تخریج:
[صحيح بخاري 6594]،
[صحيح مسلم 6723]

فقہ الحدیث:
➊ عقیدہ تقدیر برحق ہے۔
➋ کون خوش قسمت ہے اور کون بدقسمت؟ یہ سب اللہ تعالیٰ کو معلوم ہے اور اس نے اپنے علم سے، اسے تقدیر میں لکھ رکھا ہے۔
➌ سچی توبہ کرنے سے سابقہ گناہ معاف ہو جاتے ہیں، لہٰذا کسی توبہ کرنے والے شخص کو سابقہ گناہوں اور غلطیوں پر ملامت نہیں کرنا چاہئیے۔
➍ کفریہ عقائد و اعمال انسان کو جہنم کی طرف لے جاتے ہیں اور اللہ کے فضل و کرم سے اسلامی عقائد و اعمال انسان کے جنت میں داخلے کا ذریعہ بن جاتے ہیں۔
➎ جن عقائد و اعمال پر خاتمہ ہوتا ہے اسی کا اعتبار ہے، لہٰذا ہر وقت اللہ تعالیٰ سے خاتمہ بالخیر کی دعا مانگنی چاہئیے۔
➏ نبی کریم صلی اللہ علیہ وسلم ہر بات میں سچے اور امین تھے، چاہے نبوت سے پہلے کی زندگی تھی یا بعد کی، آپ صلی اللہ علیہ وسلم کے مخالفین بھی آپ کو سچا اور امین مانتے تھے۔
➐ جدید طبی تحقیقات نے اس حدیث کی تصدیق کر دی ہے، جس سے اہل ایمان کا ایمان اور زیادہ ہو جاتا ہے۔ «والحمد لله عليٰ كل حال»
➑ اس حدیث سے ثابت ہوتا ہے کہ چار ماہ کے بعد بچے میں روح پھونک دی جاتی ہے۔ اگر پانچ ماہ یا زیادہ مدت والا بچہ مردہ پیدا ہو جائے یا پیدا ہوتے ہی مر جائے تو اس کی نماز جنازہ پڑھنی چاہیے۔
رسول اللہ صلی اللہ علیہ وسلم نے فرمایا:
«والسقط يصلي عليه ويدعيٰ لوالديه بالمغفرة والرحمة»
”اور «سقط» (ناتمام بچہ جو اپنی میعاد سے پہلے گر جائے) کی نماز جنازہ پڑھی جائے گی اور اس کے والدین کے لئے مغفرت و رحمت کی دعا کی جائے گی۔“ [سنن ابي داود: 3180 وسنده صحيح، سنن الترمذي: 1031، وقال: ”حسن صحيح“ وصححه ابن حبان: 769 والحاكم عليٰ شرط البخاري 1؍363 ووافقه الذهبي]
◈ اس حدیث کے راوی سیدنا مغیرہ بن شعبہ رضی اللہ عنہ نے فرمایا:
” «سقط» کی نماز جنازہ پڑھی جائے گی اور اس کے والدین کے لئے مغفرت و رحمت کی دعا کی جائے گی۔“ [مصنف ابن ابي شيبه 3؍317 ح11589 وسنده صحيح]
◈ سیدنا ابن عمر رضی اللہ عنہما نے ناتمام مردہ بچے کی نماز جنازہ پڑھی، نافع نے کہا کہ مجھے پتا نہیں کہ وہ زندہ پیدا ہو کر (مر گیا تھا) یا پیدا ہی مردہ ہوا تھا۔ [ابن ابي شيبه 3؍317 ح 11584، وسنده صحيح]
◈ مشہور تابعی محمد بن سیرین رحمہ اللہ نے فرمایا:
اگر اس کی تخلیق پوری ہو جائے تو اس کا نام رکھا جائے گا اور اس کی نماز جنازہ اسی طرح پڑھی جائے گی، جس طرح بڑے آدمی کی پڑھی جاتی ہے۔ [ابن ابي شيبه 3؍317 ح11588، وسنده صحيح]
◈ عبدالرحمٰن بن ابی لیلیٰ رحمہ اللہ فرماتے ہیں:
”ہم اپنی اولاد میں سے کسی کو بھی نماز جنازہ پڑھے بغیر نہیں چھوڑیں گے۔“ [ابن ابي شيبه 3؍317 ح11590، وسنده صحيح]
◈ امام ترمذی رحمہ اللہ نے فرمایا:
«والعمل عليه عند بعض أهل العلم من أصحاب النبى صلى الله عليه وسلم وغيرهم، قالوا: يصليٰ على الطفل وإن لم يستهل بعد أن يعلم أنه خلق وهو قول أحمد وإسحاق»
”صحابہ کرام وغیرہم میں سے بعض کا اسی پر عمل ہے، انہوں نے کہا: بچے کی نماز جنازہ پڑھی جائے گی اگرچہ وہ پیدا ہوتے وقت آواز نہ نکالے، یہ معلوم ہو جانے کے بعد کہ اس کی تخلیق (مکمل) ہو چکی ہے اور أحمد (بن حنبل) اور اسحاق (بن راہویہ) کا یہی قول ہے۔“ [سنن الترمذي: 1031]
↰ جو علماء مردہ بچے کی نماز جنازہ کے قائل نہیں ہیں، ان کا قول نبی کریم صلی اللہ علیہ وسلم کی حدیث کے خلاف ہونے کی وجہ سے متروک و ناقابل حجت ہے۔
❀ سیدنا ابوہریرہ رضی اللہ عنہ چھوٹے بچے پر نماز جنازہ میں درج ذیل دعا پڑھتے تھے:
«اللَّهُمَّ اجْعَلْهُ فَرَطَاً وَذُخْراً»
”اے اللہ! اسے امیر سامان، آگے چلنے والا اور ذخیرہ بنادے۔“ [السنن الكبريٰ للبيهقي 4؍10، وسنده حسن]

