حدیث حاشیہ:
یہ حضرت زینب رسول اللہ صلی اللہ علیہ وسلم کی ربیبہ تھیں، ان کے والد ابو سلمہ تھے جن کا نام عبداللہ ابن عبدالاسد مخزومی ہے اور کنیت ابو سلمہ ہے۔
یہ رسول کریم صلی اللہ علیہ وسلم کے حقیقی پھوپھی زاد بھائی تھے۔
ان کی والدہ کا نام بوہ بنت عبدالمطلب ہے اور ابو سلمہ نبی صلی اللہ علیہ وسلم کے دودھ شریک بھی ہیں۔
ان کی بیوی ام سلمہ نے ان کے ساتھ حبشہ کی ہجرت کی تھی مگر مکہ واپس آ گئے جب دوبارہ مدینہ منورہ کو ہجرت کی تو ان کے بچے سلمہ کو ددھیال والوں نے چھین لیا اور حضرت ام سلمہ کو ان کے میکے والوں نے جبراً روک لیا۔
ابوسلمہ دل مسوس کر بیوی اوربچوں کو چھوڑ کر اللہ اور اس کے رسول صلی اللہ علیہ وسلم کی محبت میں مدینہ چلے گئے۔
حضرت ام سلمہ رضی اللہ عنہا ایک سال تک برابر روتی رہی اورروزانہ اس جگہ آ کر بیٹھ جاتی جہاں شوہر سے الگ کی گئی تھیں، ان کی اس بے قراری اورگریہ وزاری نے سنگ دل عزیزوں کو بھی رحم پرمجبور کر دیا اور انہوں نے ان کو ان کے شوہر کے پاس جانے کی اجازت دے دی۔
یہ اکیلی مدینہ منورہ کو چل کھڑی ہوئیں، جنگ احد میں ابو سلمہ سخت زخمی ہو گئے اور جمادی الآخر3ھ میں ان زخموں کی وجہ سے ان کا انتقال ہو گیا۔
اس وقت انہوں نے دعا کی تھی کہ یا اللہ! میرے اہل وعیال کی اچھی طرح نگہداشت کیجیو یہ دعا قبول ہوئی اور ابو سلمہ کے اہل وعیال کو رسول اللہ صلی اللہ علیہ وسلم جیسا سرپرست عطا ہوا اور حضرت ام سلمہ کو ام المؤمنین کا لقب ومنصب عطا کیا گیا۔
ابو سلمہ رضی اللہ عنہ کے بچوں کی رسول کریم صلی اللہ علیہ وسلم نے ایسی تعلیم وتربیت فرمائی کہ عمر بن ابو سلمہ سے سعید بن مسیب، ابو امامہ بن سہل اور عروہ ابن زبیر رضی اللہ عنہم جیسے جلیل القدر صحابہ حدیث کی روایت کرتے ہیں اور حضرت علی ان کو فارس اور بحرین کا حاکم مقرر کرتے ہیں۔
ابو سلمہ کی بیٹی زینب اپنے زمانہ کی سب عورتوں سے زیادہ فقیہ تھیں، یہ بچہ ہی تھیں کہ ایک دن کھیلتے کھیلتے یہ رسول کریم صلی اللہ علیہ وسلم کے پاس آ گئیں آپ غسل فرما رہے تھے آپ نے پیار سے ان کے منہ پر پانی کے چھینٹے مارے، چہرے کی تازگی بڑھاپے میں بھی جوانی جیسی قائم رہی۔
ان کا انتقال مدینہ منورہ میں84 سال کی عمر میں 60ھ میں ہوا۔

حدیث حاشیہ:
دینی امور کے متعلق معلومات حاصل کرنے کے لیے حیا مانع نہیں ہونی چاہیے، چنانچہ حضرت ام سلیم رضی اللہ عنہا نے بطور تعریف و حمد پہلے اللہ تعالیٰ کی صفت بیان کی کہ وہ حق بات بیان کرنے سے حیا نہیں کرتا، پھر ہمیں بھی حق کے متعلق سوال کرنے سے نہیں شرمانا چاہیے، پھر انہوں نے زندگی میں پیش آنے والا ایک سوال کیا جو سراسر شرم و حیا پر مبنی ہے لیکن انہوں نے اس قسم کی حیا کو ایک طرف رکھا، پھر سوال کیا کیونکہ اس قسم کا سوال حصول دین کا ذریعہ تھا۔
اگر وہ حیا کو مدنظر رکھتے ہوئے سوال نہ کرتیں تو ہم اس دینی امر سے محروم رہتے۔

صحیح بخاری کا باب: «بَابُ خَلْقِ آدَمَ صَلَوَاتُ اللَّهِ عَلَيْهِ وَذُرِّيَّتِهِ:»

