حدیث حاشیہ:
اذان کے بارے میں بعض روایات میں پندرہ کلمات وارد ہوئے ہیں، جیسا کہ عوام میں اذان کا مروجہ طریقہ ہے۔
بعض روایات میں انیس کلمات آئے ہیں اوریہ اس بناپر کہ اذان ترجیع کے ساتھ دی جائے۔
جس کا مطلب یہ ہے کہ شہادت کے ہردو کلموں کو پہلے دو مرتبہ آہستہ آہستہ کہا جائے، پھر ان ہی کو دو دو مرتبہ بلند آواز سے کہا جائے۔
حضرت امام ترمذی ؒ نے ان لفظوں میں باب منعقد کیاہے۔
باب ماجاءفي الترجیع في الأذان۔
یعنی ترجیع کے ساتھ اذان کہنے کے بیان میں۔
پھر آپ یہاں حدیث ابومحذورہ ؓ کو لائے ہیں۔
جس سے اذان میں ترجیع ثابت ہے۔
چنانچہ خود امام ترمذی ؒ فرماتے ہیں:
قال أبوعیسیٰ حدیث أبي محذورة في الأذان حدیث صحیح وقد روي عنه من غیروجه وعلیه العمل بمکة وهوقول الشافعي۔
یعنی اذان کے بارے میں ابومحذورہ کی حدیث صحیح ہے۔
جو مختلف طرق سے مروی ہے۔
مکہ شریف میں اسی پر عمل ہے اورامام شافعی کا بھی یہی قول ہے۔
امام نووی حدیث ابومحذورہ کے ذیل میں فرماتے ہیں:
وَفِي هَذَا الْحَدِيثِ حُجَّةٌ بَيِّنَةٌ وَدَلَالَةٌ وَاضِحَةٌ لِمَذْهَبِ مَالِكٍ وَالشَّافِعِيِّ وَأَحْمَدَ وَجُمْهُورِ الْعُلَمَاءِ أَنَّ التَّرْجِيعَ فِي الْأَذَانِ ثَابِتٌ مَشْرُوعٌ وَهُوَ الْعَوْدُ إِلَى الشَّهَادَتَيْنِ مَرَّتَيْنِ بِرَفْعِ الصَّوْتِ بَعْدَ قَوْلِهِمَا مَرَّتَيْنِ بِخَفْضِ الصَّوْتِ۔
(نووی، شرح مسلم)
یعنی حدیث ابی محذورہ روشن واضح دلیل ہے کہ اذان میں ترجیع مشروع ہے اوروہ یہ ہے کہ پہلے کلمات شہادتین کو آہستہ آواز سے دودو مرتبہ ادا کرکے بعد میں بلند آواز سے پھر دو دومرتبہ دہرایا جائے۔
امام مالک اورامام شافعی اورجمہور علماءکا یہی مذہب ہے۔
حضرت ابومحذورہ کی روایت ترمذی کے علاوہ مسلم اور ابوداؤد میں بھی تفصیل کے ساتھ موجود ہے۔
فقہائے احناف رحمہم اللہ اجمعین ترجیع کے قائل نہیں ہیں اورانھوں نے روایات ابومحذورہ کی مختلف توجیہات کی ہیں۔
ترجیع کے ساتھ اذان کہنے کا بیان:
المحدث الکبیر حضرت مولانا عبدالرحمن مبارک پوری رحمۃ اللہ علیہ فرماتے ہیں:
وأجاب عن هذہ الروایات من لم یقل بالترجیع بأجوبة کلها مخدوشة واهیة۔
(تحفۃ الاحوذی)
یعنی جوحضرات ترجیع کے قائل نہیں ہیں انھوں نے روایات ابومحذورہ رضی اللہ عنہ کے مختلف جوابات دیئے ہیں۔
جوسب مخدوش اورواہیات ہیں۔
کوئی ان میں قابل توجہ نہیں۔
ان کی بڑی دلیل عبداللہ بن زید کی حدیث ہے۔
جس میں ترجیع کا ذکر نہیں ہے۔
علامہ مبارک پوری مرحوم اس بارے میں فرماتے ہیں کہ حدیث عبداللہ بن زید میں فجر کی اذان میں کلمات“ الصلوٰة خیرمن النوم کا بھی ذکر نہیں ہے۔
اوریہ زیادتی بھی حدیث ابومحذورہ ہی سے ثابت ہے۔
جسے محترم فقہائے احناف نے قبول فرمالیاہے۔
پھر کوئی وجہ نہیں کہ ترجیع کے بارے میں بھی حدیث ابومحذورہ کی زیادتی کو قبول نہ کیا جائے۔
قلت فلذلك یقال إن الترجیع وإن لم یکن في حدیث عبداللہ بن زید فقد علمه رسول اللہ صلی اللہ علیه وسلم ذلك أبامحذورة بعد ذلك فلما علمه رسول اللہ صلی اللہ علیه وسلم أبامحذورة کان زیادة علی ما فی حدیث عبداللہ بن زید فوجب استعماله۔
(تحفة الأحوذي)
