فوائد و مسائل:
اصل روایت اس طرح ہے کہ رسول اللہ صلی اللہ علیہ وسلم نے چاندی کی انگوٹھی بنوائی اور پھر اسے اتار دیا۔ گویا بیت الخلا میں جاتے وقت انگوٹھی اتار دینے کی روایت ضعیف ہے۔ تاہم ادب و احترام کا تقاضا ہے کہ ایسی انگوٹھی یا کتاب وغیرہ، جس میں اللہ کا نام ہو، بیت الخلاء میں لے جانا مناسب نہیں ہے۔ مذکورہ بالا سند کے منکر ہونے کی وجہ یہ ہے کہ ہمام نے حدیث کا لفظ روایت کرنے میں ثقات کی مخالفت کی ہے اور اس متن کو ایک دوسری حدیث کے متن کے ساتھ خلط ملط کر دیا ہے۔

� لغوی تشریح:
«بَابُ آدَابِ قَضَاءِ الْحَاجَةِ» قضائے حاجت، یہ بول وبراز سے کنایہ ہے۔
«اَلْخَلَآءَ» ”خا“ کے فتحہ اور الف ممدودہ کے ساتھ ہے۔ خالی جگہ اور خالی مکان کو کہتے ہیں۔ پھر یہ قضائے حاجت کی جگہ کے لیے کثرت سے استعمال ہونے لگا۔ اسے بیت الخلاء بھی کہتے ہیں کیونکہ قضائے حاجت کے اوقات کے علاوہ یہ جگہ عموماً خالی رہتی ہے، اور اس لیے بھی اسے خلا کہتے ہیں کہ انسان کے لیے اس میں خلوت اور تنہائی میسر آتی ہے۔
«وَضَعَ خَاتَمَهُ» اپنی انگوٹھی اتار کر رکھ دیتے کیونکہ اس میں «محمد رسول الله» منقش تھا۔ اور اس میں تنبیہ اور خبردار کرنا مقصود ہے کہ گندگی والی جگہوں سے ایسی چیزوں کو دور ہی رکھا جائے جس میں اللہ کا ذکر ہو۔
«وَھُوَ مَعْلُوْلٌ» معلول اس لیے ہے کہ ہمام نے یہ روایت ابن جریج سے بیان کی ہے اور وہ زہری کے واسطے سے روایت کرتا ہے، حالانکہ ابن جریج نے یہ روایت زہری سے نہیں سنی بلکہ اس نے زیاد بن سعد کے واسطے سے زہری سے سنا ہے اور اس کے الفاظ بھی دوسرے ہیں اور وہ یہ ہیں کہ رسول اللہ صلی اللہ علیہ وسلم نے اپنے لیے چاندی کی انگوٹھی بنوائی، پھر اسے اتار دیا۔

فائدہ:
یہ روایت سنداً ضعیف ہے۔ اس کو امام ابوداود نے منکر قرار دیا ہے، وہ فرماتے ہیں کہ اس میں ہمام راوی کو وہم ہوا ہے۔ تاہم ادب واحترام کا تقاضا ہے کہ بیت الخلا وغیرہ ناپاک اور گندی جگہوں میں ایسی کوئی چیز لے کر دیدہ و دانستہ داخل نہیں ہونا چاہیے جس پر اللہ تعالیٰ کے اسمائے حسنیٰ یا آیات قرآن مجید وغیرہ لکھی ہوئی ہوں۔

اردو حاشہ:
 یہ روایت ضعیف بلکہ منکر ہے۔
صحیح روایت اس طرح ہے کہ رسول اللہﷺ نے چاندی کی ایک انگوٹھی بنوائی تھی لیکن پھر آپ نے وہ اتاردی۔ دیکھیے: (سنن ابوداؤد، الطھارۃ، باب الخاتم یکون فیہ ذکر اللہ یدخل بہ الخلاء، حدیث: 19)
بنابریں بیت الخلاء میں داخل ہوتے وقت نبی ﷺ واقعی انگوٹھی اتاردیتے تھےیا نہیں؟ اس کی بابت کوئی صریح صحیح روایت نہیں تاہم ادب واحترام کا تقاضہ ہے کہ ایسی انگوٹھی یا کتاب وغیرہ جس میں اللہ کا نام ہو بیت الخلاء میں لے جانا مناسب نہیں۔

اردو حاشہ:
وضاحت:
1؎:
ایسا اس لیے کرتے تھے کیوں کہ اس پر ”محمد رسول اللہ“ نقش تھا،
معلوم ہواکہ پاخانہ پیشاب جاتے وقت اس بات کا خیال رہے کہ اس کے ساتھ ایسی کوئی چیز نہیں ہونی چاہیے جس کی بے حرمتی ہو،
مثلا اللہ اور اس کے رسول کے نام یا آیات قرآنیہ وغیرہ۔

نوٹ:
(بطریق (الزهري عن أنس) اصل روایت یہ نہیں بلکہ یہ ہے کہ نبی اکرم ﷺ نے چاندی کی انگوٹھی بنوائی،
پھراسے پھینک دیا،
اس روایت میں یا تو بقول امام ابوداود ہمام سے وہم ہوا ہے،
یا بقول البانی اس کے ضعف کا سبب ابن جریج مدلس کا عنعنہ ہے،
انہوں نے خود زہری سے نہیں سنا اور بذریعہ عنعنہ روایت کردیا ہے،
تفصیل کے لیے دیکھئے:
ضعیف ابی داود رقم: 4)