Hum se Amr bin Khalid ne bayan kiya, kaha hum se Zuhair bin Mu’aawiyah ne bayan kiya, kaha hum se Aasim bin Sulaiman ne bayan kiya, un se Abu Uthman Nahdi ne bayan kiya aur un se Mujaashi’ bin Mas’ood Radhiallahu Anhu ne bayan kiya ke Fatah-e-Makkah ke baad main Rasoolullah Sallallahu Alaihi Wasallam ki khidmat mein apne bhai (Mujaalid) ko le kar haazir huwa aur arz kiya ke ya RasoolAllah! Main ise is liye le kar haazir huwa hun taake Aap Hijrat par is se Bai’at le len. Nabi Kareem Sallallahu Alaihi Wasallam ne farmaaya ke Hijrat karne waale us ki fazeelat o sawab ko haasil kar chuke (yani ab Hijrat karne ka zamaane to guzar chuka). Main ne arz kiya: Phir Aap is se kis cheez par Bai’at lenge? Nabi Kareem Sallallahu Alaihi Wasallam ne farmaaya ke imaan, Islam aur Jihaad par. Abi Uthman Nahdi ne kaha ke phir main (Mujaashi’ ke bhai) Abu Ma’bad Mujaalid se mila woh dono bhaiyon se bade the, main ne un se bhi is Hadees ke mutalliq poocha to unhon ne kaha ke Mujaashi’ ne Hadees theek tarah bayan ki hai.