فوائد ومسائل:
(۱)شیطان کا مسکن گندی جگہیں ہے اور وہ قضائے حاجت کے وقت انسان کو ایذا پہنچانے کی کوشش کرتا ہے۔ اس لیے مسلمان کو حکم دیا گیا ہے کہ وہ بیت الخلاء میں داخل ہونے سے پہلے یہ دعا پڑھ لے تاکہ وہ جنات اور شیاطین سے محفوظ رہے۔ ارشاد نبوی ہے:
((ستْرُ مَا بَیْنَ الْجِنِّ وَعَورَاتِ بَنی آدم إذا دخل الکنیف أن یقول:بسم اللّٰه))(سنن ابن ماجة، الطهارة، ح:۲۹۷)
”جنات اور بنی آدم کے پوشیدہ اعضاء کے درمیان جو چیز پردہ بنتی ہے، وہ یہ ہے کہ جب وہ لیٹرین میں داخل ہو تو بسم اللہ پڑھے۔“
(۲) دعا بیت الخلا میں داخل ہونے سے پہلے پڑھنی چاہیے جیسا کہ حدیث میں صراحت ہے جب داخل ہونے کا ارادہ کرتے تو پڑھتے۔ اور جب کھلی فضا میں قضائے حاجت کرے تو کپڑا اٹھانے سے پہلے دعا پڑھ لے۔