حدیث حاشیہ:
مسلمان کا ہر کام جو نیک ہو ثواب ہی ثواب ہے ا س کا کاروبار کرنا بھی ثواب ہے اور بیوی و بچوں کو کھلانا پلانا بھی ثواب ہے ﴿قُلْ إِنَّ صَلَاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ﴾ (الأنعام: 162)
کا یہی مطلب ہے۔

حدیث حاشیہ:
(1)
مسلمان، جب اللہ تعالیٰ کی رضا کا طالب ہو تو اس کا ہر کام باعث ثواب ہے۔
اس کا بیوی بچوں پر خرچ کرنا حتی کہ اس کا سونا اور آرام کرنا بھی نیکی ہے۔
(2)
امام بخاری رحمہ اللہ کا اس حدیث سے مقصود یہ ہے کہ حضرت سعد رضی اللہ عنہ نے اپنی تکلیف کا اظہار رسول اللہ صلی اللہ علیہ وسلم کے سامنے کیا۔
یہ تسلیم و رضا کے منافی نہیں بلکہ صورت حال سے آگاہ کرنے اور اپنی مشکل کا حل تلاش کرنے کے لیے رسول اللہ صلی اللہ علیہ وسلم کو آگاہ فرمایا۔
اگر شرعی طور پر ایسا کرنا منع ہوتا تو رسول اللہ صلی اللہ علیہ وسلم ضرور انہیں روک دیتے، لیکن آپ نے حضرت سعد رضی اللہ عنہ کو اس کے متعلق کچھ نہیں کہا بلکہ پیش آنے والی مشکل کے متعلق مناسب رہنمائی فرمائی۔

� تشریح:
ان جملہ احادیث میں جملہ اعمال کا دارومدار نیت پر بتلایا گیا۔ امام نووی کہتے ہیں کہ ان کی بنا پر حظ نفس بھی جب شریعت کے موافق ہو تو اس میں بھی ثواب ہے۔

حدیث حاشیہ:
اس موقع پر حضور اکرم ﷺ نے اسلام کا وہ زریں اصول بیان کیا ہے جو اجتماعی زندگی کی جان ہے۔
احادیث کے ذخیرہ میں اس طرح کی احادیث کی کمی نہیں اور اس سے ہماری شریعت کے مزاج کا پتہ چلتا ہے کہ وہ اپنی اتباع کرنے والوں سے کس طرح کی زندگی کا مطالبہ کرتی ہے۔
خداوند تعالیٰ خود شارع ہیں اور اس نے اپنی تمام دوسری مخلوقات کے ساتھ انسانوں کو بھی پیدا کیا ہے۔
اس لیے انسان کی طبیعت میں فطری طور پر جو رجحانات اور صلاحیتیں موجود ہیں۔
خداوند تعالیٰ اپنے احکام و اوامر میں انہیں نظرانداز نہیں کرتے۔
شریعت میں معاد ومعاش سے متعلق جن احکام پر عمل کرنے کا ہم سے مطالبہ کیا گیا ہے‘ ان کا مقصد یہ ہے کہ خدا کی عبادت اس کی رضا کے مطابق ہوسکے اور زمین میں شرو فساد نہ پھیلے۔
اہل وعیال پر خرچ کرنے کی اہمیت اور اس پر اجروثواب کا استحقاق صلہ رحمی اور خاندانی نظام کی اہمیت کے پیش نظر ہے کہ جن پر معاشرہ کی صلاح وبقا کا مدار ہے۔
حدیث کا یہ حصہ کہ اگر کوئی شخص اپنی بیوی کے منہ میں لقمہ دے تو اس پر بھی اجروثواب ملے گا، اسی بنیاد پر ہے۔
کون نہیں جانتا کہ اس میں حظ نفس بھی ہے۔
لیکن اگر ازدواجی زندگی کے ذریعہ مسلمان اس خاندانی نظام کو پروان چڑھاتا ہے جس کی ترتیب اسلام نے دی اور اس کے مقتضیات پر عمل کی کوشش کرتا ہے تو قضاء شہوت بھی اجروثواب کا باعث ہے۔
شیخ نووی ؒ نے لکھا ہے کہ حظ نفس اگر حق کے مطابق ہوتو اجروثواب میں اس کی وجہ سے کوئی کمی نہیں ہوتی۔
مسلم میں اس سلسلے کی ایک حدیث بہت زیادہ واضح ہے‘ آنحضورﷺ نے فرمایا کہ تمہاری شرمگاہ میں صدقہ ہے۔
صحابہ ؓ نے عرض کی کہ یا رسول اللہ ﷺ! کیا ہم اپنی شہوت بھی پوری کریں اور اجر بھی پائیں گے؟ آپ ﷺ نے فرمایا کہ ہاں! کیا تم اس پر غور نہیں کرتے کہ اگر حرام میں مبتلا ہوگئے تو پھر کیا ہوگا؟ اس سے سمجھا جاسکتا ہے کہ شریعت ہمیں کن حدود میں رکھنا چاہتی ہے اور اس کے لیے اس نے کیا کیا جتن کئے ہیں اور ہمارے بعض فطری رجحانات کی وجہ سے جو بڑی خرابیاں پیدا ہوسکتی تھیں‘ ان کے سد باب کی کس طرح کوشش کی ہے۔
حافظ ابن حجر ؒ نے لکھا ہے کہ اس کے باوجود کہ بیوی کے منہ میں لقمہ دینے اور دوسرے طریقوں سے خرچ کرنے کا داعیہ نفعانی اور شہوانی بھی ہے۔
خود یہ لقمہ جس جسم کا جزو بنے گا شوہر اسی سے منتفع (فائدہ)
اٹھاتا ہے، لیکن شریعت کی طرف سے پھر بھی اجروثواب کا وعدہ ہے۔
اس لیے اگر دوسروں پر خرچ کیا جائے جن سے کوئی نسبت وقرابت نہیں اور جہاں خرچ کرنے کے لیے کچھ زیادہ مجاہدہ کی بھی ضرورت ہوگی تو اس پر اجروثواب کس قدر مل سکتا ہے۔
تاہم یہ یاد رہے کہ ہر طرح کے خرچ اخراجات میں مقدم اعزا واقرباء ہیں۔
اور پھر دوسرے لوگ کہ اعزاپر خرچ کرکے آدمی شریعت کے کئی مطالبوں کو ایک ساتھ پورا کرتا ہے۔
سعد بن خولہ ؓ مہاجرین میں سے تھے۔
لیکن آپ کی وفات مکہ میں ہوگئی تھی۔
یہ بات پسند نہیں کی جاتی تھی کہ جن لوگوں نے اللہ اور رسول سے تعلق کی وجہ سے اور اللہ کی رضا حاصل کرنے کے لیے ہجرت کی تھی وہ بلا کسی سخت ضرورت کے مکہ میں قیام کریں۔
چنانچہ سعد بن وقاص ؓ مکہ میں بیمار ہوئے تو وہاں سے جلد نکل جانا چاہا کہ کہیں وفات نہ ہوجائے اور رسول اللہ ﷺ نے بھی سعد بن خولہ ؓ پر اس لیے اظہار غم کیا تھا کہ مہاجر ہونے کے باوجود ان کی وفات مکہ میں ہوگئی۔
اسی کے ساتھ آپ ﷺ نے اس کی بھی دعا کی کہ اللہ تعالیٰ صحابہ کو ہجرت پر استقلال عطا فرمائے تاہم یہ نہیں کہا جاسکتا کہ یہ نقصان کس طرح کا ہوگا۔
کیونکہ یہ تکوینیات سے متعلق ہے۔
(تفہیم البخاری)
ترجمہ باب رثاء سے وہی اظہار افسوس اور رنج وغم مراد ہے نہ مرثیہ پڑھنا۔
مرثیہ اس کو کہتے ہیں کہ میت کے فضائل اور مناقب بیان کئے جائیں اور لوگوں کو بیان کرکے رلایا جائے۔
خواہ وہ نظم ہو یا نثر یہ تو ہماری شریعت میں منع ہے، خصوصاً لوگوں کو جمع کرکے سنانا اور رُلانا اس کی ممانعت میں تو کسی کا اختلاف نہیں ہے۔
صحیح حدیث میں وارد ہے جس کو احمد اور ابن ماجہ نے نکالا کہ آنحضرت ﷺ نے مرثیوں سے منع فرمایا۔
سعد ؓ کا مطلب یہ تھا کہ اور صحابہ تو آپ کے ساتھ مدینہ طیبہ روانہ ہوجائیں گے اور میں مکہ ہی میں پڑے پڑے مرجاؤں گا۔
آپ ﷺ نے پہلے گول مول فرمایا جس سے سعد ؓ نے معلوم کرلیا کہ میں اس بیماری سے مروں گا نہیں۔
پھر آگے صاف فرمایا کہ شاید تو زندہ رہے گا اور تیرے ہاتھ سے مسلمانوں کو فائدہ اور کافروں کا نقصان ہوگا۔
اس حدیث میں آپ ﷺ کا ایک بڑا معجزہ ہے جیسے آپ کی پیش گوئی تھی ویسا ہی ہوا۔
سعد ؓ آنحضرت ﷺ کی وفات کے بعد مدت تک زندہ رہے عراق اور ایران انہوں نے فتح کیا۔
رضي اللہ عنه۔
(وحیدي)

