سیدنا عبداللہ بن عمر رضی اللہ عنہما سے روایت ہے کہ سیدنا عمر بن خطاب رضی اللہ عنہ نے قحط سالی کے سال کہا کہ جو شدید قحط کا سال تھا عمر نے دیہاتیوں کی امداد کے لیے کوئی کثر نہ چھوڑی تھی۔ اونٹوں، گیہوں تیل اور تمام قسم کی پیداوار سے مدد کی۔ یہاں تک کہ تمام پیداوار قحط کی وجہ سے خشک ہو گئی اس وقت سیدنا عمر رضی اللہ عنہ دعا کرنے لگے: ”اے اللہ! ان کے رزقوں کو پہاڑوں کی چوٹیوں میں پیدا کر دے (یعنی برف اور بادل)۔“ اللہ نے ان کی اور تمام مسلمانوں کی دعا قبول کر لی جب پانی برسا تو سیدنا عمر رضی اللہ عنہ نے کہا: الحمدللہ! اللہ کی قسم اگر وہ اس آفت کو دور نہ کرتا تو میں ہر کھاتے پیتے مسلمان گھر میں گھر والوں کی تعداد کے برابر محتاجوں کو بٹھا دیتا جتنی غذا کی مقدار پر ایک شخص آرام سے رہتا ہے اتنی مقدار میں دو آدمی ہلاکت سے محفوظ رہ سکتے ہیں۔ [صحيح الادب المفرد/حدیث: 438]

سیدنا سلمہ بن اکوع رضی اللہ عنہ سے مروی ہے انہوں نے کہا کہ نبی صلی اللہ علیہ وسلم نے فرمایا: ”یہ جو تمہارے قربانی کے جانور ہیں تم میں سے کوئی تیسرے دن اس حال میں صبح نہ کرے کہ اس کے پاس اس کے گوشت میں سے کچھ ہو۔“ جب اگلا سال آیا انہوں نے کہا: اے اللہ کے رسول! ہم ویسا ہی کریں جیسا ہم نے پچھلے سال کیا تھا۔آپ صلی اللہ علیہ وسلم نے فرمایا: ”کھاؤ اور ذخیرہ کر لو پچھلے سال لوگ فاقہ میں تھے تو میں چاہتا تھا کہ تم مدد کرو۔“ [صحيح الادب المفرد/حدیث: 439]

عروہ سے مروی ہے انہوں نے کہا کہ میں سیدنا معاویہ رضی اللہ عنہ کے پاس بیٹھا ہوا تھا کوئی بات ان کے دل میں آئی تو وہ چونکے اور کہا: دانائی تجربہ سے آتی ہے، انہوں نے یہ تین بار فرمایا۔ [صحيح الادب المفرد/حدیث: 440]

سیدنا عبدالرحمن بن عوف رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”میں اپنے چچاؤں کے ساتھ حلف المطیبین (زمانہ جاہلیت کا ایک معاہدہ امن) میں شریک تھا میں اس عہد کو سرخ اونٹوں کے مقابلہ میں بھی توڑنا پسند نہیں کرتا۔“ (مطیبین یعنی خوشبو لگائے ہوئے، بنو ہاشم، بنو زہرہ، بنو تیم عبد اللہ بن جدعان کے گھر میں جمع ہوئے اور انہوں نے ایک پیالہ میں خوشبو ڈال کر اس میں ہاتھ ڈالے اور یہ معاہدہ کیا کہ ہم ایک دوسرے کی مدد کریں گے اور ہم فقیروں اور مسکینوں کا حق دلوائیں گے ہم یہاں کسی کو مظلوم یا ظالم نہ بننے دیں گے۔) [صحيح الادب المفرد/حدیث: 441]

سیدنا انس رضی اللہ عنہ کہتے ہیں کہ نبی صلی اللہ علیہ وسلم نے سیدنا ابن مسعود اور سیدنا زبیر رضی اللہ عنہما کے درمیان بھائی چارہ قائم کیا۔ [صحيح الادب المفرد/حدیث: 442]