باب اور حدیث میں مناسبت:
امام بخاری رحمہ اللہ نے ترجمۃ الباب میں آدم علیہ السلام اور ان کی ذریت یعنی ان کی اولادوں کی تخلیق کی بابت روشنی ڈالی۔ مگر حدیث میں ایسے کوئی ظاہر الفاظ موجود نہیں، جس سے بظاہر باب اور حدیث میں مناسبت کا پتہ چلے، لیکن بغور مطالعہ سے ایک لفظ کے ساتھ حدیث کی مناسبت باب سے قائم ہوتی ہوئی دکھلاتی ہے، حدیث کے آخری لفظ کو پڑھیں کہ نبی کریم صلی اللہ علیہ و سلم نے ان کے سوال کے جواب میں کیا فرمایا، آپ صلی اللہ علیہ و سلم کا ارشاد ہے کہ:
«فبم يشبه الولد»
حدیث کے اس جملے میں بچے کی پیدائش کا ذکر ہے اور ترجمۃ الباب میں بھی آدم علیہ السلام اور ان کی اولاد کا بھی ذکر موجود ہے۔
◈ حافظ ابن حجر رحمہ اللہ فرماتے ہیں:
«والغرض منه قوله فى آخره فبم يشبه الولد؟» [فح الباري: 307/7]
یعنی ترجمۃ الباب سے حدیث کی جو غرض ہے، وہ ان الفاظ کے ساتھ ہے،
«فبم يشبه الولد؟»
◈ علامہ بیضاوی رحمۃ اللہ علیہ فرماتے ہیں:
«هذا استدلال على أن لها منيًّا كما للرجل منيّ والولد مخلوق منهما إذ لو لم يكن بها ماء وكان الولد من مائه المجدد لم يكن يشبهها لأن الشبه بسبب ما بينهما من المشاركة» [ارشاد الساري للقسطلاني: 9/139]
”ترجمۃ الباب سے استدلال کچھ یوں ہے کہ عورت کی بعین اسی طرح سے منی ہوتی ہے، جس طرح مرد کی ہوتی ہے اور اولاد کی تخلیق ان دونوں سے ہوتی ہے، اگر عورت کا پانی نہ ہوتا تو بچہ ماں کے مشابہ نہ ہوتا، (یعنی بچہ کی مشابہت ماں سے اس کے پانی کے سبب ہے)۔“
پس اگر آدمی کا پانی عورت کے پانی پر غالب آ جاتا ہے تو وہ بچہ باپ کے مشابہ ہوتا ہے اور اگر اس کے بر عکس ہوا یعنی عورت کا پانی غالب آ گیا مرد کے پانی پر، تو وہ بچہ ماں کے مشابہ ہو گا اور ہو سکتا ہے کہ لڑکی پیدا ہو۔
علامہ بیضاوی رحمہ اللہ کا مقصد بیان واضح ہوتا ہے کہ آپ بھی مرد اور عورت کے باہمی تعلقات سے جو حضرت انسان پیدا ہوتا ہے، اس کی پیدائش کا ذکر فرما رہے ہیں، یعنی ترجمۃ الباب میں اور حدیث میں مناسبت لفظ حدیث میں مقید ہے اور لفظ حدیث کا تعلق تولیدی نظام کے ساتھ ہے، اسی بات کی طرف حافظ ابن حجر رحمہ اللہ اور دیگر شارحین نے اشارہ فرمایا ہے، لہٰذا مناسبت باب کی حدیث سے حدیث کے آخری لفظ میں ہے۔
◈ علامہ عبدالحق الہاشمی رحمہ اللہ فرماتے ہیں:
حدیث اور باب میں غرض حدیث کے آخری جملے میں ہے،
«فبم يشبه الولد» [لب اللباب: 190/3]

لغوی تشریح:
«لَا يَسْتَحْيِي مِنَ الْحَقِّ» ”حا“ کے بعد دو ”یا“ ہیں۔ ”حا“ اس میں ساکن ہے۔ معنی یہ ہیں کہ وہ حق بیان کرنے سے رکتا ہے نہ حیا کرنے والے کی طرح حق کو ترک کرتا ہے۔ اسی طرح جن مسائل کے دریافت کرنے کی مجھے ضرورت و احتیاج ہے ان سے میں رک نہیں سکتی۔ یہ بات انہوں نے اعتذار کے طور پر کہی کیونکہ عورتیں اس قسم کی باتیں پوچھنے میں شرماتی ہیں۔
«إذَا احتلمت» یعنی جب اسے احتلام ہو جائے۔ ایک دوسری روایت میں: «إذَا رَأَتْ أَنَّ زَوْجَهَا يُحَامِعُهَا فِي الْمَنَامِ» کے الفاظ بھی منقول ہیں۔ [مسند أحمد: 346/6، 377]
یعنی جب وہ دیکھے کہ خواب میں اس کا شوہر اس سے زن و شو کے تعلقات قائم کیے ہوئے ہے۔
«اذا رأتِ انمَاء» جب نیند سے بیدار ہو کر منی دیکھے۔

