حدیث حاشیہ:
حضرت امام بخاری ؒ نے اس حدیث سے یہ ثابت فرمایا ہے کہ بچے اگرچہ نابالغ ہوں مگر8-10 سال کی عمر میں جب وہ نماز پڑھنے لگیں تو ان کو وضو کرنا ہوگا اور وہ جماعت و عیدین وجنائز میں بھی شرکت کر سکتے ہیں جیسا کہ یہاں اس روایت میں حضرت ابن عباس ؓ کا ذکر ہے جوابھی نابالغ تھے مگر یہاں ان کا صف میں شامل ہونا ثابت ہے پس اگرچہ بچے بالغ ہونے پر ہی مکلف ہوں گے مگر عادت ڈالنے کے لیے نابالغی کے زمانہ ہی سے ان کو ان باتوں پر عمل کرانا چاہیے حضرت مولانا وحید الزماں صاحب مرحوم فرماتے ہیں کہ حضرت امام بخاری ؒ نے صاف یوں نہیں کہا کہ لڑکوں پر وضو واجب ہے یا نہیں کیونکہ صورت ثانی میں لڑکوں کی نماز بے وضو درست ہوتی اور صورت اولی میں لڑکوں کو وضو اور نماز کے ترک پر عذاب لازم آتا صرف اس قدر بیان کر دیا جتنا حدیثوں سے معلوم ہوتا ہے کہ لڑکے آنحضرت ﷺ کے زمانے میں نماز وغیرہ میں شریک ہوتے اور یہ ان کی کمال احتیاط ہے۔
اہل حدیث کی شان یہی ہونی چاہیے کہ آیتِ کریمہ ﴿لَاتُقَدِّمُوابَینَ یَدَیِ اللّٰہِ وَرَسُولِه﴾ (الحجرات: 1)
(للہ اور اس کے رسول سے آگے مت بڑھو)
کے تحت صرف اسی پر اکتفا کریں جو قرآن وحدیث میں وارد ہو آگے بے جا رائے، قیاس، تاویل فاسدہ سے کام نہ لیں خصوصاً نص کے مقابلہ پر قیاس کرنا ابلیس کا کام ہے۔

اردو حاشہ:
وضاحت:
1؎:
یہ لوگ باب کی حدیث کاجواب یہ دیتے ہیں کہ یہ نبی اکرمﷺ کے لیے خاص تھا کیونکہ مسلم کی روایت میں ہے (إن هذه القبور مملوؤة مظالم على أهلها وأن الله ينورها لهم بصلاة عليهم) ان لوگوں کا کہنا ہے کہ نبی اکرم ﷺ کی صلاۃ قبرکو منورکرنے کے لیے تھی اوریہ دوسروں کی صلاۃ میں نہیں پائی جاتی ہے لہٰذا قبرپر صلاۃِجنازہ پڑھنا مشروع نہیں جمہوراس کا جواب یہ دیتے ہیں کہ جن لوگوں نے آپ کے ساتھ قبرپر صلاۃِجنازہ پڑھی آپ نے انھیں منع نہیں کیا ہے کیونکہ یہ جائزہے اور اگریہ آپ ہی کے لیے خاص ہوتادوسروں کے لیے جائزنہ ہوتا توآپ انھیں ضرور منع فرما دیتے۔

حدیث حاشیہ:
باب اور حدیث میں مطابقت ظاہر ہے۔
کیونکہ ابن عباس اس واقعہ کے وقت بچے ہی تھے۔
مگر آپ ﷺ کے ساتھ برابر صف میں شریک ہوئے۔

