لغوی تشریح:
«اَلزَّبِيبِ» خشک انگور (کشمش)۔
«اَلْقِثَّاءُ» ”قاف“ کے نیچے کسرہ، «ثا» «مثلثه» پر تشدید اور آخر میں الف ممدود ہے، کھیرا۔
«اَلْبِطِّيخُ» ”با“ کے نیچے کسرہ اور ”طا“ پر تشدید ہے، تربوز۔
«الْرُمَّانُ» ”را“ پر ضمہ اور ”میم“ پر تشدید ہے۔ انار۔
«الْقَصَبُ» ”قاف“ اور ”ضاد“ دونوں پر فتحہ ہے۔ گنا اور ہر وہ زمینی پیداوار جس کے تنے میں پوریاں اور گرہیں ہوں جیسے بانس اور سرکنڈا وغیرہ۔ یہ حدیث زکاۃ کی فرضیت کو غلے اور پھلوں میں سے انہیں چار اصناف پر منحصر کرتی ہے۔ یہ رائے ایک گروہ کی ہے۔
اور دوسرے لوگوں کی رائے یہ ہے کہ ہر وہ چیز جو ان چار اصناف کے قائم مقام ہو، یعنی جو ذخیرہ ہو سکتی ہو اور محفوظ رہ سکتی ہو اس میں زکاۃ واجب ہے، وہ کہتے ہیں کہ اس حدیث میں جو حصر ہے وہ حصر حقیقی نہیں بلکہ حصر اضافی ہے، یعنی یمن میں دستیاب اس دور کی اجناس کے لحاظ سے آپ نے ان کا تذکرۃ کیا، یا ان سبزیوں کو خارج کرنے کے لیے یہ حکم صادر فرمایا جن میں زکاۃ فرض ہی نہیں، چنانچہ چاول مکئی وغیرہ جیسی اجناس جنہیں اکثر علاقوں میں بالعموم لوگ ذخیرہ کر لیتے ہیں، ان میں زکاۃ واجب ہے۔ محققین کے نزدیک یہ رائے زیادہ قابل اعتبار ہے۔

فائدہ:
حضرت ابوموسیٰ اور حضرت معاذ بن جبل رضی اللہ عنہ کی روایت کو ہمارے فاضل محقق نے سنداً ضعیف قرار دیا ہے۔ جبکہ شیخ البانی رحمہ اللہ نے اسے صحیح قرار دیا ہے۔ دیکھیے: [ارواء الغليل: 278، 3]
علاوہ ازیں بعض علماء کے نزدیک یہ مرسل ہے، اس لیے اکثر ائمہ اس بات کے قائل ہیں کہ مذکورہ چار چیزوں کے علاوہ اور بھی جو چیزیں زمین سے پیدا ہوتی ہیں ان سب میں عشر یا نصف عشر ہے، جیسے باجرہ، مکئی، چنے، چاول، سرسوں، توریا اور گنا وغیرہ۔ ان کی دلیل قرآنی آیت:
«وَمِمَّا اَخَرَجْنَا لَكُم مِّنَ اَلَارْضِ» [البقرة: 2: 267]
اور حدیث «فِيمَا سَقَتِ السَّمَاءُ» کا عموم ہے۔ قرآن اور حدیث دونوں کے الفاظ عام ہیں کہ زمین کی ہر پیداوار میں زکاۃ ہے۔ اس عموم کا تقاضا ہے کہ سب میں سے عشر یا نصف عشر نکالا جائے۔ اس عموم سے وہی چیز خارج ہو گی جس کا استثناء حدیث سے ثابت ہو گا، جیسے سبزیوں کا استثناء حدیث سے ثابت ہے، اس لیے ان میں عشر یا نصف عشر نہیں ہو گا۔ تاہم سبزیوں کے استثناء سے بالواسطہ یہ بات ثابت ہوتی ہے کہ زمین کی پیداوار جو بھی زیادہ عرصے تک محفوظ رکھی جا سکتی ہے، اس میں عشر یا نصف عشر ادا کیا جائے گا۔ اسی بنا پر مذکور عموم کے قائل ائمہ، زمین کی پیداوار کے لیے دو شرطیں ضروری قرار دیتے ہیں۔ ایک یہ کہ وہ ماپی تولی جانے والی ہو۔ دوسری یہ کہ وہ بطور خوراک ذخیرہ کی جاتی ہو۔ اس موقف کی تائید صحیح مسلم کی حدیث سے ہوتی ہے جس میں آپ صلی اللہ علیہ وسلم نے فرمایا: ”کسی دانے (غلے) اور کھجور میں اس وقت تک زکاۃ نہیں جب تک وہ پانچ وسق تک نہ پہنچ جائے۔“ [صحيح مسلم، الزكاة، باب ليس فيما دون خمسة اوسق صدقة، حديث: 979]
اس حدیث کیں حب (دانے اور غلے) کا لفظ عام ہے جو ہر قسم کے غلے کو شامل ہے اس لیے اس میں تمام اجناس آ جاتی ہیں جو کھائی اور ذخیرہ کی جاتی ہیں۔ اسی طرح جو پھل وغیرہ ہیں ان میں سے آئندہ فصل تک رہنے والے پھل بھی اسی اصول اور قاعدے کے تحت اس پیداوار ہی سے سمجھے جائیں گے جن میں سے زکاۃ نکالی جاتی ہے کیونکہ ان میں بھی خوراک ذخیرہ کرنے کی علت موجود ہے، تاہم جو پھل زیادہ دیر تک نہیں رہ سکتے، وہ سبزی کے حکم میں ہوں گے، یعنی ان میں زکاۃ نہیں ہو گی۔ یہی موقف راجح اور درست ہے۔ شیخ صفی الرحمٰن مبارک پوری رحمہ اللہ نے بھی اسی طرف اشارہ کیا ہے، نیز محققین علماء کے نزدیک بھی یہ رائے زیادہ قابل اعتبار ہے۔ «والله اعلم» مزید تفصیل کے لیے دیکھیے: [فقه السنة الزكاة]
حضرت معاذ رضی اللہ عنہ کی روایت جو سنن دارقطنی کے حوالے سے ہے ضعیف ہے۔ اس میں ضعف کی وجہ ایک ضعیف راوی ہے اور اس کی سند بھی منقطع ہے جیسا کہ مصنف نے التلخیص میں وضاحت کی ہے، نیز ہمارے فاضل محقق نے بھی اسے ضعیف قرار دیا ہے، دیکھیے: تحقیق و تخریج حدیث ھذا۔