راویٔ حدیث:
(سیدہ ام سلیم رضی اللہ عنہا) ان کا نام رمیصاء یا غمیصاء بنت ملحان تھا۔ سیدنا انس بن مالک رضی اللہ عنہ کی والدہ تھیں۔ فاضلہ و عالمہ خاتوں تھیں۔ مالک بن نصر کی زوجیت میں تھیں۔ یہ مسلمان ہو گئیں۔ انہوں نے اپنے خاوند کے سامنے اسلام پیش کیا تو وہ اسی وجہ سے ناراض ہو کر شام کی طرف بھاگ گیا اور فوت ہو گیا۔ مالک بن نصر کی وفات کے بعد ابوطلحہ نے ان کو پیغام نکاح دیا۔ ابوطلحہ ابھی مشرک تھے۔ ام سلیم نے شرط پیش کی کہ اسلام قبول کر لو تو میں تمہارے ساتھ نکاح کر لوں گی۔ اس شرط کو ابوطلحہ رضی اللہ عنہ نے قبول کیا اور مسلمان ہو گئے تو ام سلیم رضی اللہ عنہا نے ان سے نکاح کر لیا۔ ان کے بہت زیادہ فضائل و مناقب ہیں۔ سیدنا عثمان رضی اللہ عنہ کے دور خلافت میں وفات پائی۔

لغوی تشریح:
«مَا يَرَي الرَّجُلُ» اس سے مراد احتلام ہے۔
«فَمِنْ أَيْنَ يَكُونُ الشِّبْهُ؟» شبه میں ”شین“ پر کسرہ ہے اور ”با“ ساکن ہے اور دونوں پر فتحہ بھی جائز ہے۔ مماثلت کے معنی ہیں۔ اور اس میں «أَيْنَ» استفہامیہ ہے جو دراصل سیدہ ام سلمہ رضی اللہ عنہا کے اس خیال کی تردید کے لیے ہے کہ آیا عورت کو بھی احتلام ہوتا ہے۔ گفتگو کا ماحصل یہ ہے کہ بچہ کبھی باپ سے مشابہت رکھتا ہے اور کبھی ماں اور خالاؤں سے۔ اور یہ اسی صورت میں ہو سکتا ہے کہ شہوت کے وقت عورت کے اندر سے بھی منی خارج ہو اور بچے کی خلقت و ساخت میں حصہ دار بنے۔ سیدہ ام سلمہ رضی اللہ عنہا کا انکار اس پر دلالت کرتا ہے کہ عورتوں کو احتلام نادر طور پر، یعنی بہت کم ہوتا ہے، مردوں کی طرح کثرت سے نہیں ہوتا۔

فائدہ:
جس طرح مردوں کو احتلام لاحق ہوتا ہے اور ان پر غسل کرنا فرض ہے، اسی طرح عورتوں کو بھی یہ صورت لاحق ہوتی ہے، ایسی صورت میں ان پر بھی غسل کرنا فرض ہے۔ باقی رہا بچے کی مشابہت کا مسئلہ تو اس بارے میں حدیث سے ثابت ہے کہ جب مرد کا پانی غالب ہوتا ہے تو نومولود کی مشابہت باپ سے ہوتی ہے اور جب ماں کا پانی غالب ہو تو بچے کی مشابہت والدہ سے ہوتی ہے۔ [صحيح البخاري، مناقب النصار، حديث: 3938]

� تشریح:
متکبر اپنے تکبر کی حماقت میں مبتلا ہے جو کسی سے تحصیل علم اپنی کسرشان سمجھتا ہے اور شرم کرنے والا اپنی کم عقلی سے ایسی جگہ حیادار بن رہا ہے، جہاں حیا و شرم کا کوئی مقام نہیں۔

انصار کی عورتیں ان مخصوص مسائل کے دریافت کرنے میں کسی قسم کی شرم سے کام نہیں لیتی تھیں، جن کا تعلق صرف عورتوں سے ہے۔ یہ واقعہ ہے کہ اگر وہ رسول اللہ صلی اللہ علیہ وسلم سے ان مسائل کو وضاحت کے ساتھ دریافت نہ کرتیں توآج مسلمان عورتوں کو اپنی زندگی کے اس گوشے کے لیے رہنمائی کہاں سے ملتی، اسی طرح مذکورہ حدیث میں سیدہ ام سلیم رضی اللہ عنہا نے نہایت خوب صورتی کے ساتھ پہلے اللہ تعالیٰ کی صفت خاص بیان فرمائی کہ وہ حق بات کے بیان میں نہیں شرماتا، پھر وہ مسئلہ دریافت کیا جو بظاہر شرم سے تعلق رکھتا ہے، مگر مسئلہ ہونے کی حیثیت میں اپنی جگہ دریافت طلب تھا، پس پوری امت پر سب سے پہلے رسول اللہ صلی اللہ علیہ وسلم کا بڑا احسان ہے کہ آپ صلی اللہ علیہ وسلم نے ذاتی زندگی سے متعلق بھی وہ باتیں کھول کر بیان فرما دیں جنہیں عام طور پر لوگ بےجا شرم کے سہارے بیان نہیں کرتے اور دوسری طرف صحابیہ عورتوں کی بھی یہ امت بے حد ممنون ہے کہ انہوں نے آپ سے سب مسائل دریافت کر ڈالے، جن کی ہر عورت کو ضرورت پیش آتی ہے۔