حدیث حاشیہ:
اس باب کا مقصد یہ بتانا ہے کہ نماز جنازہ بھی نماز ہے اور تمام نمازوں کی طرح اس میں وہی چیزیں ضروری ہیں جو نمازوں کے لیے ہونی چاہئیں۔
اس مقصد کے لیے حدیث اور اقوال صحابہ وتابعین کے بہت سے ٹکڑے ایسے بیان کئے ہیں جن میں نماز جنازہ کے لیے ”نماز“ کا لفظ ثابت ہوا اور حدیث واردہ میں بھی اس پر نماز ہی کا لفظ بولا گیا جب کہ آنحضرت ﷺ امام ہوئے اور آپ ﷺ کے پیچھے صحابہ ﷺ نے صف باندھی۔
اس حدیث سے یہ بھی ثابت ہوا کہ اگر کوئی مسلمان جس پر نماز جنازہ پڑھنی ضروری تھی اور اس کو بغیر نماز پڑھائے دفن کردیا گیا تو اس کی قبر پر نماز جنازہ پڑھی جاسکتی ہے۔

حدیث حاشیہ:
معلوم ہوا کہ رات کو دفن کرنے میں کوئی قباحت نہیں ہے۔
بلکہ بہتر یہی ہے کہ رات ہو یا دن مرنے والے کے کفن دفن میں دیرنہ کی جائے۔

حدیث حاشیہ:
(1)
پہلے عنوان میں یہ صراحت نہ تھی کہ دو صفوں سے زیادہ صفیں بھی بنائی جا سکتی ہیں، اس بنا پر وضاحت سے اس عنوان میں بتایا گیا ہے کہ دو صفوں سے زیادہ صفیں بنانا بھی جائز ہے، نیز عطاء ؒ کا موقف ہے کہ جنازے کے لیے صف بندی کی سرے سے ضرورت ہی نہیں، جیسا کہ مصنف عبدالرزاق میں اس کی تفصیل ہے۔
حضرت ابن جریج کہتے ہیں کہ میں نے حضرت عطاء سے دریافت کیا کہ جنازہ کے لیے نماز کی طرح صف بندی کرنا ضروری ہے؟ تو انہوں نے فرمایا:
اس کے لیے صف بندی کی ضرورت نہیں، بلکہ تکبیریں کہہ کر میت کے لیے دعائیں کرنا ہی کافی ہے۔
حافظ ابن حجر ؒ لکھتے ہیں:
امام بخاری ؒ نے عنوان میں لفظ صفوف لا کر اس بات کی طرف اشارہ کیا ہے کہ جنازے کے لیے تین صفیں بنانا مستحب ہے۔
اس کے لیے ایک صریح حدیث بھی ہے کہ جس جنازے میں کم از کم تین صفیں ہوں اس کے لیے جنت واجب ہو جاتی ہے۔
(سنن أبي داود، الجنائز، حدیث: 3166)
ایک روایت میں ہے کہ اس میت کے گناہ معاف کر دیے جاتے ہیں۔
(فتح الباري: 239/3)
لیکن حافظ ابن حجر ؒ نے جو حدیث پیش کی ہے اس میں محمد بن اسحاق نامی ایک راوی مدلس ہے، اس نے کسی روایت میں بھی تصریح سماع نہیں کی۔
اس بنا پر ایسی ضعیف روایت سے استحباب ثابت نہیں کیا جا سکتا۔
(2)
امام بخاری ؒ کے قائم کردہ عنوان اور پیش کردہ احادیث میں مطابقت واضح نہیں، کیونکہ عنوان میں میت کے لیے جنازہ پڑھتے وقت صفیں باندھنے کا ذکر ہے، لیکن احادیث میں قبر پر یا غائبانہ جنازہ پڑھنے کا ذکر ہے۔
اس کا جواب علامہ کرمانی ؒ نے دیا ہے کہ جنازے سے مراد میت ہے، وہ مدفون ہو یا غیر مدفون، نیز جب غائبانہ نماز جنازہ کے لیے صفیں باندھی جاتی ہیں تو حاضر میت کے لیے بطریق اولیٰ صفیں باندھنا ہوں گی۔
وهو المقصود۔
اس لیے عنوان اور احادیث میں کوئی منافات نہیں۔
(فتح الباري: 239/3) (3)
ان احادیث سے غائبانہ نماز جنازہ بھی ثابت ہوتا ہے، اگرچہ امام بخاری ؒ نے اس کے لیے الگ عنوان بندی نہیں کی۔
اسی طرح حضرت عمران بن حصین ؓ سے مروی ایک حدیث میں بھی اس کا ذکر ہے۔
(مسند أحمد: 431/4)
بعض حضرات غائبانہ نمازِ جنازہ کو ناجائز قرار دیتے ہیں اور نجاشی کا جنازہ غائبانہ پڑھنا رسول اللہ ﷺ کی خصوصیت کہتے ہیں کیونکہ بعض روایات میں ہے کہ نماز جنازہ پڑھتے وقت رسول اللہ ﷺ کے لیے زمین کے تمام پردے ہٹا دیے گئے تھے اور نجاشی کی میت آپ کے سامنے تھی، لیکن یہ روایت محض اوہام و خیالات میں سے ہے۔
اس کی کچھ حقیقت نہیں۔
(المجموع: 253/5) (4)
بعض حضرات کا خیال ہے کہ اگر غائب شخص ایسے شہر میں فوت ہوا ہو جہاں اس کی نماز جنازہ نہ ادا کی گئی ہو تو پھر اس کی غائبانہ نماز جنازہ پڑھی جا سکتی ہے، لیکن احادیث میں اس کی کوئی صراحت نہیں کہ نجاشی کی نماز جنازہ اس کے شہر میں نہیں پڑھی گئی تھی۔
(فتح الباري: 241/3)
ہمارے نزدیک غائبانہ نماز جنازہ ہر ایک کے لیے مشروع نہیں۔
اگر کسی کی سیاسی، مذہبی، علمی یا سماجی خدمات ہوں تو اس کی غائبانہ نماز جنازہ پڑھنے میں کوئی حرج نہیں، کیونکہ رسول اللہ ﷺ سے نجاشی کے علاوہ کسی اور صحابی کی غائبانہ نماز جنازہ پڑھنے کا ثبوت نہیں ملتا، حالانکہ متعدد صحابہ کرام ؓ رسول اللہ ﷺ کی موجودگی میں مدینہ سے باہر فوت ہوئے ہیں۔
اس کی مزید وضاحت ہم شہید کی نماز جنازہ کے بیان میں کریں گے۔
إن شاءالله۔

