قیس سے مروی ہے کہ سیدنا عمرو بن عاص رضی اللہ عنہ اپنے ساتھیوں کی ایک جماعت کے ساتھ سفر کر رہے تھے ان کا گزر ایک مردہ خچر پر سے ہوا جو پھول گیا تھا۔ انہوں نے کہا: اللہ کی قسم! تم میں سے کوئی آدمی اس کو کھا کر اپنا پیٹ بھرے یہ اس سے بہتر ہے کہ وہ مسلمان بھائی کا گوشت کھائے۔ [صحيح الادب المفرد/حدیث: 569]

محمد بن زیاد بیان کرتے ہیں کہ میں نے سلف (صحابہ) کا زمانہ پایا ہے۔ یہ لوگ ایک ہی مکان میں اپنے اہل و عیال کے ساتھ زندگی بسر کرتے تھے۔ اکثر ایسا ہوتا تھا کہ کسی کے پاس مہمان آتا اور دوسرے کی دیگچی آگ پر ہوتی۔ صاحب مہمان وہ دیگچی اپنے مہمان کے لیے لے جاتا۔ جس کی دیگچی ہوتی وہ اپنی دیگچی نہ پاتا تو پوچھتا دیگچی کون لے گیا، مہمان جس کے پاس ہوتا وہ کہتا ہم نے مہمان کے لیے لے لی ہے۔ دیگچی کا مالک کہتا: اللہ تجھے اس میں برکت دے، یا اسی قسم کا کوئی جملہ کہہ دیتا۔ بقیہ نے کہا: محمد کہتے تھے: روٹی پکانے میں بھی یہی ہوتا تھا۔ اور ان دونوں گھرانوں کے مابین لکڑی کی دیواریں ہی ہوتی تھیں۔ بقیہ کہتے ہیں: میں نے بھی یہ پایا یعنی محمد بن زیاد اور ان کے دوستوں کا یہی حال پایا۔ [صحيح الادب المفرد/حدیث: 571]

سیدنا ابوہریرہ رضی اللہ عنہ بیان کرتے ہیں کہ نبی صلی اللہ علیہ وسلم کی خدمت میں ایک شخص آیا۔ آپ صلی اللہ علیہ وسلم نے اپنی ازواج مطہرات سے معلوم کرایا۔ سب نے جواب دیا کہ پانی کے سوا اپنے پاس کچھ نہیں، تو رسول اللہ صلی اللہ علیہ وسلم نے فرمایا: ”اس مہمان کو کون لے کر جائے گا، یا کون اس کی ضیا فت کر ے گا۔“ انصار میں سے ایک شخص نے کہا: میں، وہ اسے اپنی بیوی کے پاس لے گیا۔ اس سے کہا کہ رسول اللہ صلی اللہ علیہ وسلم کے مہمان کی تکریم کرو۔ اس نے کہا کہ ہمارے پاس تو بچوں کے کھانے کے سوا کچھ نہیں، کہا کہ کھانا تیار کرو، اور چراغ کی لو ٹھیک کر دو۔ بچوں کو سلا دو جب وہ رات کا کھانا مانگیں۔ بیوی نے کھانا تیار کیا، چراغ کی لو کو ٹھیک کر دیا، بچوں کو سلا دیا۔ پھر وہ اٹھیں اور ایسے کے گویا چراغ کو درست کر رہی ہیں تو اس کو بجھا دیا اور مہمان کو ایسے محسوس کرایا کہ یہ دونوں (میاں بیوی) بھی کھانا کھا رہے ہیں۔ حالانکہ یہ لوگ رات کو بھوکے سوئے۔ جب صبح ہوئی، وہ رسول اللہ صلی اللہ علیہ وسلم کی خدمت میں آئے تو رسول اللہ صلی اللہ علیہ وسلم نے (انہیں دیکھتے ہی) فرمایا: ”اللہ تمہاری اس کار گزاری پر مسکرایا ہے یا خوش ہوا ہے۔“ اسی پر یہ آیت اللہ نے نازل فرمائی: «ويؤثرون على أنفسهم ولو كان بهم خصاصة ومن يوق شح نفسه فأولئك هم المفلحون» [صحيح الادب المفرد/حدیث: 572]