حدیث حاشیہ:
حجۃ الوداع میں حضرت سعد بن ابی وقاص ؓ بیمار ہو گئے اور بیماری شدت پکڑ گئی تو انہوں نے آنحضرت ﷺ سے زندگی سے مایوس ہو کر اپنے ترکہ کے بارے میں مسائل معلوم کئے۔
آنحضرت ﷺ نے ان کو مسائل سمجھائے اور ساتھ ہی تسلی دلائی کہ ابھی تم عرصہ تک زندہ رہو گے اور ایسا ہی ہوا کہ حضرت سعد ؓ بعد میں چالیس سال زندہ رہے عراق فتح کیا اور بہت سے لوگ ان کے ہاتھ پر مسلمان ہو ئے ان کے بہت سے لڑکے بھی پیداہوئے۔
حدیث پر غور کرنے سے واضح ہوتا ہے کہ اسلام مسلمانوں کو تنگ دست مفلس قلاش بننے کی بجائے زیادہ سے زیادہ حلال طور پر کما کر دولت مند بننے کی تعلیم دیتا ہے اور بزور رغبت دلاتا ہے کہ وہ اپنے اہل وعیال کو غربت تنگ دستی کی حالت میں چھوڑ کر انتقال نہ کریں یعنی پہلے سے ہی محنت و مشقت کرکے افلاس کا مقابلہ کریں۔
ضرور ایسی ترقی کریں کہ مرنے کے بعد ان کی اولاد تنگ دستی محتا جگی افلاس کی شکار نہ ہو۔
اسی لئے حضرت امام سعید بن مسیب مشہور محدث فرماتے ہیں:
لا خیر في من لا یرید جمع المال من حله یکف به وجھه عن الناس ویصل به رحمه ویعطي منه حقه۔
ایسے شخص میں کوئی خوبی نہیں ہے جو حلال طریقہ سے مال جمع نہ کرے جس کے ذریعہ لوگوں سے اپنی آبرو کی حفاظت کرے اور خویش واقارب کی خبر گیری کرے اور اس کا حق ادا کرے۔
حضرت امام سبیعی کا قول ہے کانوا یرون السعة عونا علی الدین بزرگان دین خوش حالی کو دین کے لئے مدد گار خیال کرتے تھے۔
امام سفیان ثوری ؒ فرماتے ہیں:
المال في زماننا ھذاسلاح المومنین مال ہمارے زمانہ میں مومن کا ہھتیار ہے (از منہاج القاصدین، ص: 199)
قرآن مجید میں زکوٰۃ کا بار بار ذکر ہی یہ چاہتا ہے کہ ہر مسلمان مال دار ہو جو سالانہ زیادہ سے زیادہ زکوٰۃ ادا کر سکے۔
ہاں مال اگر حرام طریقہ سے جمع کیا جائے یا انسان کو اسلام اور ایمان سے غافل کر دے تو ایسا مال خدا کی طرف سے موجب لعنت ہے۔
وفقنا اللہ لما یحب ویرضی (آمین)

حدیث حاشیہ:
حجۃ الوداع کے ذکر کی وجہ سے حدیث کو یہاں لایا گیا۔

حدیث حاشیہ:
حضرت سعد بن ابی وقاص قریشی عشرہ مبشرہ میں سے ہیں۔
سترہ سال کی عمر میں اسلام لائے۔
تمام غزوات میں شریک رہے، بڑے مستجاب الدعوات تھے۔
آنحضرت صلی اللہ علیہ وسلم نے ان کے لیے قبولیت دعا کی تھی۔
اس کی برکت سے ان کی دعا قبول ہوتی تھی۔
یہی ہیں جن کے لیے حضور صلی اللہ علیہ وسلم نے فرمایا تھا (ارم یا سعد فداك أبي و أمي)
سنہ55ھ میں مقام عقیق میں وفات پائی۔
ستر سال کی عمر تھی مروان بن حکم نے نماز جنازہ پڑھائی۔
مدینے کے قبر ستان بقیع الغرقد میں دفن ہو ئے۔
رضي اللہ عنه و أرضاہ آمین۔