فوائد ومسائل:
1: بظاہر اگر کوئی انسان ایک راہ پر جارہا ہوتو یہ نہیں سمجھنا چاہیے کہ وہ ہمیشہ اسی راہ پر چلتا رہے گا، اس کے اگر آخر میں جا کر بھی راستہ بدل لینا ہے تو یہ سب پہلے سے اللہ کے علم کے مطابق لکھا ہواہے۔

2: تقدیرکا معاملہ سراسر غیب کا معاملہ ہے، انسان کو خود بھی خیر کے عمل کرکے دھوکے میں نہیں پڑنا چاہیے کہ بس بخشا گیا یا غلط ہونے کی وجہ سے بابکل ہی مایوس نہیں ہونا چاہیے کہ بس مارا گیا، بلکہ ہمیشہ اللہ الرحمن الرحیم سے بھلائی کی توفیق مانگتے رہنا چاہیے اور غلط کشی سے فورا توبہ کرنی چاہیے اور یہ دعا بھی کرنا چاہیے: (یا مقلبَ القلوبِ ثَبِّت قلبي علی دینِكَ)  (جامع الترمذي، الدعوات،باب: الدعاء، یا مقلب القلوب، حدیث: 3522) (اللهم مصرفَ القلوبِ صرِّف قلبي علی طاعتِكَ)  (صحیح مسلم، القدر،باب تصریف اللہ تعالی القلوب کیف یشاء، حدیث: 2654) اے دلوں کے بدلنے والے، مجھے اپنے دین کی اطاعت پر ثابت قدم رکھ۔
۔
۔
۔
اور اے دلوں کے پھیرنے والے! میرے دل کو اپنی اطاعت کی طرف پھیر دے۔

اردو حاشہ:
(1)
تقدیر کا مطلب یہ ہے کہ ابد تک جو کچھ بھی ہونے والا ہے، اس کا علم پہلے سے اللہ کو ہے اور اس نے اسے لکھ رکھا ہے۔
اب جو کچھ ہوتا ہے وہ اس کے ازلی علم کے مطابق ہی ہوتا ہے لیکن اس کا یہ مطلب نہیں کہ اللہ نے گناہ گار کو گناہ کرنے پر مجبور کیا ہے۔
انسان اللہ کی دی ہوئی طاقت ہی سے نیکی یا گناہ کرتا ہے۔
اگراللہ تعالیٰ چاہتا تو یہ اختیار چھین لیتا لیکن وہ ایسا نہیں کرتا، البتہ اسے پہلے سے معلوم ہے کہ فلاں بندہ اس اختیار کو صحیح طریقے سے استعمال کر کے اس کی خوشنودی حاصل کر لے گا اور فلاں بندہ اس اختیار کے غلط استعمال کی وجہ سے اللہ کو ناراض کر کے سزا کا مستحق ہو جائے گا۔