سیدہ زینب بنت عبداللہ بن الاسد مخزومی اپنے زمانہ کی بڑی فاضلہ خاتون تھیں، ان کی والدہ ماجدہ ام سلمہ رضی اللہ عنہا اپنے خاوند عبداللہ کی وفات بعد غزوہ احد کے عدت گزارنے پر آنحضرت صلی اللہ علیہ وسلم کی زوجیت سے مشرف ہوئیں تو ان کی تربیت آپ صلی اللہ علیہ وسلم ہی کے پاس ہوئی۔ ام سلمہ رضی اللہ عنہا اسلام میں پہلی خاتون ہیں جنہوں نے مدینہ طیبہ کو ہجرت کی، ان کے خاوند ابوسلمہ بدرمیں شریک تھے، احد میں یہ مجروح ہوئے اور بعد میں وفات پائی، جن کے جنازے پر آنحضرت صلی اللہ علیہ وسلم نے نو تکبیروں سے نماز جنازہ ادا فرمائی تھی، اس وقت ام سلمہ رضی اللہ عنہا حاملہ تھیں۔ وضع حمل کے بعد آنحضرت صلی اللہ علیہ وسلم کے حرم میں ان کو شرف حاصل ہوا۔ ام سلیم حضرت انس کی والدہ محترمہ ہیں اور حضرت ابوطلحہ انصاری کی زوجہ مطہرہ ہیں، اسلام میں ان کا بھی بڑا اونچا مقام ہے رضی اللہ عنہم اجمعین۔

� تشریح:
اس حدیث سے معلوم ہوا کہ عورت کو بھی احتلام ہوتا ہے۔ اس کے لیے بھی مرد کا سا حکم ہے کہ جاگنے پر منی کی تری اگر کپڑے یا جسم پر دیکھے تو ضرور غسل کرے تری نہ پائے تو غسل واجب نہیں۔

حدیث حاشیہ:
انصار کی عورتیں ان مخصوص مسائل کے دریافت کرنے میں کسی قسم کی شرم سے کام نہیں لیتی تھیں، جن کا تعلق صرف عورتوں سے ہے۔
یہ واقعہ ہے کہ اگر وہ رسول اللہ صلی اللہ علیہ وسلم سے ان مسائل کو وضاحت کے ساتھ دریافت نہ کرتیں توآج مسلمان عورتوں کو اپنی زندگی کے اس گوشے کے لیے رہنمائی کہاں سے ملتی، اسی طرح مذکورہ حدیث میں حضرت ام سلیم نے نہایت خوب صورتی کے ساتھ پہلے اللہ تعالیٰ کی صفت خاص بیان فرمائی کہ وہ حق بات کے بیان میں نہیں شرماتا، پھر وہ مسئلہ دریافت کیا جو بظاہر شرم سے تعلق رکھتا ہے، مگرمسئلہ ہونے کی حیثیت میں اپنی جگہ دریافت طلب تھا، پس پوری امت پر سب سے پہلے رسول اللہ صلی اللہ علیہ وسلم کا بڑا احسان ہے کہ آپ صلی اللہ علیہ وسلم نے ذاتی زندگی سے متعلق بھی وہ باتیں کھول کر بیان فرما دیں جنھیں عام طور پر لوگ بے جا شرم کے سہارے بیان نہیں کرتے اور دوسری طرف صحابیہ عورتوں کی بھی یہ امت بے حد ممنون ہے کہ انھوں نے آپ سے سب مسائل دریافت کر ڈالے، جن کی ہرعورت کو ضرورت پیش آتی ہے۔
حضرت زینب بنت عبداللہ بن الاسد مخزومی اپنے زمانہ کی بڑی فاضلہ عالمہ خاتون تھیں، ان کی والدہ ماجدہ ام سلمہ رضی اللہ عنہا اپنے خاوند عبداللہ کی وفات بعد غزوۂ احد کے عدت گزارنے پر آنحضرت صلی اللہ علیہ وسلم کی زوجیت سے مشرف ہوئیں توان کی تربیت آپ صلی اللہ علیہ وسلم ہی کے پاس ہوئی۔
حضرت ام سلمہ رضی اللہ عنہا اسلام میں پہلی خاتون ہیں جنھوں نے مدینہ طیبہ کو ہجرت کی، ان کے خاوند ابوسلمہ بدر میں شریک تھے، احد میں یہ مجروح ہوئے اور بعد میں وفات پائی، جن کے جنازے پر آنحضرت صلی اللہ علیہ وسلم نے نو تکبیروں سے نماز جنازہ ادا فرمائی تھی، اس وقت ام سلمہ حاملہ تھیں۔
وضع حمل کے بعد آنحضرت صلی اللہ علیہ وسلم کے حرم میں ان کو شرف حاصل ہوا۔
حضرت ام سلیم حضرت انس کی والدہ محترمہ ہیں اور حضرت ابو طلحہ انصاری کی زوجہ مطہرہ ہیں، اسلام میں ان کا بھی بڑا اونچا مقام ہے رضی اللہ عنہم اجمعین۔

