حدیث حاشیہ:
اس حدیث کی مناسبت باب سے معلوم نہیں ہوتی۔
فتح مکہ8ھ میں ہوا اور حجۃ الوداع 10ھ میں وقوع میں آیا۔
شاید یہی فرق بتلانا مقصود ہوکہ حجۃ الوداع فتح مکہ کے بعد وقوع میں آیا ہے۔

باب اور حدیث میں مناسبت
صحیح بخاری کی حدیث نمبر: 4400 کا باب: «بَابُ حَجَّةُ الْوَدَاعِ:»
ترجمہ الباب اور حدیث میں مناسبت انتہائی مشکل ہے، اس کا اعتراف کرتے ہوئے،
حافظ ابن حجر رحمہ اللہ اور علامہ قسطلانی رحمہ اللہ فرماتے ہیں:
«قد اشتكل دخول هذا الحديث فى باب حجة الوداع، لأن فيه التصريح بأن القصة كانت عام الفتح وعام الفتح كان سنة ثمان و حجة الوداع كانت سنة عشر»
”باب حجۃ الوداع میں اس حدیث کا داخل ہونا مناسبت کے اعتبار سے انتہائی مشکل ہے، کیونکہ فتح مکہ کا واقعہ سنہ ۸ ہجری کا ہے اور حجۃ الوداع کا واقعہ سنہ ۱۰ ہجری کا ہے۔ (لہٰذا ان کی آپس میں مناسبت نہیں ہے)۔“
حافظ ابن حجر رحمہ اللہ رحمہ اللہ نے واضح طور پر اقرار کر لیا کہ ترجمتہ الباب اور حدیث میں مناسبت بہت مشکل ہے۔

محمد داؤد راز رحمہ اللہ ترجمۃ الباب اور حدیث میں مناسب دیتے ہوئے فرماتے ہیں:
”اس حدیث کی مناسبت باب سے معلوم نہیں ہوتی، فتح مکہ ۸ ہجری میں ہوا اور حجۃ الوداع 10 ہجری میں وقوع میں آیا، شاید یہی فرق بتلانا مقصود ہو کہ حجۃ الوداع مکہ کے بعد وقوع میں آیا ہے۔“
محمد داود راز رحمہ اللہ نے مناسبت کی طرف اشارہ فرمایا ہے کہ امام بخاری رحمہ اللہ یہ ثابت فرما رہے ہیں کہ حجۃ الوداع فتح مکہ کے بعد وقوع پذیر ہوا۔

جہاں تک مناسبت کا تعلق ہے، یہ حقیر اور ناکارہ بندہ کہتا ہے کہ امام بخاری رحمہ اللہ ترجمہ طالب اور حدیث کے ذریعے کسی اور مخفی چیز کی طرف بھی اشارہ فرما رہے ہیں جس پر غور و فکر کرنا انتہائی ضروری ہے۔

پہلی مناسبت یہ ہے کہ امام بخاری رحمہ اللہ اس طرف توجہ دلانا چاہتے ہیں کہ فتح مکہ کے روز نبی کریم صلی اللہ علیہ وسلم جب بیت اللہ میں داخل ہوئے تھے تو اس وقت آپ صلی اللہ علیہ وسلم کا سفر خاص بیت اللہ کے قصد کے لیے نہ تھا، بلکہ اس موقع پر آپ کا جو سفر تھا وہ جہاد اور غزوہ کے ارادے کا تھا، لیکن جب نبی کریم صلی اللہ علیہ وسلم حج کے لئے بیت اللہ میں داخل ہوئے تو اس دن آپ کا سفر اور مقصد صرف بیت اللہ ہی کا تھا۔