(2)
انسان کے نیک و بد اعمال، اس کی عمر، اس کا رزق اور اس کا جنتی یا جہنمی ہونا ایک خاص وقت پر اللہ کے بتانے سے فرشتوں کے علم میں آتا ہے اور وہ لکھ لیتے ہیں، اگرچہ یہ فیصلے ازل میں ہو چکے ہیں اور لوح محفوظ میں درج ہو چکے ہیں۔

(3)
ماں کے پیٹ میں انسان کی تخلیق کے مختلف مراحل ہیں۔
ایک مرحلے سے دوسرے مرحلہ میں وہ دیکھنے میں خون سے زیادہ مشابہ محسوس ہوتا ہے۔
تیسرے مرحلے میں اعضاء بننے لگتے ہیں لیکن مجموعی طور پر وہ نرم گوشت کے ٹکڑے سے مشابہ نظر آتا ہے۔

(4)
ہر انسان کی عمر مقرر ہے۔
اس سے پہلے فوت نہیں ہو سکتا، لہذا بندے کو جان کے خوف سے ایمان ترک نہیں کرنا چاہیے بلکہ ایمان کی حفاظت کے لیے جان قربان کرنے کے لیے تیار رہنا چاہیے۔

(5)
ہر انسان کا رزق مقرر ہو چکا ہے جو اسے بہرحال ملنا ہے، بندے کی آزمائش اسی چیز میں ہے کہ وہ اس کے حصول کے لیے کون سے ذرائع اختیار کرنے سے بھی نہیں ملے گی، اس لیے اللہ پر توکل کرتے ہوئے رزق حلال حاصل کرنے کی کوشش کرنی چاہیے۔

(6)
کسی شخص کے بارے میں بالیقین جنتی یا جہنمی ہونے کا فیصلہ نہیں کرنا چاہیے۔
یہ بات صرف اللہ تعالیٰ کو معلوم ہے کہ کون جنت میں جانے والا ہے اور کون جہنم کا ایندھن بننے والا ہے، البتہ اللہ تعالیٰ کی رحمت کی امید رکھنا ضروری ہے اور کسی نیک آدمی کے بارے میں اظہار خیال کرتے ہوئے یہی کہنا چاہیے کہ ہمارے خیال میں وہ نیک آدمی تھا اور ہم اللہ کی رحمت سے امید رکھتے ہیں کہ وہ جنت میں جائے گا، البتہ جن افراد کے متعلق اللہ تعالیٰ نے یا اس کے نبی صلی اللہ علیہ وسلم نے بتا دیا ہے، ان کے جنتی یا جہنمی ہونے کے بارے میں یقین رکھنا چاہیے، مثلا:
ابولہب اور اس کی بیوی کا جہنمی ہونا، جیسے سورہ لہب میں مذکور ہے یا عشرہ مبشرہ رضی اللہ عنھم کا جنتی ہونا وغیرہ۔

(7)
کسی غیر مسلم یا گناہ گار کو تبلیغ کی جائے اور وہ قبول نہ کرے تو یہ نہیں کہنا چاہیے کہ اسے ہرگز ہدایت نہیں ملے گی کیونکہ اس کا علم صرف اللہ کو ہے ممکن ہے آخری وقت میں ہدایت نصیب ہو جائے، جیسے ایک یہودی لڑکے کو مرض الموت میں رسول اللہ صلی اللہ علیہ وسلم نے اسلام لانے کو کہا، تو وہ اسلام لے آیا اور فوت ہو گیا۔ (صحيح البخاري، الجنائز، باب إذا أسلم الصبي فمات هل يُصلي عليه... حديث: 1356)