حدیث حاشیہ:
(1)
حضرت ابن عباس ؓ رسول اللہ ﷺ کے عہد مبارک میں بالغ نہ ہوئے تھے، جیسا کہ خود ان کا اپنا بیان ہے کہ میں حجۃ الوداع میں رسول اللہ ﷺ کے ہمراہ شریک سفر تھا اور اس وقت میں قریب البلوغ تھا۔
اس سے معلوم ہوتا ہے کہ آپ عہد نبوی میں بالغ نہیں ہوئے تھے۔
اس بنا پر حدیث کی عنوان سے مطابقت واضح ہے۔
اس کی مزید وضاحت باب: 59 میں ہو گی جو بایں الفاظ ہے:
(باب صلاة الصبيان مع الناس علی الجنائز)
”بچوں کا لوگوں کے ہمراہ نماز جنازہ ادا کرنا۔
“ (2)
اس حدیث سے یہ بھی معلوم ہوا کہ بچوں کو نماز کی عادت ڈالنے کے لیے نماز باجماعت میں شرکت کرنے کا شوق پیدا کرنا چاہیے تاکہ وہ فریضہ نماز سے مانوس ہو جائیں۔

حدیث حاشیہ:
امام بخاری ؒ نے اس روایت سے صرف یہ ثابت کیا ہے کہ جنازے پر نماز کا اطلاق درست ہے اور اس کی شرائط میں سے طہارت، ستر پوشی اور استقبال قبلہ وغیرہ ہیں۔
ان کے بغیر نماز جنازہ صحیح نہیں، اگرچہ اس میں رکوع اور سجدہ نہیں ہوتا۔
(فتح الباري: 245/3)