دوسری مناسبت جو اللہ تعالیٰ کی طرف سے اس ضعیف اور ناکارہ بندے کو سمجھ میں آتی ہے وہ یہ ہے کہ اسلامی فتوحات اور لوگوں کا جوق در جوق اسلام میں داخل ہونا فتح مکہ کے بعد ہی تھا جس کی طرف اللہ تعالیٰ نے واضح اشارہ فرمایا کہ:
«إِذَا جَاءَ نَصْرُ اللَّـهِ وَالْفَتْحُ * وَرَأَيْتَ النَّاسَ يَدْخُلُونَ فِي دِينِ اللَّـهِ أَفْوَاجًا ٭ فَسَبِّحْ بِحَمْدِ رَبِّكَ وَاسْتَغْفِرْهُ إِنَّهُ كَانَ تَوَّابًا.» [110-النصر:3 - 1]
یہ سورۃ مبارکہ فتح مکہ کے بعد نازل ہوئی جس میں جوق در جوق لوگوں کے اسلام میں داخل ہونے کی پیشن گوئی ہے اور یہ بھی یاد رکھا جائے کہ نزول کے اعتبار سے یہ آخری سورۃ ہے، جس میں نبی کریم صلی اللہ علیہ وسلم کی وفات کا بھی اشارہ ہے، اس سورۃ کا تعلق فتح مکہ کے واقعہ کے ساتھ ہے اور جو حجۃ الوداع کے خطبہ کا واقعہ ہے اس خطبہ کے آغاز میں نبی کریم صلی اللہ علیہ وسلم کا یہ فرمان بھی موجود ہے کہ:
«ايها الناس اسمعوا قولي، فاني لا أدري لا ألقاكم بعد عامي هذا .» [تاريخ ابن هشام: 603/2]
”اے لوگو! میری بات غور سے سنو، پس مجھے نہیں معلوم کہ میں اس سال کے بعد آپ سے ملوں گا کہ نہیں۔“
یعنی خطبہ حجۃ الوداع میں نبی کریم صلی اللہ علیہ وسلم نے اپنی وفات کی خبر صحابہ کرام رضی اللہ عنہم کو سنا دی، اب ترجمۃ الباب سے حدیث کی مناسبت پر غور کیجئے کہ تحت الباب جو حدیث پیش فرمائی ہے جس میں فتح مکہ کا ذکر ہے، اس دوران نبی کریم صلی اللہ علیہ وسلم پہ قرآن نازل کر کے صرف آپ علیہ السلام کی وفات کا اشارہ فرمایا گیا مگر حجۃ الوداع جو کہ باب ہے اس میں مکمل طور پر نبی کریم صلی اللہ علیہ وسلم نے اپنی وفات کی خبر صحابہ کرام رضی اللہ عنہم کو دے دی، لہٰذا یہ بھی دقیق مناسبت کا پہلو موجود ہے، اب اگر غور کیا جائے تو ایک اور بھی ترجمۃ الباب سے حدیث کی مناسبت بنتی ہے وہ یہ کہ فتح مکہ کے روز نبی کریم صلی اللہ علیہ وسلم پر سورۃ النصر نازل ہوئی جو کہ نزول کے اعتبار سے آخری سورت ہے اور جب نبی کریم صلی اللہ علیہ وسلم خطبہ حجۃ الوداع سے فارغ ہوئے تو آپ پر سورہ مائدہ کی آیت نازل ہوئی:
«الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا.» [5-المائدة:3]
اس آیت میں دین کو مکمل کرنے کی بشارت نبی کریم صلی اللہ علیہ وسلم کو سنائی گئی۔ لہٰذا سورۃ النصر جو فتح مکہ کے روز نازل ہوئی اس میں نبی کریم صلی اللہ علیہ وسلم کی وفات کا اشارہ تھا اور سورہ المائدہ میں دین مکمل کرنے کا حکم موجود ہے، لہٰذا یہاں پر یہ مناسبت بھی موجود ہے کہ دین کا تعلق اور اس کی تکمیل نبی کریم صلی اللہ علیہ وسلم کی ذات گرامی کے ساتھ وابستہ ہے، آپ کے بعد نہ ہی دین میں کسی امر پر زیادتی ہو گی اور نہ ہی کمی۔۔۔۔۔
فتح مکہ کی حدیث کے الفاظ پر غور کریں کہ جب نبی کریم صلی اللہ علیہ وسلم بیت اللہ میں داخل ہوئے تو بیت اللہ کا دروازہ بند کر دیا، جو کہ اس بات کی طرف دقیق اشارہ ہے کہ اب دین کے احکامات کے نزول اور نزول وحی کا سلسلہ عنقریب بند ہونے والا ہے، لہٰذا ایسا ہی ہوا کہ صرف دو سال بعد یہ سلسلہ ہمیشہ کے لئے بند ہو گیا۔