(8)
مومن کو نیکیوں پر فخر نہیں کرنا چاہیے بلکہ اللہ کا خوف رکھتے ہوئے استقامت کی دعا کرتے رہنا چاہیے۔
حضرت یوسف علیہ السلام نے دعا فرمائی تھی:
  ﴿فاطِرَ‌ السَّمـوتِ وَالأَر‌ضِ أَنتَ وَلِيّۦ فِى الدُّنيا وَالءاخِرَ‌ةِ تَوَفَّنى مُسلِمًا وَأَلحِقنى بِالصّـلِحينَ﴾  (یوسف: 101)
 ”اے زمین اور آسمان کے بنانے والے! تو ہی دنیا اور آخرت مین میرا دوست اور کارساز ہے، مجھے اسلام کی حالت میں فوت کرنا اور نیکوں میں شامل کر دینا۔“

اردو حاشہ:
وضاحت:
1؎:
یعنی سچے ہیں او ر سچی بات آپ کی طرف وحی کی جاتی ہے۔

فائدہ:
اس حدیث میں انسان کی تخلیق کے متعلق بیان کیا گیا ہے کہ کس طرح اللہ تعالیٰ عدم سے ”احسن تقویم“ اور ”اشرف الخلوقات“ انسان کو وجود بخشا ہے، سبحان اللہ۔ اس حدیث میں تقدیر کا بھی بیان ہے، تقدیر کا مفہوم یہ ہے کہ جو کام انسان نے کرنے تھے، وہ اللہ تعالیٰ کے علم میں ہیں، اور وہی علم لکھا گیا ہے، اس کا نام تقدیر ہے۔ تقدیر برحق ہے، اس پر ایمان لانا واجب ہے، اس میں بحث و جدال منع ہے۔

حدیث حاشیہ:
مفردات الحدیث:
الصادق:
سچ کہنے والا،
المصدوق،
جس کے قول اور وحی کی تصدیق کی جاتی ہے،
يجمع خلقه في بطن امه:
ماں کے پیٹ میں منی کا نطفہ چالیس دن تک مختلف مراحل سے گزرتا ہے،
پھر چالیس دن منجمد خون کے مختلف مراحل سے گزرتا ہے اور پھر چالیس دن تک گوشت کے لوتھڑے کی شکل میں مختلف مراحل طے کرتا ہے اور اس مدت میں اعضاء کی تشکیل اور ہڈیوں کی بناوٹ کے آثار پیدا ہو جاتے ہیں اور چار ماہ کے بعد جب اعضاء،
ہڈیوں اور گوشت پوست کا ظہور ہو جاتا ہے تو اس میں روح پھونک دی جاتی ہے۔
" فوائد ومسائل:
اس حدیث سے معلوم ہوتا ہے،
انسان جب رحم مادر میں ہوتا ہے اور اس پر تین چلے،
یعنی چار ماہ گزر جاتے ہیں تو پھر اس میں روح پھونک دی جاتی ہے اور اللہ کا مقرر کیا ہوا فرشتہ اس کے متعلق چار باتیں لکھتا ہے،
اس کا رزق،
اس کی مدت حیات و عمر،
اس کے اعمال اور اس کا نیک بخت یا بدبخت لکھا ہوتا ہے،
بسا اوقات وہ ایک مدت تک جنتیوں کی سی پاکبازانہ زندگی گزارتا رہتا ہے اور بظاہر نیک اعمال کرتا رہتا ہے،
یہاں تک کہ وہ جنت کے بہت قریب ہو جاتا ہے،
لیکن پھر ایک دم اس کے رویہ میں تبدیلی رونما ہو جاتی ہے اور وہ دوزخ میں لے جانے والے برے اعمال کرنے لگتا ہے اور اس حال میں مر کر بالآخر دوزخ میں چلا جاتا ہے اور اس طرح بعض دفعہ ایسا بھی ہوتا ہے کہ ایک انسان جو نوشتہ میں جنتی لکھا جاتا ہے،
وہ ایک عرصہ تک بظاہر دوزخیوں والا رویہ اختیار کیے رہتا ہے اور برے اعمال کرتا رہتا ہے،
یہاں تک کہ وہ دوزخ کے بہت قریب پہنچ جاتا ہے،
لیکن پھر اچانک وہ پلٹا کھاتا ہے اور وہ سنبھل جاتا ہے اور اہل جنت والے اعمال صالحہ کرنے لگ جاتا ہے اور اعمال صالحہ پر ہی اس کا خاتمہ ہوتا ہے اور وہ جنت میں چلا جاتا ہے،
اس لیے کسی کو بداعمالیوں میں مبتلا دیکھ کر اس کے دوزخی ہونے کا قطعی حکم لگانا درست نہیں ہے،
کیا معلوم زندگی کے آخری دور میں اس کا رویہ اور طرز عمل یکسر بدل جائے،
اسی طرح اگر کسی کو آج اللہ کی طرف سے نیک عملوں کی توفیق میسر آ رہی ہے تو اسے اس پر مطمئن اور بے فکر نہیں ہو جانا چاہیے،
بلکہ پوری دل جمعی اور قوت سے برابر حسن خاتمہ کے لیے کوشاں رہنا چاہیے،
محض اچھے عملوں پر شاداں اور فرحاں نہیں ہونا چاہیے،
کیونکہ دارومدار اور انحصار خاتمہ پر ہے،
جو انسان کو معلوم نہیں ہے۔
اللہ تعالیٰ کا علم چونکہ ازلی و اندی ہے اس لیے اسے اس بات کا علم ہے کہ اس کا خاتمہ کن اعمال پر ہو گا،
اچھے یا برے اسی کے مطابق اس کا سعید یا شقی ہونا لکھا جاتا ہے۔
اللہ کے علم میں چونکہ تخلف ممکن نہیں ہے،
اس کا علم واقعہ اور ہئیت کے مطابق ہوتا ہے اس کے خلاف ممکن نہیں ہو گا جیسا انجام ہونا ویسے اعمال ہی اس نے کرنے ہوتے ہیں۔

