حدیث حاشیہ:
رسول اللہ صلی اللہ علیہ وسلم کا خاص اوقات میں تین دفعہ سلام کرنے کا معمول تھا مثلاً کسی کے گھر آنے کی اجازت طلب کرتے تو ایسا ہوتا تھا۔
یا ایک مرتبہ اجازت کے لیے، دوسرا جب ان کے پاس جاتے اور تیسرا جب ان سے رخصت ہوتے۔
عام حالات میں تین مرتبہ سلام کرنا آپ کے معمولات سے ثابت نہیں۔
(شرح الکرماني: 86/2)
”آگاہ رہو اور جھوٹ بولنا“ پوری حدیث اس طرح ہے کہ رسول اللہ صلی اللہ علیہ وسلم نے فرمایا:
”میں تمھیں بڑے بڑے گناہوں کی خبرنہ دوں؟“ ہم نے کہا:
کیوں نہیں! آپ نے فرمایا:
”اللہ کے ساتھ شرک کرنا والدین کی نا فرمانی کرنا۔
“ (اس کے بعد)
آپ سنبھل کر بیٹھ گئے جب کہ پہلے آپ نے ٹیک لگائی ہوئی تھی (اور فرمایا:
)
”آگاہ رہو اور جھوٹ بولنا“ اس پر آپ نے اس قدر زور دیا کہ باربار تکرار کرتے رہے حتی کہ ہم نے کہا:
کاش!آپ خاموشی اختیار فرما لیں۔
(صحیح البخاري، الشھادات، حدیث: 2654)
اس مخصوص طرز بیان سے معلوم ہوتا ہے کہ تکرار کی یہ صورت ہر موقع پر نہ ہوتی تھی بلکہ کسی چیز کی اہمیت کے پیش نظر بار بار اعادہ ہوتا تھا غالباً اسی لیے آگے روایت میں(ثلاثاً)
کی قید لگی ہوئی ہے یعنی جب آپ نے حجۃ الوداع کے موقع پر ضروری نصیحتیں فرمائیں تو آخر میں تین مرتبہ فرمایا:
”کیا میں نے فریضہ تبلیغ ادا کردیا۔
؟“

تخريج الحدیث:
[صحيح بخاري 95]

فقہ الحدیث:
➊ تقریر، تبلیغ اور نصیحت وغیرہ کے دوران میں اہم بات دو تین دفعہ دہرانی چاہئیے تاکہ مخاطب اسے سمجھ کر یاد کر لے۔
➋ تین دفعہ سلام کہنے سے مراد کسی گھر یا جگہ میں داخل ہونے کے لئے سلام کہنا ہے۔ جیسا کہ امام بخاری کی کتاب الاستئذان میں تبویب سے ظاہر ہے اور علمائے کرام نے بھی یہی مفہوم بیان کیا ہے۔
➌ منصب کے لحاظ سے کتنا ہی بڑا آدمی کیوں نہ ہو، دوسرے کے گھر میں داخل ہونے سے پہلے اجازت طلب کرنا ضروری ہے۔