یعنی اگرچہ ترجیع کی زیادتی حدیث عبداللہ بن زید میں مذکور نہیں ہے مگرجس طرح فجر میں آپ نے ابومحذورہ کو الصلوٰة خیرمن النوم کے الفاظ کی زیادتی تعلیم فرمائی ایسے ہی آپ نے ترجیع کی بھی زیادتی تعلیم فرمائی۔
پس اس کا استعمال ضروری ہوا، لہٰذا ایک ہی حدیث کے نصف حصہ کو لینا اورنصف کا انکار کردینا قرین انصاف نہیں ہے۔
حضرت علامہ انورشاہ کشمیری:
صاحب تفہیم البخاری (دیوبندی)
ترجیع کی اذان کے بارے میں حضرت علامہ انور شاہ صاحب کشمیری رحمۃ اللہ علیہ کا مسلک ان لفظوں میں بیان فرماتے ہیں:
حضرت ابومحذورہ جنھیں آنحضور صلی اللہ علیہ وسلم نے فتح مکہ کے بعد مسجدالحرام کا مؤذن مقرر کیاتھا وہ اسی طرح (ترجیع کے ساتھ)
اذان دیتے تھے جس طرح امام شافعی ؒ کا مسلک ہے۔
اوران کا یہ بھی بیان تھاکہ نبی کریم ﷺ نے انھیں اسی طرح سکھایاتھا۔
نبی کریم ﷺ کی حیات میں برابر آپ اسی طرح (ترجیع سے)
اذان دیتے رہے اورپھر صحابہ کرام رضوان اللہ علیہم اجمعین کے طویل دورمیں بھی آپ کا یہی عمل رہا کسی نے انھیں اس سے نہیں روکا۔
اس کے بعد بھی مکہ میں اسی طرح اذان دی جاتی رہی۔
لہٰذا اذان کا یہ طریقہ مکروہ ہرگز نہیں ہوسکتا۔
صاحب بحرالرائق نے یہی فیصلہ کیاہے اوراس آخری دورمیں حنفیت اورحدیث کے امام حضرت علامہ انور شاہ صاحب کشمیری رحمۃ اللہ علیہ نے بھی اس فیصلہ کو درست کہاہے۔
”(تفہیم البخاری، کتاب الاذان، پ3، ص: 50)
یہ مختصر تفصیل اس لیے دی گئی کہ ہمارے معزز/حنفی بھائیوںکی اکثریت اوّل تو ترجیع کی اذان سے واقف ہی نہیں اور اگر اتفاقاً کہیں کسی اہل حدیث مسجد میں اسے سن پاتے ہیں تو حیرت سے سنتے ہیں۔
بلکہ بعض لوگ انکار کرتے ہوئے ناک بھوں بھی چڑھانے لگ جاتے ہیں۔
ان پر واضح ہونا چاہئیے کہ وہ اپنی ناواقفیت کی بناپر ایسا کررہے ہیں۔
رہی یہ بحث کہ ترجیع کے ساتھ اذان دینا افضل ہے یابغیرترجیع کے جیسا کہ عام طور پر مروج ہے اس لفظی بحث میں جانے کی ضرورت نہیں ہے۔
ہر دوطریقے جائز درست ہیں۔
باہمی اتفاق اوررواداری کے لیے اتناہی سمجھ لینا کافی وافی ہے۔
حضرت مولانا عبیداللہ شیخ الحدیث مبارک پوری رحمۃ اللہ علیہ فرماتے ہیں:
قلت هذا هوالحق إن الوجهين جائزان ثابتان مشروعان سنتان من سنن النبي صلی اللہ علیه وسلم۔
(مرعاة المفاتیح، ج1، ص: 422)
یعنی حق یہ ہے کہ ہر دو طریقے جائز اورثابت اورآنحضرت ﷺ کی سنتوں میں سے ہیں۔
پس اس بارے میں باہمی طور پر لڑنے جھگڑنے کی کوئی بات ہی نہیں۔
اللہ پاک مسلمانوں کو نیک سمجھ عطا کرے کہ وہ ان فروعی مسائل پر لڑنا چھوڑکر باہمی اتفاق پیدا کریں۔
آمین۔

فوائد:
➊ ان حدیثوں میں اذان کے کلمات دو، دو بار اور اقامت کے کلمات ایک ایک بار کہنے کا ذکر ہے، مگر دوسری صحیح احادیث میں اذان کے شروع میں «اللهُ أَكْبَرُ» چار بار کہنے کا اور آخر میں «لا إِلهَ إِلَّا الله» صرف ایک بار کہنے کا ذکر موجود ہے، جیسا کہ اس سے پہلے صحیح بخاری کی حدیث (604) میں گزرا ہے۔ ان احادیث کے ساتھ اس حدیث میں «اللهُ أَكْبَرُ» دو بار کہنے کی تطبیق یہ ہے کہ اس میں «اللهُ أَكْبَرُ اللهُ أَكْبَرُ» کوایک کلمہ شمار کیا گیا ہے، اس لیے یہ دونوں ایک سانس میں اکٹھے کیے جاتے ہیں اور آخر میں «لَا إِلَهَ إِلَّا الله» ایک دفعہ کہنے پر سب کا اتفاق ہے۔