حدیث حاشیہ:
یعنی اس کے جنت یا دوزخ کا فاصلہ اتنا ہی رہ جاتا ہے۔
قسمت غالب آتی ہے اور وہ تقدیر کے مطابق جنت یا دوزخ میں داخل کیا جاتا ہے۔
اللَّهُمَّ إِنْ كُنْتَ كَتَبْتَنِي مِن أهلِ النارِ فامحهُ فَإِنَّكَ تَمْحُو مَا تَشَاءُ وَتُثْبِتُ، وَعِنْدَكَ أُمُّ الْكِتَابِ آمین۔
دوسری روایت میں اتنا زیادہ ہے کہ وہ اس میں روح پھونکتا ہے، تو روح چار مہینے کے بعد پھونکی جاتی ہے۔
ابن عباس رضی اللہ عنہما کی روایت میں یوں ہے کہ چار مہینے دس دن کے بعد۔
قاضی عیاض نے کہا اس پر علماء کا اتفاق ہے کہ روح ایک سو بیس دن کے بعد پھونکی جاتی ہے اور مشاہدہ اور جنین کی حرکت سے بھی یہی ثابت ہوتا ہے۔
میں (وحید الزماں)
کہتا ہوںکہ اس زمانے کے حکیموں اور ڈاکٹروں نے مشاہدہ اور تجربہ سے ثابت کیا ہے کہ چار مہینے گزرنے سے پہلے ہی جنین میں جان پڑجاتی ہے۔
اب جن روایتوں میں روح پھونکنے کا ذکر نہیں ہے جیسے امام بخاری رحمۃ اللہ علیہ کی اس روایت میں ہے ان میں تو کوئی اشکال ہی نہ ہوگا لیکن جن روایتوں میں اس کا ذکر ہے تو حدیث غلط نہیں ہوسکتی بلکہ حکیموں اور ڈاکٹروں کا دعویٰ غلط ہے اور یہ بھی ممکن ہے کہ روح حیوانی چار مہینے سے پہلے ہی جنین میں پڑجاتی ہے لیکن حدیث میں روح سے مراد روح انسانی یعنی نفس ناطقہ ہے۔
وہ چار مہینے دس دن کے بعد ہی بدن سے متعلق ہوتا ہے۔

حدیث حاشیہ:
تواعتبار خاتمہ کا ہے۔
اس حدیث سے حضرت امام بخاری  نے یہ ثابت کیا کہ اللہ کا کلام حادث ہوتا ہے کیونکہ جب نطفہ پر چارمہینے گزر لیتے ہیں، اس وقت فرشتہ بھیجا جاتا ہے اور اللہ تعالی صرف چار چیزوں کے لکھنے کا اس کو حکم دیتا ہے۔