تخريج الحديث:
[180۔ البخاري فى: 3 كتاب العلم: 50 باب الحياء فى العلم 130، مسلم 313، حميدي 298، ترمذي 122]
لغوی توضیح:
«تَرِبَتْ يَمِيْنُكَ» تیرے ہاتھ خاک آلود ہوں۔ عرب لوگ محض انکار کی غرض سے یہ کلمہ استعمال کرتے ہیں، قطع نظر اس سے کہ اس کا حقیقی معنی کیا ہے۔
«فَبِمَ يُشْبِهُهَا وَلَدُهَا» پھر اس کا بچہ اس کے مشابہ کیوں ہوتا ہے (اگر اس کی منی نہیں ہوتی)؟ مطلب یہ ہے کہ بچہ مرد اور عورت دونوں کے پانی (یعنی منی) سے مل کر بنتا ہے، پھر جس کا پانی غالب آ جاتا ہے وہ اسی کے ساتھ زیادہ مشابہت اختیار کر لیتا ہے۔

197۔ اردو حاشیہ:
➊ ان روایات میں امام زہری اور ہشام بن عروہ کے مابین اختلاف ہے کہ یہ مکالمہ حضرت عائشہ کا ہے یا ام سلمہ رضی اللہ عنہا کا؟ امام ابوداود رحمہ اللہ کے نزدیک زہری کی روایت راجح ہے، یعنی یہ مکالمہ حضرت عائشہ اور ام سلیم رضی اللہ عنہا کے مابین ہوا انہوں نے اس کے شواہد بھی ذکر کیے ہیں۔ مگر قاضی عیاض کی تحقیق کے مطابق یہ مکالمہ ام سلمہ اور ام سلیم رضی اللہ عنہا کے درمیان ہوا، اس طرح ہشام بن عروہ کی روایت راجح ہو گی اور امام بخاری رحمہ اللہ کا میلان بھی اسی طرف ہے۔ دیکھیے: [صحیح البخاري، العلم، حدیث: 130]
تاہم علامہ نووی رحمہ اللہ نے دونوں روایتوں کے مابین یوں تطبیق دی ہے کہ عین ممکن ہے کہ ام سلمہ اور عائشہ رضی اللہ عنہا دونوں ہی اس موقع پر موجود ہوں اور دونوں نے تعجب کا اظہار کیا ہو۔ واللہ أعلم۔ [شرح مسلم للنووي: 286/3، تحت حديث: 331، وعون المعبود: 403/1، 404 تحت حديث: 237]
➋ ام سلیم کا یہ جملہ جو انہوں نے اپنے سوال سے پہلے کہا کہ ”اللہ تعالیٰ حق سے نہیں شرماتا۔“ ان کے کمال حسن ادب پر دلیل ہے، یعنی جو بات عرفاً زبان پر نہیں لائی جاتی اور مجھے اس کی شرعاً ضرورت ہے، وہ بتائی جائے۔ حضرت عائشہ رضی اللہ عنہا فرماتی ہیں کہ انصار کی عورتیں کتنی اچھی ہیں کہ دین کی سمجھ بوجھ حاصل کرنے میں حیا انہیں آڑے نہیں آتی۔ [صحیح البخاري، قبل حدیث: 130]

اردو حاشہ:
(1)
عورت عالم دین مرد سے ہر قسم کا مسئلہ پوچھ سکتی ہے لیکن انداز اور الفاظ  کا انتخاب مناسب اور حیا کے تقاضوں کے مطابق ہونا چاہیے۔

(2)
ام المومنین رضی اللہ عنہ کو اس سوال پر تعجب ہوا کیونکہ انھیں کبھی ایسی صورت حال پیش نہیں آئی تھی۔
اس کی وجہ یہ ہے کہ عورتوں میں یہ صورت حال شاذونادر پیش آتی ہے جبکہ مردوں میں یہ ایک معمول کا مسئلہ ہے
(3)
صرف خواب میں مباشرت کا عمل یا ایسی کوئی چیز نظر آنے سے غسل فرض نہیں ہوتا بلکہ انزال سے غسل فرض ہوتا ہے، اس لیے اگر جسم پر یا لباس پرمادہ منویہ لگا ہوا نظر آئے توغسل کرنا فرض ہوجاتا ہے، خواہ خواب یاد ہو یا نہ ہو۔

(4)
 (تَرِبَتْ يَمِينُكِ)
 کے لفظی معنی ہیں”تیرے داہنے ہاتھ کو مٹی لگے“  لیکن اہل عرب اس قسم کے محاورات تعجب یا ڈانٹ کے موقع پر بولتے ہیں، لفظی مطلب مقصود نہیں ہوتا۔