حدیث حاشیہ:
اس حدیث سے بھی تہائی تک کی وصیت کرنا جائز ثابت ہوا‘ ساتھ یہ بھی کہ شارع کا منشا وارثوں کے لئے زیادہ سے زیادہ مال چھوڑنا ہے تاکہ وہ پیچھے محتاج نہ ہوں‘ وصیت کرتے وقت وصیت کرنے والوں کو یہ امرملحوظ رکھنا ضروری ہے۔

حدیث حاشیہ:
آنحضرت صلی اللہ علیہ وسلم نے جیسی امید ظاہر فرمائی تھی، اللہ نے اس کو پورا کیا۔
سعد بن ابی وقاص رضی اللہ عنہ وفات نبوی کے بعد مدت دراز تک زندہ رہے۔
عراق کاملک انہوں نے ہی فتح کیا۔
کافروں کوزیر کیا اوروہ مدتوں عراق کے حاکم رہے۔
صدق رسول اللہ صلی اللہ علیه وسلم۔
سعد رضی اللہ عنہ عشرئہ مبشرہ میں سے ہیں۔
17 سال کی عمر میں مسلمان ہوئے اور کچھ اوپر ستر سال کی عمر پائی اور سنہ 55 ھ میں انتقال ہوا۔
مروان بن حکم نے نماز جنازہ پڑھائی اور مدینہ طیبہ میں دفن ہوئے۔
رضي اللہ عنه و أرضاہ و عنا أجمعین۔

حدیث حاشیہ:
ان جملہ احادیث میں جملہ اعمال کا دارومدار نیت پر بتلایا گیا۔
امام نووی رحمہ اللہ کہتے ہیں کہ ان کی بنا پر حظ نفس بھی جب شریعت کے موافق ہو تو اس میں بھی ثواب ہے۔

حدیث حاشیہ:
آنحضرت صلی اللہ علیہ وسلم نے سعد بن ابی وقاص کے لئے جیسا فرمایا تھا ویسا ہی ہوا، وہ وفات نبوی کے بعد کافی دنوں زندہ رہے اور تاریخ اسلام میں ایک عظیم مجاہد اور فاتح کی حیثیت سے نامور ہوئے جیسا کہ کتب تاریخ میں تفصیلات موجود ہیں۔
کچھ اوپر 70 سال کے عمر میں 55 میں انتقال فرمایا۔

تخریج الحدیث:
[واخرجه البخاري 1295، من حديث مالك به ورواه مسلم 1628، من حديث الزهري به من رواية يحييٰ بن يحييٰ]

تفقه
➊ ورثاء کے ہوتے ہوئے وصیت میں (صدقہ ہو یا ہبہ) اپنے تمام مال میں سے صرف ثلث (ایک تہائی) دینا ہی جائز ہے۔ اس سے تجاوز کرنا جائز نہیں ہے تاہم کوئی وارث نہ ہو تو بعض علماء کے نزدیک سارا مال صدقہ کرنا جائز ہے۔
➋ اس روایت میں بعض راویوں نے ”عام الفتح“ یعنی حجۃ الوداع کے بدلے فتح مکہ کا سال روایت کیا ہے لیکن راجح یہی ہے کہ یہ حجۃ الوداع کا واقعہ ہے۔
➌ مریض موت کے وقت جو بھی صدقہ، ہبہ یا غلام آزاد کرے گا تو اس کے ترکے کے ایک تہائی سے ہی ادا ہو گا۔
➍ قرآن مجید کی تخصیص صحیح حدیث سے جائز ہے کیونکہ اس حدیث نے وصیت کے عمومی حکم کو مخصوص کر دیا ہے۔
➎ بعض علماء نے کہا ہے کہ وارثوں کی رضا مندی کے ساتھ ایک تہائی سے زیادہ وصیت کی جا سکتی ہے۔
➏ اگر مرنے والا غریب ہے تو اس کے لئے بہتر یہی ہے کہ ایک تہائی کی بھی وصیت نہ کرے بلکہ اپنے رشتہ داروں کے لئے مال چھوڑ جائے تاکہ وہ لوگوں سے مانگتے نہ پھریں۔
➐ اگر مفضول بیمار ہو تو سنت یہی ہے کہ افضل آدمی بھی اس کی عیادت (بیمار پرسی) کے لئے اس کے پاس جائے۔ سیدنا جابر بن عبداللہ الانصاری رضی اللہ عنہ سے روایت ہے کہ نبی صلی اللہ علیہ وسلم نے فرمایا: «من عاد مريضًا خاض فى الرحمة حتي إذا قعد استقرفيها۔» جو شخص کسی مریض کی بیمارپرسی کرتا ہے تو رحمت (ہی رحمت) میں داخل ہو جاتا ہے اور جب وہ بیٹھتا ہے تو (رحمت) میں قرار پکڑ لیتا ہے۔ [الادب المفرد للبخاري: 522 و سنده حسن وله طريق آخر عند أحمد 3٠4/3 وابن حبان فى صحيحه: 711 والحاكم 35٠/1 والبزار: 775 وسنده حسن]
➑ اعمال کا دارومدار نیتوں پر ہے۔ جو چیز اللہ کی رضا مندی کے لئے خرچ کی جائے تو اس کا اجر ملے گا۔ إن شاء اللہ
➒ اپنے اہل وعیال اور قریبی رشتہ داروں پر مال خرچ کرنا اور ان کی حسب استطاعت مدد کرنا بھی نیک کاموں اور صدقات میں سے ہے جس کا اجر ان شاء اللہ ملے گا۔
➓ نبی کریم صلی اللہ علیہ وسلم پر قرآن مجید کے علاوہ بھی وحی آتی تھی کیونکہ آپ کا یہ فرمانا: ”تمہاری وجہ سے ایک قوم کو فائدہ پہنچے گا اور دوسروں کو نقصان ہو گا۔“ غیب کی خبر ہے جو کہ من و عن پوری ہوئی۔ سیدنا سعد بن ابی وقاص رضی اللہ عنہ نبی صلی اللہ علیہ وسلم کے بعد زندہ رہے اور ایران آپ کے ہاتھ پر فتح ہوا جس سے مسلمانوں کو فائدہ پہنچا اور کفار کو نقصان ہوا۔ غیب صرف اللہ ہی جانتا ہے لہٰذا ثابت ہوا کہ یہ خبر اللہ تعالیٰ نے نبی کریم صلی اللہ علیہ وسلم کو دی تھی۔ والحمدللہ
اس حدیث سے اور بھی بہت سے فائدے معلوم ہوتے ہیں مثلاً یہ کہ مہاجر ہجرت کے بعد اپنے آبائی علاقے میں دوبارہ آباد نہیں ہو سکتا۔ مومن بھائی کی وفات پر اس کا مرثیہ کہنا یا لکھنا جائز ہے بشرطیکہ اس مرثیے میں غلو، مبالغہ اور جھوٹ شامل نہ ہو۔
نیز مصیبت پر تاسف اور اظہار ہمدردی کرنا مسنون ہے اور یہ بھی کہ اصل مصیبت دین اور اعمال کا نقصان ہے۔ «وغيرذلك»