حدیث حاشیہ:
دوسری روایت میں ہے کہ جب مرد عورت سے صحبت کرتا ہے تو مرد کا پانی عورت کے ہر رگ و پے میں سما جاتا ہے۔
ساتویں دن اللہ اس کو اکٹھا کرکے اس سے ایک صورت جوڑتا ہے۔
پھر نفس ناطقہ چوتھے چلہ میں یعنی چار مہینے کے بعد اس سے متعلق ہوجاتا ہے۔
جو لوگ اعتراضاً کہتے ہیں کہ چار ماہ سے قبل ہی حمل میں جان پڑ جاتی ہے ان کا جواب یہ ہے کہ حدیث میں روح سے نفس ناطقہ مدرکہ مراد ہے اسے روح انسانی کہا جاتا ہے اور روح حیوانی پہلے ہی سے بلکہ نطفہ کے اندر بھی موجود رہتی ہے۔
لہٰذا اعتراض باطل ہوا۔
اس حدیث سے یہ بھی ظاہر ہوا کہ اعتبار خاتمہ کا ہے اس لیے آدمی کیسے ہی اچھے کام کررہا ہو پھر بھی خرابی خاتمہ سے ڈرتے رہنا چاہئے۔
بزرگوں نے تجربہ کیا ہے کہ جو لوگ حدیث شریف سے محبت رکھتے ہیں اور اسی فن شریف میں مشغول رہتے ہیں، اکثر ان کی عمر دراز ہوتی ہے اور خاتمہ بالخیر نصیب ہوتا ہے۔
یا اللہ! اپنے حقیر ناچیز بندے محمد داؤد راز کو بھی حدیث کی یہ برکا عطا فرمائیو اور میرے جملہ معاونین کرام کو جن کی حدیث دوستی نے مجھ کو اس عظیم خدمت کے انجام دینے کے لیے آمادہ کیا۔
اللہ پاک ان سب کو برکات دارین سے نوازیو۔
آمین ثم آمین۔

حدیث حاشیہ:
1۔
حضرت مالک بن حویرث ؓ سے مروی ایک حدیث میں ہے:
”جب مرد،عورت سے صحبت کرتا ہے تو مرد کا پانی عورت کے ہررگ وریشے میں سما جاتاہے،پھر ساتویں دن اللہ تعالیٰ اسے اکٹھا کرکے اس سے ایک صورت جوڑتا ہے۔
“ (فتح الباري: 585/11 و السلسلة الصحیحة للألباني، حدیث: 3330)
2۔
جدید طب کا دعویٰ ہے کہ چار ماہ سے پہلے ہی حمل میں جان پڑجاتی ہے۔
اس کا جواب یہ ہے کہ حدیث میں روح سے مراد نفس ناطقہ مدرکہ ہے جو ختم نہیں ہوتا بلکہ موت کے وقت نکلتا ہے۔
اسے روح انسانی بھی کہتے ہیں اورقرآن کریم نے اسے " أَمْرِ رَبِّي " قراردیاہے۔
اس کے برعکس روح حیوانی پہلے ہی سے بلکہ نطفے کے اندر بھی موجود رہتی ہے۔
یہ روح حیوانی موت کے وقت ختم ہوجاتی ہے۔
دوسرے لفظوں میں چار ماہ سے پہلے حرکت، حرکت نمواور اور بڑھوتری ہوتی ہے۔
3۔
امام بخاری ؒ نے اس حدیث سے فرشتوں کا وجود ثابت کیا ہے کہ وہ اللہ کی مخلوق ہیں اور ان کی کئی ایک قسمیں ہیں جن کی تعداد اللہ کے سوا کوئی نہیں جانتا۔
ان میں سے فرشتوں کی ایک قسم رحم مادر سے متعلق ہے، چنانچہ حضرت انس ؓ سے مروی ایک حدیث میں ہے کہ رسول اللہ ﷺ نے فرمایا:
”اللہ تعالیٰ نے عورت کے رحم پر ایک فرشتہ مقرر کررکھا ہے جو کہتا ہے:
پروردگار! اب نطفہ پڑا۔
پروردگار اب یہ خون بن گیا۔
پروردگار! اب یہ لوتھڑا بن گیا۔
پھر جب اللہ تعالیٰ اس کی پیدائش کے متعلق حکم کردیتاہے تو فرشتہ پوچھتا ہے کہ یہ مرد ہے یا عورت؟ بدبخت ہے یا نیک بخت؟ اس کی روزی کیا ہے؟ اس کی عمر کیا ہے؟ پھر ماں کے پیٹ ہی میں اس بچے کے ہوتے ہوئے یہ سب کچھ لکھ دیاجاتاہے۔
“ (صحیح البخاري، الحیض، حدیث: 318)

