جس کی طرف سے ذبح کر رہا ہے اس کا نام لے۔
5. اہل خانہ کی طرف سے ایک جانور قربانی کرنے سے سنت ادا ہو جاتی ہے۔
6. قربانی اپنے ہاتھ سے ذبح کرنی چاہیے گو اس میں نیابت بھی جائزہے۔
7.میت کی طرف سے قربانی کرنا کسی صحیح حدیث سے ثابت نہیں۔
رسول اللہ صلی اللہ علیہ وسلم کے عمومی عمل سے استدلال اس لیے صحیح نہیں کہ بعض علماء کے نزدیک وہ آپ کا خاصہ ہے جس میں امت کے لیے آپ کی اقتدا جائز نہیں۔
دیکھیے: (إرواء الغلیل: ۴ /۳۵۴) علاوہ ازیں خیرالقرون (صحابہ و تابعین کے بہترین ادوار) میں بھی میت کی طرف سے قربانی کرنے کا ثبوت نہیں ملتا۔
صرف ایک نقطۂ نظر سے اس کا جواز ہو سکتا ہے کہ میت کی طرف سے صدقہ کرنا جائز ہے‘ یعنی ایصال ثواب کے طور پر اس کا انکار کرنا ممکن نہیں ہے۔
واللّٰہ أعلم۔
مزید تفصیل کے لیے دیکھیے: (سنن ابوداود ‘ اردو‘ طبع دارالسلام‘ حدیث: ۲۷۹۰ کے فوائد و مسائل)

اردو حاشہ:
فوائد و مسائل:
قربانی اپنے ہاتھ سے ذبح کرنا افضل ہے لیکن دوسرا شخص بھی ذبح کرسکتا ہےجیسے کی حجۃالوداع میں رسول اللہ ﷺ نے ازواج مطہرات رضی اللہ عنہ کی طرف سے قربانی دی۔
انھیں تب معلوم ہوا گوشت ان کے پاس پہنچا۔ (دیکھیےحدیث: 2981)

حدیث حاشیہ:
مقصد باب یہ ہے کہ نبی کریم ﷺ نے خود اپنے ہاتھ سے اونٹوں کو نحر کیا، اس سے ترجمہ باب ثابت ہوا۔

حدیث حاشیہ:
(1)
امام بخاری ؒنے یہ حدیث مختصر بیان کی ہے، آئندہ خود ہی تفصیل سے بیان کریں گے۔
(صحیح البخاري، الحج، حدیث: 1714)
اس حدیث میں صراحت ہے کہ رسول اللہ ﷺ نے اپنے دستِ مبارک سے قربانی کے اونٹ نحر کیے۔
(2)
اس حدیث میں حضرت انس ؓنے اپنا مشاہدہ بیان کیا ہے۔
صحیح مسلم میں حضرت جابر ؓ سے ایک طویل حدیث مروی ہے، وہ بیان کرتے ہیں کہ رسول اللہ ﷺ نے ترسیٹھ اونٹ اپنے دست مبارک سے ذبح کیے اور سو میں سے باقی اونٹ نحر کرنے کے لیے حضرت علی ؓ کو مامور فرمایا۔
(صحیح مسلم، الحج، حدیث: 2950(1218)