اردو حاشہ:
(1) یہ واقعہ مکہ مکرمہ کا ہے فتح مکہ کے موقع پر۔
(2) ”بیٹی کے سوا“ یعنی اولاد میں سے‘ ورنہ عصبات تو تھے۔
(3) ”زیادہ ہی ہے“ اس سے بعض حضرات نے استدلال کیا ہے کہ ثلث (تہائی) سے بھی کم میں وصیت کرنی چاہیے۔ دیگر حضرات معنیٰ کرتے ہیں: ”ایک تہائی بہت ہے۔“ گویا ایک تہائی میں وصیت ہوسکتی ہے۔
(4) مریض کی عیادت اور اس کے لیے شفا کی دعا کرنا مشروع ہے اور مریض کے لیے جائز ہے کہ وہ اپنی بیماری کی شدت کو بیان کرے لیکن اس میں کراہت اور عدم رضا کا پہلو نہ ہو۔

فوائد ومسائل:
1۔
مال اللہ تعالیٰ کا فضل ہے۔
اس لئے اسے حلال ذرائع سے کمانا اور پھر جمع رکھنا کوئی معیوب نہیں، بشرط یہ کہ شرعی واجبات ادا کرتا رہے۔
مال جمع ہونے کی صورت میں ہی ایک مسلمان زکواۃ، حج، جہاد، قربانی، صدقہ، ورثہ اور وصیت جیسے احکام پر عمل پیرا ہوسکتا ہے۔
ورنہ مدات پرعمل محال ہوگا۔
اور جن آیات وحدیث میں مال جمع کرنے کی مذمت ہے۔
وہاں حرام مال کمانے شریعت کے تقاضے پورے نہ کرنے اور اس کا محض حریص بننے کی مذمت ہے۔

2۔
تہائی مال سے زیادہ وصیت کرنا جائز نہیں۔

3۔
فقیروں کی نسبت وارثوں کا حق اولیٰ ہے۔
اور انہیں غنی چھوڑ جانا مستحب اور فقیرچھوڑ جانانا پسندیدہ ہے۔
سوائے اس کے کہ وہ توکل کے اعلیٰ مراتب پرہوں۔

4۔
واجب اخراجات اور تمام اعمال صالحہ جو راہ للہ کیے جایئں ان سب میں انسان کواجر وثواب ملتا ہے۔
اور درجات بلند ہوتے ہیں۔

5۔
حضرت سعد بن ابی وقاص رضی اللہ تعالیٰ عنہ رسول اللہ ﷺ کی بشارت کے مطابق آپ کی رحلت کے بعد تقریبا چوالیس برس حیات رہے۔
اور عراق انہی کے ہاتھوں فتح ہوا۔
مشہور اور فیصلہ کن جنگ قادسیہ میں مسلمانوں کے کمانڈر آپ ہی تھے۔

6۔
اس وقت واجب تھا کہ جس علاقے کے مسلمانوں نے اللہ کے لئے ہجرت کی ہو وہاں قیام نہیں کرسکتے۔
اس لئے یہ بھی کوشش ہوتی تھی کہ سفر میں بھی وہاں موت نہ آئے۔
اور حضرت سعد بن خولہ رضی اللہ تعالیٰ عنہ مہاجر صحابی تھے۔
پہلے ہجرت حبشہ ثانیہ میں حبشہ گئے وہاں سے لوٹے اور غزوہ بدر میں شریک ہوئے۔
بالاخرحجۃ الوداع کے موقعہ پر مکہ میں فوت ہوئے۔

فوائد ومسائل:
عیادت میں چاہیے کہ مریض کی پوری طرح دلجوئی کی جائے۔
اور بالخصوص اللہ تعالیٰ سے دعا ہو کہ اسے شفا ملے۔

اردو حاشہ:
فوائد و مسائل:
(1)
بیمار کی عیادت کرنا مسلمان کےحقوق میں شامل ہے اور یہ بہت بڑا نیک عمل ہے
(2)
  جب انسان محسوس کرے کہ اس کا آخری وقت قریب ہے تو اس وقت اسے ترکے کے تہائی حصے سے زیادہ صدقے کی وصیت نہیں کرنی چاہیے۔

(3)
اگر کوئی شخص تہائی حصے سے زیادہ کی وصیت کرکے فوت ہوجائے تو اس کی وصیت پر صرف تہائی ترکےتک عمل کیا جائے گا۔ (دیکھئے حدیث: 2345)

(4)
بہتر یہ ہے کہ تہائی مال سے کم وصیت کی جائے کیونکہ رسول اللہﷺ نے تہائی کی اجازت دینے کے باوجود اسے ” زیادہ“ فرمایا ہے۔
حضرت عبداللہ بن عباس رضی اللہ عنہ نے اس حدیث سے یہی سمجھا ہے۔ (دیکھئے حدیث: 2711)

اردو حاشہ:
وضاحت:
1؎:
اس حدیث سے معلوم ہواکہ صاحب مال ورثاء کو محروم رکھنے کی کوشش نہ کرے،
اس لیے وہ زیادہ سے زیادہ اپنے تہائی مال کی وصیت کرسکتا ہے،
اس سے زیادہ کی وصیت نہیں کرسکتا ہے،
البتہ ورثاء اگر زائد کی اجازت دیں تو پھر کوئی حرج کی بات نہیں ہے،
یہ بھی معلوم ہواکہ ورثاء کا مالدار رہنا اور لوگوں کے سامنے ہاتھ پھیلانے سے بچنا بہت بہترہے۔

2؎:
آپ ﷺ نے سعد بن ابی وقاص کے متعلق جس امید کا اظہار کیاتھا وہ پوری ہوئی،
چنانچہ سعد اس مرض سے شفا یاب ہوئے اور آپ کے بعد کافی لمبی عمر پائی،
ان سے ایک طرف مسلمانوں کو فائدہ پہنچا تو دوسری جانب کفار کو زبردست نقصان اٹھانا پڑا،
ان کا انتقال مشہور قول کے مطابق 50 ھ میں ہواتھا۔