حدیث حاشیہ:
1۔
انسان اپنی پیدائش سے پہلے جن مراحل سے گزرتا ہے اسے اللہ تعالیٰ نے قرآن میں بھی بیان کیا ہے۔
چنانچہ ارشاد باری تعالیٰ ہے۔
”اور ہم نے انسان کو مٹی کے خلاصے سے پیدا کیا پھر ہم نے اسے محفوظ مقام (رحم مادر)
میں نطفہ بنا کر رکھا پھر نطفے کو لوتھڑا (جما ہوا خون بنایا پھر لوتھڑے کو بوٹی بنایا پھر بوٹی کو ہڈیاں بنایا پھر ہم نے ہڈیوں پر کچھ گوشت چڑھایا پھر ہم نے اسے ایک اور ہی صورت میں پیدا کر دیا۔
پس بڑا با برکت ہے اللہ جو سب بنانے والوں سے بہتر بنانے والاہے۔
“ (المومنون23۔
12)
2۔
اس حدیث سے معلوم ہوا کہ انسان کے اعمال و کردار سے اس کی تقدیر لکھ دی جاتی ہے یہ اس امر کی دلیل ہے کہ اللہ تعالیٰ کا علم اور اس کی قدرت بہت وسیع ہے اور اس نے ہر چیز کو گھیر رکھا ہے اور وہی اشیاء کی حقیقت ان کی پیدا ئش سے پہلے جانتا ہے نیز اس نے ہر چیز کو اپنے ہاں لکھ رکھا ہے۔
آئندہ وقوع پذیر ہونے والے حوادث اس تقدیر کے مطابق ہوتے ہیں اس حدیث میں جس تقدیر کے لکھنے کا ذکر ہے یہ اس لکھی ہوئی تقدیر سے علیحدہ ہے جسے اللہ تعالیٰ نے کائنات سے پہلے لکھ رکھا ہے جیسا کہ ارشاد باری تعالیٰ ہے۔
”کوئی بھی مصیبت جو زمین میں آتی ہے یا خود تمھارے نفوس کو پہنچتی ہے وہ ہمارے پیدا کرنے سے پہلے ہی ایک کتاب لکھی ہوئی ہے۔
“ (الحدید57۔
22)
3۔
حضرت عبداللہ بن عمر رضی اللہ تعالیٰ عنہ سے روایت ہے کہ رسول اللہ صلی اللہ علیہ وسلم نے فرمایا:
”اللہ تعالیٰ نے زمین و آسمان کی پیدائش سے پچاس ہزار سال پہلے کائنات میں ہونے والے واقعات تحریر کر لیے تھے۔
“ (صحیح مسلم، القدر، حدیث: 6748ـ2653)
اللہ تعالیٰ کی تقدیر اور واقعات کی تحریر انسان کے ارادے اور اختیار کے منافی نہیں۔
بہر حال اس حدیث سے پتا چلتا ہے کہ اہل سعادت کی پیدائش سے پہلے ہی اللہ کی رحمت نے انھیں اپنے گھیرے میں لے لیا تھا کیونکہ اللہ تعالیٰ نے اس کا اندازہ ٹھہرا لیا اور اسے اپنے پاس لکھ لیا پھر عمل کی توفیق دی اور اس کے لیے اسباب اور ذرائع پیدا کیے گویا یہ تمام مراحل درج ذیل آیت کا حصہ ہیں جسے امام بخاری رحمۃ اللہ علیہ نے بطورعنوان منتخب کیا ہے۔
”اور ہمارے بندے جو رسول ہیں ان کے حق میں پہلے ہی ہماری بات صادر ہو چکی ہے کہ یقیناً ان کی مدد کی جائے گی اور بے شک ہمارا لشکر یقیناً وہی غالب رہے گا۔
“