(5)
چونکہ بچے کی تخلیق میں مرد اور عورت دونوں کے پانی کا دخل ہوتا ہے، اس لیے بچہ کبھی باپ یا ددھیالی رشتہ داروں سے مشابہت رکھتا ہے، اور کبھی ماں اور ننھیالی رشتہ داروں سے۔
ارشاد نبوی کا مطلب یہ ہے کہ جب عورت میں یہ پانی موجود ہے جس سے بچے کی تخلیق ہوتی ہے، تو وہ خواب میں جسم سے خارج بھی ہوسکتا ہے لہذا یہ کوئی تعجب کی بات نہیں۔

اردو حاشہ:
1؎:
مطلب یہ ہے کہ اللہ تعالیٰ شرم و حیا کی وجہ سے حق کے بیان کر نے سے نہیں رکتا،
تو میں بھی ان مسائل کے پوچھنے سے باز نہیں رہ سکتی جن کی مجھے احتیاج اور ضرورت ہے۔

2؎:
”جو مرد دیکھتا ہے“ سے مراد احتلام ہے۔

3؎:
اس میں اس بات کی دلیل ہے کہ منی کے نکلنے سے عورت پر بھی غسل واجب ہو جاتا ہے،
نیز اس سے یہ بھی معلوم ہوا کہ مردوں کی طرح عورتوں کو بھی احتلام ہوتا ہے۔

فائدہ:
اس حدیث سے ثابت ہوا کہ حق بات سے شرمانا درست نہیں ہے، آج کی کی ہوئی حق بات بہتوں کو فائدہ دے گی، ان شاء اللہ۔ عورت کو بھی احتلام ہوتا ہے، اس کا بھی مرد کی طرح حکم ہے کہ جاگنے پر منی کی تری کپڑے یا جسم پر دیکھے تو ضرور غسل کر لے، اگر وہ تری نہ پائے تو اس پر غسل واجب نہیں ہے۔

حدیث حاشیہ:
1۔
اخلاقیات کے باب میں حیا ایک قابل تعریف وصف ہے۔
احادیث میں اسے ایمان کا شعبہ قراردیا گیا ہے، نیز یہ کل خیرو برکت ہے۔
(صحیح مسلم، الإیمان، حدیث: 157(37)
اس کے نتائج بھی اچھے ہوتے ہیں لیکن بعض اوقات انسان اچھی چیز کا استعمال غلط کرتا ہے اور استعمال کی غلطی برے نتائج پیدا کردیتی ہے۔
مثلاً:
حیا کو بہانہ بنا کر بعض اوقات علم سے محروم رہتا ہے، اس لیے حیا کا دامن تھامتے ہوئے سوال کیا جا سکتا ہے۔
دوسرے لفظوں میں بے حیا بن کر سوال نہیں کرنا چاہیے۔
حضرت مجاہد رحمۃ اللہ علیہ کا اثر ابو نعیم نے الحلیۃ (3/328)
میں موصولاً ذکر کیا اور اس کا مطلب ہے کہ حیا کو بطور بہانہ استعمال کرنے والا علم سے محروم رہتا ہے۔
حضرت عائشہ رضی اللہ تعالیٰ عنہا کے ارشاد سے یہ معلوم ہوتا ہے کہ حیا اور طلب علم دونوں برقرار رہنے چاہئیں۔
انصار کی عورتیں اسی طرز عمل کو اپنائے ہوئے تھیں۔
یعنی حیا کا دامن بھی برقرار اور علم کا حصول بھی اپنی جگہ، سیدہ عائشہ رضی اللہ تعالیٰ عنہا کی یہ حدیث صحیح مسلم وغیرہ میں موصولاً مروی ہے۔
(صحیح مسلم، الحیض، حدیث: 748(332)
امام بخاری رحمۃ اللہ علیہ کا مقصد یہ ہے کہ حیا طالب علم کے لیے محرومی علم کا سبب نہیں بننی چاہیے نیز شرم پر مبنی مسائل دریافت کرنے میں حیا داری کو برقراررکھنا چاہیے گویا حیا بھی باقی رہے اور مقصد برآری بھی ہو جائے۔
2۔
حضرت اُم سلمہ رضی اللہ تعالیٰ عنہا کے اندر حضرت ام سلیم رضی اللہ تعالیٰ عنہا سے زیادہ حیا تھی کہ انھوں نے مارے شرم کے اپنا منہ ڈھانپ لیا۔
ان کے سوال کا مطلب یہ تھا کہ جب عورت کو یہ حالت پیش آجائے تو یہ تقوی اور دینداری کے خلاف تو نہیں؟ رسول اللہ صلی اللہ علیہ وسلم نے بھی مکمل حیاداری کو برقرار رکھتے ہوئے جواب دیا کہ عورت اور مرد کے اندر اللہ تعالیٰ نے جوہر رکھا ہے، اس کے اشتراک سے اولاد ہوتی ہے اور اولاد ماں پر باپ پر یا دونوں پر جاتی ہے۔
بے شمار بچے ایسے ہوتے ہیں جو رنگ ماں کا رکھتے ہیں لیکن حلیہ باپ کا ہو تا ہے۔
رسول اللہ صلی اللہ علیہ وسلم کے جواب سے معلوم ہوا کہ احتلام ہونا ایک فطری حالت ہے تقوی اور دینداری کے خلاف نہیں ہے۔