اردو حاشہ:
وضاحت:
1؎:
تاکہ بات اچھی طرح سمجھ میں آ جائے۔

حدیث حاشیہ:
1۔
امام بخاری رحمۃ اللہ علیہ نے اس عنوان سے ان لوگوں کی تردید کی ہے جو حدیث کے دہرانے اور دہرا دینے کی طلب کو معیوب خیال کرتے ہیں۔
بات کو دہرانا طلبہ کی طبا ئع کے اختلاف کے پیش نظر ہوتا ہے، بعض طلباء ایک ہی مرتبہ سمجھ لیتے ہیں اور بعض حضرات کو کئی کئی بار دہرانے کی ضرورت ہوتی ہے۔
اس کا مطلب یہ بھی ہوسکتا ہے کہ اگر طالب علم کندذہن ہوتو اس کے لیے زیادہ سے زیادہ تین دفعہ دہرایا جا سکتا ہے اور تین بار دہرانے کے باوجود سمجھنے سے قاصر رہے اس کا کوئی علاج نہیں۔
(فتح الباري: 249/1)
2۔
تین دفعہ سلام کرنے کی ایک توجیہ تو سابق حدیث میں بیان ہو چکی ہے کچھ توجیہات حسب ذیل ہیں:
(1)
۔
یہ سلام، سلام اجازت ہے جو زیادہ سے زیادہ تین مرتبہ کیا جا سکتا ہے۔
ممکن ہے کہ امام بخاری رحمۃ اللہ علیہ کا یہی مقصد ہو، کیونکہ آپ نے کتاب الاستئذان میں اس حدیث کو حضرت ابو موسیٰ اشعری رضی اللہ تعالیٰ عنہ کے واقعے کے ساتھ بیان کیا ہے جو سلام اجازت کے متعلق حضرت عمر رضی اللہ تعالیٰ عنہ کے ساتھ پیش آیا تھا۔
(صحیح البخاري، الإستئذان، حدیث: 6245)
(2)
۔
جب مجمع کثیر ہوتا اور لوگ منتشر ہوتے تو سب کو سلام پہنچانے کے لیے تین مرتبہ سلام کرتے ایک سامنے، دوسرا دائیں جانب اور تیسرا بائیں طرف، کیونکہ آپ کے سلام کے تمام حاضرین مشاق ہوتے تھے۔
(3)
۔
جب آپ بڑے مجمع میں شریک ہوتے تو ایک سلام داخل ہوتے ہی کرتے، دوسرا وسط میں پہنچ کر اور تیسرا سلام مجلس کے آخر میں پہنچ کرکرتے تھے۔

حدیث حاشیہ:
(1)
اس حدیث سے معلوم ہوتا ہے کہ رسول اللہ صلی اللہ علیہ وسلم سلام و کلام میں تکرار فرماتے تھے لیکن اس سے مراد اکثر اوقات ہیں، یعنی افہام و تفہیم کے لیے اکثر ایسا کرتے تھے تاکہ سلام عام ہو اور بات دلوں میں راسخ ہو جائے۔
(عمدة القاري: 361/15) (2)
تین دفعہ سلام کرنے کی حسب ذیل توجیہات ممکن ہیں:
٭ جب مجمع زیادہ ہوتا اور لوگ منتشر ہوتے تو تمام حاضرین کو سلام پہنچانے کے لیے تین مرتبہ سلام کرتے۔
ایک سامنے، دوسرا دائیں جانب اور تیسرا بائیں طرف کیونکہ آپ صلی اللہ علیہ وسلم کے سلام کے تمام حاضرین مشتاق ہوتے تھے۔
٭ اگر کہیں جم غفیر ہوتا تو ایک سلام داخل ہوتے ہی کرتے، دوسرا درمیان میں پہنچ کر اور تیسرا سلام آخر میں پہنچ کر فرماتے۔
٭ یہ سلام، سلام اجازت ہے جو زیادہ سے زیادہ تین مرتبہ کہا جا سکتا ہے۔
امام بخاری رحمہ اللہ کا بھی یہی مقصد معلوم ہوتا ہے کیونکہ انہوں نے اس کے بعد حضرت ابو موسیٰ اشعری رضی اللہ عنہ کا واقعہ بیان کیا ہے جو سلام اجازت سے متعلق ہے۔
(3)
یہ بھی ممکن ہے کہ پہلا سلام اجازت کے لیے، دوسرا جب ان کے پاس جاتے اور تیسرا جب ان سے رخصت ہوتے کیونکہ عام حالات میں تین مرتبہ سلام کرنا آپ کے معمولات سے ثابت نہیں۔
پہلا سلام اجازت، دوسرا سلام ملاقات اور تیسرا سلام وداع۔
(شرح الکرماني: 86/2)
واللہ أعلم