سیدنا انس بن مالک رضی اللہ عنہ کہتے ہیں کہ رسول اللہ صلی اللہ علیہ وسلم نے میرے گھر میں جو مدینہ میں ہے قریش اور انصار کے درمیان بھائی چارہ قائم کیا تھا۔ [صحيح الادب المفرد/حدیث: 443]

عمرو بن شعیب اپنے والد سے اور وہ اپنے دادا سے روایت کرتے ہیں کہ نبی صلی اللہ علیہ وسلم نے فتح کے سال کعبہ کی سیڑھیوں پر بیٹھ کر اللہ کی حمد و ثناء بیان کی پھر فرمایا: ”جس کسی کا جاہلیت میں معاہدہ ہو تو اسلام اسے اور زیادہ مضبوط کرتا ہے اور فتح مکہ کے بعد اب ہجرت نہیں رہی۔“ [صحيح الادب المفرد/حدیث: 444]

سیدنا انس رضی اللہ عنہ بیان کرتے ہیں کہ جب ہم نبی صلی اللہ علیہ وسلم کے ساتھ تھے تو ہمیں بارش نے آ لیا تو نبی صلی اللہ علیہ وسلم نے اپنے اوپر سے کپڑا ہٹا دیا یہاں تک کہ آپ صلی اللہ علیہ وسلم پر بارش برسی۔ ہم نے عرض کیا کہ آپ نے ایسا کیوں کیا؟ آپ صلی اللہ علیہ وسلم نے فرمایا: ”کیونکہ یہ اپنے رب کے پاس سے نئی نئی آئی ہے۔“ [صحيح الادب المفرد/حدیث: 445]

حمید بن مالک بن خثیم بیان کرتے ہیں کہ میں سیدنا ابوہریرہ رضی اللہ عنہ کے ساتھ عقیق میں ان کی زمین پر بیٹھا تھا (عقیق وادی کے اختتام پر مدینہ یونیورسٹی کا گیٹ ہے) کہ مدینہ والے کچھ لوگ آپ کے پاس جانوروں پر سوا ر ہو کر آئے پھر وہ اترے، حمید بیان کرتے ہیں کہ سیدنا ابوہریرہ رضی اللہ عنہ نے کہا کہ میری والدہ کے پاس جاؤ اور ان سے کہو، آپ کا بیٹا آپ کو سلام کہتا ہے اور کہتا ہے کہ آج ہمیں کچھ کھانا کھلا دیں، اس پر ان کی والدہ نے جَو کی تین روٹیاں اور کچھ زیتون کا تیل اور نمک ایک پلیٹ میں رکھا میں نے اسے سر پر رکھ لیا، اور اٹھا کر ان لوگوں کے پاس لے آیا، جب میں نے ان لوگوں کے سامنے کھانا رکھا تو سیدنا ابوہریرہ رضی اللہ عنہ نے اللہ اکبر کہا، اور کہا: اللہ کا شکر ہے جس نے ہمارا پیٹ روٹیوں سے بھرا۔ جبکہ ہمارا کھانا دو سیاہ چیزوں یعنی کھجور اور پانی کے سوا کچھ نہ تھا۔ لوگوں نے کھانے میں سے کچھ بھی نہ کھایا۔ جب وہ چلے گئے کہا: اے میرے بھتیجے اپنی بکریوں کا اچھی طرح دھیان رکھنا ان پر سے گرد جھاڑ دیا کرنا ان کے باڑے کو صاف کر دیا کرنا، اس کے ایک کونے میں نماز پڑھنا۔ کیونکہ یہ (بکریاں) جنت کے جانوروں میں سے ہیں۔ قسم ہے اس ذات کی جس کے ہاتھ میں میری جان ہے، قریب ہے کہ لوگوں پر ایک زمانہ ایسا آئے گا کہ بکریوں کا ایک چھوٹا سا ریوڑ اس کے مالک کو مروان کے محل سے بھی زیادہ محبوب ہو گا (مروان مدینہ کا ایک گورنر تھا)۔ [صحيح الادب المفرد/حدیث: 446]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کفر کا مرکز مشرق کی جانب ہے فخر اور تکبر گھوڑوں اور اونٹوں کے مالکوں میں ہے، اور سکینت (وقار) بکریوں کے مالکوں میں ہے۔“ [صحيح الادب المفرد/حدیث: 447]