سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:”آپس میں بغض نہ رکھو، ایک دوسرے سے حسد نہ رکھو، ایک دوسرے سے بائیکاٹ نہ کرو اور اللہ کے بندو! بھائی بھائی بن جاؤ اور کسی مسلمان کے لیے حلال نہیں ہے کہ وہ اپنے مسلمان بھائی سے تین دن سے زیادہ بائیکاٹ جاری رکھے، نہ پیٹھ پیچھے برا کہو، اور اللہ کے بندو آپس میں بھائی بن کر رہا کرو، کسی مسلمان کے لئے یہ حلال نہیں کہ کسی بھائی سے تین راتوں سے زیادہ قطع تعلق رکھے۔“ [صحيح الادب المفرد/حدیث: 307]

رسول اللہ صلی اللہ علیہ وسلم کے صحابی سیدنا ابوایوب رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”کسی شخص کے لئے یہ حلال نہیں ہے کہ اپنے کسی بھائی سے تین دن سے زیادہ عرصے تک بائیکاٹ جاری رکھے۔ وہ دونوں آپس میں ملیں اور یہ بھی منہ پھیر لے اور وہ بھی منہ پھیر لے اور ان دونوں میں سے بہتر وہ ہے جو پہلے سلام کرے۔“ [صحيح الادب المفرد/حدیث: 308]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”آپس میں بغض نہ رکھا کرو، اور آپس میں حسد نہ کیا کرو اور نہ منافقت کیا کرو، اللہ کے بندوں(آپس میں) بھائی بھائی بن جاؤ۔“ [صحيح الادب المفرد/حدیث: 309]

سیدنا انس رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”دو اشخاص جب آپس میں اللہ عزوجل کے لیے یا فرمایا کہ اسلام کے لیے محبت کرتے ہیں تو ان کے درمیان وہ پہلا گناہ جدائی ڈالتا ہے جس کا ارتکاب ان میں سے کوئی ایک کرتا ہے۔“ [صحيح الادب المفرد/حدیث: 310]

ہشام بن عامر انصاری سے مروی ہے جو انس بن مالک کے چچا زاد بھائی ہیں جن کے والد احد کے دن شہید ہوئے تھے بیان کرتے ہیں کہ انہوں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم نے فرمایا: ”کسی مسلمان کے لئے یہ جائز نہیں ہے کہ کسی مسلمان سے تین دن سے زیادہ قطع تعلقی کرے۔ جب تک یہ دونوں اپنے قطع تعلقی پر قائم ہیں حق سے رو گرداں ہی ہوں گے۔ اور جو پہلے رجوع کرے گا اس کا پہلے رجوع کرنا اس گناہ کا کفارہ بن جائے گا اگر وہ اپنے قطع تعلقی کی حالت میں مر گئے تو وہ دونوں کبھی بھی جنت میں اکٹھے داخل نہیں ہوں گے اور اگر وہ اس کو سلام کرے تو وہ نہ تو اس کے سلام کو اور نہ اس کے سلام کرنے کو قبول کرے تو فرشتہ اس کو جواب دیتا ہے اور دوسرے کو شیطان جواب دیتا ہے۔ ان دونوں میں جس نے پہلے اس صورت حال کو ختم کیا اس کا یہ فعل پچھلی غلطی کا کفارہ ہو جائے گا، اور اگر ان دونوں کی اسی حالت میں موت ہو گئی تو یہ دونوں ہی جنت میں کبھی نہ جا سکیں گے، اور اگر ایک نے سلام کیا اور دوسرے نے اس کا سلام قبول کرنے سے انکار کیا تو فرشتہ اس کے سلام کا جواب دیتا ہے اور دوسرے کو شیطان جواب دیتا ہے۔“ [صحيح الادب المفرد/حدیث: 311]

سیدہ عائشہ رضی اللہ عنہا سے روایت ہے، انہوں نے کہا، رسول اللہ صلی اللہ علیہ وسلم نے فرمایا: ”میں جانتا ہوں تم کب ناراض ہوتی ہو اور کب راضی ہوتی ہو۔“ میں نے عرض کیا آپ کو یہ کیسے معلوم ہو جاتا ہے؟ فرمایا: ”بیشک! جب تم خوش ہوتی ہو تو تم (قسم کھاتے وقت) یہ کہتی ہو، ہاں محمد صلی اللہ علیہ وسلم کے رب کی قسم اور جب تم ناراض ہوتی ہو تو کہتی ہو: ہاں! ابراہیم کے رب کی قسم“، سیدہ عائشہ رضی اللہ عنہا کہتی ہیں کہ میں نے عرض کیا: جی ہاں! ایسا ہی ہے یا رسول اللہ، میں صرف آپ کے نام کا مقاطعہ کرتی ہوں۔ [صحيح الادب المفرد/حدیث: 312]