فائدہ:
صحا بہ کرام رضی اللہ عنہن سخی لوگ تھے، اور وہ دنیا وما فیہا سے بے رغبتی اختیار کرنے والے تھے۔ ورثاء تھوڑے ہوں یا زیادہ کوئی بھی انسان اپنے مال سے زیادہ سے زیادہ تیسرا حصہ اللہ تعالی کی راہ میں دے سکتا ہے، اس سے زیادہ نہیں کیونکہ ہر نیکی کے کام میں اتباع قرآن و حدیث شرط ہے۔ اسلام کے قوانین کس قدر پیارے ہیں کہ وہ کسی کو لوگوں کے سامنے ہاتھ پھیلاتے ہوئے نہیں دیکھنا چاہتا، اس سے ہر ممکن طریقے سے بچنا چاہیے۔ اس سے یہ بھی ثابت ہوا کہ اولاد کو اپنے پیچھے فقیر چھوڑنے سے کئی گنا بہتر ہے کہ انھیں خوشحال چھوڑا جائے۔ اس حدیث سے ہجرت کی اہمیت بھی ثابت ہوتی ہے کہ نبی کریم صلی اللہ علیہ وسلم مہاجرین کی ثابت قدمی کی دعا فرمایا کرتے تھے۔

حدیث حاشیہ:
مفردات الحدیث:
(1)
إنك ان تذر ورثتك أغنياء:
تم اپنے وارثوں کو لوگوں سے بے نیاز چھوڑو،
وہ کسی کے محتاج نہ رہیں کہ اپنی احتیاج و فقر کی بنا پر لوگوں کے سامنے مانگنے کے لیے ہاتھ پھیلائیں۔
(2)
العالة:
عائل کی جمع ہے،
فقراء،
محتاج۔
(3)
اخلف بعداصحابي:
کہ میرے ساتھی حج کر کے واپس چلے جائیں گے،
اور میں بیماری کے سبب ادھر ہی مکہ میں رہ جاؤں گا،
حالانکہ مہاجر کے لیے حج سے فراغت کے بعد تین دن سے زائد رہنا جائز نہیں ہے،
اور یہ بھی ممکن ہے،
میں ادھر ہی فوت ہو جاؤں،
تو آپ نے تسلی دیتے ہوئے،
تخلف کے مفہوم کو بدل دیا،
کہ اللہ تعالیٰ تمہیں طویل عمر دے گا،
اور تمہاری زندگی سے مسلمانوں کو نفع حاصل ہو گا،
کیونکہ عراق اور ایران کے فاتح ہیں اور ان فتوحات سے کافروں کو نقصان پہنچا،
حکومت فارس کے قریباً سارے زیر اقتدار علاقے انہیں کی قیادت میں فتح ہوئے،
اور اللہ کے لاکھوں،
بندوں کو اسلام کی دولت نصیب ہوئی،
اور خاص کر فتح قادسیہ ان کا بہت بڑا کارنامہ ہے،
اور آپ نے تمام مہاجرین کے حق میں دعا فرمائی،
کہ ان کی ہجرت میں کسی قسم کی کمی یا کوتاہی واقع نہ ہو اور سعد بن خولہ رضی اللہ عنہ پر اس لیے ترس کا اظہار فرمایا کہ وہ مکہ مکرمہ میں فوت ہو گئے تھے،
حضرت سعد کے بارے میں رسول اللہ صلی اللہ علیہ وسلم کی یہی پیش گوئی پوری ہوئی اور اس کا اس طرح ظہور میں آنا بلاشبہ آپﷺ کا معجزہ ہے،
حضرت سعد 55ھ تا 58ھ میں فوت ہوئے۔
فوائد ومسائل:
(1)
الثُلُثُ كَثِيرُ سے معلوم ہوتا ہے کہ زیادہ سے زیادہ ایک تہائی مال کے بارے میں وصیت کی گنجائش ہے اور بہتر ہے کہ اس سے کم کے بارے میں وصیت کی جائے،
جیسا کہ آگے حضرت ابن عباس رضی اللہ عنہما کا قول آ رہا ہے،
اور احناف و حنابلہ کا یہی موقف ہے،
اور امام شافعی کا موقف یہ ہے کہ ایک تہائی بہت ہے یا کوئی کم نہیں ہے،
اس لیے تہائی سے زائد کے بارے میں وصیت جائز نہیں ہے،
اور اس پر امت کا اتفاق ہے،
ہاں اگر اس کا کوئی بھی رشتہ دار (اصحاب الفروض،
عصبہ اور ذوی الارحام)
موجود نہیں ہے،
تو پھر اس کے بارے میں اختلاف ہے،
کیونکہ یہاں وہ علت کے تم اپنے ورثاء کو لوگوں کے سامنے ہاتھ پھیلانے سے مستغنی چھوڑو موجود نہیں ہے،
احناف کے نزدیک اس صورت میں وہ آزاد ہے،
اس پر کسی قسم کی پابندی نہیں ہے،
بعض صحابہ،
حضرت علی،
ابن مسعود اور ابو موسیٰ رضی اللہ عنہم سے بھی یہ قول منقول ہے،
امام احمد کا ایک قول یہی ہے،
لیکن شافعیوں،
اور مالکیوں کے نزدیک ایک تہائی سے زائد کی گنجائش کسی بھی صورت میں نہیں ہے،
اگر اس کا کوئی وارث نہیں ہے،
تو اس کا مال،
بیت المال میں جمع ہو گا۔
(2)
اس حدیث سے ثابت ہوتا ہے،
فرض نفقات جن کا خرچ اس کی ذمہ داری ہے،
اس میں اگر انسان اللہ کی خوشنودی کی نیت کر لے تو اس کے اجروثواب میں اضافہ ہو جاتا ہے،
اگر اللہ تعالیٰ کی خوشنودی کی نیت نہ ہو تو فرض ساقط ہو جائے گا،
اور اس سے یہ بھی ثابت ہو گا،
کہ امور مباح میں حسن نیت سے ثواب حاصل ہو گا،
مثلاً انسان کھاتے پیتے وقت یہ نیت کرے،
اس سے مجھے عبادت کرنے کی طاقت حاصل ہو گی،
نیند و استراحت میں یہ نیت کرے،
اس سے میں عبادت کے لیے تازہ دم ہو جاؤں گا،
وہ بیوی سے تعلقات اس لیے قائم کرے تاکہ زنا اور بدنظری سے بچ سکے،
یا بیوی کا حق ادا ہو سکے،
اور نیک اولاد حاصل ہو۔
(3)
انسان کو اگر اعمال صالحہ کی توفیق کے ساتھ طویل عمر ملے،
تو یہ انسان کے لیے اجروثواب میں اضافہ اور رفع درجات کا باعث ہے۔

