لغوی تشریح:
«اَلنَّعْيِ» موت کی اطلاع دینا۔ صرف اس قدر خبر دینا کہ لوگ اس کے کفن دفن اور نماز جنازہ میں شرکت کر سکیں، ممنوع نہیں ہے۔ البتہ دور جاہلیت کے طریقے سے منادی کرنا ممنوع ہے۔ اس کی نوعیت یہ تھی کہ اس منادی میں نوحہ ہوتا اور مرنے والے کے افعال کی فخریہ انداز میں بازاروں اور گلی کوچوں میں گھوم پھر کر بیان کیا جاتا تھا۔

فائدہ: ہمارے فاضل محقق نے مذکورہ روایت کو سنداً ضعیف قرار دیا ہے، تاہم دیگر احادیث کی روشنی میں مطلقاً موت کی اطلاع دینا ممنوع نہیں ہے جیسا کہ حبشہ میں حضرت نجاشی رحمہ الله کی وفات ہوئی تو مدینہ میں رسول اللہ صلی اللہ علیہ وسلم نے صحابہ کو خبر دی اور غائبانہ نماز جنازہ پڑھائی۔ علاوہ ازیں جنگ موتہ میں حضرت زید، حضرت جعفر طیار اور حضرت عبداللہ بن رواحہ رضی اللہ عنہم مسلمانوں کی قیادت کرتے ہوئے یکے بعد دیگرے شہید ہو گئے تو رسول اللہ صلی اللہ علیہ وسلم کو وحی کے ذریعے سے خبر ہوئی، چنانچہ آپ صلی اللہ علیہ وسلم نے اسی وقت مدینہ منورہ میں صحابہ کرام رضی اللہ عنہم کو ان حضرات کی شہادت کی خبر دی۔ دیکھیے: [صحيح البخاري الجنائز، حديث: 1245]
لہٰذا مذکورہ روایت میں ممانعت سے مراد اعلان کا وہ جاہلی انداز ہے کہ جب کوئی آدمی مر جاتا تو چند افراد کو مقرر کیا جاتا کہ بازاروں اور گلی کوچوں میں گھوم پھر کر اس کی وفات کا رو رو کر اعلان کریں اور اس کے افعال اور محاسن کو فخریہ انداز میں بیان کریں۔ واللہ اعلم

اردو حاشہ:
فوائد و مسائل:
(1)
جاہلیت میں یہ رواج تھا کہ جب کوئی آدمی مرجاتا تو چند افراد کو مقرر کیا جاتا تاکہ بازاروں اور گلی کوچوں میں گھوم پھر کر اس کی وفات کا رو رو کر اعلان کریں۔
مرنے والا جتنی اہم شخصیت کا حامل ہوتا۔
اتنا ہی زیادہ اہتمام کیا جاتا۔
اسے نعی کہتے تھے۔

(2)
سادہ طریقے سے ایک دوسرے کو اطلاع دینا جائز ہے۔
تاکہ لوگ اس کے کفن دفن کا اہتمام اور نماز جنازہ میں شرکت کرسکیں۔
جب حبشہ میں حضرت نجاشی کی وفات ہوئی۔
تو مدینہ میں رسول اللہ ﷺ نے صحابہ کرام رضوان للہ عنہم اجمعین کوخبردی۔
اور نماز جنازہ غائبانہ ادا فرمائی۔
علاوہ ازیں جنگ موتہ میں حضرت زید، حضرت جعفرطیار اور حضرات عبد اللہ بن رواحہ رضی اللہ تعالیٰ عنہ مسلمانوں کے لشکر کی قیادت کرتے ہوئے یکے بعد دیگرے شہید ہوگئے۔
تو رسول اللہ ﷺ کو وحی کے ذریعے خبر ہوئی آپﷺنے اس وقت مدینہ منورہ میں صحابہ کرام رضوان للہ عنہم اجمعین کو ان حضرات کی شہادت کی خبر دی۔
دیکھئے: (صحیح البخاري، الجنائز، باب الرجل ینعی إلی أھل المیت بنفسه، حدیث: 1246، 1245)
 اس جنگ میں حضرت عبد اللہ بن رواحہ رضی اللہ تعالیٰ عنہ کی شہادت کے بعد حضرت خالد بن ولید رضی اللہ تعالیٰ عنہ نے مسلمانوں کے لشکر کی قیادت کی اور کامیابی سے واپس لوٹے۔
اس موقع پر رسول اللہﷺ نے حضرت خالد بن ولید رضی اللہ تعالیٰ عنہ کو اللہ کی تلوار کے نام یاد سے فرمایا تھا چنانچہ ان کا لقب سیف اللہ مشہور ہوگیا۔

(3)
یہ روایت بعض کے نزدیک حسن ہے۔
اور اس میں بھی ممانعت سے مراد اعلان کا وہ جاہلی انداز ہے جس کی وضاحت سطور بالا میں کی گئی ہے۔