ابوشریح عدوی سے مروی ہے انہوں نے کہا کہ میرے دونوں کانوں نے سنا اور میری آنکھوں نے دیکھاجب نبی صلی اللہ علیہ وسلم فرما رہے تھے کہ جو اللہ پر اور قیامت کے دن پر ایمان رکھتا ہو اسے چاہیے کہ اپنے ہمسایہ کی تکریم کرے اور جو اللہ پر اور قیامت کے دن پر ایمان رکھتا ہو اسے چاہیے کہ اپنے مہمان کو عطیہ دے کر اس کی عزت کرے۔ (کسی نے)کہا: اے اللہ کے رسول! اس کے عطیہ سے کیا مراد ہے؟ فرمایا: ”ایک دن رات، مستحب مہمان نوازی تین دن تک ہے، اور جو اس کے بعد ہو گی وہ مہمان پر صدقہ ہو گی اور اس کے لیے جائز نہیں ہے کہ وہ اس کے پاس ہی رک جائے یہاں تک کہ اسے تنگی میں ڈال دے جو اللہ پر اور قیامت پر ایمان رکھتا ہو اس کو چاہیے کہ اچھی بات بولے ورنہ خاموش رہے۔“ [صحيح الادب المفرد/حدیث: 573]

سیدنا ابوہریرہ رضی اللہ عنہ سے مروی ہے، انہوں نے کہا کہ رسول اللہ صلی اللہ علیہ وسلم نے فر مایا: ”مہمان نوازی تین دن تک ہے اور جو اس کے بعد ہو گی وہ صدقہ ہو گا۔“ [صحيح الادب المفرد/حدیث: 574]

ابوکریمہ شامی بیان کرتے ہیں کہ نبی صلی اللہ علیہ وسلم نے فرمایا: ”مہمان کی ایک رات مہمان نوازی کرنا یہ ہر مسلمان پر واجب ہے۔ جو کسی کے صحن میں صبح کرے یہ اس پر قرض ہو جائے گا، اگر چاہے تو اس سے قرضہ مانگ لے اور چاہے تو چھوڑ دے۔“ [صحيح الادب المفرد/حدیث: 575]

سیدنا عقبہ بن عامر رضی اللہ عنہ روایت کرتے ہیں کہ میں نے رسول اللہ صلی اللہ علیہ وسلم سے عرض کیا، یا رسول اللہ! آپ ہمیں بھیجتے ہیں (جہاد کے لیے) ہم کسی قوم کے پاس پڑاؤ کرتے ہیں اور وہ ہماری ضیافت نہیں کرتے، تو آپ کا اس کے بارے میں کیا خیال ہے؟ آپ صلی اللہ علیہ وسلم نے ہم سے فرمایا: ”اگر تم کسی قوم کے پاس پڑاؤ کرو تو تمہارے لیے حکم جاری کر دیا جائے جو مہمان کے لائق ہے تو قبول کر لو اگر وہ ایسا نہ کریں تو ان سے مہمان کا وہ حق چھین لو جو ان کے لیے جائز تھا۔“ (جب تم کسی قوم کے پاس جاؤ تو میں بتاتا ہوں کہ مہمان کو کیا کرنا چاہیے۔ انہیں متوجہ کرو۔ اگر وہ مہمان نوازی نہ کریں تو اس قدر لے لو جتنا ایک مہمان کو چاہیے۔) [صحيح الادب المفرد/حدیث: 576]

سہل بن سعدسے مروی ہے کہ ابواسید ساعدی رضی اللہ عنہ نے نبی صلی اللہ علیہ وسلم کو اپنی شادی میں دعوت دی اور ان کی بیوی ہی اس دن لوگوں کی خدمت کر رہی تھی اور وہ دلہن تھی، تو اس (بیوی) نے کہا: یا اس (خاوند) نے کہا: کیا آپ جانتے ہیں کہ میں نے رسول اللہ صلی اللہ علیہ وسلم کے لیے کیا کچھ بھگو کر نبیذ بنایا تھا؟ میں نے رات کو ایک پلیٹ میں کھجوریں بھگوئی تھیں۔ [صحيح الادب المفرد/حدیث: 577]