حدیث حاشیہ:
1۔
واقعہ یہ ہے کہ حجۃ الوداع کے موقع پر حضرت سعد بن ابی وقاص رضی اللہ عنہ اس قدر بیمار ہوئے کہ زندگی سےمایوسی ہوگئی۔
رسول اللہ صلی اللہ علیہ وسلم جب تیمارداری کے لیے تشریف لے گئے تو حضرت سعد رضی اللہ تعالیٰ عنہ نے عرض کیا:
اے اللہ کے رسول صلی اللہ علیہ وسلم! مال زیادہ ہے بیٹی ایک ہے سارے مال کی وصیت کرنا چاہتا ہوں، رسول اللہ صلی اللہ علیہ وسلم نے تمام مال کی وصیت سے روک دیا، اس مال سے صلہ رحمی اور اقربا پروری کی تلقین فرمائی۔
مذکورہ حدیث بھی اسی ضمن میں ارشاد فرمائی۔
اس کا مفہوم یہ ہے کہ بال بچوں پر خرچ کرنا بھی صدقہ ہے۔
صدقہ صرف وہی نہیں جو غیر کو دیا جائے۔
بلکہ خود اپنے اوپر خرچ کر کے ثواب حاصل کیا جا سکتا ہے۔
حتی کہ بیوی کےمنہ میں لقمہ ڈالنا بھی باعث اجرو ثواب ہے اگر نیت ثواب کی ہو۔
اگرچہ اس میں لذت کا پہلو اور طبیعت کا تقاضا بھی ہے۔
2۔
علامہ نووی رحمۃ اللہ علیہ نے لکھا ہے کہ شریعت کے دائرے میں رہتے ہوئے جائز طور پر نفسانی خواہشات کی تکمیل سے بھی ثواب ملتا ہے۔
چنانچہ رسول اللہ صلی اللہ علیہ وسلم نے فرمایا:
”شرمگاہ میں بھی صدقہ ہے۔
“ صحابہ کرام رضوان اللہ علیہم اجمعین نے عرض کیا:
اے اللہ کے رسول صلی اللہ علیہ وسلم! کیا قضائے شہوت میں بھی اجر ہے؟ آپ نے فرمایا:
”اگر اس کا غلط استعمال کیا جاتا تو گناہ گار نہ ہوتا۔
“ اندریں حالات اپنے محل میں یہ عمل باعث اجر کیوں نہ ہو۔
(فتح الباري: 181/1)
3۔
امام بخاری رحمۃ اللہ علیہ نے تینوں احادیث کی ترتیب میں بھی عجیب اسلوب اختیار کیا ہے پہلی حدیث کا مرکزی اصول یہ ہے کہ شرعی عبادات میں نیت کا اعتبار ہوگا۔
اگر اخلاص ہے تو ثواب، اگر نہیں تو عتاب، دوسری حدیث میں ہے کہ عام معاشرتی عادات کو حسن نیت سے عبادات میں تبدیل کیا جا سکتا ہے جس پر اجروثواب بھی ملے گا۔
تیسری حدیث میں ہے کہ خواہشات نفسانی کی تکمیل اگر جائز طریقے سے ہو تو اس میں اجرو ثواب کی بشارت دی گئی ہے۔
گو اس میں حصول لذت بھی ہے اور طبیعت کا تقاضا بھی موجود ہے۔

حدیث حاشیہ:
(1)
راوی کے بیان کے مطابق رسول اللہ ﷺ نے حضرت سعد بن خولہ ؓ کے متعلق صرف اظہارِ رنج و غم فرمایا کہ انہیں مکہ ہی میں موت آ گئی۔
اس کے متعلق محدث اسماعیلی نے امام بخاری ؒ پر اعتراض کیا ہے کہ مذکورہ حدیث عنوان کے مطابق نہیں، کیونکہ رسول اللہ ﷺ کا حزن و ملال، مرثیے میں سے نہیں۔
حافظ ابن حجر ؒ نے لکھا ہے کہ شاید امام بخاری ؒ کا مقصد مرثیہ مباح کی صورت بتانا ہے، کیونکہ ایسا مرثیہ جس سے غم کے جذبات بھڑکنے کا اندیشہ ہو اس کی ممانعت ہے، چنانچہ رسول اللہ ﷺ نے مرثیے سے منع فرمایا ہے، جیسا کہ مسند احمد وغیرہ میں ہے۔
(مسند أحمد: 356/4،383)
مصنف ابن ابی شیبہ میں حضرت عبداللہ بن ابی اوفیٰ ؓ سے مروی حدیث میں ہے کہ رسول اللہ ﷺ نے ہمیں مرثیہ خوانی سے منع فرمایا۔
(المصنف لابن أبي شیبة: 302/3، 392، 394، 395)
لیکن امام بخاری ؒ نے ثابت کیا ہے کہ شریعت کے دائرے میں رہتے ہوئے کسی میت کے متعلق مرثیے کے الفاظ استعمال کیے جا سکتے ہیں، کیونکہ اس سے مراد اپنی ہمدردی اور شرکتِ غم کا اظہار کرنا ہے۔
(فتح الباري: 210/3)
بعض شارحین نے حضرت سعد بن ابی وقاص ؓ کے اس واقعے کو فتح مکہ سے متعلق قرار دیا ہے، حالانکہ اس حدیث میں صراحت ہے کہ یہ واقعہ حجۃ الوداع کے موقع پر پیش آیا۔
حضرت سعد بن ابی وقاص ؓ رسول اللہ ﷺ کی پیشن گوئی کے مطابق مدت تک زندہ رہے۔
اللہ تعالیٰ کی توفیق سے ایران اور عراق ان کے ہاتھوں فتح ہوئے۔
بےشمار لوگ ان کے ہاتھوں مسلمان ہوئے اور کئی ایک ان کے ہاتھوں جہنم واصل ہوئے۔
(2)
حضرت سعد بن ابی وقاص ؓ کو رسول اللہ ﷺ کی تسلی کے بعد یہ خیال پیدا ہوا کہ میری زندگی ابھی باقی ہے اور اس بیماری میں میرا انتقال نہیں ہو گا، اس لیے انہوں نے سوال کیا کہ آیا میں اپنے ساتھیوں سے پیچھے رہ جاؤں گا، یعنی آپ تو حجۃ الوداع سے فارغ ہو کر مکہ معظمہ سے اپنے صحابہ کے ساتھ مدینہ منورہ چلے جائیں گے اور میں یہاں اکیلا رہ جاؤں گا۔
یہ فکر اس لیے دامن گیر ہوئی کہ صحابہ کرام ؓ ہجرت کے بعد مکہ میں رہ جانے کو اچھا نہیں جانتے تھے اور سمجھتے تھے کہ دارہجرت ہی میں موت آئے تو ہجرت کی تکمیل ہو گی، اس پر رسول اللہ ﷺ نے فرمایا:
”اگر تم رہ بھی جاؤ تو کوئی حرج والی بات نہیں، یہاں بھی جو نیک اعمال کرو گے ان کا نفع اور ثواب تمہیں مکہ معظمہ میں بھی ضرور حاصل ہو گا۔
“ پھر آپ نے دعا فرمائی کہ یا اللہ! میرے صحابہ کرام کے لیے ان کی ہجرت کو کامل کر دے اور ان کے قدم کمال سے نقص اور کمی کی طرف نہ لوٹیں۔
حضرت سعد بن ابی وقاص ؓ کے سوال کا مطلب یہ بھی ہو سکتا ہے کہ میں اس مرض سے نجات پر مزید زندگی پاؤں گا کہ میں اپنے ساتھیوں سے بعد میں وفات پاؤں۔
اس کے جواب میں آپ کا دوسرا ارشاد ہے کہ تمہاری عمر دراز ہو گی اور تمہاری موت مکہ مکرمہ میں نہیں ہو گی، چنانچہ اس کے بعد حضرت سعد بن ابی وقاص ؓ چالیس سال تک زندہ رہے، عراق و ایران فتح کیا، نیز ان سے مسلمانوں کو بہت نفع پہنچا اور کفارومشرکین پر ان کی وجہ سے بہت تکلیفیں آئیں۔