حدیث حاشیہ:
(1)
قبل ازیں امام بخارى ؒ نے اس حدیث پر ایک عنوان بایں الفاظ قائم کیا تھا:
(باب صفوف الصبيان مع الرجال في الجنائز)
”نماز جنازہ میں مردوں کے ساتھ بچوں کا صف بندی کرنا“ اس کا مطلب یہ تھا کہ جنازہ پڑھتے وقت بچوں کو مردوں سے علیحدہ صف بنانے کی ضرورت نہیں بلکہ وہ ان کے ساتھ ہی کھڑے ہوں گے۔
وہاں ان کا نماز پڑھنا بھی ذکر ہوا تھا لیکن اس کی حقیقت ثانوی اور ضمنی تھی۔
اس مقام پر مستقل طور پر بچوں کا مردوں کے ہمراہ نماز پڑھنا ذکر کیا ہے۔
اس کا مطلب یہ ہے کہ بچے اکیلے نماز جنازہ نہیں پڑھ سکتے۔
اگر پڑھیں گے تو میت کا حق ادا نہیں ہو گا، کیونکہ ان پر نماز فرض ہی نہیں تو ان کے نماز پڑھنے سے فرض کفایہ کیونکر ادا ہو سکتا ہے، اس لیے بچے نماز جنازہ مردوں کے ساتھ ہی ادا کر سکتے تھے۔
اس کے برعکس دوسری فرض نماز صرف بچے ادا کر سکتے ہیں۔
جیسا کہ حضرت انس ؓ کا رسول اللہ ﷺ کی اقتدا میں نماز پڑھنے کا ذکر احادیث میں ملتا ہے۔
(2)
امام بخاری ؒ نے اس عنوان کو جنازے کے ساتھ جانے کی فضیلت بیان کرنے کے بعد ذکر کیا ہے تاکہ وضاحت کی جائے کہ اس فضیلت کو حاصل کرنے میں بچے بھی شامل ہیں لیکن ان کے جنازہ پڑھنے سے فرض کفایہ ساقط نہیں ہو گا۔
والله أعلم۔
(فتح الباري: 253/3)

حدیث حاشیہ:
ایک حدیث میں ہے کہ رسول اللہ ﷺ نے اس بات پر ڈانٹا کہ آدمی کو رات کے وقت دفن کیا جائے، ہاں اگر کوئی مجبوری ہو تو الگ بات ہے۔
(صحیح ابن حبان: 41/6)
لیکن صحیح مسلم کی روایت میں اس کا سبب بیان ہوا ہے کہ کسی نے اپنے مرنے والے عزیز کا کفن اچھا نہ بنایا اور رات ہی دفن کر دیا تاکہ اس کی حرکت پر پردہ رہے، تو رسول اللہ ﷺ نے رات کو دفن کرنے سے منع کر دیا اور میت کو اچھا کفن پہنانے کی تلقین فرمائی۔
(صحیح مسلم، الجنائز، حدیث: 2185(943)
اس روایت میں ایک اور سبب کی بھی نشاندہی ہوتی ہے۔
وہ یہ کہ آپ نے اس گمان کی وجہ سے منع فرمایا کہ نماز جنازہ میں رات کے وقت لوگ کم تعداد میں شریک ہوں گے، لہذا اگر نماز جنازہ دن کے وقت پڑھ لی گئی ہو اور کسی عذر کی وجہ سے رات کو دفن کرنا پڑے تو ایسا کرنا ممنوع نہیں۔
مذکورہ حدیث سے بھی رات کے وقت دفن کرنے کا جواز معلوم ہوتا ہے، کیونکہ رسول اللہ ﷺ نے اس کے متعلق لوگوں سے کوئی باز پرس نہیں کی تھی، بلکہ آپ کو اطلاع نہ دینے کی بنا پر انہیں پوچھا تھا، اس لیے رات کے وقت دفن کرنے میں چنداں حرج نہیں۔
حضرت علی ؓ نے حضرت فاطمہ ؓ کو رات کے وقت دفن کیا تھا۔
(المصنف لابن أبي شیبة: 346/3)
امام بخاری ؒ نے رات کے وقت جواز دفن ثابت کرنے کے لیے یہ عنوان قائم کیا ہے، تاہم اگر دن کے وقت دفن کرنا شہرت و ریا کاری کے پیش نظر ہو تو شرعا یہ عمل بھی پسندیدہ نہیں۔
والله أعلم۔