اسود سے روایت ہے کہ انہوں نے کہا کہ میں نے سیدہ عائشہ رضی اللہ عنہا سے سوال کیا کہ نبی صلی اللہ علیہ وسلم اپنے گھر میں کیا کرتے تھے؟ انہوں نے کہا: آپ صلی اللہ علیہ وسلم اپنے گھر والوں کے کاموں میں مشغول ہوا کرتے تھے جب نماز کا وقت آ جاتا تو باہر چلے جاتے تھے۔ [صحيح الادب المفرد/حدیث: 418]

عروہ سے مروی ہے کہ میں نے سیدہ عائشہ رضی اللہ عنہاسے سوال کیا کہ نبی صلی اللہ علیہ وسلم اپنے گھر میں کیا کام کرتے تھے؟ انہوں نے کہا: اپنا جوتا گانٹھتے تھے اور وہی کام کیا کرتے تھے جو ایک آدمی اپنے گھر میں کرتا ہے۔ (اور ایک روایت میں ہے انہوں نے کہا: تم میں سے کوئی اپنے گھر میں کیا کرتا ہے؟ جوتا سیتا ہے، کپڑے کو پیوند لگاتا ہے، اور اس کی سلائی کرتا ہے۔) [صحيح الادب المفرد/حدیث: 419]

عمرہ سے روایت ہے کہ سیدہ عائشہ رضی اللہ عنہا سے پوچھا گیا کہ رسول اللہ صلی اللہ علیہ وسلم اپنے گھر میں کیا کام کرتے تھے؟ کہا: آپ ان انسانوں میں سے ہی ایک انسان تھے جو اپنے کپڑے جھاڑتا اور صاف کرتا ہے اور اپنی بکری کا دودھ دوہتا ہے۔ [صحيح الادب المفرد/حدیث: 420]

حبیب بن عبید سے روایت ہے وہ سیدنا مقدام بن معدی کرب رضی اللہ عنہ سے روایت کرتے ہیں اور انہوں نے ان کا زمانہ بھی پایا ہے انہوں نے کہا: نبی صلی اللہ علیہ وسلم نے فرمایا: ”جب تم میں سے کوئی اپنے بھائی سے محبت کرے تو اسے بتا دے کہ وہ اس سے محبت کرتا ہے۔“ [صحيح الادب المفرد/حدیث: 421]

مجاہد سے روایت ہے کہ انہوں نے کہا کہ مجھے نبی صلی اللہ علیہ وسلم کے اصحاب میں سے ایک آدمی ملا اس نے پیچھے سے میرے کاندھوں کو تھام لیا اور کہا: سنو میں تم سے محبت کرتا ہوں، مجاہد نے کہا: اللہ بھی تم سے محبت کرے، جس کی رضا کے لیے تم نے مجھ سے محبت کی۔ اس پر انہوں نے کہا: اگر رسول اللہ صلی اللہ علیہ وسلم یہ نہ فرماتے کہ جو شخص کسی دوسرے آدمی سے محبت کرے تو وہ اسے بتا دے کہ وہ اس سے محبت کرتا ہے تو میں یہ بات تمہیں کبھی نہ کہتا، اس کے بعد وہ میرے سامنے ایک نکاح کی پیش کش کرنے لگے اور کہا: سنو ہمارے یہاں ایک لڑکی ہے لیکن وہ نابینا ہے۔ [صحيح الادب المفرد/حدیث: 422]

سیدنا انس رضی اللہ عنہ سے مروی ہے کہ انہوں نے کہا کہ نبی صلی اللہ علیہ وسلم نے فرمایا: ”جب دو آدمی آپس میں ایک دوسرے سے (اللہ کی رضا کے لیے) محبت کرتے ہیں تو ان میں افضل وہ ہوتا ہے جو اپنے ساتھی سے زیادہ محبت رکھتا ہو۔“ [صحيح الادب المفرد/حدیث: 423]

سیدنا معاذ بن جبل رضی اللہ عنہ سے مروی ہے انہوں نے کہا کہ جب تم بھائی سے محبت کرو تو اس سے لڑائی نہ کرو، اور نہ اس کو اپنا شر پہنچاؤ، اور اس کے متعلق استفسار بھی نہ کرو ممکن ہے کہ اس کے کسی دشمن سے تمہاری ملاقات ہو جائے اور وہ دشمن اس کے بارے میں ایسی باتیں کرے جو اس میں نہیں پائی جاتیں تو وہ تمہارے اور اس کے درمیان جدائی ڈال دے۔ [صحيح الادب المفرد/حدیث: 424]

