یہ روایت اعمش سے ان کی سند کے ساتھ ایک دوسرے طریق سے بھی اسی طرح مروی ہے اور اس میں ہے: ”لوگو! میں (اللہ تعالیٰ ٰ کی طرف سے) بھیجی ہوئی رحمت ہوں۔“ [مسند الشهاب/حدیث: 1161]

سیدنا على بن ابی طالب رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”بے شک (مسئلہ) پوچھ لینا لاعلمی کا علاج ہے۔“ [مسند الشهاب/حدیث: 1162]

سیدنا جابر رضی اللہ عنہ سے مروی ہے اور انہوں نے اس حدیث کو طوالت کے ساتھ بیان کیا اور اس میں یہ بھی تھا کہ یہ بات رسول الله صلی اللہ علیہ وسلم کو پہنچی تو آپ صلی اللہ علیہ وسلم نے فرمایا: ”انہوں نے اسے مار ڈالا، اللہ انہیں ہلاک کرے، جب انہیں مسئلہ معلوم نہیں تھا تو انہوں نے کیوں نہ پوچھا:؟ بے شک (مسئلہ) پوچھ لینا لا علمی کا علاج ہے۔“ [مسند الشهاب/حدیث: 1163]

سیدنا انس بن مالک رضی اللہ عنہ کہتے ہیں کہ ایک مرتبہ رسول الله صلی اللہ علیہ وسلم مسجد میں تشریف فرما تھے اور آپ کے صحابہ آپ کو گھیرے ہوئے تھے کہ اچانک سیدنا علی بن ابی طالب رضی اللہ عنہ آئے اور آ کر کھڑے ہو گئے، سلام کیا پھر بیٹھنے کے لیے مناسب جگہ دیکھنے لگے تو رسول اللہ صلی اللہ علیہ وسلم اپنے صحابہ کے چہروں کو دیکھنے لگے کہ کون ان کے لیے وسعت پیدا کرتا ہے۔ سیدنا ابوبکر رضی اللہ عنہ رسول الله صلی اللہ علیہ وسلم کے دائیں جانب بیٹھے تھے وہ اپنی جگہ سے ہٹے اور کہا: ابوالحسن! آپ یہاں بیٹھ جائیں، چنانچہ وہ رسول اللہ صلی اللہ علیہ وسلم اور سیدنا ابوبکر رضی اللہ عنہ کے درمیان بیٹھ گئے۔ سیدنا انس رضی اللہ عنہ کہتے ہیں کہ میں نے رسول اللہ صلی اللہ علیہ وسلم کے چہرے پر خوشی دیکھی پھر آپ نے سیدنا ابوبکر رضی اللہ عنہ کی طرف متوجہ ہو کر فرمایا: ”سیدنا ابوبکر رضی اللہ عنہ! اہل فضل ہی فضیلت والوں کا مقام پہنچانتے ہیں۔“ [مسند الشهاب/حدیث: 1164]

سیدنا ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”مجھے تو اعلیٰ اخلاق کی تعمیل کے لیے بھیجا گیا ہے۔“ [مسند الشهاب/حدیث: 1165]

سیدنا ثوبان رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”مجھے تو اپنی امت پر گمراہ آئمہ کا خطرہ ہے۔“ [مسند الشهاب/حدیث: 1166]

سیدنا سہل بن سعد ساعدی رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”اعمال کا دارو مدار تو خاتمہ پر ہے۔“ [مسند الشهاب/حدیث: 1167]

یہ حدیث سیدنا سہل رضی اللہ عنہ سے ایک دوسری سند کے ساتھ بھی اسی طرح مروی ہے۔ [مسند الشهاب/حدیث: 1168]

سیدنا ابن عمر رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”قسم یا تو توڑنا پڑتی ہے یا اس پر شرمندہ ہونا پڑتا ہے۔“ [مسند الشهاب/حدیث: 1169]

سیدنا عبد الله بن عمر رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”قسم یا تو توڑنا پڑتی ہے یا اس پر شرمندہ ہونا پڑتا ہے۔“
طبرانی نے کہا: اسے بشار سے صرف ابومعاویہ نے روایت کیا ہے اور ہمیں اس کے علاوہ بشار کی کوئی مسند حدیث یاد نہیں ہے۔“ [مسند الشهاب/حدیث: 1170]