حدیث حاشیہ:
(1)
امت کا اس امر پر اجماع ہے کہ جس میت کا وارث ہو، ایک تہائی سے زیادہ وصیت اس کے لیے جائز نہیں لیکن اگر کوئی وارث نہ ہو تو کیا تہائی سے زیادہ کی وصیت کی جا سکتی ہے یا نہیں؟ جمہور اہل علم کہتے ہیں:
تہائی مال سے زیادہ وصیت کرنا کسی صورت میں جائز نہیں۔
ایک تہائی بطور وصیت خرچ کرنے کے بعد دو تہائی بیت المال میں جمع کر دیا جائے، لیکن احناف کا موقف ہے کہ وارث نہ ہونے کی صورت میں تہائی مال سے زیادہ وصیت جائز ہے کیونکہ قرآن کریم نے مطلق طور پر وصیت کا ذکر کیا ہے، پھر سنت نے اسے مقید کیا ہے کہ ورثاء موجود ہونے کی صورت میں ایک تہائی تک وصیت کی جائے۔
جس کا وارث نہ ہو وہ قرآن کریم کے اطلاق پر رہے گا اور تہائی سے زیادہ وصیت کرنے میں کوئی حرج نہیں۔
ہمارے رجحان کے مطابق ورثاء کی عدم موجودگی میں ایک تہائی سے زیادہ وصیت کی جا سکتی ہے کیونکہ وصیت کی تعیین صرف حقوق ورثاء کے پیش نظر ہے جیسا کہ رسول اللہ ﷺ نے حضرت سعد بن ابی وقاص ؓسے فرمایا تھا، اس لیے اگر ورثاء نہیں ہیں تو ایک تہائی سے زیادہ وصیت کی جا سکتی ہے۔
واضح رہے کہ وصیت کسی برے کام کے لیے نہیں ہونی چاہیے کیونکہ رسول اللہ ﷺ کا ارشاد گرامی ہے:
”اللہ تعالیٰ نے تم پر تمہاری وفات کے وقت تمہارے تہائی مال کے بدلے تمہاری نیکیوں میں اضافے کا صدقہ کیا ہے تاکہ وہ اس کے ذریعے سے تمہارے اچھے اعمال میں اضافہ کرے۔
“ (سنن ابن ماجة، الوصایا، حدیث: 2709)
یہ حدیث اس بات کا ثبوت ہے کہ تہائی مال کی وصیت نیکیوں میں اضافے کا باعث ہے اور گناہ کے کام میں وصیت کرنا جائز نہیں کیونکہ کتاب و سنت نے گناہ سے بچنے کا حکم دیا ہے۔
واللہ اعلم (2)
امام بخاری ؒ نے تہائی مال کی مشروعیت کو بیان کیا ہے۔
اگر ورثاء فقیر ہوں تو بہتر ہے کہ تہائی مال سے کم کی وصیت کی جائے جیسا کہ ابن عباس ؓ کا ارشاد ہے۔
اگر ورثاء مال دار ہیں تو پھر تہائی مال تک وصیت کی گنجائش ہے۔

حدیث حاشیہ:
1۔
اس حدیث سے ہجرت کی قدروقیمت اور اہمیت وفضیلت بتانا مقصود ہے۔
2۔
رسول اللہ ﷺ نے مہاجرین صحابہ کرام ؓ کے لیے استقامت کی دعا فرمائی ہے کہ اے اللہ! ان کی ہجرت کو قائم رکھ اور شرف قبولیت سے ہمکنار کر۔
انھیں ہجرت کے برعکس کوئی کام کرکے الٹے پاؤں مت پھیر۔
پھر آپ نے حضرت سعد بن خولہ ؓ پر اظہار افسوس فرمایا کہ وہ بے چارے اپنی مجبوری کی وجہ سے مکہ چھوڑ کر مدینہ طیبہ نہ آسکے اور انھیں مکے ہی میں موت آئی۔
3۔
اس حدیث میں حضرت سعد بن ابی وقاص ؓ کے متعلق ایک پیش گوئی کاذکر ہے،چنانچہ وہ اس کے بعد چالیس سال تک زندہ رہے۔
عراق اور فارس فتح کیا۔
مسلمانوں کو فتوحات سے مالا مال اور مشرکین کو نقصان ہوا کہ وہ شکست کھا کرمیدان چھوڑ گئے۔
4۔
اس وقت حضرت سعد ؓ کی ایک بیٹی تھی۔
اس کےبعد اللہ تعالیٰ نے انھیں اولاد کثیر سے نوازا۔
5۔
اس حدیث سے یہ بھی معلوم ہوتا ہے کہ اسلام مسلمانوں کو تنگ دست وقلاش بننے کے بجائے ذرائع سے زیادہ مال کما کر دولت مند بننے کی تعلیم دیتا ہے۔
ہاں، اگرحرام ذرائع سے مال جمع کیا جائے یا وہ مال ایمان واسلام سے غافل کردے تو ایسا مال اللہ کی طرف سے موجب لعنت ہے۔

حدیث حاشیہ:
1۔
حضرت سعد بن ابی وقاص ؓ غزوات میں شمولیت کی وجہ سے اموال غنیمت کے باعث بہت مال دار ہوگئے تھے، اس لیے ان کی تقسیم کے متعلق سوال کیا۔
2۔
چونکہ یہ مہاجرتھے اور مکہ میں سخت علیل ہوگئے، انھیں خیال آیا کہ اگرمکہ ہی میں انتقال ہوگیا تو شاید ہجرت کا ثواب ضائع ہوجائے۔
رسول اللہ ﷺ نے انھیں تسلی دی کہ اس مرض میں تمھیں موت نہیں آئے گی بلکہ تم زندہ رہوگے حتی کہ تم سے مسلمانوں کو نفع پہنچے گا اور مشرکین ومنافقین تمہاری وجہ سے بہت نقصان اٹھائیں گے، چنانچہ ایسا ہی ہوا۔
وہ فاتح فارس بنے اور حضرت عمر ؓ کے دور خلافت میں ہونے والی جنگ قادسیہ میں سپہ سالار تھے۔
چونکہ اس حدیث میں حجۃ الوداع کا بیان ہے، اس لیے امام بخاری ؒ نے اسے ذکر کیا ہے۔