سیدنا علی رضی اللہ عنہ سے مروی ہے انہوں نے صفین میں یہ بات سنی ہے، وہ کہتے تھے کہ عقل دل میں ہوتی ہے اور رحمت جگر میں ہوتی ہے، نرمی (ترس کھانا) تلی میں ہوتی ہے اور سانس پھیپھڑوں میں ہوتا ہے۔ [صحيح الادب المفرد/حدیث: 425]

سیدنا عبداللہ بن عمرو رضی اللہ عنہ کہتے ہیں کہ ہم رسول اللہ صلی اللہ علیہ وسلم کے پاس بیٹھے ہوئے تھے کہ بادیہ نشینوں میں سے ایک شخص آیا وہ سبز شال کا جبہ پہنے ہوئے تھا۔ یہاں تک کہ وہ نبی صلی اللہ علیہ وسلم کے سر پر کھڑا ہو گیا، اور کہنے لگا: تمہارے ان صاحب نے ہر شہسوار کا مرتبہ گرا دیا۔ یا کہا کہ تمہارے یہ صاحب چاہتے ہیں کہ ہر سوار کا مرتبہ گرا دیں اور ہر چرواہے کا مرتبہ بلند کر دیں اس پر نبی صلی اللہ علیہ وسلم نے اس کے جبہ کو مجتمع کر کے پکڑ لیا اور فرمایا: ”کیا میں تم پر یہ بیوقوفوں کا لباس نہیں دیکھ رہا ہوں“، پھر فرمایا: ”جب اللہ کے نبی نوح علیہ السلام کی وفات کا وقت آیا تو انہوں نے اپنے بیٹے سے کہا: میں تم سے ایک وصیت بیان کر رہا ہوں میں تمہیں دو باتوں کا حکم دیتا ہوں اور دو باتوں سے منع کرتا ہوں میں تمہیں «لا اله الا الله» کا حکم دیتا ہوں، اگر ساتوں آسمان اور ساتوں زمینیں ترازو کے ایک پلڑے میں رکھ دی جائیں اور دوسرے پلڑے میں «لا اله الا الله» رکھ دیا جائے تو اس کا پلہ بھاری ہو گا، اور اگر ساتوں آسمان اور ساتوں زمینیں انگوٹھی بن جائیں تو «لا اله الا الله وسبحان الله وبحمده» اس کو توڑ دیں گی (ایک روایت میں ہے اس کا نگینہ ہوں گی)، یہی ہر چیز کی نماز ہے اور اسی سے ہر چیز کو رزق دیا جاتا ہے اور میں تمہیں شرک اور تکبر سے منع کرتا ہوں“، اس پر میں نے عرض کیا یا عرض کیا گیا: یا رسول اللہ! یہ شرک تو ہم نے پہچان لیا لیکن تکبر کیا ہے؟ کیا تکبر یہ ہے کہ ہم میں سے کسی کے پاس حلہ ہو وہ اسے پہن لے؟ فرمایا: ”نہیں“، عرض کیا گیا کہ کیا یہ ہے کہ ہم میں سے کسی کے پاس بہت ہی خوبصورت جوتے ہوں، اور اس کے بہت ہی خوبصورت تسمے ہوں؟ فرمایا: ”نہیں“، عرض کیا گیا کہ کیا کیا یہ ہے کہ کسی کے پاس بہت اچھا جانور ہو جس پر وہ سواری کرے؟ فرمایا: ”نہیں“، عرض کیا گیا کہ کسی کے پاس احباب ہوں جو اس کے پاس ادب سے بیٹھتے ہوں؟ آپ صلی اللہ علیہ وسلم نے فرمایا: ”یہ بھی نہیں“، عرض کیا: یا رسول اللہ! تو پھر تکبر کیا ہے؟ آپ صلی اللہ علیہ وسلم نے فرمایا: ”حق کو ٹھکرا دینا اور لوگوں کو حقیر سمجھنا۔“ [صحيح الادب المفرد/حدیث: 426]

سیدنا عبداللہ بن عمر رضی اللہ عنہما سے مروی ہے وہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جس نے اپنی ذات کو بڑا سمجھا یا اپنی چال میں تکبر اختیار کی وہ اللہ عزوجل سے اس حال میں ملے گا کہ وہ اس پر غضبناک ہو گا۔“ [صحيح الادب المفرد/حدیث: 427]