حضرت ابوسلمہ بن عبدالرحمٰن اور سلیمان بن یسار سے سوال ہوا کہ ایک گواہ اور ایک قسم پر فیصلہ کرنا درست ہے؟ انہوں نے کہا: ہاں۔

امام مالک رحمہ اللہ نے فرمایا کہ جب مدعی کے پاس ایک گواہ ہو تو اس کی گواہی لے کر مدعی کو قسم دیں گے، اگر وہ قسم کھا لے گا تو بری ہو جائے گا، اگر وہ قسم کھانے سے انکار کرے تو مدعی کا دعویٰ اس پر ثابت ہوجائے گا۔

امام مالک رحمہ اللہ نے فرمایا کہ ایک قسم اور ایک گواہ سے فیصلہ کرنا صرف اموال کے دعوے میں ہوگا، اور حدود اور نکاح اور طلاق اور عتاق اور سرقہ اور قذف میں ایک گواہ اور ایک قسم پر فیصلہ کرنا درست نہیں، اور جس شخص نے عتاق کو اموال کے دعوے میں داخل کیا اس نے غلطی کی، کیونکہ اگر ایسا ہوتا تو غلام جب ایک گواہ لاتا اس امر پر کہ مولیٰ نے اس کو آزاد کر دیا ہے تو چاہیے تھا کہ غلام سے حلف لے کے اس کو آزاد کر دیتے، حالانکہ ایسا نہیں ہے، بلکہ جب غلام اپنی آزادی پر ایک گواہ لائے تو اس کے مولیٰ سے حلف لیں گے، اگر حلف کر لے گا تو آزادی ثابت نہ ہوگی۔

امام مالک رحمہ اللہ نے فرمایا کہ اسی طرح اگر عورت ایک گواہ لائے اس امر پر کہ اس کے خاوند نے اس کو طلاق دی تو خاوند سے قسم لیں گے، اگر وہ قسم کھائے اس امر پر کہ میں نے طلاق نہیں دی تو طلاق ثابت نہ ہوگی۔

امام مالک رحمہ اللہ نے فرمایا کہ اگر طلاق اور عتاق میں جب ایک گواہ ہو تو خاوند اور مولیٰ پر قسم لازم آئے گی، کیونکہ عتاق ایک حد شرعی ہے جس میں عورتوں کی گواہی درست نہیں، اس لیے کہ غلام جب آزاد ہو جاتا ہے تو اس کی حرمت ثابت ہوجاتی ہے، اور اس کی حدیں اوروں پر پڑتی ہیں، اور اوروں کی حدیں اس پر پڑتی ہیں، اگر وہ زنا کرے اور محصن ہو تو رجم کیا جائے گا، اگر اس کو کوئی مار ڈالے تو قاتل بھی مارا جائے گا، اور اس کے وارثوں کو میراث کا استحقاق حاصل ہوگا، اگر کوئی حجت کرنے والا یہ کہے کہ مولیٰ جب غلام کو آزاد کر دے پھر ایک شخص اپنا قرض مولیٰ سے مانگنے آئے اور ایک مرد اور دو عورتوں کی گواہی سے اپنا قرض ثابت کرے تو مولیٰ پر قرضہ ثابت ہوجائے گا، اگر مولیٰ کے پاس سوائے اس غلام کے کوئی مال نہ ہوگا تو اس غلام کی آزادی فسخ کر ڈالیں گے، اس سے یہ بات نکالی کہ عورتوں کی گواہی عتاق میں درست ہے تو یہ نہیں ہوسکتا، کیونکہ عورتوں کی گواہی قرضے کے اثبات میں معتبر ہوئی، نہ کہ عتاق میں، اس کی مثال یہ ہے کہ ایک شخص اپنے غلام کو آزاد کر دے، پھر اس کا قرض خواہ ایک گواہ اور ایک قسم سے اپنا قرضہ مولیٰ پر ثابت کر دے، اور اس کی وجہ سے آزادی فسخ کی جائے یا مولیٰ پر قرضے کا دعویٰ کرے، اور گواہ نہ رکھتا ہو تو مولیٰ سے قسم لی جائے، اور وہ انکار کرے تو مدعی سے قسم لے کر اس کا قرضہ ثابت کردیا جائے، اور آزادی فسخ کی جائے، اسی طرح ایک شخص نکاح کرے لونڈی سے، پھر لونڈی کا مولیٰ خاوند سے کہنے لگے کہ تو نے اور فلاں شخص نے مل کر میری اس لونڈی کو اتنے دینار میں خرید کیا ہے، اور خاوند انکار کرے تو مولیٰ ایک مرد اور دو عورتوں کو گواہ لائے اپنے قول پر، اس صورت میں بیع ثابت ہوجائے گی، اور وہ لونڈی خاوند پر حرام ہوجائے گی، اور نکاح فسخ ہوجائے گا، حالانکہ طلاق میں عورتوں کی گواہی درست نہیں۔

