محمد بن واسع کہتے ہیں کہ سیدنا ابودرداء رضی اللہ عنہ نے سیدنا سلمان رضی اللہ عنہ کو لکھا: اما بعد! اے میرے بھائی! اپنی صحت کو بیماری سے پہلے غنیمت سمجھو اور اپنی فراغت کو اس آزمائش کے نازل ہونے سے پہلے غنیمت سمجھو جسے لوگوں میں سے کوئی بھی ٹالنے کی طاقت نہیں رکھتا۔ اے میرے بھائی! اس مومن کی دعا کو غنیمت سمجھو جو کسی آزمائش میں مبتلا ہو۔ اے میرے بھائی! مسجد تمہارا گھر ہونا چاہیے کیونکہ میں نے رسول اللہ صلی اللہ علیہ وسلم کو یہ فرماتے سنا ہے ”مسجد ہر متقی کا گھر ہے۔“ [مسند الشهاب/حدیث: 72]

ابوعثمان کہتے ہیں کہ سیدنا سلمان رضی اللہ عنہ نے سیدنا ابودرداء رضی اللہ عنہ کی طرف لکھا کہ اے میرے بھائی! مسجد کو اپنے اوپر لازم کرلو کیونکہ میں نے نبی صلی اللہ علیہ وسلم کو یہ فرماتے سنا ہے: ”مسجد ہر متقی کا گھر ہے۔“ [مسند الشهاب/حدیث: 73]