حضرت ابو ہریرہ رضی اللہ عنہ نے بیان کیا کہ ہم رسول اللہ صلی اللہ علیہ وسلم کے پاس بیٹھے ہوئے تھے کہ ”سورۃ الجمعہ“ (کی یہ آیتیں) نازل ہوئیں۔ وآخرین منھم لما یلحقوا بھم الایۃ اور دوسروں کے لیے بھی (آنحضرت صلی اللہ علیہ وسلم ہادی اور معلم ہیں)جو ابھی ان میں شامل نہیں ہوئے ہیں۔ حضرت ابوہریرہ رضی اللہ عنہ کہتے ہیں میں نے عرض کی یارسول اللہ! یہ دوسرے کون لوگ ہیں؟ آنحضرت صلی اللہ علیہ وسلم نے کوئی جواب نہیں دیا۔ آخر یہی سوال تین مرتبہ کیا۔ مجلس میں سلمان فارسی رضی اللہ عنہ بھی موجود تھے آنحضرت صلی اللہ علیہ وسلم نے ان پر ہاتھ رکھ کر فرمایا اگر ایمان ثریا پر بھی ہوگا تب بھی ان لوگوں (یعنی فارس والوں) میں سے اس تک پہنچ جائیں گے یا یوں فرمایا کہ ایک آدمی ان لوگوں میں سے اس تک پہنچ جائے گا [اللؤلؤ والمرجان/كتاب فضائل الصحابة/حدیث: 1650]