حدیث حاشیہ:
1۔
یہ واقعہ فتح مکہ کا ہے جوآٹھ ہجری میں ہوا یہ عنوان حجۃ الوداع ہے جو دس ہجری میں کیا گیا۔
حافظ ابن حجر ؒ نے اشکال وارد کیا ہے کہ نہ معلوم امام بخاری ؒ نے اس حدیث کو حجۃ الوداع میں کیوں بیان کیا ہے؟ (فتح الباري: 132/8)
2۔
دراصل یہاں کوئی اشکال نہیں بلکہ امام بخاری ؒ ایک اختلافی مسئلے پرتنبیہ کرناچاہتے ہیں۔
اس امر میں اختلاف ہے کہ حجۃ الوداع کے موقع پر رسول اللہ ﷺ بیت اللہ میں داخل ہوئے تھے یا نہیں؟ امام بخاری ؒ نے اس حدیث سے ثابت کیا ہےکہ رسول اللہ ﷺ حجۃ الوداع کے موقع پر بیت اللہ میں داخل ہوئے تھے کیونکہ جب فتح مکہ کے موقع پر بیت اللہ میں داخل ہونا یقینی ہے۔
حالانکہ اس سفر کامقصد صرف جہاد کرنا ار کفر کو دبانا تھا، بیت اللہ کی زیارت مقصود نہ تھی تو حجۃ الوداع کےموقع پر بطریق اولیٰ دخول ثابت ہوگا۔
کیونکہ یہ سفر تو محض بیت اللہ کی زیارت کے لیے تھا بلکہ ایک صریح حدیث سے بھی ثابت ہے کہ رسول اللہ ﷺ حجۃ الوداع کے موقع پر بیت اللہ میں داخل ہوئے تھے۔
حضرت عائشہ ؓ بیان کرتی ہیں کہ رسول اللہ ﷺ ایک دفعہ میرے پاس تشریف لائے تو چہرہ مبارک پر حزن وملال تھا، حالانکہ جب آپ میرے پاس سے گئے تھے تو اس وقت آپ کے چہرے پر خوشی ومسرت کے آثار نمایاں تھے۔
حضرت عائشہ ؓ فرماتی ہیں:
میں نے وجہ پوچھی تو بتایا کہ میں بیت اللہ میں داخل ہوا ہوں اور میں نے بیت اللہ میں داخل ہوکر اپنی اُمت کو مشقت میں ڈال دیا ہے۔
اگرمجھے اس امر کااحساس پہلے ہوجاتا جواب ہوا ہے تو کبھی بیت اللہ میں داخل نہ ہوتا۔
(سنن أبي داود، المناسك، حدیث: 2029)
3۔
اگرچہ اس حدیث میں حجۃ الوداع کی تصریح نہیں ہے۔
تاہم یہ بات ثابت ہے کہ حضرت عائشہ ؓ فتح مکہ کے وقت ہمرا ہ نہیں تھیں، البتہ حجۃ الوداع پرآپ کے ساتھ تھیں اور اس امر پر اتفاق ہے کہ فتح مکہ سے پہلے آپ بیت اللہ میں داخل نہیں ہوئے۔
ممکن ہے کہ فتح مکہ کے موقع پر اندر داخل ہوکر مورتیوں کو توڑا ہو اور حجۃ الوداع کے موقع پر داخل ہوکر نماز پڑھی ہو۔
اس صورت میں (عَامَ فَتحِ مَكَّةَ)
کے الفاظ کسی راوی کے وہم پر مبنی ہوں گے۔
یہ بھی ممکن ہے کہ وہم راوی نہ ہو بلکہ روایت کا پہلا حصہ عام فتح مکہ پر محمول ہواور دوسرا حصہ جہاں بیت اللہ کادرواہ بند کرنے کا ذکر ہے وہ حجۃ الوداع پرمحمول ہو۔
واللہ اعلم۔