امام مالک رحمہ اللہ نے فرمایا کہ اسی طرح اگر ایک شخص قذف کرے ایک شخص کو، پھر ایک مرد یا دو عورتیں گواہی دیں کہ جس شخص کو قذف کیا ہے وہ غلام ہے، تو قاذف کے ذمہ سے حد ساقط ہوجائے گی، حالانکہ قذف میں شہادت عورتوں کی درست نہیں۔

امام مالک رحمہ اللہ نے فرمایا کہ یہ بھی اس کی مثال ہے کہ دو عورتیں گواہی دیں بچے کے رونے پر، تو اس بچے کے لیے میراث ثابت ہوجائے گی، اور جو بچہ مر گیا ہوگا تو اس کے وارثوں کو میراث ملے گی، حالانکہ ان دو عورتوں کے ساتھ نہ کوئی مرد ہے نہ قسم ہے، اور کبھی میراث کا مال کثیر ہوتا ہے، جیسے سونا، چاندی، زمین، باغ، غلام وغیرہ، اگر یہی دو عورتیں ایک درہم پر یا اس سے کم پر بھی گواہی دیں تو ان کی گواہی سے کچھ ثابت نہ ہوگا، جب تک کہ ان کے ساتھ ایک مرد یا ایک قسم نہ ہو۔

امام مالک رحمہ اللہ نے فرمایا کہ بعض لوگ یہ کہتے ہیں کہ ایک قسم اور ایک گواہ سے حق ثابت نہیں ہوتا بہ سبب قول اللہ تعالیٰ کے ﴿فَإِن لَّمْ يَكُونَا رَجُلَيْنِ﴾ الآیة، تو حجت ان لوگوں پر یہ ہے کہ آیا تم نہیں دیکھتے کہ اگر ایک شخص نے دعویٰ کیا ایک شخص پر مال کا، کیا نہیں حلف لیا جاتا مدعی علیہ سے، تو اگر حلف کرتا ہے باطل ہوجاتا ہے اس سے یہ حق، اگر نکول کرتا ہے پھر حلف دلاتے ہیں صاحبِ حق کو، تو یہ امر ایسا ہے کہ نہیں ہے اختلاف اس میں کسی کا لوگوں میں سے، اور نہ کسی شہر میں شہروں میں سے، تو کس دلیل سے نکالا ہے اس کو، اور کس کتاب اللہ میں پایا ہے اس مسئلے کو، تو جب اس امر کو اقرار کرے تو ضرور ہی اقرار کرے، یمین مع الشاہد کا اگرچہ نہیں ہے یہ کتاب اللہ میں، مگر حدیث میں تو موجود ہے، آدمی کو چاہیے کہ ٹھیک راستہ پہچانے اور دلیل کا موقع دیکھے اس صورت میں اگر اللہ چاہے گا تو اس کی مشکل حل ہو جائے گی۔