➋ اذان کی ایک اور صورت ابو محذورہ رضی اللہ عنہ سے بھی آئی ہے، اسے اذان میں ترجیع کہتے ہیں، یعنی شہادت کے کلمات چار دفعہ ادا کرنا۔ وہ کہتے ہیں کہ رسول اللہ صلی اللہ علیہ وسلم نے انہیں اذان انیس (19) کلمات اور اقامت سترہ (17) کلمات سکھائی۔ وہ اذان یہ ہے:
«الله أكبر الله أكبر،
الله أكبر الله أكبر .» ان کلمات کو بلند آواز سے کہو، پھر کہو:
«أَشْهَدُ أَنْ لَّا إِلَهَ إِلَّا الله، أشهد أن لا إله إلا الله، أشهد أن محمدًا رَسُولُ الله، أشهد أن محمدًا رَسُولُ اللهِ» ان کلمات کو نیچی آواز کے ساتھ کہو، پھر شہادت کے الفاظ بلند آواز سے کہو:
«أشهد أن لا إله إلا الله، أَشْهَدُ أَنَّ لَا إِلَهَ إِلَّا اللَّهُ، أَشْهَدُ أَنَّ محمدا رسول الله، أشهد أن محمدا رسول الله، حي على الصلاةِ، حَيَّ عَلَى الصَّلَاةِ، حَيَّ عَلَى الفلاح، حي على الفلاح، الله أكبر الله أكبر، لا إله إلا الله» اور اقامت یہ ہے:
«اللهُ أَكْبَرُ اللَّهُ أَكْبَرُ، اللَّهُ أكبر الله أكبر، أشهد أن لا إله إلا الله، أشهد أن لا إله إلا الله، أَشْهَدُ أَنَّ مُحَمَّدًا رَسُولُ اللَّهِ، أَشْهَدُ أَنَّ محَمَّدًا رَسُولُ الله، حي على الصلاة، حي على الصلاة، حي على الفلاح، حَيَّ عَلَى الْفَلَاحِ، قَدْ قامت الصلاة، قد قامت الصلاة، الله أكبر الله أكبر، لا إله إلا الله .» [أبو داود: 502، حسن صحيح]
سنن ابی داود کی حدیث (500) میں ابو محذورہ رضی اللہ عنہ سے مروی ہے کہ رسول اللہ صلی اللہ علیہ وسلم نے انھیں اذان میں شہادت کے دو، دو کلمات پہلے آہستہ آواز میں اور اس کے بعد وہی کلمات دو، دو بار بلند آواز سے کہنے کا حکم دیا تھا اور آپ صلی اللہ علیہ وسلم نے انھیں صبح کی اذان میں دو دفعہ «الصلاة خير من النوم» کہنے کا حکم دیا۔ یہ حدیث بھی صحیح ہے، اس سے ثابت ہوا کہ «الصلاة خير من النوم» کے الفاظ خود رسول اللہ صلی اللہ علیہ وسلم نے سکھائے ہیں اور ان لوگوں کی تردید ہو گئی جو کہتے ہیں «الصَّلَاةُ خَيْرٌ من النوم» کے الفاظ عمر فاروق رضی اللہ عنہ کے کہنے پر اذان میں بڑھائے گئے۔ یہ بھی معلوم ہوا کہ بلال رضی اللہ عنہ والی اذان میں دو، دو کلمات ہیں اور اقامت میں ایک ایک کلمہ ہے جب کہ ابو محذورہ رضی اللہ عنہ کی اذان میں ترجیع ہے اور اس میں اقامت کے کلمات دو، دو بار ہیں۔ امام ابن خزیمہ رحمہ اللہ نے فرمایا: اگر اذان ابو محذورہ رضی اللہ عنہ والی کہی جائے تو تکبیر بھی دوہری اور اگر اذان بلال رضی اللہ عنہ والی ہو تو تکبیر اکہری کہنی چاہیے۔ [فتح الباري]

حدیث حاشیہ:
امام بخاری ؒ بعض اوقات قائم کردہ عنوان کے ذریعے سے حدیث کے معنی کو متعین کرتے ہیں۔
اس قسم کے عنوان کو”ترجمۂ شارحہ“ کہا جاتا ہے،
چنانچہ حدیث میں ہے کہ اذان میں شفع ہو اور عربی زبان اس کے معنی ”ملا دینا“ ہیں۔
ممکن ہے کہ کوئی خیال کرے کہ اس سے مراد ایک کلمے کو دوسرے سے ملا کر کہنا ہے۔
امام بخاری رحمہ اللہ نے عنوان سے اس حدیث کے معنی متعین کیے ہیں کہ اس سے مراد کلمات اذان کو دو مرتبہ کہنا ہے۔
والله أعلم.