حدیث حاشیہ:
(1)
اپنی بیوی کے منہ میں لقمہ ڈالنا آپس کی دل لگی ہے، طاعات سے نہیں، لیکن اس سے جب اللہ تعالیٰ کی رضا مقصود ہو اور اس سے نیت حصول ثواب کی ہو تو اللہ تعالیٰ اس کے بدلے بھی ثواب عطا فرمائے گا۔
اس سے اپنے اہل و عیال پر خرچ کرنے کی فضیلت معلوم ہوتی ہے۔
(2)
رسول اللہ صلی اللہ علیہ وسلم نے حضرت سعد رضی اللہ عنہ کے متعلق جو امید ظاہر کی تھی اللہ تعالیٰ نے اسے پورا کر دکھایا۔
رسول اللہ صلی اللہ علیہ وسلم کے بعد وہ عرصۂ دراز تک زندہ رہے۔
انہوں نے عراق اور دیگر ممالک فتح کیے۔
ان کی وجہ سے مسلمانوں کو بہت فوائد حاصل ہوئے اور کافروں کو مصیبتوں اور تکلیفوں کا سامنا کرنا پڑا۔
انہوں نے 55 ہجری مین وفات پائی۔
مروان بن حکم نے ان کی نماز جنازہ پڑھائی اور مدینہ طیبہ میں دفن ہوئے۔
رضي اللہ عنه۔

حدیث حاشیہ:
(1)
حضرت سعد بن ابی وقاص رضی اللہ عنہ کی اس وقت ایک ہی بیٹی تھی۔
رسول اللہ صلی اللہ علیہ وسلم نے فرمایا تھا ممکن ہے کہ اللہ تعالیٰ آپ کو زندہ رکھے اور آپ کی وجہ سے بہت سے لوگوں کو فائدہ پہنچے اور بہت سے لوگ آپ کی وجہ سے نقصان میں رہیں، چنانچہ رسول اللہ صلی اللہ علیہ وسلم کی دعا کے نتیجے میں اللہ تعالیٰ نے انہیں عرصۂ دراز تک زندہ رکھا۔
ان کی اولاد میں برکت فرمائی اور وہ فاتح قادسیہ قرار پائے۔
(2)
امام بخاری رحمہ اللہ نے اس حدیث سے ثابت کیا ہے کہ مریض کو مانوس کرنے اور اس کی بیماری کو جاننے کے لیے اس کی پیشانی اور پیٹ پر ہاتھ رکھا جا سکتا ہے۔
بعض اوقات رسول اللہ صلی اللہ علیہ وسلم مریض کو دم کرتے اور جہاں تکلیف ہوتی وہاں ہاتھ رکھتے۔
اللہ تعالیٰ کی مہربانی سے مریض شفایاب ہو جاتا۔
اگر کوئی نیک آدمی کسی کی عیادت کے لیے جائے تو آج بھی ایسا کیا جا سکتا ہے۔
واللہ أعلم

حدیث حاشیہ:
(1)
اس حدیث میں حضرت سعد بن ابی وقاص رضی اللہ عنہ کی لمبی عمر کی طرف اشارہ ہے، چنانچہ رسول اللہ صلی اللہ علیہ وسلم کی یہ پیش گوئی حرف بحرف پوری ہوئی اور وہ اس کے بعد چالیس برس تک زندہ رہے۔
ان کے ہاتھوں بے شمار فتوحات ہوئیں۔
بہت سے لوگ ان کے ہاتھ پر مشرف باسلام ہوئے جبکہ بے شمار لوگ ان کے ہاتھ سے قتل ہو کر جہنم واصل ہوئے۔
(2)
امام بخاری رحمہ اللہ نے اس حدیث سے عنوان کا دوسرا حصہ ثابت کیا ہے کیونکہ سعد بن ابی وقاص رضی اللہ عنہ اس وقت بیمار تھے تو رسول اللہ صلی اللہ علیہ وسلم نے ان کے لیے دعا فرمائی:
”اے اللہ! تو سعد کو شفا دے اور اس کی ہجرت کو پورا کر دے۔
“ (صحیح البخاري، المرض، حدیث: 5659)

حدیث حاشیہ:
(1)
حضرت سعد بن ابی وقاص رضی اللہ عنہ نے رسول اللہ صلی اللہ علیہ وسلم سے عرض کی کہ میری وارث صرف میری ایک بیٹی ہے۔
رسول اللہ صلی اللہ علیہ وسلم نے اس کا انکار نہیں کیا جس کا مطلب یہ ہے کہ میت کے ترکے سے بیٹی وارث ہوتی ہے۔
امام بخاری رحمہ اللہ کا مقصود یہی ہے کہ بیٹیوں کی وراثت کو ثابت کیا جائے۔
(2)
واضح رہے کہ بیٹیوں کی تین حالتیں ہیں:
٭ جب میت کی اولاد سے صرف ایک بیٹی ہو تو اسے جائیداد سے نصف ملے گا، ارشاد باری تعالیٰ ہے:
”اگر بیٹی اکیلی ہو تو اسے ساری جائیداد کا آدھا ملے گا۔
“ (النساء 4: 11)
٭ جب میت کی ایک سے زیادہ بیٹیاں ہوں تو ساری جائیداد کا دوتہائی لیں گی، ارشاد باری تعالیٰ ہے:
”اگر بیٹیاں (دویا)
دوسے زیادہ ہوں تو ان کے لیے ترکے میں سے دوتہائی حصہ ہوگا۔
“ (النساء 4: 11)
٭جب میت کی اولاد لڑکے اور لڑکیوں پر مشتمل ہوتو بیٹے کو دو حصے اور بیٹی کو ایک حصہ بطور عصبہ ملے گا۔
ارشاد باری تعالیٰ ہے:
”اللہ تعالیٰ تمھیں، تمھاری اولاد کے بارے میں حکم دیتا ہے کہ مذکر کو دو مؤنث کےبرابر حصہ دیا جائے جائے۔
“ (النساء 4: 11) (3)
حضرت سعد بن ابی وقاص رضی اللہ عنہ کے عصبات تو موجود تھے، البتہ اس وقت اولاد میں صرف ایک لڑکی تھی، ان کی نفی کو اولاد پر محمول کیا جائے گا۔
(فتح الباري: 20/12)