حدیث حاشیہ:
1۔
انصار کی عورتیں ایسے مسائل دریافت کرنے میں کسی قسم کی روایتی شرم سے کام نہ لیتی تھی جن کا تعلق صرف عورتوں سے ہوتا تھا، چنانچہ حضرت ام سلیم ؒ نے سب سے پہلے نہایت خوبصورتی کے ساتھ اللہ کی صفت حیا بیان فرمائی کہ وہ حق بات بیان کرنے سے نہیں شرماتا، پھر شرم وحیا کے دائرے میں رہتے ہوئے وہ مسئلہ دریافت کیا جو بظاہر شرم سے متعلق تھا مگرایک مسئلہ ہونے کی حیثیت سے دریافت طلب ضرور تھا۔
اگرآپ اس کے دریافت کرنے میں عورتوں جیسی شرم سے کام لیتیں تو نہ صرف ایک دینی حکم سے محروم رہتیں بلکہ دوسری تمام مسلمان عورتیں بھی اس سے ناواقف رہتیں۔
اس اعتبار سے رسول اللہ ﷺ کا اس امت پر بڑا احسان ہے کہ آپ نے ذاتی زندگی سے متعلق وہ باتیں کھول کر بیان کردیں جنھیں عام طور پر روایتی شرم وحیا کے پیش نظر بیان نہیں کیا جاتا۔
دوسری طرف صحابیات مبشرات رضوان اللہ عنھن اجمعین کا بھی اس امت پر بہت احسان ہے کہ انھوں نے رسول اللہ ﷺ سے ایسے ایسے سوالات دریافت کیے جن کی ہر مسلمان عورت کو زندگی میں ضرورت پیش آسکتی تھی، اور جومسائل بعض اوقات اپنے خاوند سے بھی دریافت کرنے میں ہچکچاہٹ محسوس ہوتی ہے۔
2۔
لفظ استحیاء میں ایک انفعالی کیفیت ہے جسے حافظ ابن حجر ؒ نے تغیر وانکسار سے تعبیر کیا ہے۔
علماء کو اس مقام پر بڑا اشکال ہوا کہ اللہ تعالیٰ کی طرف اسے کس معنی میں منسوب کیا جائے؟ ان حضرات کے بقول اس معنی کے لحاظ سے اللہ کی طرف نسبت کرنا صحیح نہیں، لہذا انھوں نے اس کی بایں الفاظ تاویل کرڈالی کہ اللہ تعالیٰ حق کے معاملات میں شرم وحیا کا حکم نہیں دیتا۔
درست بات یہ ہے کہ جن امور کی نسبت خود اللہ تعالیٰ نے اپنی ذات اقدس کی طرف کی ہے ان کی نسبت اللہ کی طرف کرنے میں ہم بھی تامل نہیں کریں گے۔
البتہ ان کی کیفیت کا ہمیں علم نہیں، لہذا کیفیت کا معاملہ اللہ کے سپرد کریں گے۔
اس مقام پر بھی تاویل کی قطعاً کوئی گنجائش نہیں ہے۔
صفت حیا کو اللہ کی طرف بایں طور منسوب کریں گے جو اس کی شایان شان ہے اور اس طرح کہ کسی طرح بھی مخلوق اس صفت میں اپنے خالق سے مشابہت نہیں رکھتی، جیسا کہ دیگر صفات باری تعالیٰ کے متعلق اہل حق کا موقف ہے۔
یہی نجات کا راستہ اور حق بات ہے۔
3۔
اس عنوان سے امام بخاری ؒ کا مقصود یہ ہے کہ مرد کی طرح عورت کو بھی احتلام ہوتا ہے، لیکن بحالت خواب اگروہ جماع کی حالت دیکھے تو بیداری کے بعد اگراپنے کپڑے پر تری دیکھے تو عورت پر غسل واجب ہوجاتا ہے۔
احتلام کے متعلق مرد وعورت میں مساوات کا حکم ہے کہ حالتِ نوم میں بصورت انزال دونوں پرغسل واجب ہوجاتا ہے اور بصورت عدم انزال دونوں پر غسل واجب نہیں ہوگا، چنانچہ امام ترمذی ؒ انے اپنی جامع میں ایک عنوان بایں الفاظ قائم کیاہے”جوشخص بیدار ہو،تری دیکھے لیکن احتلام کا خواب یاد نہ ہو“ پھر انھوں نے حضرت عائشہ ٍؓ سے مروی ایک حدیث بیان کی ہے:
رسول اللہ ﷺ سے سوال ہوا کہ جو شخص تری دیکھے اوراسے احتلام کا خواب یاد نہ ہو تو اس کے متعلق کیا حکم ہے؟آپ نے فرمایا:
”وہ غسل کرے۔
“ پھر ایسے شخص کے متعلق سوال ہوا جسے احتلام تو یاد ہومگرتری نہ دیکھے؟آپ نے فرمایا:
”اس پر غسل نہیں۔
“ اس پر حضرت ام سلیم نے عرض کیا:
یارسول اللہ ﷺ !اگر عورت ایسا دیکھے تو کیا اس پر بھی غسل ہے؟ آپ نے فرمایا:
”ہاں اس پر بھی غسل ہے کیونکہ عورتیں بھی تومردوں کی طرح ہیں۔
“ (جامع الترمذي، الطھارة، حدیث: 113)
یہ احادیث مجرد وجود منی کو معتبر ٹھہراتی ہیں، خواہ اس کے ساتھ دفق وشہوت ہو یا نہ ہو۔
4۔
حافظ ابن حجر ؒ نے لکھا ہے کہ اس حدیث سے ان حضرات کا موقف غلط ثابت ہوا جو کہتے ہیں کہ عورت کے پانی میں خروج وبروز ہوتا ہی نہیں اور اس کے انزال کو صرف اس کی شہوت ہی سے معلوم کیا جا سکتا ہے، لہٰذا ان کے نزدیک پانی دیکھنے سے مراد پانی کا معلوم ہو جانا ہے۔
یعنی روئیت، علم کے معنی میں ہے۔
ان کا یہ خیال درست نہیں۔
کلام کو ظاہر پر محمول کرنا زیادہ قرین قیاس ہے۔
(فتح الباري: 505/1)
ایک روایت میں ہے کہ حضرت ام سلمہ ؓ نے تعجب کے طور پر سوال کیا:
آیا عورت کو بھی احتلام ہوتا ہے؟ آپ نے فرمایا:
”کیوں نہیں؟ایسا ہوتا ہے ورنہ بچے میں ماں کی شکل وصورت کیسے آتی ہے؟“ اس سے ثابت ہوا کہ مرد کی طرح عورت کا بھی مادہ منویہ ہوتا ہے اور بچہ دونوں کے نطفے سے پیدا ہوتا ہے۔
جب عورت کے لیے منی کا وجود ثابت ہے تو اس کا انزال اورخروج بھی ممکن ہے، اگرچہ بحالت خواب ایساکم ہوتا ہے۔
5۔
صحیح مسلم کے الفاظ یہ ہیں کہ مرد کا پانی گاڑھا سفید اور عورت کا پانی رقیق زرد ہوتا ہے اور دونوں میں سے جس کا پانی غالب آ جائے اس کی شکل وشباہت بچہ اختیار کرتا ہے۔
بعض روایات میں ہے کہ جس کا پانی رحم مادر میں پہلے پہنچ جائے، بچہ تذکیر و تانیث اس کی اختیارکرتا ہے۔
اس بنا پر چارصورتیں ممکن ہیں:
۔
رحم مادر میں مرد کا پانی پہلے پہنچتا ہے اورعورت کے پانی پر غالب آجاتا ہے تو اس صورت میں بچہ نرہوگا اور شکل وصورت بھی ددھیال کی اختیار کرے گا۔
۔
رحم مادر میں عورت کا پانی پہلے پہنچتا ہے اور عورت ہی کا پانی غالب آتا ہے تو بچہ مادہ ہو گا اور ننھیال کی شکل و صورت اختیار کرے گا۔
۔
رحم مادر میں مرد کا پانی پہلے پہنچتا ہے، لیکن غالب عورت کا پانی آتا ہے تو اس صورت میں بچہ نر ہوگا، لیکن شکل وصورت میں ننھیال جیساہوگا۔
۔
رحم مادر میں عورت کا پانی پہلے پہنچتا ہے، لیکن غالب مرد کا پانی آتا ہے تو اس صورت میں بچہ مادہ ہوگا، لیکن شکل وصورت ددھیال جیسی اختیار کرے گا۔
واللہ أعلم۔

حدیث حاشیہ:
1۔
اس حدیث سے معلوم ہوتا ہے کہ مرد کی طرح عورت کی منی اور نطفہ ہے اور ان دونوں کے مادے کے ملنے سے بچہ پیدا ہوتا ہے۔
اگر عورت کا نطفہ نہ ہو اور بچہ صرف مرد کے نطفے سے پیدا ہو تو وہ عورت کے مشابہ کبھی نہ ہو۔
اگر مرد کا نطفہ عورت کی منی پر غالب آجائے اور رحم میں پہلے پہنچ جائے تو بچہ مرد کے مشابہ ہو گا اور لڑکا پیدا ہوگا اور اگر عورت کا نطفہ مرد کی منی پر غلبہ کرے اور رحم میں پہلے پہنچ جائے تو بچہ عورت کے مشابہ ہوگا اور لڑکی پیدا ہوگی۔
اس کی تفصیل ہم آئندہ حدیث کے ذیل میں بیان کریں گے۔
2۔
اس حدیث میں اولاد آدم کی خلقت کا ذکر ہے اس لیے امام بخاری ؒ نے اسے بیان کیا ہے۔
واللہ أعلم۔