سیدنا جابر رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”اے بنی سلمہ تمہارا سردار کون ہے؟“ ہم نے عرض کیا: جد بن قیس۔ اگرچہ ہم لوگ اسے بخیل قرار دیتے ہیں۔ فرمایا: ”بخل سے مہلک اور کون سی بیماری ہو سکتی ہے؟ بلکہ تمہارا سردار عمر و بن جمو ح ہے۔“ عمرو جاہلیت میں ان کے بتوں کا انتظام کرتا تھا اور رسول اللہ صلی اللہ علیہ وسلم جب نکاح کرتے تو وہ آپ صلی اللہ علیہ وسلم کی طرف سے ولیمہ کرتا تھا۔ [صحيح الادب المفرد/حدیث: 227]

سیدنا مغیرہ رضی اللہ عنہ کے کاتب وراد بیان کرتے ہیں کہ سیدنا معاویہ رضی اللہ عنہ نے سیدنا مغیرہ بن شعبہ رضی اللہ عنہ کو خط لکھا: مجھے ایسی چیز لکھ کر بھیجیں جو آپ نے رسول اللہ صلی اللہ علیہ وسلم سے سنی ہو۔ تو سیدنا مغیرہ رضی اللہ عنہ نے انہیں لکھ بھیجا۔ (اور ایک روایت میں ہے، وزاد نے کہا: انہوں نے مجھے لکھوایا اور میں نے اپنے ہاتھ سے لکھا۔) بیشک رسول اللہ صلی اللہ علیہ وسلم (اور دوسری روایت میں ہے میں نے آپ صلی اللہ علیہ وسلم سے سنا آپ صلی اللہ علیہ وسلم ) «قيل و قال» (فضول باتوں) سے، مال کو ضائع کرنے سے، زیادہ سوال کرنے سے، (لوگوں کے حقوق) روکنے اور ناجائز مانگنے سے (جس کا حق نہیں بنتا اس کو طلب کرنا یعنی ناجائز مطالبے کرنا)، ماؤں کی نافرمانی سے اور لڑکیوں کو زندہ دفن کرنے سے منع کرتے تھے۔ [صحيح الادب المفرد/حدیث: 228]